Leksyon 10 Materyal sa Magtutudlo: Paghinulsol ug Kapasayloan

“Leksyon 10 Materyal sa Magtutudlo: Paghinulsol ug Kapasayloan,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)

“Leksyon 10 Materyal sa Magtutudlo,” Materyal sa Magtutudlo alang sa Mga Pagtulun-an ug Doktrina sa Basahon ni Mormon

Leksyon 10 Materyal sa Magtutudlo

Paghinulsol ug Kapasayloan

Ang Basahon ni Mormon nagtanyag og talagsaong mga panabut ngadto sa doktrina sa paghinulsol ug kapasayloan. Ang mga kasinatian ni Enos, mga katawhan ni Hari Benjamin, ug ni Alma nga Batan-on naghulagway nga ang Manluluwas mao ang atong katapusan nga tinubdan sa atong kapasayloan ug kalinaw sa konsyensya. Dinhi niini nga leksyon, ang mga estudyante makabaton og oportunidad sa paghisgot og mga pangutana mahitungod sa proseso sa paghinulsol ug makakat-on og mas maayong pag-ila kon ang Manluluwas nakapasaylo na ba kanila. Ang mga estudyante mohunahuna usab kon unsaon nila nga makapadayon sa paghinulsol ug mahimong mas mahisama ni Jesukristo.

Mga Sugyot alang sa Pagtudlo

Nagpasabut si Alma kon giunsa niya pagdawat ang kapasayloan sa Manluluwas.

Ipakita ang mosunod nga tulo ka mga pangutana sa lain-laing mga dapit sa lawak-klasehanan. Lingina pagpahimutang ang pipila ka mga lingkuranan duol sa matag pangutana. Ipasabut nga kini nga mga pangutana susama niadtong anaa sa seksyon 1 sa materyal sa pagpangadam.

Unsa gayud ang gipasabut sa paghinulsol? Unsa nga tambag ang imong ihatag ngadto sa usa ka tawo kinsa nakahimo sa mga lakang sa paghinulsol, apan wala mobati og bisan unsa nga kalainan?
Unsaon nato sa pagpangita ang kalig-on sa tinuoray nga pag-usab? Unsa ang imong isulti ngadto sa usa ka tawo kinsa nawad-an og kadasig tungod kay sila sa tinuod naninguha gyud pag-ayo sa pagbuhat og mas maayo apan nagpadayon gihapon sa pagbuhat sa samang mga kasaypanan?
Unsa kon ang usa ka tawo mobati nga siya wala nay paglaum nga mausab? Unsaon nimo sa pagtabang ang usa ka tawo kinsa mibati nga sila kinahanglan nga dili manumbaling sa paghinulsol tungod kay ang ilang mga sala ngil-ad kaayo nga sila dili gayud mapasaylo?

Dapita ang mga estudyante sa paghanduraw nga sila mga misyonaryo nga nangandam sa pagtubag sa usa sa mga pundok sa mga pangutana nga anaa sa ibabaw alang sa ilang mga investigator o nga sila nangandam sa pagtabang sa usa ka minahal kinsa nanlimbasog sa paghinulsol. Dayon hangyoa ang mga estudyante sa paglingkod sa usa ka lingkuranan duol sa pangutana nga ilang gustong hisgutan. Awhaga ang mga estudyante sa paggamit sa asoy sa kasinatian ni Alma ug sa ubang mga tudling gikan sa Basahon ni Mormon nga makatabang sa pagtubag sa ilang mga pangutana.

Pagtudlo og usa ka lider sa panaghisgot alang sa matag grupo, ug hatagi ang matag lider og usa ka kopya sa mga panudlo nga makaplagan diha sa katapusan niining materyal sa leksyon. Hatagi ang mga grupo og igo nga panahon sa paghimo og makahuluganong mga panaghisgot.

Human matuguti ang mga estudyante og panahon sa paghisgot, mahimo ka nga modapit og usa o dugang pa nga mga boluntaryo gikan sa matag grupo sa paghatag og daklit nga mga summary sa unsay nakat-unan sa ilang mga grupo ug gibati atol sa ilang mga panaghisgot.

Si Enos, mga katawhan ni Hari Benjamin, ug Alma nagsinati sa hingpit nga kalipay sa kapasayloan.

