Leksyon 19 Materyal sa Magtutudlo

Pagpakabuhi nga Matarong sa Panahon sa Kadautan

Si Presidente Russell M. Nelson miingon, “Ang Basahon ni Mormon mihatag og katin-awan sa pagtulun-an sa Agalon ug mipakita sa mga taktika sa kaaway” (“Ang Basahon ni Mormon: Unsa kaha ang Imong Kinabuhi Kon wala Kini?” Liahona, Nob. 2017, 62; tan-awa usab sa 2 Nephi 26–33). Ang Yunit 6 makatabang sa mga estudyante nga mas makamatngon sa mga taktika sa kaaway ug motino unsay ilang mahimo aron mapalig-on ang ilang kaugalingon batok sa iyang dautang mga laraw. Niini nga leksyon, ang mga estudyante moila kon unsa ang ilang mahimo aron magpabilin nga lig-on kon sila mag-atubang og mga pagpanggukod ug kon unsa ang ilang mahimo aron magpakabuhi nga matarong diha sa kalibotan nga puno sa kadautan.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Paggamit og tinuod nga mga kahimtang. Kon makita sa mga estudyante ang mga koneksyon tali sa ilang kaugalingong mga kinabuhi ug sa unsay ilang gitun-an diha sa mga kasulatan, sila mas andam nga mohatag og bili sa kamahinungdanon sa pulong sa Dios ug makita kon sa unsang paagi nga kini mosangpot ngadto sa epektibo, matarong nga aksyon. Ang mga kahimtang nga nagpresentar sa tinuod nga mga sitwasyon sa kinabuhi ug motubag sa mga pangutana, mga kabalaka, ug mga hagit nga giatubang sa mga estudyante makatabang sa mga estudyante sa pagkonektar sa ilang mga kinabuhi ngadto sa doktrina ug mga baruganan nga makit-an diha sa pulong sa Dios. Ang tinuod nga mga kahimtang makatabang usab sa mga estudyante sa pagdiskobre mismo nga usahay ang kinabuhi komplikado ug ang mga tubag dili kanunayng sayon pangitaon.

Ang matarong nga mga sumusunod ni Jesukristo napalig-on taliwala sa pagpanggukod.

Sa pagsugod sa klase, ikonsiderar ang pagpaambit sa mosunod nga mga kahimtang o laing mahinungdanong kahimtang nga imong gihunahuna.

Si Akari usa ka bag-ong nabunyagan nga miyembro sa Simbahan. Ang iyang mga ginikanan wala na moila kaniya nga anak sa dihang siya nabunyagan. Sa sinugdanan, ang tanan sa iyang ward mahigalaon kaayo. Apan, bag-ohay lang ang pipila sa mga miyembro nagsulti og dili mabination nga mga butang mahitungod sa kagahapon ni Akari ug mibiay-biay kaniya tungod sa iyang kamatinguhaon sa pagsunod sa ebanghelyo. Gusto siya nga mahimong usa ka matinud-anong miyembro sa Simbahan apan gibati gayod nga nawad-an og kadasig.

• Ngano kaha nga lisud kaayo alang ni Akari nga ang isig ka miyembro sa Simbahan ang mihimo sa pagpanggukod?

• Kon si Akari modangop diha kaninyo aron mangayo og tabang, unsa ang inyong isulti o buhaton?

Pahinumdumi ang mga estudyante nga sa Helaman 3:24–34 atong mabasa nga napulo ka liboan sa mga tawo ang miapil sa Simbahan ug ang mga tawo hilabihan ang pag-uswag. Sa katapusan, hinoon, ang garbo misulod ngadto sa mga kasingkasing sa ubang miyembro sa Simbahan, kinsa misugod sa pagpanggukod niadtong kinsa nagpabilin nga mapaubsanon ug matinud-anon.

Dapita ang mga estudyante sa pagribyu sa Helaman 3:33–35 ug mangita sa unsay nakatabang sa mapainubsanon nga mga miyembro sa Simbahan aron mobarog nga lig-on diha sa pag-atubang sa pagpanggukod. Ikonsiderar kon hain sa mosunod nga mga pangutana ang imong ipangutana aron mapalambo og maayo ang pagkat-on sa imong mga estudyante:

• Unsa nga mga pagtulun-an niining mga bersikulo nga makatabang ni Akari o sa usa ka tawo nga anaa sa susama nga sitwasyon? (Mahimo nimong ilista ang pipila sa mga kamatuoran nga makaplagan sa mga estudyante, sama sa mosunod: Kon kita magpuasa, mag-ampo, ug motugyan sa atong mga kasingkasing ngadto sa Dios, ang atong pagkamapainubsanon ug hugot nga pagtuo diha ni Jesukristo mas molig-on, ug ang atong kasingkasing mahimong limpyo—dili igsapayan ang makapasakit nga pamatasan sa uban.)

• Sa unsang mga paagi nga ang pagpuasa, pag-ampo, ug pagtugyan sa inyong kasingkasing ngadto sa Dios nakaapekto sa inyong hugot nga pagtuo ni Jesukristo? (tan-awa sa Helaman 3:35). Sa unsang paagi nga kining matarong nga mga aksyon nakatabang kaninyo samtang kamo nag-atubang sa makapasakit nga pamatasan sa uban?

