Leksyon 12 Materyal sa Pagpangandam sa Klase

Ang Atong Panginahanglan sa Espirituhanong Pagkatawo Pag-usab

Si Elder David A Bednar sa Korum sa Napulog Duha ka mga Apostoles mi-obserbar, “Ang Basahon ni Mormon mao ang atong tamdanan nga basahon sa mga panudlo samtang magsubay kita sa dalan gikan sa pagkadautan ngadto sa pagkamaayo ngadto sa pagkamas maayo ug maningkamot nga mausab ang atong kasingkasing” (“Ang Pag-ula ug ang Panaw sa Pagka-mortal,” Liahona, Abr. 2012, 12). Diha sa Basahon ni Mormon kini nga kausaban gihulagway isip espirituhanong pagkatawo pag-usab, usa ka kausaban sa kasingkasing, ug pagkakabig. Samtang ikaw magtuon niini nga materyal agi og pagpangandam alang sa klase, hunahunaa kon sa unsa nga paagi ang pagpuyo sa doktrina ni Kristo makatabang kanimo sa pagpalig-on sa imong pagkakabig ug pagkamahimo nga mas mahisama ni Jesukristo.

Seksyon 1

Sa unsa nga paagi ang pagpuyo sa doktrina ni Kristo makapalig-on sa imong pagkakabig?

Ang mosunod nga summary naghulagway unsay mahitabo kon kita tinuoray makabig:

Ang pagkakabig naglakip og usa ka kausaban sa pamatasan, apan kini molapas pa sa pamatasan; kini usa ka kausaban gayud sa atong kinaiyahan. Hilabihan kini ka mahinungdanon nga kausaban nga ang Ginoo ug ang Iyang mga propeta nagpasabut ngadto niini isip usa ka pagkatawo pag-usab, usa ka kausaban sa kasingkasing, ug usa ka bunyag sa kalayo(P“agkakabig,” Gospel Topics, topics.ChurchofJesusChrist.org)

Sama pananglit, human si Alma nga Batan-on gitawag sa paghinulsol pinaagi sa usa ka anghel, giantus niya ang hilabihan nga pagmahay tungod sa iyang mga sala. Samtang nag-antus si Alma, miduol siya sa Ginoo alang sa panabang, ang iyang mga sala gipasaylo, ug gisinati niya ang usa ka espirituhanong pagkatawo pag-usab (tan-awa sa Mosiah 27:11–23).

Pagtuon agi og Pagpangandam alang sa Klase

Basaha ang Mosiah 27:25–26, mangita alang sa unsay gitudlo sa Ginoo ni Alma mahitungod sa panginahanglan sa usa ka espirituhanong pagkatawo pag-usab.

Ang espirituhanong pagkatawo pag-usab, o pagkakabig dili usa ka uyon-uyon nga hitabo. “Ang pagkakabig moabut isip usa ka resulta sa matarung nga paningkamot sa pagsunod sa Manluluwas. Kini nga mga paningkamot naglakip sa pagbansay sa hugot nga pagtuo diha ni Jesukristo, paghinulsol sa sala, pagpabunyag, pagdawat sa gasa sa Espiritu Santo, ug sa paglahutay ngadto sa katapusan diha sa hugot nga pagtuo [naggamit sa doktrina ni Kristo]” (“Conversion [Pagkakabig],” Gospel Topics, topics.ChurchofJesusChrist.org).

Ang kasinatian sa mga katawhan ni Hari Benjamin nagpakita kon sa unsa nga paagi ang paggamit sa doktrina ni Kristo naggiya ngadto niining espirituhanong pagkatawo pag-usab ug pagkakabig ngadto sa Ginoo.

Sa iyang katapusan nga pakigpulong, gitudlo ni Hari Benjamin nga kitang tanan “dili mapuslanon nga mga sulugoon” ug mga “utangan hangtud sa kahangturan” ngadto sa Dios (Mosiah 2:21–25, 34). Dayon siya mipamatuod nga kita maluwas lamang pinaagi ni Jesukristo. Nabuntog niini nga mensahe, ang mga katawhan ni Hari Benjamin nangatumba sa yuta agi og ligdong nga pagtahud ug kahadlok (tan-awa sa Mosiah 3:17–4:2).

Pagtuon agi og Pagpangandam alang sa Klase

Basaha ang Mosiah 4:2–3, ug pangitaa kon giunsa paggamit sa mga katawhan ni Hari Benjamin ang doktrina ni Kristo ug unsa nga mga panalangin ang ilang nadawat.

Atong nakat-unan gikan sa Mosiah 4 nga human ang iyang mga katawhan nakadawat og kapasayloan sa ilang mga sala, gitudloan sila ni Hari Benjamin sa pagtuo sa Dios ug sa pagpuyo uban ang hugot nga pagtuo aron sila sa “kanunay magbaton sa kapasayloan sa [ilang] mga sala” (bersikulo 12). Sa dihang siya nahuman sa iyang pakigpulong, gusto ni Hari Benjamin nga mahibalo kon ang mga katawhan mituo ba sa unsay iyang gitudlo (tan-awa sa Mosiah 5:1).

Pagtuon agi og Pagpangandam alang sa Klase

Basaha ang Mosiah 5:2–7, mangita sa unsay gibuhat sa Ginoo alang sa mga katawhan ni Hari Benjamin samtang ilang gigamit ang doktrina ni Kristo sa ilang mga kinabuhi.

