Pasiuna sa Materyal sa Magtutudlo alang sa Mga Pagtulun-an ug Doktrina sa Basahon ni Mormon (Relihiyon 275)

Welcome sa mga Pagtulun-an ug Doktrina sa Basahon ni Mormon nga kurso! Salamat sa pagdawat sa kahigayonan sa pagtabang sa mga estudyante sa institute nga moduol ngadto kang Kristo pinaagi sa pagtuon sa Basahon ni Mormon. Kini nga kurikulom gidesinyo sa pagtabang kaninyo nga mahimong magtutudlo nga nakasentro kang Kristo ug nakapunting sa tigkat-on.

Unsa ang mga katuyoan niini nga kurso?

Ang Tumong sa Seminaries and Institutes of Religion namahayag:

Ang atong katuyoan mao ang pagtabang sa kabatan-onan ug mga young adult nga makasabot ug makasalig sa mga pagtulun-an ug Pag-ula ni Jesukristo, makasarang alang sa mga panalangin sa templo, ug makaandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit. (Pagtudlo ug Pagkat-on sa Ebanghelyo: Usa ka Handbook alang sa mga Magtutudlo ug sa mga Lider sa Seminaries and Institutes of Religion [2012], 1)

Kini nga kurso gidesinyo aron motabang kaninyo ug sa inyong mga estudyante nga matuman ang Tumong sa Seminaries and Institutes pinaagi sa:

• Maghimo og mga kasinatian sa pagkat-on nga makatabang sa mga magtutudlo ug mga estudyante nga mobati sa gugma sa Langitnong Amahan ug sa pagpalig-on sa ilang relasyon ngadto Kaniya.

• Maghatag og mga kahigayonan sa pagpalambo sa hugot nga pagtuo kang Jesukristo ug sa Iyang Pag-ula.

• Pagtabang sa mga estudyante sa pag-ila ug pagpasabot sa lahi nga mga pagtulun-an ug doktrina sa Basahon ni Mormon, ikonsiderar kon sa unsang paagi kini nga mga pagtulun-an may kalabotan sa ilang personal nga kalamboan, ug tinoon kon unsaon sa paggamit sa unsay ilang nakat-onan ngadto sa ilang mga kinabuhi.

• Pagpalambo og usa ka mahigugmaon ug matinahurong palibot sa pagkat-on diin ang mga estudyante gidapit sa pagpangutana, pagpahayag og mga kabalaka, paghisgot sa ilang mga kasinatian, ug pagpakigbahin sa ilang mga pagpamatuod.

Giunsa pagkahan-ay kini nga mga materyal?

Kini nga kurso gibahin ngadto sa 8 ka yunit, adunay 28 ka leksiyon. Ang matag yunit naglangkob sa labing mahinungdanon nga tema sa doktrina sa Basahon ni Mormon. Ang mga leksiyon sa matag yunit pinasikad sa hilisgotan ug may kalabotan sa tema sa doktrina.

Ang matag leksiyon gidesinyo alang sa 50 minuto nga gidugayon sa klase. Alang sa mga klase nga magkita kausa matag semana sulod sa 90 ka minuto, ang mga magtutudlo mahimong motipon sa duha ka leksiyon, tungod kay ang mga leksiyon sa matag yunit konektado ngadto sa tema sa yunit.

Ang matag leksiyon gilangkoban og materyal sa pagpangandam sa klase ug materyal sa magtutudlo. Kini nga materyal gidesinyo aron sa pagdapit og mahunahunaon nga pagpangandam, nag-awhag sa mga estudyante sa pagpaapil diha sa mas lawom nga pagkat-on, ug makapaaghat og mga aksiyon nga makatabang kanila nga mahimong mas mahisama sa Langitnong Amahan.

