Leksyon 21 Materyal sa Magtutudlo

Pagbuntog sa Garbo

Ang sala sa garbo usa ka mahinungdanon nga tema sa Basahon ni Mormon. Ang mga panahon sa pagkamatarong ug pagkamauswagon kanunay gisundan sa mga panahon sa garbo ug kadaotan. Kini nga leksyon motabang sa mga estudyante nga makaila sa mga timailhan sa garbo sa ilang kaugalingon nga mga kinabuhi. Ang mga estudyante maghunahuna usab kon unsay ilang mabuhat aron sa pagbuntog sa garbo ug sa pagkahimong mas mahisama sa Manluluwas.

Mga Sugyot alang sa Pagtudlo

Si Jacob ug si Moroni nagtudlo mahitungod sa sala sa garbo.

Sa pagsugod sa klase, mahimo nimong ipakita ang mosunod nga pamahayag ni Elder J. Devn Cornish sa Seventy: “Hunungon nato ang pagtandi sa atong kaugalingon ngadto sa uban” (“Igo Ba Ang Akong Kamaayo? Makasulod Ba Ko Didto?” Liahona, Nob. 2016, 33). Pangutan-a ang mga estudyante kon nganong maayo kini nga tambag.

Ipaambit ang mosunod nga sitwasyon, ug pangutan-a ang mga estudyante kon sila o usa ka tawo nga ilang kaila mibati ba niini nga paagi.

Dili ganahan motambong si Jill sa mga miting sa Relief Society. Samtang motan-aw siya palibot sa lawak, ang tanan nga iyang makit-an mao ang mga babaye nga ingon og mas matahom, espirituhanon, ug talentado kay kaniya. Maglagot siya kanila tungod kay aduna sila niini nga mga kinaiya ug kasagaran mobiya sa Relief Society nga nasuko ug nasuya.

Ipakita ang mosunod nga pamahayag ni Presidente Dieter F. Uchtdorf, kinsa namulong mahitungod sa garbo samtang nagserbisyo isip usa ka sakop sa Unang Kapangulohan: “Ang kahulugan gayud niini, ang garbo usa ka sala sa pagkumpara” (“Garbo ug ang Priesthood,” Liahona, Nob. 2010, 56). Isulat sa pisara ang mosunod nga kamatuoran: Ang garbo usa ka sala sa pagkompara.

• Sa unsa nga mga paagi nga ang pagkompara sa atong kaugalingon sa uban mosangpot ngadto sa garbo?

Pagpalambo sa Atong Pagtudlo ug Pagkat-on

Ipahiangay aron matubag ang mga panginahanglan sa mga estudyante. Samtang ang kurikulum naghatag og importante nga mga kamatuoran, mga kapanguhaan, ug makatabang nga giya, dili kini makatubag sa tanang panginahanglan sa imong mga estudyante. Samtang magtudlo ka, paminaw pag-ayo sa mga komentaryo, mga pangutana, ug mga kabalaka sa mga estudyante aron ang Espiritu Santo makatabang kanimo nga mahibalo kon unsa ang tutukan ug unahon atol sa usa ka panaghisgot.

Pahinumdomi ang mga estudyante nga ilang nakat-onan gikan sa seksyon 1 sa materyal sa pagpangandam nga gipasidan-an ni Jacob ang iyang katawhan mahitungod sa ilang garbo, nakita nang daan ni Moroni ang garbo sa kataposang mga adlaw, ug namulong si Presidente Ezra Taft Benson bahin sa garbo diha sa gipahiuli nga Simbahan sa Ginoo. Dapita ang matag estudyante sa pagpili og usa niini nga mga propeta ug sa pagrebyo sa iyang mensahe bahin sa garbo, nga mangita og mga paagi nga “ang garbo usa ka sala sa pagkumpara” (“Garbo ug ang Priesthood,” 56).

Human nga ang mga estudyante makagahin og panahon sa pagsiksik niini nga mga tudling, dapita sila sa pagpaambit sa ilang nakat-onan. Samtang ang mga estudyante mopaambit sa ilang mga panabot, hunahunaa kon hain sa mosunod nga mga pangutana ang tutokan ug unahon:

• Unsa kaha ang gipasabot sa “gibayaw sa garbo sa inyong mga kasingkasing”? (Jacob 2:13). Unsaon ninyo pagkahibalo kon kamo gibayaw sa garbo sa inyong kaugalingong kasingkasing?

• Unsa nga dugang nga mga sala ang mapaila sa atong mga kinabuhi kon ubos ang atong pagtan-aw sa uban nga adunay pagkamapahitas-on o motan-aw sa uban nga adunay kalagot? Sa inyong kasinatian, sa unsang paagi kini nga mga matang sa pagkompara makaapekto sa mga relasyon sa mga higala, mga sakop sa pamilya, mga kauban sa kwarto [roommates], mga kauban sa trabaho, ug sa Langitnong Amahan?

• Sa unsa nga mga paagi nga ang social media makapasiugda og mga pagkompara nga mosangpot ngadto sa sala sa garbo? Unsa ang inyong gibuhat sa pagbuntog sa tintasyon nga ikompara ang inyong kaugalingon ngadto sa uban?

