Leksyon 6 Materyal sa Magtutudlo

Ang Walay Kinutubang Pag-ula ni Jesukristo

Ang Basahon ni Mormon usa ka gamhanang saksi ni Jesukristo ug ang katubsanan nga moabut pinaagi Kaniya. Kini nga leksyon motabang sa mga estudyante sa pagpasabut kon giunsa kita pagtubos gikan sa Pagkapukan pinaagi ni Jesukristo ug sa Iyang Pag-ula. Ang mga estudyante motino usab kon unsay ilang mabuhat sa pagsalig pa diha sa Manluluwas nga motabang kanila sa pagbuntog sa mga kahilig sa ilang kinaiyanhon nga lalaki o babaye.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Ipahibalo ang mga resulta sa pagkat-on sa estudyante. Ang mga resulta sa pagkat-on mao ang mga pamahayag nga naghulagway sa kahibalo ug mga kahanas sa mga estudyante nga kinahanglan nga ipalambo atol sa kasinatian sa pagkat-on. Hunahunaa ang pagpakigbahin ngadto sa mga estudyante sa gitinguha nga resulta nga gilista diha sa pasiuna sa matag leksyon. Kining gipahayag nga mga resulta makatabang sa mga magtutudlo ug mga estudyante sa pagbanabana og dungan sa kalampusan sa ilang pagtuon ug mga panaghisgot.

Ang mga propeta sa Basahon ni Mormon nagpamatuod sa panginahanglan alang sa Pag-ula ni Jesukristo.

Ipakita ang mosunod nga wala mahuman nga pangutana: Unsa ang mahitabo sa akong kinabuhi nga walay …?

Aron sa pagtabang sa mga estudyante sa paghunahuna og mga paagi nga sila makakompleto sa pangutana, pagpakita og pipila ka nagkalain-laing mga hulagway o mga pulong. Dapita ang mga estudyante sa paghisgot og daklit uban sa usa ka pares kon unsaon nila pagtubag ang matag aytem o ideya. Makahimo ka sa paggamit sa nag-uban nga mga hulagway o sa pipila nga ikaw mismo ang mopili. Siguroha nga ang katapusang hulagway usa ka representasyon sa maulaong sakripisyo ni Jesukristo aron ang mga estudyante makahisgot kon unsa ang mahitabo sa ilang mga kinabuhi kon wala si Jesukristo ug ang Iyang Pag-ula.

batan-ong babaye nga naggunit og telepono

batan-ong mga babaye nga nangatawa

mga ginikanan ug masuso nangatawa

Si Kristo diha sa Getsemani, ni Harry Anderson

Isulat ang mosunod nga wala mahuman nga pamahayag diha sa pisara: Wala ang Manluluwas ug ang Iyang Pag-ula kita mahimo …

Pahinumdumi ang mga estudyante nga si Jacob ug Amulek mihatag og importanting mga pakigpulong mahitungod sa Pag-ula ni Jesukristo. Hangyoa ang mga estudyante sa pagribyu sa 2 Nephi 9:6–10 ug sa Alma 34:9, mangita sa mga hugpong sa mga pulong nga ilang magamit sa pagkompleto sa pamahayag diha sa pisara.

• Unsa ang pipila ka mga hugpong sa mga pulong gikan niini nga mga tudling nga atong magamit sa pagkompleto sa pamahayag nga anaa sa pisara? (Samtang ang mga estudyante makigbahin og lain-laing mga paagi sa pagkompleto sa pamahayag i-rekord ang ilang mga tubag sa ubos niini diha sa pisara. Ang mga estudyante mahimong moila og usa ka kamatuoran susama niining usa: Wala ang Manluluwas ug ang Iyang Pag-ula, kita dili makalikay sa pagkalaglag. Ang ubang mga kamatuoran nga mahimo nilang ilhon naglakip sa mosunod: Wala ang Manluluwas ug ang Iyang Pag-ula kita ipahimulag gikan sa atubangan sa Ginoo, dili mabanhaw, mahimo nga mangalagad sa yawa, mahimo nga sama sa yawa, magpabilin diha sa pagkauyamot, ug mahimo nga mangalagad ngadto nianang makalilisang nga mangtas sa kamatayon ug sa impyerno. Dapita ang mga estudyante sa pagpasabut kon unsa sa ilang hunahuna ang ipasabut niini nga mga hugpong sa mga pulong.)