Si Elder D. Todd Christofferson sa Korum sa Napulog Duha ka mga Apostoles mi-obserbar sa mosunod mahitungod sa espirituhanong pagkatawo pag-usab:

Tingali mangutana kamo, Ngano nga kining dako nga kausaban dili dali dayon mahitabo kanako? Kinahanglan nga inyong hinumduman nga ang talagsaong mga ehemplo sa mga katawhan ni Hari Benjamin, ni Alma, ug sa uban pa diha sa kasulatan ingon gyud niana––talagsaon ug dili kasagaran [tan-awa sa Ezra Taft Benson, “A Mighty Change of Heart [Usa ka Dakong Kausaban sa Kasingkasing],” Ensign, Okt. 1989, 2–5]. Alang sa kadaghanan kanato, ang mga kausaban, mas hinay-hinay ug mahitabo sa kadugayan. Ang pagkatawo pag-usab, dili sama sa atong pisikal nga pagkatawo, mas usa kini ka proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagka-mortal.

… Kinahanglan takus kitang moambit sa sakramento matag semana ug magpadayon sa pagtawag sa Balaan nga Espiritu sa pagkuha sa hingpit sa katapusang mga timailhan sa pagkadili putli nga ania kanato. Ako mopamatuod nga samtang kamo mopadayon diha sa dalan sa espirituhanon nga pagkatawo pag-usab, ang maulaon nga grasya ni Jesukristo mokuha sa inyong mga sala ug sa lama niadto nga mga sala diha kaninyo, ang mga tintasyon mawad-an sa ilang pagkamadanihon, ug pinaagi ni Kristo kamo mahimong balaan, sama nga Siya ug ang atong Amahan mga balaan. (“Natawo Pag-usab,” Liahona, May 2008, 78)

Si Presidente Bonnie L. Oscarson, kanhi Kinatibuk-ang Presidente sa Young Women, mitudlo:

Tanan kita kinahanglang magtinguha nga mausab ang atong mga kasingkasing ug kinaiyahan aron dili na kita magtinguha sa pagsunod sa mga pamaagi sa kalibutan apan sa pagpahimuot sa Dios. Ang tinuod nga pagkakabig usa ka proseso nga mahitabo sulod sa panahon ug maglakip sa pagkaandam nga mogamit sa hugot nga pagtuo. … Nagkinahanglan kini sa padayon ug inadlawng paningkamot. (“Mituo ba Ako?” Liahona, Mayo 2016, 88–89)

Irekord ang Imong mga Hunahuna

Seksyon 2

Sa unsa nga paagi ako makapakita sa Ginoo nga ako sa tinuoray gustong magbaton og kausaban sa kasingkasing?

Hunahunaa kon unsay atong makat-unan gikan sa ehemplo sa mga Anti-Nephi- Lehi mahitungod sa pagbaton og hugot nga katuyoan sa atong mga paningkamot sa pag-angkon ug pagpalambo og gamhanang kausaban sa kasingkasing. Kining kanhi mga Lamanite “usa ka luog ug magahi ug usa ka mabangis nga mga katawhan; usa ka katawhan kinsa nahimuot diha sa pagbuno sa mga Nephite, ug panulis ug panglungkab kanila” (Alma 17:14). Apan, ang mga Anti-Nephi-Lehi midawat sa ebanghelyo ni Jesukristo sa dihang sila gitudloan ni Ammon ug sa iyang igsoong mga lalaki, ug ingon ka daghan kutob sa “makabig ngadto sa Ginoo, wala gayud mobiya.” (Alma 23:6).

Pagtuon agi og Pagpangandam alang sa Klase

Basaha ang Alma 24:9–11, 15, 19, mangita sa unsay gibuhat sa mga Anti-Nephi-Lehi sa paglig-on sa ilang pagkakabig ngadto sa Ginoo.

Nagkomentaryo kabahin sa kasinatian niini nga mga katawhan sa gamhanang kausaban sa kasingkasing, mitambag si Elder Bednar:

Ang pagpadaplin sa gihambin nga “mga hinagiban sa pagsukol” sama sa kahakog, garbo, ug kamasinupakon nagkinahanglan og labaw pa kay sa motuo ug masayud lamang. Ang kombiksyon, pagpaubos, paghinulsol, ug pagnunot mag-una sa pagsalikway sa atong mga hinagiban sa pagsukol. Kamo ug ako nagtinir ba gihapon og mga hinagiban sa pagsukol nga nagpalayo nato nga makabig ngadto sa Ginoo? Kon mao, nan kinahanglan kitang maghinulsol karon(“Pakabig ngadto sa Ginoo,” Liahona, Nob. 2012, 108–9)

Pamalandong agi og Pagpangandam alang sa Klase

Unsa nga “mga hinagiban sa pagsukol” ang tingali nagpugong kanimo gikan sa pagsinati og kausaban sa kasingkasing?

Gusto pa og Dugang? (Opsyonal)

Asa ako makabasa pa og dugang mahitungod sa mga katawhan diha sa Basahon ni Mormon kinsa misinati og lawom ug mahangturon nga pagkakabig?

Diha sa 4 Nephi 1:1–18 mabasa nato ang mahitungod sa usa ka pundok sa mga katawhan kinsa nagsinati og lawom ug nagpadayon nga pagkakabig nga naggiya ngadto sa hapit 200 ka tuig sa kalinaw.

Unsa pa ang akong mabuhat sa pagpatunhay sa gamhanang kausaban sa akong kasingkasing?

Diha sa pakigpulong “Walay Pagkapaling nga Pasalig ngadto Kang Jesukristo” (Liahona, Nob. 2019, 22–25), si Elder Dale G. Renlund sa Korum sa Napulog Duha ka mga Apostoles mihisgot kon unsa ang kahulugan sa pagkakabig ngadto sa Ginoo ug sa hangtud mausab pinaagi sa Iyang ebanghelyo.