Leksyon 8 Materyal sa Magtutudlo

Kinabuhi human sa Kamatayon

Samtang ang mga estudyante nagtapos sa yunit 2, “Ang Mahinungdanong Plano sa Katubsanan,” sila makabaton og oportunidad sa pagpasabut kon unsaon ang usa ka hustong pagsabut sa kinabuhi human sa kamatayon makahatag kanila og dugang nga kahupayan ug paglaum niini nga kinabuhi. Sila usab makaila og mga lihok nga ilang pilion aron mas maayo ang pagpangandam sa ilang mga kaugalingon sa pagsugat sa Dios.

Mga Sugyot alang sa Pagtudlo

Si Alma ug Amulek nagtudlo mahitungod sa kalibutan sa espiritu ug sa Pagkabanhaw.

Sugdi ang klase pinaagi sa pakigbahin sa mosunod nga talan-awon ug sa pagdapit sa mga estudyante sa paghisgot kon unsay ilang isulti o unsaon nila sa pagtubag:

Hunahunaa nga ikaw mobisita sa pamilya sa usa ka suod nga higala, si Anna, kinsa bag-o pa lamang nga namatay. Mipasakop si Anna sa Simbahan pipila ka bulan ang milabay. Ang iyang pamilya dili relihiyoso. Samtang ikaw nagpahayag sa imong kasubo ngadto sa inahan ni Anna, migunit siya sa imong mga kamot ug mitan-aw sa imong mga mata ug miingon, Makasulti ka ba kanako kon unsay mahitabo human kita mamatay?”

Dapita ang mga estudyante sa pagribyu sa Alma 11:43–44 ug sa Alma 40:11–14, mangita alang sa mga kamatuoran mahitungod sa kinabuhi human sa kamatayon nga makadala sa inahan ni Anna og kahupayan ug paglaum. (Mahimong ilhon sa mga estudyante ang mga baruganan sama sa mosunod: Tungod ni Jesukristo, ang tanang mga tawo pagabanhawon ug pagadad-on sa atubangan sa Dios aron pagahukman. Sa Pagkabanhaw ang atong mga lawas mahimong hingpit. Kon kita matarung, kita makapahulay gikan sa atong tanang mga kasamok ug mga kaguol didto sa kalibutan sa espiritu.)

• Unsa ang labing importante kanimo mahitungod sa mga pagtulun-an ni Alma ug Amulek kabahin sa Pagkabanhaw? Sa unsa nga paagi nga ang pagbaton og usa ka pagpamatuod sa Pagkabanhaw makatabang kanato sa pag-atubang sa mga hagit sa mortalidad uban ang mas dakong paglaum ug kaisug? (Hunahunaa ang pagbasa sa pamahayag ni Presidente Susan W. Tanner diha sa seksyon 2 sa materyal sa pagpangandam.)

• Unsa pa ang atong nahibaloan mahitungod sa kalibutan sa espiritu gikan sa mga kasulatan ug bag-ong [modern] pagpadayag? (Mahimo nimong hangyoon ang mga estudyante sa pagribyu sa pamahayag ni Presidente Dallin H. Oaks diha sa seksyon 1 sa materyal sa pagpangandam.)

• Sa unsa nga mga paagi nga ang doktrina sa Ginoo mahitungod sa kalibutan sa espiritu ug sa Pagkabanhaw nagpakita sa Iyang gugma ug kalooy alang kanato?

Dapita ang mga estudyante sa paghunahuna og hilum kon kinsa kaha ang nagkinahanglan nga makadungog sa ilang pagpamatuod kabahin sa kinabuhi human sa kamatayon ug unsaon nila sa pagpakigbahin ang ilang pagpamatuod uban niadtong kinsa nagkinahanglan nga makadungog niini. (Hatagi og panahon ang mga estudyante sa pagpamalandong sa ilang tubag.)