• Unsa ang “makalilisang nga mangtas”nga gihulagway ni Jacob diha sa 2 Nephi 9:10? Nganong hilabihan kini ka makalilisang? (Ingon nga gikinahanglan, tabangi ang mga estudyante sa pagsabut kon ngano nga ang permanenting pisikal ug espirituhanon nga kamatayon mopugong kanato gikan sa pagkahimo nga sama sa Langitnong Amahan. Timan-i nga ang espirituhanon nga kamatayon mga resulta sa Pagkapukan ug sa atong kaugalingong pagkadili masulundon. [Tan-awa sa “Kamatayon, Espirituhanon” ug “Kamatayon, Pisikal,” Gospel Topics, topics.ChurchofJesusChrist.org.])

• Sa unsa nga paagi nga ang pag-ila sa mga epekto sa Pagkapukan nagtabang kanato sa pagsabut kon nganong kita nagkinahanglan ni Jesukristo?

Dungan og basa sa 2 Nephi 9:11–12, 19–22 ug dapita ang mga estudyante sa pagpangita sa mga paagi nga kita gitubos ni Jesukristo gikan “niining makalilisang nga mangtas” (bersikulo 10) sa kamatayon ug impyerno.

• Sa unsa nga paagi si Jesukristo naghatag kanato og kalingkawasan gikan “niining makalilisang nga mangtas” sa kamatayon ug impyerno?

• Unsa ang imong gibati mahitungod sa Manluluwas, nasayud nga Siya andam ug makahimo sa pagluwas kanimo gikan sa kamatayon ug sa impyerno?

Pahinumdumi ang mga estudyante nga si Jacob ug si Amulek parehong mihulagway sa panginahanglan alang sa “usa ka walay kinutubang ”pag-ula o sakripisyo nga pagahimoon (tan-awa sa 2 Nephi 9:7; Alma 34: 10). Dapita ang mga estudyante sa pagribyu sa mga pamahayag ni Presidente Russell M. Nelson ug Presidente Tad R. Callister diha sa seksyon 1 sa materyal sa pagpangandam, mangita alang sa mga paagi nga ang Pag-ula sa Manluluwas walay kinutuban.

• Ngano kahang importante nga makasabut nga ang Pag-ula sa Manluluwas walay kinutuban?

• Sa unsa nga paagi nga ang pagkahibalo nga ang Pag-ula sa Manluluwas walay kinutubang nakaapekto sa paagi sa imong pagsabut ug pagtubag sa imong kaugalingong mga pakigbisog ug mga kabalaka?

• Unsa ang imong mabuhat sa pagpakita sa Ginoo nga ikaw nagtuo nga ang Iyang walay kinutubang Pag-ula makatabang ug makaluwas kanimo? (Hunahunaa ang paghatag sa mga estudyante og panahon sa pagrekord sa ilang mga hunahuna.)

Si Hari Benjamin nagtudlo sa iyang mga katawhan nga sila makasalikway sa ilang kinaiyanhong pagkalalaki o pagkababaye pinaagi sa Pag-ula ni Jesukristo.

Ipakita ang mosunod nga pamahayag: “Ang kinaiyanhon nga tawo mao ang usa ka kaaway sa Dios, ug sa gihapon gikan pa sa pagkapukan ni Adan” (Mosiah 3:19). Pahinumdumi ang mga estudyante nga si Hari Benjamin mitudlo niini nga kamatuoran.

• Unsaon nimo sa pagpasabut unsa ang “kinaiyanhon nga tawo” ngadto sa usa ka tawo nga dili pamilyar niini nga pulong? (Mahimo nimong awhagon ang mga estudyante sa pagribyu sa pamahayag ni Elder David A. Bednar diha sa seksyon 2 sa materyal sa pagpangandam.)