Pahinumdom: Kon ang mga estudyante mopahayag og kabalaka kabahin sa mga hagit nga gihatag sa social media, mahimo nimong ipaambit ug hisgotan ang mosunod nga pamahayag ni Elder Gary E. Stevenson sa Korum sa Napulog Duha ka mga Apostoles:

Elder Gary E. Stevenson

Daghan (kon dili kadaghanan) sa mga litrato nga gibutang diha sa social media nahilig sa pagpagpakita sa kinabuhi sa labing nindot niini—kasagaran dili katuohan. …

Kon atong itandi ang atong kaugalingong sagad nga kinabuhi ngadto sa uban nga gi-edit, nga maayong pagkapahiluna, hingpit nga pagkahimo nga mga kinabuhi ingon nga girepresentar sa social media usahay kita adunay mga pagbati nga mawad-an og kadasig, masina, ug gani pagkapakyas. …

Samtang mipahinumdom si Sister Bonnie L. Oscarson nato karong buntaga, ang kalampusan sa kinabuhi dili moabut kon pila ka likes ang atong makuha o pila ka friends o sumusunod kita aduna. Hinoon, kini adunay usa ka butang nga mahimo sa pagkonektar sa makahuluganong paagi ngadto sa uban ug sa pagdugang og kahayag ngadto sa ilang mga kinabuhi. (“Espiritwal nga Eklipse,” Liahona, Nob. 2017, 46)

Hangyoa ang mga estudyante nga moadto sa mga pangutana sa kataposan sa seksyon 1 sa materyal sa pagpangandam. Dapita sila sa pagribyu sa mga tubag nga ilang girekord atol sa ilang personal nga pagtuon ug mopuno og bisan unsang dugang pa nga mga hunahuna o mga pagbati nga ilang naangkon sukad sa pagrekord sa ilang mga tubag.

Ang mga Nephite mibuntog sa garbo pinaagi sa pagkamapainubsanon.

Hangyoa ang usa ka estudyante sa pagpasabot sa katuyoan sa usa ka panagang [antidote]. (Kon gikinahanglan, ipasabot nga ang usa ka panagang usa ka tambal nga tumaron sa pagbatok sa usa ka piho nga hilo.) Ipakita ang mosunod nga pamahayag ni Presidente Benson: “Ang panagang sa garbo mao ang pagkamapainubsanon—pagkamaaghop, pagkamanunuton. (Tan-awa sa Alma 7:23.)” (“Beware of Pride,” Ensign, Mayo 1989, 6). Isulat sa pisara ang mosunod nga kamatuoran: Ang pagkamapainubsanon mao ang panagang sa garbo.

• Sa unsang mga paagi nga ang garbo mahimong sama sa usa ka hilo?

• Ngano kaha nga gihulagway ni Presidente Benson ang pagkamapainubsanon isip ang panagang sa garbo?

Pahinumdomi ang mga estudyante nga sa Jacob 2:17–21, gisultian ni Jacob ang iyang mga tawo kon unsaon sa pagbuntog sa tintasyon sa garbo samtang nagkadaghan ang ilang mga bahandi. Pahinumdomi usab ang mga estudyante nga ilang nakat-onan gikan sa ilang pagpangandam sa klase nga ang 3 Nephi 6:12–14 naghulagway sa mapainubsanon nga mga tawo kinsa midumili nga molihok sa mapagarbohon nga paagi. Dapita ang mga estudyante sa pagrebyo og usa niini nga mga tudling, nga mangita kon unsay mabuhat nato aron sa pagbuntog sa garbo.

• Sumala niini nga mga bersikulo, unsay atong mabuhat aron sa pagbuntog sa garbo? (Mahimo nimong ilista ang mga tubag sa mga estudyante diha sa pisara. Pipila sa posible nga mga tubag mahimong maglakip sa mosunod: magmanggihatagon sa unsay anaa kanato, tinguhaon og una ang gingharian sa Dios, magbaton og paglaom diha ni Kristo, moatiman sa mga kabos, tan-awon nga bililhon ang tanang tawo, dili makiglalis sa uban, magmapainubsanon ug mahinulsulon sa atubangan sa Dios, ug mosunod sa mga kasugoan.)

• Sa unsang paagi nga kini nga mga kinaiya ug mga aksiyon nagpakita og pagkamapainubsanon?

• Unsay inyong nakat-onan mahitungod sa pagkamapainubsanon gikan sa kinabuhi sa Manluluwas? Sa unsang paagi nga atong masunod ang Iyang ehemplo sa pagkamapainubsanon sa atong kinabuhi?

Hatagi og pipila ka minuto ang mga estudyante sa pagrebyo sa pamahayag ni Presidente Benson sa seksyon 2 sa materyal sa pagpangandam. Awhaga sila sa pag-ila og piho nga paagi nga sila makaugmad og dugang nga pagkamapainubsanon sa ilang kinabuhi ug sa paghukom kon unsaon nila sa pagbuhat sa ingon.

Ikonsiderar ang paghatag og pagpamatuod nga pinaagi sa tabang sa Ginoo kita makapadayon sa pag-ila ug pagbuntog sa garbo ug mahimong mas mahisama sa Manluluwas.

Alang sa Sunod nga Higayon

Pangutan-a ang mga estudyante kon nakabasa o nakadungog ba sila og mga butang nga nakamugna og pagduhaduha o milalis sa mga pagtulun-an ni Jesukristo ug sa iyang buhi nga mga propeta. Samtang magtuon ang mga estudyante sa materyal sa pagpangandam alang sa sunod nga klase, dapita sila nga mangita og mga pagtulun-an nga makatabang kanila sa pagpanalipod sa ilang kaugalingon batok niadtong kinsa nagtinguha sa paglaglag sa ilang pagtuo.