Aron masayod unsaon paggamit niini nga kurikulom sa labing maayo nga paagi aron sa pagpanalangin sa mga kinabuhi sa inyong mga estudyante, kinahanglan nga magtuon kamo sa materyal sa pagpangandam sa klase ug sa materyal alang sa magtutudlo samtang mag-andam kamo alang sa mga diskusyon sa klase.

Samtang magtuon kamo sa kurikulom, pag-ampo alang sa tabang sa Ginoo nga masabtan ang mga panginahanglan sa inyong mga estudyante. Si Elder Jeffrey R. Holland sa Korum sa Napulog Duha ka Apostoles mitudlo:

Elder Jeffrey R. Holland

Magpabilin nga bukas—ilabi na gayod sa Espiritu. Paggahin og igong kapailin-ilinan sa inyong plano sa leksyon. Kon gikinahanglan ninyo nga pamub-an ang usa ka leksyon og gamay aron sa paghatag sa inyong pagpamatuod ug makapasiugda og diskusyon kabahin sa kasamtangang isyu, palihog buhata kon giaghat sa Espiritu nga kini tukma. …

… Hinumdomi nga ang usa ka estudyante dili usa ka sudlanan nga pun-on; ang usa ka estudyante usa ka kalayo nga pasigahon. (“Mga Anghel ug Katingala” [pagpamulong nga gihatag atol sa sibya sa pagbansay sa Church Educational System, Hunyo 12, 2019], broadcasts.ChurchofJesusChrist.org)

Materyal sa Pagpangandam sa Klase

Ang materyal sa pagpangandam sa klase naglakip sa mga tudling gikan sa Basahon ni Mormon, ang kinatibuk-ang kahulogan sa mga tudling sa kasulatan, mga pamahayag sa mga lider sa Simbahan, mga hulagway, mga video ug ang “Want More [Gusto ka Pa og Dugang]?” nga seksiyon nga naghatag og dugang nga mga kapanguhaan nga may kalabotan sa hilisgotan sa leksiyon.

Ang materyal sa pagpangandam sa klase naglakip usab og mga pangutana ug mga kalihokan nga nag-awhag sa mga estudyante sa pagpalawom sa ilang mga pagkat-on ug mangandam sa pag-apil sa klase. Sama pananglit, diha sa materyal sa pagpangandam alang sa leksiyon 4, “Pagpangita sa mga Kasulatan,” ang mga estudyante gidapit sa pagtuon kon sa unsang paagi ang mga kasulatan mapahisama o matandi ngadto sa Liahona. Sila dayon dapiton sa pagbuhat sa mosunod nga kalihokan:

paghulagway sa diskusyon

Si Elder Kim B. Clark sa Seventy nagtudlo unsa ang kinahanglan nga buhaton sa usa ka tigkat-on (ug magtutudlo) aron makat-on og maayo:

Elder Kim B. Clark

Kon tinud-anay kamong magtinguha nga makat-on og maayo, kon ang inyong kasingkasing ug hunahuna andam modawat sa pagkat-on, ug kon lih[o]kon ninyo kana nga tinguha, ang Ginoo mopanalangin kaninyo. Kon buhaton ninyo ang inyong bahin—mag-ampo diha sa hugot nga pagtuo, mangandam, magtuon, aktibong moapil, ug mobuhat sa inyong labing maayo—ang Espiritu Santo motudlo kaninyo, mopalambo sa inyong kapasidad sa pagbuhat sa unsay inyong nakat-[o]nan, ug motabang kaninyo nga mamahimo kon unsay gusto sa Ginoo nga kamo mamahimo. (“Pagkat-on alang sa Tibuok Kalag,” Liahona, Ago. 2017, 33–34)

Materyal sa Magtutudlo

Diha sa pasiuna sa materyal sa magtutudlo alang sa matag leksiyon, inyong makita ang usa ka paghulagway sa gitinguha nga mga resulta sa tigkat-on. Kini nga pasiuna gisundan sa gisugyot nga mga ideya sa pagtudlo nga maghatag og estruktura sa leksiyon, sulod [content], mga tabang sa panaghisgotan, ug mga ideya sa paggamit.