Mubo nga Sulat Ang mga estudyante tingali nakadungog og lain-laing mga ideya mahitungod sa kinabuhi human sa kamatayon. Pahinumdumi sila nga kita kinahanglan nga mogamit og balaang gitudlo nga mga tinubdan, sama sa mga kasulatan ug mga pagtulun-an sa mga lider sa Simbahan, sa pagtimbang-timbang niini nga mga ideya. Makita nimo nga kini makatabang ang pakigbahin ug paghisgot sa mosunod nga pasidaan gikan ni Presidente Dallin H. Oaks:

Busa unsa pay [dugang sa unsay atong nakat-unan gikan sa pundok sa relihiyusong mga kasulatan] atong nasayran mahitungod sa kalibutan sa espiritu? Daghang mga miyembro sa Simbahan adunay mga panan-awon o laing mga inspirasyon nga nagpahibalo kanila bahin sa mga kalihokan o sa mga gipangbuhat sa kalibutan sa espiritu, apan kining personal nga espiritwal nga mga kasinatian dili sabton o itudlo isip opisyal nga doktrina sa Simbahan. Ug, dayag lang, adunay daghang mga pangagpas sa mga miyembro ug sa uban diha sa namantala nga mga kapanguhaan sama sa mga libro kabahin sa nag-ungaw sa kamatayon nga mga kasinatian. (“Salig sa Ginoo,” Liahona, Nob. 2019, 27-28)

Nagtudlo si Alma ug Amulek nga kinahanglan kitang mangandam sa pagsugat sa Dios.

Ipakita ang mosunod nga mga pamahayag:

• Nakaila ako og mga tawo kinsa milapas sa mga sugo ug nag-ingon, “Dili kana importante nga butang, tungod kay ako sa kanunay makahinulsol sa dili madugay.”

• Ang Dios mahigugmaon. Dili niya ihikaw gikan kanako ang celestial nga gingharian tungod lamang kay ako naglangan langan sa akong paghinulsol sa pipila ka mga sala.

• Bisan unsaon nako sa pagpaninguha, ako sa kanunay nagkulang ug dili gayud maandam sa pagsugat sa Dios.

Hunahunaa ang pagporma sa mga estudyante ngadto sa ginagmay nga mga grupo ug sa paghangyo sa matag grupo sa pagpili og usa sa nag-una nga mga pamahayag nga ilang gusto nga hisgutan. Dapita ang matag grupo sa pagbasa sa Alma 34:32–34 ug sa paggamit sa mga pagtulun-an dinhi niini nga tudling sa pagbana-bana sa ilang gipili nga pamahayag. Mahimo nimong hatagan ang matag grupo sa mosunod nga mga pangutana sa pagtabang sa paglig-on sa ilang panaghisgot:

• Haing mga bahin niini nga pamahayag ang mga tinuod, ug hain nga mga bahin tingali dili tinuod o makalibug?

• Unsa nga mga baruganan ang gitudlo sa Alma 34:32–34 nga labing angay ngadto niini nga pamahayag? Unsaon nimo sa pagpasabut kini nga mga baruganan ngadto sa usa ka tawo kinsa mihimo niini nga pamahayag? (Mahimong ilhon ug ipasabut sa mga estudyante ang pipila sa mosunod nga mga baruganan: Kini nga kinabuhi mao ang panahon sa pagpangandam sa pagsugat sa Dios ug sa pagbuhat sa atong mga buluhaton. Mag-andam kita sa pagsugat sa Dios pinaagi sa paghinulsol ug paglambo karon. Kon kita maglangay-langay sa atong paghinulsol, kita dili maandam sa pagsugat sa Dios.)

Human ang mga estudyante dihay panahon sa paghisgot niini nga mga pangutana, dapita ang pipila ka mga grupo sa pakigbahin kon unsa ang ilang nakat-unan sa klase.

• Unsa ang pipila sa ubang mga butang nga nagpugong sa mga tawo gikan sa pag-andam sa pagsugat sa Dios? (Ilista diha sa pisara ang mga tubag sa mga estudyante.)

Pagpalambo sa Atong Pagtudlo ug Pagkat-on

Hatagi ang mga estudyante og panahon sa pagpamalandong. Usa ka paagi nga kita makatabang sa mga estudyante nga mas maayong gamiton ang ilang mga kasingkasing sa pagsabut mao ang paghatag kanila og “panahon sa klase sa paghunahuna og lawom, pagpamalandong, o pagsulat mahitungod sa unsay ilang nasabtan ug gibati, ug sa paghunahuna unsay piho nga mga lihok nga kinahanglan nilang buhaton sa paggamit niini diha sa ilang mga kinabuhi” (Pagtudlo ug Pagkat-on sa Ebanghelyo: Usa ka Handbook alang sa mga Magtutudlo ug mga Lider sa mga Seminary ug mga Institute of Religion [2012], 2.5.4).

