« ការបន្តកែលម្អអាជីវកម្មរបស់ខ្ញុំ ៖ រៀន » ការចាប់ផ្ដើម និងការពង្រីកអាជីវកម្មរបស់ខ្ញុំសម្រាប់ភាពខ្លួនទីពឹងខ្លួន ( ឆ្នាំ ២០១៧ )
« ការបន្តកែលម្អអាជីវកម្មរបស់ខ្ញុំ ៖ រៀន »
រៀន
ម៉ោងជាអតិបរមា ៖ ៦៥ នាទី
១. ទស្សនវិស័យសម្រាប់អាជីវកម្មរបស់ខ្ញុំ
អាន ៖
ម្ចាស់អាជីវកម្មដែលជោគជ័យគិត និងប្រាស្រ័យទាក់ទងអំពីអ្វីដែលអាជីវកម្មរបស់ពួកគេនឹងប្រែក្លាយ ។ ពួកគេកំណត់អំពីទស្សនវិស័យសម្រាប់អាជីវកម្មរបស់ខ្លួន ។ ទស្សនវិស័យគឺជារូបភាពមួយនៃស្ថានភាពនាអនាគតដែលប្រាថ្នាចង់បាន ។ នៅក្នុងគម្ពីរមុក្ដាដ៏មានតម្លៃមហិមា យើងអានថា ព្រះអម្ចាស់ « បានបង្កើតគ្រប់របស់ទាំងអស់ … ខាងវិញ្ញាណ មុនមានរបស់ទាំងនោះនៅលើផែនដីតាមធម្មជាតិ » ( ម៉ូសេ ៣:៥ ) ។ ស្រដៀងនេះគ្នាផងដែរ ម្ចាស់អាជីវកម្មគួរតែបង្កើតអនាគតនៃអាជីវកម្មមួយក្នុងចិត្ត ដែលពួកគេមានបំណងចង់ស្ថាបនាវាឲ្យមានរូបរាងពិតប្រាកដ ។
ការបង្កើតទស្សនវិស័យមួយគឺជាសញ្ញាមួយនៃភាពជាអ្នកដឹកនាំ ។ ខគម្ពីរបង្រៀនថា « គ្រាណាដែលឥតមានការបើកសម្តែង នោះបណ្តាជនរមែងលែងទប់ចិត្ត » ( សុភាសិត ២៩:១៨ ) ។ សេចក្តីពិតនេះអនុវត្តដោយផ្ទាល់ចំពោះអាជីវកម្មរបស់អ្នក ។ ទស្សនវិស័យរបស់អ្នកនឹងដឹកនាំសកម្មភាពអ្នក ហើយនឹងជួយអ្នក និងមនុស្សដែលអ្នកធ្វើការជាមួយឲ្យផ្តោតទៅលើថាមពល និងកិច្ចខិតខំរបស់ពួកគេ ។
វាមិនគ្រប់គ្រាន់ទេ ដើម្បីបង្កើតទស្សនវិស័យមួយ ហើយបន្ទាប់មកសង្ឃឹមថា អាជីវកម្មរបស់អ្នកទទួលជោគជ័យនោះ ។ អ្នកត្រូវខិតខំធ្វើការ ហើយតស៊ូព្យាយាមដើម្បីនាំឲ្យទស្សនវិស័យរបស់អ្នកក្លាយជាការពិត ។
២. ការធ្វើឲ្យអាជីវកម្មរបស់ខ្ញុំមានបទដ្ឋាន
អាន ៖
អាជីវកម្មពុំគួរពឹងផ្អែកទាំងស្រុងលើម្ចាស់របស់អាជីវកម្មឡើយ ។ ម្ចាស់អាជីវកម្មជោគជ័យបង្កើតសៀវភៅប្រតិបត្តិការ និងឯកសារនៃលំហូរកិច្ចការរបស់ពួកគេ ដើម្បីបង្ហាញពីរបៀបធ្វើកិច្ចការតាមបទដ្ឋានក្នុងអាជីវកម្មរបស់ពួកគេ ។ ធនធានទាំងនេះជំរុញឲ្យមានគុណភាព និងភាពខ្ជាប់ខ្ជួននៅក្នុងដំណើរការនៃអាជីវកម្ម ។ ធនធានទាំងនេះមានប្រយោជន៍សម្រាប់ការបំពាក់បំប៉ននិយោជិតថ្មី និងសម្រាប់ថែរក្សាទុកនូវការអនុវត្តដ៏ល្អបំផុតនានានៅក្នុងចំណោមនិយោជិតបច្ចុប្បន្ន ។ ធនធានទាំងនេះ គួរតែត្រូវបានពិនិត្យមើល និងធ្វើបច្ចុប្បន្នភាពជារឿយៗ ។