Samtang inyong tun-an ang materyal sa magtutudlo, bantayi kon sa unsang paagi kini makapaaghat sa mga estudyante sa pagpangandam. Ang padayon nga pagsalig sa pagpangandam sa mga estudyante makatabang kanila nga mobati sa kaimportante sa pagpangandam alang sa matag klase. Ang mosunod nga instruksiyon gikan sa leksiyon 4 usa ka panag-ingnan kon sa unsang paagi ang materyal sa magtutudlo makapaaghat sa mga estudyante sa pagpangandam:

graphic sa instruksyon sa pagtudlo

icon, pamalandong

Pamalandong agi og Pagpangandam alang sa Klase

Susama sa unsay buhaton ninyo ug sa inyong mga estudyante sa dili pa magklase, paggahin og mubo nga higayon sa pagpamalandong samtang kamo mangandam sa pagtudlo niini nga kurso. Una, motan-aw sa usa o duha ka leksiyon aron mapamilyar kon giunsa ang pagpangandam ug ang materyal sa magtutudlo paghimo aron dungan nga magamit samtang mangandam kamo sa pagtudlo. Dayon pamalandongi ang mosunod nga mga pangutana: Unsa ang pipila ka mga paagi nga mahimo kamong makadasig sa mga estudyante nga mangandam aron makabaton sila og mas buhong nga kasinatian diha sa klase? Unsa ang inyong mabuhat aron maapil ang mga estudyante nga wala magtuon sa materyal sa pagpangandam?

Timan-i: Kon ang mga estudyante nakaandam alang sa mga panaghisgotan sa klase, inyong makita nga kamo mas dali nga makabalhin sa klase ngadto sa lawom, makahuluganon nga mga diskusyon sa mga hilisgotan. Kini magtugot og dugang panahon sa klase sa pagsusi unsaon ninyo ug sa inyong mga estudyante sa pagplano alang sa ug mohimo og epektibo, matarong nga aksyon.

Unsaon nako aron epektibong makapangandam sa pagtudlo?

Ang Langitnong Amahan motabang kaninyo samtang mangandam kamo sa pagtudlo sa Iyang mga anak. Ang inyong mga paningkamot nga makugihong mosunod sa ebanghelyo makatabang kaninyo aron mahimong kwalipikado alang sa paggiya sa Espiritu diha sa inyong pagpangandam sa pagtudlo.

Tingali makatabang kaninyo ang pagpangutana sa inyong kaugalingon sa mosunod nga mga pangutana isip kabahin sa inyong pagpangandam sa pagtudlo:

• Nag-ampo ba ako aron makadawat sa giya sa Espiritu Santo ug sa pagsabot sa mga panginahanglan sa akong mga estudyante? Sa unsang paagi nako mabana-bana kon unsa ang labing mahinungdanon ngadto kanila?

• Mibati ba ako nga adunay igo nga kahibalo diha sa pagpangandam ug sa materyal sa magtutudlo? Aduna bay bisan unsang butang nga kinahanglan nakong ipahiangay aron matubag ang mga panginahanglan sa akong mga estudyante?

• Unsaon nako sa pagtabang sa akong mga estudyante nga mapalambo ang ilang hugot nga pagtuo ngadto sa Langitnong Amahan ug ni Jesukristo samtang magtuon kami niini nga leksiyon? Unsaon nako sa pagtabang sa mga estudyante nga magtinguha sa pagkat-on pinaagi sa Espiritu Santo?

• Unsaon nako sa pagtabang ang matag usa sa akong mga estudyante aron mapuno gayod sa kadasig sa pagsalmot sa leksiyon? Unsaon nako sa pagsiguro nga sila adunay panahon nga ilang gikinahanglan sa paghimo og personal nga mga plano sa paggamit sa unsay ilang nakat-onan?