Hangyoa ang mga estudyante sa paghunahuna kon sila, o ang mga tawo nga ilang nailhan, nakahunahuna ba sukad kon unsaon pagkahibalo kon ang Manunubos nakapasaylo ba kanila sa ilang mga sala. Dapita ang mga estudyante sa pagsiksik sa Enos 1:4–8; Mosiah 4:1–3; ug Alma 36:19–21, mangita sa mga paagi nga makahibalo nga kita napasaylo na.

Pagpalambo sa Atong Pagtudlo ug Pagkat-on

Ilha ang gahum sa nakasentro ni Kristo nga pagtudlo. Si Chad H. Webb, tigdumala sa Seminaries and Institute of Religion, miingon ngadto sa mga magtutudlo: “Ang labing importanting paagi nga makatabang kita sa pagpalambo sa pagtuo sa nagtubo nga henerasyon mao ang mas hingpit nga pagbutang ni Jesukristo diha sa sentro sa atong pagtudlo ug pagkat-on pinaagi sa pagtabang sa atong mga estudyante aron makaila Kaniya, aron makakat-on gikan Kaniya, ug sa pagpaningkamot og maayo nga mahimong sama Kaniya” (“Kami Naghisgot kang Kristo, Kami Nalipay diha kang Kristo” [gi-broadcast nga pakigpulong nga gihatag sa tinuig nga pagtudlo sa mga Seminaries and Institutes of Religion, Hunyo 12, 2018], ChurchofJesusChrist.org). Samtang ikaw nangandam sa pagtudlo, pangutan-a ang imong kaugalingon: Unsaon nako pagtabang ang mga estudyante nga mas hingpit makaila, mahigugma, ug mosunod sa Manluluwas pinaagi niining kasinatian sa pagkat-on?

Hain nga mga pulong o hugpong sa mga pulong niini nga mga bersikulo ang importante nganha kanimo? Ngano kaha nga kadtong hugpong sa mga pulong nakakuha sa imong atensyon?
Nganong importante ang pagtuo ug pagdawat nga si Jesukristo andam, makahimo, ug matinguhaon sa pagpasaylo sa atong mga sala ug pagkuha sa kabug-at sa atong konsyensya [guilt]? (Hunahunaa ang pagdapit sa mga estudyante sa pagribyu sa seksyon 3 sa materyal sa pagpangandam.)
Unsaon nato sa pagkahibalo nga ang Manluluwas nakapasaylo na sa atong mga sala? (Tabangi ang mga estudyante sa pag-ila og usa ka baruganan sama sa mosunod: Kon kita sinsero nga maghinulsol ug magbaton og hugot nga pagtuo diha ni Jesukristo, Siya mopasaylo kanato ug mopanalangin kanato uban sa hingpit nga kalipay ug kalinaw sa konsyensya.)
Kanus-a nimo nasinati ang hingpit nga kalipay ug kalinaw sa pagpasaylo gikan sa Ginoo, ug giunsa niini nga kasinatian pag-impluwensya sa imong kinabuhi? (Awhaga ang mga estudyante sa paghisgot kabahin sa ilang mga pagbati sa pagpasaylo ug dili ang mga detalye sa ilang mga sala.) Unsa ang imong mga hunahuna ug mga pagbati mahitungod sa abilidad ug tinguha sa Manluluwas sa pagpasaylo kanimo?

Atol sa inyong panaghisgot, mahimo nimong makaplagan nga kini makatabang sa pagpakigbahin sa mosunod nga pamahayag ni Elder Neil L. Andersen:

Alang niadtong kinsa tinuod nga mahinulsulon apan daw wala mobati og kahupayan: padayon sa pagsunod sa mga sugo. Ako mosaad kaninyo, ang kahupayan moabut sa panahon nga gitakda sa Ginoo. Ang pagpaayo nagkinahanglan usab og panahon. (“Paghinulsol … Aron Ako Moayo Kaninyo,” Liahona, Nob. 2009, 42)

Mubo nga Sulat: Alang sa mga estudyante kinsa mahimong mobati og pagkawala sa kadasig mahitungod sa proseso sa paghinulsol tungod kay ang ilang mga paningkamot wala pa moresulta sa kahupayan, paghatag og mga pulong sa pagdasig ug dapita sila sa pagpadayon sa pagduol ngadto sa Ginoo ug tingali sa pagpakigbahin sa ilang piho nga mga kabalaka ngadto sa ilang bishop.