ការបង្កើតសៀវភៅប្រតិបត្តិការ និងការធ្វើឯកសារនៃលំហូរកិច្ចការរបស់អ្នកសម្រាប់កិច្ចការជាក់លាក់ នឹងបង្កើតនូវការរំពឹងទុកនានា ជួយនិយោជិតឲ្យសម្រេចនូវគោលដៅទូទៅ និងធ្វើឲ្យប្រាកដថាមានភាពខ្ជាប់ខ្ជួន ។ ឯកសារនេះធ្វើឲ្យបុគ្គលម្នាក់អាចធ្វើកិច្ចការមួយបាន នៅពេលដែលនិយោជិតម្នាក់ដែលជាធម្មតាធ្វើកិច្ចការនោះឈឺ ឈប់សម្រាកវិស្សមកាល មានបញ្ហាអាសន្ន ឬឈប់ធ្វើការ ។ ដោយមានលំហូរកិច្ចការលម្អិត នោះអ្នកអាចធ្វើការកែលម្អអាជីវកម្មរបស់អ្នក ជាជាងគ្រាន់តែធ្វើការដោយសាមញ្ញសម្រាប់អាជីវកម្មរបស់អ្នក ។
ការបង្កើតសៀវភៅប្រតិបត្តិការ និងការធ្វើឯកសារនៃលំហូរកិច្ចការរបស់អ្នកក៏នឹងជួយអ្នក ប្រសិនបើអ្នកគឺជានិយោជិតតែម្នាក់ឯងនៃអាជីវកម្មរបស់អ្នក ។ ដំណើរការនៃការធ្វើឯកសារនឹងជួយអ្នកឲ្យចេះរៀបចំរចនាសម្ព័ន្ធ និងធ្វើឲ្យអាជីវកម្មរបស់អ្នកមានបទដ្ឋាន ។ វានឹងជួយអាជីវកម្មរបស់អ្នកឲ្យមានការរៀបចំបានកាន់តែប្រសើរឡើង ។ លំហូរកិច្ចការដែលបានធ្វើឯកសារហើយក៏នឹងធ្វើជាធនធានចំណេះដឹងមួយ ដើម្បីជួយអ្នកឲ្យចងចាំអំពីកិច្ចការនានាដែលអ្នកអាចធ្វើមិនទៀងទាត់ ។
ពិភាក្សា ៖
-
ក្នុងនាមជាម្ចាស់អាជីវកម្ម ហេតុអ្វីវាសំខាន់សម្រាប់អ្នកក្នុងការបង្កើតសៀវភៅប្រតិបត្តិការ និងធ្វើឯកសារលំហូរកិច្ចការរបស់អ្នកសម្រាប់កិច្ចការជាក់លាក់ ?
-
តើកិច្ចការ ឬដំណើរការអាជីវកម្មអ្វីខ្លះដែលអ្នកគួរតែរក្សាទុកឯកសារ ដើម្បីឲ្យកិច្ចការនោះត្រូវបានធ្វើឡើងដោយខ្ជាប់ខ្ជួន ?
៣. ការធ្វើឲ្យប្រាកដថា អាជីវកម្មរបស់ខ្ញុំអនុលោមតាមច្បាប់ និងបទបញ្ជាទាំងឡាយ
អាន ៖
ម្ចាស់អាជីវកម្មមានការទទួលខុសត្រូវដើម្បីប្រាកដថា អាជីវកម្មរបស់គេអនុលោមតាមច្បាប់ និងបទបញ្ជាទាំងឡាយ ។ ច្បាប់ និងបទបញ្ជាទាំងឡាយមានភាពផ្សេងគ្នាតាមវិស័យ និងទីតាំង ដូច្នេះវាមានសារៈសំខាន់សម្រាប់ម្ចាស់អាជីវកម្មគ្រប់រូប ដើម្បីគិតអំពីតម្រូវការផ្នែកច្បាប់ និងបទបញ្ជាទាំងឡាយរបស់ពួកគេនៅក្នុង (១) កម្រិតមូលដា្ឋន, (២) កម្រិតរដ្ឋ ឬខេត្ត, (៣) កម្រិតថ្នាក់ជាតិ និង (៤) កម្រិតអន្តរជាតិ ។
៤. ការវិនិយោគលើនិយោជិត
អាន ៖
ការបន្ថែមនិយោជិតថ្មីម្នាក់ទៅកាន់អាជីវកម្មរបស់អ្នកគឺជាការសម្រេចចិត្តមួយដ៏ធំំ ដែលតម្រូវឲ្យមានដំណើរការជួលមួយដែលបានរៀបចំ និងការពិចារណាប្រកបដោយការអធិស្ឋាន ។ ម្ចាស់អាជីវកម្មជោគជ័យកត់ត្រាបរិយាយការងារដ៏លម្អិតដើម្បីដឹកនាំការសម្រេចចិត្តរបស់ពួកគេក្នុងការជួលមនុស្សឲ្យធ្វើការ ។ បរិយាយការងារជូនដំណឹងដល់អ្នកដាក់ពាក្យសុំធ្វើការអំពីតម្រូវការនៃការងារ និងជួយនិយោជកឲ្យបញ្ជាក់ពីជំនាញ ចំណេះដឹង និងសមត្ថភាពដែលនិយោជិតថ្មីនឹងត្រូវមាន ។
ពិភាក្សា ៖
ហេតុអ្វីវាសំខាន់ដើម្បីធ្វើតាមនិតិវិធី និងអធិស្ឋាន ពេលជួលនិយោជិតឲ្យធ្វើ ?