• Unsaon nako sa paghimo og kahimtang sa pagkat-on diin ang mga estudyante mobati nga gihatagan og bili, gidawat, ug luwas sa pagpaambit ug sa pagkat-on gikan sa usag usa? (Tan-awa sa Doktrina ug mga Pakigsaad 88:78, 122.)

Unsaon nako sa pagpahiangay sa mga leksiyon alang niadtong may mga kakulangan?

Samtang mangandam ka sa pagtudlo, pagmahunahunaon sa mga estudyante nga adunay piho nga mga panginahanglan. Ipahiangay ang mga kalihokan ug mga gilaoman aron kining mga estudyante mobati nga nahisakop ug matabangan sila nga molampos. Alang sa dugang nga impormasyon, konsultaha ang mga kapanguhaan diha sa pahina sa Mga Kakulangan nga anaa sa disabilities.ChurchofJesusChrist.org.

Unsa ang gilaoman gikan sa mga estudyante aron makadawat og kredito?

Aron makadawat og kredito ngadto na sa paggradwar sa institute, ang mga estudyante gikinahanglan nga:

1. Magtuon sa materyal sa pagpangandam sa dili mominos sa 75 porsyento sa mga leksiyon.

2. Motambong og 75 porsyento sa mga klase nga gipahigayon.

3. Mokompleto sa usa sa tulo ka mga kasinatian sa pagkat-on: pagtipig og journal sa pagtuon, pagsulat og mga tubag sa tulo ka pangutana nga essay, o mohimo ug mokompleto og usa ka kaugalingon nilang proyekto sa pagkat-on [learning project] (nga adunay pagtugot sa magtutudlo) nga may kalabotan sa sulod [content] sa kurso. Pangita og dugang nga mga detalye sa “Pagpalambo sa mga Kasinatian sa Pagkat-on sa Institute,” nga anaa sa institute. ChurchofJesusChrist.org.

Kon ang mga estudyante morekord sa mga tubag sa tanang mga pangutana ug mga kalihokan diha sa materyal sa pagpangandam, matuman usab niini ang gikinahanglan nga kasinatian sa pagkat-on. Wala kinahanglana nga isumiter sa mga estudyante ang ilang mga tubag nganha nimo. Sa kataposan sa semester, kinahanglan lamang nila nga ipakita kaninyo kon unsay ilang nakompleto.

icon, irekord

Irekord ang Inyong mga Hunahuna

Ikonsiderar ang matang sa kasinatian nga inyong gilaoman nga mabatonan sa inyong mga estudyante niini nga kurso. Isulat ang pipila sa imong mga hunahuna kon sa unsang paagi nga nagplano ka nga makatabang kanila nga makabaton og makahuluganon nga kasinatian sa pagkat-on.

Gusto pa og Dugang? (Opsiyonal)

Unsa ang ubang mga kapanguhaan nga makatabang nako aron mahimong magtutudlo nga gikinahanglan sa Ginoo nga ako mamahimo?

Ang Kapanguhaan sa Pagbansay alang sa Bag-ong Magtutudlo nga handbook makatabang kaninyo nga makasabot sa katuyoan ug mga pilosopiya sa pagtudlo sa mga Seminary ug mga Institute ingon man usab sa pagtabang kaninyo sa pagbansay sa mga kahanas sa pagtudlo.

Ang Pagtudlo ug Pagkat-on sa Ebanghelyo [Gospel Teaching and Learning] nga handbook maoy usa ka mahinungdanon nga kapanguhaan alang sa pagsabot sa proseso sa pagtudlo sa ebanghelyo ug sa pagkat-on unsaon aron mahimong malampuson sa klasehanan.

Ang kapanguhaan nga Pagtudlo sumala sa Pamaagi sa Manluluwas nagpaambit og mga baroganan aron sa pagtabang sa mga tigtudlo sa ebanghelyo nga motudlo nga mas sama sa Manluluwas.