Pahinumdumi ang mga estudyante nga si Alma nangutana sa mga katawhan sa Zarahemla og pipila ka lawom nga makahuluganong mga pangutana. (Gi-ribyu kini nga mga pangutana sa mga estudyante samtang ilang gitun-an ang Alma 5:15–17, 19, 27, 33 diha sa seksyon 3 sa materyal sa pagpangandam.) Dapita ang mga estudyante sa paggahin og pipila ka mga minuto sa pagtuon pa og maayo pinaagi sa pagbasa og usab ug pagpamalandong pa sa mga pangutana ug mga pagtulun-an ni Alma nga makita diha sa Alma 5:14–35. Mahimo nimo silang tabangan nga mahibalo nga unsay ilang gipamalandong mas importante kay sa pila ka mga bersikulo ang ilang nahuman.

Human sa igo nga panahon, mahimo kang mangutana og usa o duha sa mosunod nga mga pangutana alang sa pagpamalandong sa mga estudyante:

• Sa unsa nga mga paagi ang Manluluwas motabang kanimo samtang ikaw naningkamot sa pag-andam sa pagsugat sa Dios?

• Unsa nga kausaban o mga kausaban ang imong gikinahanglang himoon karon nga aron mas maandam sa pagsugat sa Dios?

Hunahunaa ang pakigbahin sa mosunod nga pamahayag ni Presidente Oaks:

Ang Katapusang Paghukom dili lamang usa ka pagtimbang-timbang sa gidaghanon sa maayo ug sa dautan nga mga buhat—unsa ang atong nahimo. Kini maoy usa ka pagdawat sa katapusang sangputanan sa atong mga buhat ug mga hunahuna—unsa ang atong gidangatan. (“The Challenge to Become,” Liahona, Ene. 2001, 32)

Ikaw mahimong mangutana sa mga estudyante sa paghunahuna mahitungod kon kinsay ilang gitinguha nga mahimo. Hunahunaa ang pakigbahin sa mga estudyante sa imong pagpamatuod nga ang Langitnong Amahan ug ang Manluluwas may tinguha ug abilidad sa pagtabang kanila nga mahimong matang sa tawo kinsa malinawon diha sa Ilang presensya.

Awhaga ang mga estudyante sa pagpamalandong, pagplano, o pagsulat unsay piho nga lihok nga ilang buhaton karon sa pagpakita sa ilang sinserong tinguha nga mahimong mas andam sa pagsugat sa Dios. (Mahimong makatabang usab ang pagribyu sa pamahayag ni Presidente Henry B. Eyring diha sa seksyon 3 sa materyal sa pagpangandam.)

Ikaw makatapos sa klase pinaagi sa pagdapit sa mga estudyante sa pakigbahin unsay ilang nakat-unan gikan sa ilang mga kasinatian nga nagdungan sa pagtuon sa yunit 2, “Ang Mahinungdanong Plano sa Katubsanan.” Makadapit ka usab sa mga estudyante sa pagpamatuod kon giunsa niini nga kahibalo pag-apekto sa ilang pagpasalamat alang sa Manluluwas ug sa ilang mga tinguha nga mahimong mas mahisama Kaniya.

Alang sa Sunod nga Higayon

Ipamatuod nga ang Ginoo nag-andam sa dalan alang sa matag usa kanato sa pagbalik ngadto sa presensya sa Dios. Kini nga dalan alang kanato sa pagbalik ngadto Kaniya gitawag og ang doktrina ni Kristo ug nga ang hilisgutan mao ang gihatagan og gibug-aton sa atong sunod nga yunit. Samtang ang mga estudyante mag-andam alang sa sunod nga klase, dapita sila sa paghunahuna kon unsaon ang pagbaton og hugot nga pagtuo diha ni Jesukristo pag-andam kanila sa pagsugat sa Dios.