អាន ៖
ដើម្បីបង្កើតអាជីវកម្មដ៏ឧត្តុង្គឧត្តមមួយ វាចាំបាច់ដែលអ្នកដឹកនាំ និងកែលម្អនិយោជិតរបស់អ្នក ។ អ្នកដឹកនាំគឺជាបុគ្គលម្នាក់ដែលជំរុញទឹកចិត្តដល់មនុស្សផ្សេងទៀតឲ្យធ្វើតាម ។ ភាពដឹកនាំពុំមែនកើតមកពីងារ ឬមុខនាទីឡើយ វាកើតឡើងតាមរយៈសមត្ថភាពដើម្បីបញ្ចុះបញ្ចូល លើកទឹកចិត្ត និងដឹកនាំក្រុមឆ្ពោះទៅកាន់គោលដៅដែលប៉ងចង់បាន ។ ការកែលម្អនិយោជិតរបស់អ្នកមានន័យថា អ្នកផ្តល់ពួកគេនូវឱកាសដើម្បីបង្ហាញ និងអភិវឌ្ឍជំនាញ និងចំណាប់អារម្មណ៍របស់ពួកគេ ។ ម្ចាស់អាជីវកម្មឈ្លាសវៃជួយនិយោជិតរបស់ពួកគេឲ្យសម្របខ្លួនទៅនឹងការរីកចម្រើនផ្ទាល់របស់ពួកគេ ជាមួយនឹងការរីកចម្រើនរបស់អាជីវកម្ម ។
ពិភាក្សា ៖
តើអ្នកអាចកែលម្អនិយោជិតបច្ចុប្បន្ន និងអនាគតរបស់អ្នកយ៉ាងដូចម្តេច ?
អាន ៖
ក្នុងនាមជាម្ចាស់អាជីវកម្ម អ្នកអាចបង្ហាញភាពជាដឹកនាំតាមរយៈរបៀបដែលអ្នកជួលបុគ្គលិក និងគ្រប់គ្រងបុគ្គលិករបស់អ្នក ។ វគ្គនេះពិភាក្សាអំពីគោលការណ៍ណែនាំចំនួនបី ។
គោលការណ៍ទីមួយគឺ យឺតនឹងជួល ហើយឆាប់បណ្តេញចេញ ។ ឧទាហរណ៍ សូមស្រមៃថា វីវៀនមានអាជីវកម្មថែទាំផ្ទះមួយ ។ គាត់ចំណាយពេលដោយប្រុងប្រយ័ត្នដើម្បីជួលបុគ្គលិកដ៏ល្អបំផុតដោយផ្អែកលើបរិយាយការងារយ៉ាងលម្អិត ។ គាត់ក៏ចាត់វិធានការភ្លាមៗក្នុងការបណ្តេញបុគ្គលិកដែលបង្ហាញថា គេមិនសមនឹងតួនាទី ឬអាជីវកម្មនោះ ។ នៅក្នុងឧទាហរណ៍ទាំងពីរនេះ វីវៀនធ្វើការសម្រេចចិត្តដែលនឹងផ្តល់ប្រយោជន៍ដល់និយោជិត និងអាជីវកម្មរបស់គាត់ក្នុងរយៈពេលវែង ។
គោលការណ៍ណែនាំទីពីរគឺ ផ្តល់ការបំពាក់បំប៉នឲ្យបានគ្រប់គ្រាន់ ។ ឧទាហរណ៍ សូមស្រមៃថា វិស្វករមេកានិចម្នាក់ឈ្មោះណាតមានអាជីវកម្មផ្ទាល់ខ្លួន ។ ណាតជួយនិយោជិតគាត់ឈ្មោះម៉ែល ឲ្យបង្កើតផែនការអភិវឌ្ឍខ្លួន និងផ្តល់មធ្យោបាយដើម្បីទទួលការបំពាក់បំប៉ន ។ ជាមួយនឹងជំនាញ និងការបំពាក់បំប៉នថ្មីរបស់គាត់ ម៉ែលអាចគ្រប់គ្រងគម្រោងសំខាន់ៗមួយចំនួនសម្រាប់អាជីវកម្មភ្លាម ។ ជាលទ្ធផល ណាតមានពេលបន្ថែមទៀតដើម្បីផ្តោតលើការពង្រីកអាជីវកម្ម ។