Basaha ang Mosiah 3:19 isip usa ka klase, ug dapita ang mga estudyante sa pagpangita alang sa unsay gitudlo ni Hari Benjamin sa iyang mga katawhan mahitungod sa pagbuntog sa kinaiyanhong tawo.

• Unsa nga baruganan ang atong makat-unan gikan sa mga pagtulun-an ni Hari Benjamin nga makatabang kanato sa pagbuntog sa kinaiyanhon nga pagkalalaki o pagkababaye dinhi kanato? (Ang mga estudyante mahimong moila og usa ka kamatuoran susama sa mosunod: Kon kita motugyan ngadto sa mga pagdani sa Balaang Espiritu, si Jesukristo motabang kanato sa pagsalikway sa kinaiyanhong pagkalalaki o pagkababaye ug mahimong mga santos pinaagi sa Iyang Pag-ula.)

Sa pagtabang sa mga estudyante sa paglig-on sa ilang pagsabut niini nga baruganan, hunahunaa ang pagpangutana og usa o sobra pa sa mosunod nga mga pangutana sumala sa mga panginahanglan sa mga estudyante:

• Unsay kahulugan niini nganha kanimo sa “[pagtugyan] ngadto sa mga pagdani sa Balaang Espiritu”? Sa unsa nga paagi ang Espiritu Santo mitabang kanimo sa pagbuntog sa mga kahilig sa kinaiyanhon nga lalaki o babaye?

• Ngano nga ang pagsalikway sa kinaiyanhong lalaki ug babaye mahitabo lamang kon kita mosalig diha ni Jesukristo ug sa Iyang Pag-ula?

• Sa unsa nga paagi nga ang pagsalig diha sa Pag-ula sa Manluluwas mitabang kanimo sa imong mga paningkamot nga mahimong usa ka santos––usa ka balaan ug Kristohanon nga tawo?

• Unsaon sa mga pagtulun-an diha sa Mosiah 3:19 pagdala kanato og paglaum ug kalig-on kon kita mobati nga kita dili makapugong o makabuntog sa mga kaibug ug pagkadaling mahaylo sa kinaiyanhong lalaki ug babaye?

Hunahunaa ang pagdapit sa mga estudyante sa paghunahuna mahitungod og usa ka apit sa ilang kinabuhi diin sila mahimong makigbisog sa mga kaibug, mga tinguha, o mga paghaylo sa kinaiyanhong lalaki o babaye. Ipakita ang mosunod nga mga pangutana, ug dapita ang mga estudyante nga mamalandong ug magrekord sa ilang mga hunahuna ug mga pagbati:

• Unsay mahimong makapugong kanako gikan sa pagtugyan ngadto sa Balaang Espiritu?

• Hain sa Kristohanong mga hiyas nga gihulagway diha sa Mosiah 3:19 ang akong gikinahanglan nga mapalambo pa sa hingpit?

• Unsa nga mga lihok ang akong buhaton aron ako makadawat og mas dako nga tabang gikan sa Manluluwas samtang ako naninguha sa pagpalambo niining Kristohanon nga hiyas?

Tapusa pinaagi sa pagpakigbahin sa imong pagpamatuod nga si Jesukristo mitubos kanato gikan sa Pagkapukan ug makatubos kanato gikan sa atong kaugalingon nga mga sala ug makausab kanato nga mahimong mas mahisama Kaniya ug sa atong Langitnong Amahan.

Alang sa Sunod nga Higayon

Dapita ang mga estudyante sa paghunahuna mahitungod sa pisikal, mental, emosyonal, o espirituhanong pakigbisog nga sila tingali nagsinati. Awhaga sila samtang sila nagtuon sa materyal sa pagpangandam alang sa sunod nga klase sa paghunahuna kon sa unsa nga paagi si Jesukristo makatabang kanila sa ilang pakigbisog.