Ikonsiderar ang pagpakita sa mosunod nga mga pangutana ug sa paghatag sa mga estudyante og pipila ka personal nga higayon sa pagtimbang-timbang sa usa o mas daghan niini ug mohimo og usa ka plano kon unsaon nila sa pagtubag ang bisan unsang mga pag-aghat nga ilang madawat:

• Kumusta ang inyong pag-abi-abi ug pagpakigdait sa uban diha sa Simbahan ni Jesukristo?

• Kumusta ang inyong pagtugyan sa inyong kasingkasing ngadto sa Dios?

• Unsaon kaha ninyo pagpalambo ang inyong pagtuo diha ni Jesukristo, nga dili igsapayan ang makapasakit nga pamatasan sa uban?

Ipaambit ang imong pagpamatuod o pagdapit og usa ka estudyante sa pagpamatuod sa gahum nga moabot samtang kita molihok diha sa hugot nga pagtuo ug motugyan sa atong kasingkasing ngadto sa Dios.

Samtang ang mga Nephite nagkagrabe ang kadautan, si Mormon ug si Moroni nagpabilin nga matinud-anon sa Ginoo.

Dapita ang mga estudyante sa pagpaambit og mga ehemplo sa mga istorya diha sa balita, mga pangkultura nga uso, ug mga hilisgutan sa mga pakig-istorya diha sa social media nga makahimong lisud sa pagsunod sa ebanghelyo sa atong panahon.

• Unsa nga mga kahimtang nga nakapahimong lisud sa pagsunod sa ebanghelyo sa mga panahon ni Mormon ug sa iyang anak nga si Moroni? (Kon gikinahanglan, dapita ang mga estudyante sa pagribyu sa seksyon 2 sa materyal sa pagpangandam o sa pagbasa og kadali sa mga ulohan sa mga kapitulo sa Mormon 1–6 ug Moroni 9.)

• Sa imong hunahuna unsa kaha ang kinabuhi sa panahon ni Momon ug Moroni?

Dapita ang mga estudyante sa pagribyu sa Mormon 1:1–2, 15 ug Moroni 9:25–26, nga mangita sa posibling mga rason kon nganong si Mormon ug si Moroni nakahimo sa pagpabilin nga matinud-anon ngadto sa Ginoo samtang sila nag-atubang og usa ka katilingban nga hilabihan ang kadautan.

• Unsa nga baruganan ang atong makat-unan gikan niining mga bersikulo mahitungod sa pagpabilin nga matinud-anon sa Ginoo sa mga panahon sa kadautan? (Tabangi ang mga estudyante sa pag-ila og usa ka baruganan nga susama sa mosunod: Makabuntog kita sa kadautan niining kalibotan kon kita makasinati sa kaayo ni Jesukristo ug magpabilin nga matinud-anon ngadto Kaniya.)

• Sa inyong hunahuna unsa kaha ang buot ipasabot sa pagsinati sa kaayo ni Jesukristo?

• Sa unsang paagi nga ang pagtan-aw ngadto ni Jesukristo ug pagsinati sa Iyang kaayo makatabang kanato nga magpabilin nga matarong kon ang kadautan nagpalibot kanato? (Mahimo nimong dapiton ang mga estudyante sa pagribyu sa mga pamahayag ni Presidente Joy D. Jones ug Elder Neil L. Andersen sa seksyon 2 sa materyal sa pagpangandam.)

• Sa unsang paagi nga ang inyong pagpamatuod sa kaayo ni Jesukristo ug ang inyong hugot nga pagtuo diha Kaniya nakatabang kaninyo sa paghimo og matarong nga mga pagpili samtang kamo nag-atubang sa kadautan?

Pahinumdumi ang mga estudyante nga sa seksyon 2 sa materyal sa pagpangandam, sila gidapit sa pag-ila og usa ka indibidwal o grupo sa mga tawo diha sa Basahon ni Mormon o usa ka tawo nga ilang nailhan mismo kinsa nag-atubang og kadautan ug nagpabilin nga matinud-anon. (Kon gikinahanglan, hatagi ang mga estudyante og panahon sa pagribyu sa unsay ilang gisulat.) Depende sa gidak-on sa imong klase, pagpili og pamaagi nga makahatag sa matag estudyante og oportunidad sa pagpaambit sa ilang ehemplo.

Ipakita ang mosunod nga pangutana:

• Base sa unsay inyong nakat-onan ug gibati karon, unsa ang inyong buhaton aron molambo ang inyong kapasidad sa pagbarog nga lig-on sa inyong pasalig ngadto sa Ginoo samtang mag-atubang kamo sa kadautan sa kalibotan? (Awhaga ang mga estudyante sa pagsulat sa bisan unsang mga pag-aghat nga ilang nadawat gikan sa Espiritu Santo ug mobuhat niini.)

Alang sa Sunod nga Higayon

Ipaambit kining kinutlo ni Propeta Joseph Smith: “Kini mao ang gugma sa kagawasan nga nagdasig sa akong kalag—sibil ug relihiyusong kagawasan sa tibuok katawhan” (Mga Pagtulun-an sa mga Presidente sa Simbahan: Joseph Smith [2007], 417). Samtang magtuon ang mga estudyante sa materyal sa pagpangandam alang sa sunod nga klase, dapita sila sa pagpamalandong kon unsa ang ipasabot sa relihiyusong kagawasan ngadto kanila ug moadto sa klase nga andam na sa paghisgot unsa ang ilang buhaton aron makatabang sa pagpasiugda o pagpatunhay niana nga kagawasan.