គោលការណ៍ណែនាំទីបីគឺ ពិនិត្យមើលកាន់តែច្រើន គិតស្មានកាន់តែតិច ។ គោលការណ៍នេះពុំផ្តល់ជាយោបល់ថា អ្នកគួរតែគ្រប់គ្រងនិយោជិតអ្នកឲ្យល្អិតល្អន់នោះទេ ។ ផ្ទុយទៅវិញ វាមានន័យថា អ្នកគួរតែដឹងអំពីការងារដែលពួកគេកំពុងធ្វើ និងរបៀបដែលអ្នកអាចជួយពួកគេ ។ ឧទាហរណ៍ សូមស្រមៃថា សេសាមានអាជីវកម្មរចនាប្លង់ ។ គាត់បង្កើតទំនាក់ទំនងការងារយ៉ាងជិតស្និទ្ធជាមួយបុគ្គលិករបស់គាត់ ហើយលះបង់ពេលវេលារបស់គាត់ដើម្បីសួរសំណួរ ស្តាប់ ណែនាំ និងបន្តធ្វើការយ៉ាងជិតស្និទ្ធជាមួយពួកគេ ។
ពិភាក្សា ៖
តើគោលការណ៍ទាំងនេះជួយអ្នកក្នុងអាជីវកម្មរបស់អ្នកយ៉ាងដូចម្តេច ?
៥. ការដាក់គោលដៅ និងការវាស់វែងពីភាពជោគជ័យនៃអាជីវកម្មរបស់ខ្ញុំ
អាន ៖
គោលដៅគឺជាជំហានដែលជួយយើងឲ្យនាំទស្សនវិស័យរបស់យើងក្លាយជាការពិត ។ យើងអាចធ្វើការដើម្បីសម្រេចទស្សនវិស័យរបស់យើងបាន ប្រសិនបើយើងបំបែកវាទៅជាគោលដៅលម្អិត និងជាក់លាក់ដើម្បីបំពេញនៅពេលបន្តបន្ទាប់ទៀត ។ អក្សរកាត់ ជ.វ.ស.ទ.ក. អាចរំឭកយើងដើម្បីដាក់គោលដៅដែលមានលក្ខណៈដូចខាងក្រោមនេះ ៖
-
ជាក់លាក់ ៖ បញ្ចូលការពិពណ៌នាលម្អិតនៃអ្វីដែលនឹងត្រូវសម្រេចឲ្យបាន ។
-
វាស់វែងបាន ៖ បញ្ចូលនូវរង្វាស់ ឬចំណុចចង្អុលបង្ហាញដើម្បីវាស់វែងអំពីការរីកចម្រើន ។
-
សម្រេចបាន ៖ ដាក់គោលដៅដែលពិតប្រាកដ និងអាចធ្វើទៅបាន ។
-
ទាក់ទង ៖ ដាក់គោលដៅដែលសំខាន់ និងផ្ដល់ការជំរុញចិត្ត ។
-
កាលកំណត់ ៖ បញ្ចូលកាលបរិច្ឆេទអំពីពេលដែលគោលដៅនឹងត្រូវសម្រេចបាន ។
ក្នុងនាមជាម្ចាស់អាជីវកម្ម សូមគិតអំពីទស្សនវិស័យរយៈពេលយូរ ហើយបំបែកវាឲ្យទៅជាគោលដៅតូចៗ ដែលអាចសម្រេចបានតាមរយៈការផ្តោតចិត្ត និងតស៊ូព្យាយាម ។
អាន ៖
នៅពេលអ្នកខិតខំធ្វើការដើម្បីដឹងអំពីទស្សនវិស័យរបស់អ្នក សូមប្រាកដថា អ្នករក្សាឥរិយាបថប្រចាំថ្ងៃដូចខាងក្រោមនេះ ៖
-
សូមមានភាពខ្ជាប់ខ្ជួន តាមរយៈការធ្វើការទៅរកគោលដៅរបស់អ្នករៀងរាល់ថ្ងៃ ។
-
សូមតាមដានការរីកចម្រើនរបស់អ្នកឲ្យបានល្អិតល្អន់ ។
-
សូមមានភាពបត់បែនក្នុងការកែតម្រូវគោលដៅរបស់អ្នក តាមការគួរ ។