Paghatag og panahon alang sa mga estudyante sa pagtimbang-timbang sa ilang mga kinabuhi ug sa pag-ila og bisan unsa nga ilang gikinahanglan nga pagahinulsolan. Dapita ang mga estudyante sa pagrekord sa bisan unsang mga panghunahuna nga ilang madawat.

Pakigbahin sa imong pagpamatuod sa doktrina sa paghinulsol ug kapasayloan. Hunahunaa ang pagdapit sa mga estudyante sa pagpakigbahin usab sa ilang mga pagpamatuod.

Alang sa Sunod nga Higayon

Pangutan-a ang mga estudyante kon giunsa sa ilang bunyag ug ubang mga pakigsaad pagpanalangin sa ilang mga kinabuhi. Dapita sila, samtang sila magtuon sa materyal sa pagpangandam alang sa sunod nga klase, sa paghunahuna mahitungod sa ilang dalan sa pakigsaad ug sa unsa nga paagi nga ang pagtahud sa mga pakigsaad mobugkos kanila ngadto sa Manluluwas ug sa Iyang gahum.

Ginagmay nga Grupo sa Panaghisgot kabahin sa Paghinulsol

Materyal sa Magtutudlo alang sa Mga Pagtulun-an ug Doktrina sa Basahon ni Mormon—Leksyon 10

Mubo nga sulat ngadto sa lider sa panaghisgot: Palihug gamita kini nga mga panudlo sa pag-abag og usa ka panaghisgot uban sa mga miyembro sa imong grupo. Awhaga ang tanang miyembro sa imong grupo sa pag-apil. Hinoon, ayaw pamugos; walay usa nga mobati nga giapura sa pagpakigbahin.

Dapita ang mga miyembro sa grupo sa paggahin og pipila ka mga minuto sa pagribyu sa seksyon 1 sa materyal sa pagpangandam ug sa kalabut nga mga tudling sa kasulatan (tan-awa sa Mosiah 27:35; Alma 36:12–13, 17–21, 24). Hangyoa ang mga estudyante sa pagpangita alang sa mga baruganan nga maggamit ngadto sa pangutana sa inyong grupo. Dapita usab ang mga miyembro sa grupo nga mangandam sa pagpakigbahin og bisan unsang dugang nga mga tudling sa kasulatan nga mahimong ilang nakaplagan samtang sila nangandam alang niini nga klase.

Pag-uban og desisyon hain sa mosunod nga mga pangutana ang mahimong labing importante nga hisgutan sa inyong grupo. Aron mas masabtan og maayo kini nga mga ideya, mahimong mas maayo ang paghisgot og usa o duha ka mga pangutana sa mas hingpit nga paagi kay sa pagsulay og tubag sa tanang mga pangutana sa taphaw nga paagi.

Unsa nga mga baruganan ang atong makat-unan gikan sa kasinatian ni Alma nga kalabut sa atong pangutana? Sa unsa nga mga paagi ikaw napanalanginan pinaagi sa pagsunod niini nga mga baruganan?
Unsa ang ubang mga tudling sa kasulatan o mga pagtulun-an gikan sa Basahon ni Mormon ang makatabang sa pagtubag niini nga pangutana? Giunsa sa mga kamatuoran nga gitudlo dinhi niini nga mga tudling pagtabang kanimo sa pagsinati sa gahum sa paghinulsol?
Unsa ang tahas ni Jesukristo sa atong paghinulsol? Unsa ang imong gibati mahitungod sa pagkaandam sa Manluluwas sa pagpasaylo kanimo sa imong mga sala?
Sa unsa nga paagi nga ang sugo sa paghalad ngadto sa Manluluwas og “usa ka masulub-on nga kasingkasing og usa ka mahinulsulon nga espiritu” (3 Nephi 9:20) may kalabut ngadto sa atong pangutana? (Kon ikaw maghisgot niining katapusang gimarkahan nga pangutana, makita nimo nga makatabang ang pagribyu sa 3 Nephi 9:19–20 ug sa pamahayag ni Elder Bruce D. Porter gikan sa seksyon 2 sa materyal sa pagpangandam.)