Leksyon 7 Materyal sa Magtutudllo

Ang Makapalig-on nga Gahum ni Jesukristo

Ang Basahon ni Mormon nagpatin-aw sa atong pagsabut sa gilapdon ug giladmon sa Pag-ula sa Manluluwas. Gikan niini kita nagkat-on nga si Jesukristo wala lamang maghatag kanato og oportunidad nga malimpyo gikan sa sala, apan Siya usab makahupay ug makatabang kanato sa atong mga kaluyahon ug mga kahuyang. Atol niini nga leksyon, ang mga estudyante makabaton og oportunidad sa pagpasabut ug pagpamatuod kabahin niini nga doktrina. Ang mga estudyante mahatagan usab og oportunidad sa pag-ila kon unsay ilang mahimo sa pagdapit pa sa grasya sa Ginoo nganha sa ilang mga kinabuhi.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Pagsugod nga ang mga estudyante ang gihunahuna. Ang mga estudyante moanha sa klase nga may daan na nga kasinatian, kahibalo, ug mga pangutana. Makatugot kita sa bag-ong nasabtan sa mga estudyante nga mahimong sinugdanan samtang naggiya kita kanila ngadto sa proseso sa pagkat-on. Sa tibuok niini nga paagi samtang ikaw nagsugod sa klase o nagsugod sa pagsulti mahitungod sa piho nga mga hilisgutan, hunahunaa kon unsaon kaha nimo sa pagdiskubre kon unsa nga mga pangutana ug mga panabut ang gilauman sa mga estudyante nga hisgutan, ug niana ipahiangay ang imong mga plano ingon nga gigiyahan sa Espiritu.

Si Alma nga Batan-on nagtudlo sa mga katawhan sa Gideon nga ang Ginoo motabang sa Iyang mga katawhan.

Hunahunaa ang pagpakita og mga hulagway sama sa mosunod ug pangutana “Unsa nga mga pakigbisog, mga sakit, o mga kasakit nga tingali atong masinati nga dili ang resulta sa makasasala nga mga pagpili?” (Ilista ang mga tubag sa estudyante diha sa pisara.)

babaye nga naghilak

batan-ong lalaki naghigda sa katre sa ospital

batan-ong babaye nagmasulub-on

lalaki nga naka-wheel chair

Hatagi og usa ka minuto ang mga estudyante sa pagpamalandong (ug kaha pasulaton) sa pipila ka mga hagit nga nakahimo og sakit o pag-antus alang kanila o alang niadtong ilang gimahal.

Pahinumdumi ang mga estudyante nga sa dihang si Alma nga Batan-on nangalagad ngadto sa matinud-anong mga tawo sa Gideon, mitudlo siya kanila kon sa unsa nga paagi ang pag-antus sa Manluluwas makatabang usab kanato sa mga sakit ug mga kasakit nga dili tungod sa sala. Dapita ang mga estudyante sa pagribyu sa Alma 7:11–12 ug sa pagpangita sa bisan unsa nga mga hugpong sa mga pulong nga importante nganha kanila. Dapita sila sa pagpasabut sa unsay ilang nakaplagan ug nganong kini importante nganha kanila.

Sa pagtabang nga malig-on ang pagsabut sa mga estudyante kabahin sa kahibalo sa Manluluwas sa pagtabang sa Iyang mga katawhan, mahimo nimong ipakigbahin ang mosunod nga pamahayag gikan ni ElderJeffrey R. Holland sa Korum sa Napulog Duha ka mga Apostoles:

Elder Jeffrey R. Holland

[Pagtabang] kasagaran kining gigamit diha sa mga kasulatan sa paghulagway sa pag-amuma ug pagpakabana ni Kristo kanato. Kini nagpasabut og literal nga “pagdagan ngadto.” Unsa ka nindot kaayo nga paagi sa paghulagway sa dinaliang paninguha sa Manluluwas tungod kanato. Bisan og siya nagtawag kanato sa pagduol ngadto kaniya ug sa pagsunod kaniya, siya walay pagkapakyas nga nagdagan sa pagtabang kanato. (“Come unto Me” [Church Educational System fireside alang sa mga kabatan-onan, Mar. 2, 1997], 9, speeches.byu.edu)

Human sa paghisgot sa mga pagtulun-an gikan sa Alma 7:11–12, tabangi ang mga estudyante sa pag-ila og usa ka baruganan nga susama sa mosunod: Ang Manluluwas midala diha sa Iyang Kaugalingon sa atong mga kasakit, mga sakit, ug mga pagtintal aron Siya makatabang kanato samtang nagsinati kita og mga hagit sa mortalidad.

• Nganong importante ang pagsabut niini nga bahin sa doktrina sa Pag-ula sa Manluluwas?

• Unsa ang gitudlo niini nga kamatuoran mahitungod sa kinaiyahan ug kinaiya ni Jesukristo?

• Sa unsa nga paagi nga ang pagbaton og hugot nga pagtuo niini nga kamatuoran nagtabang kanimo o sa imong mga minahal sa panahon sa kaugalingong mga hagit?

Isip usa ka klase o sa ginagmay nga grupo, basaha ang pamahayag ni Elder Bednar gikan sa seksyon 1 sa klase sa materyal sa pagpangandam, ug hisguti ang mosunod nga pangutana gikan sa materyal sa pagpangandam:

• Kanus-a nimo gibati ang pagtabang sa Manluluwas sa, paghupay, o paglig-on kanimo samtang ikaw nagsinati og mga hagit diha sa imong kinabuhi?

Nagtudlo ang Ginoo ni Moroni mahitungod sa gahum sa Iyang grasya.

Ipakita ang mosunod nga hulagway, ug dapita ang usa ka estudyante sa pagpasabut kon giunsa ni Moroni pagbati ang mahitungod sa iyang abilidad sa pagsulat og balaang kasulatan. (Kon kinahanglan, ribyuha ang Ether 12:23–25 uban sa mga estudyante.)

Gitago ni Moroni ang mga Palid didto sa Bungtod sa Cumorah, ni Tom Lovell

Mahimo kang modapit og mga estudyante sa paggahin og usa ka minuto sa pagsulat o sa pagpamalandong mahitungod sa pipila sa ilang mga kakulangan o mga kahuyang.

Pagbasa og dungan sa Ether 12:27 ug dapita ang mga estudyante sa pagpangita og mga baruganan nga makatabang kanato sa pag-atubang sa atong mga kahuyang diha sa pamaagi sa Ginoo. Mahimong ilhon sa mga estudyante ang mga kamatuoran nga susama sa mosunod: Samtang kita moduol ngadto sa Ginoo, Siya motabang kanato sa pag-ila sa atong mga kahuyang. Ang pag-ila sa atong kahuyang makatabang kanato nga magpainubsanon. Kon kita magpaubos sa atong mga kaugalingon ug magbaton og hugot nga pagtuo diha sa Manluluwas, ang Iyang grasya makahimo sa atong kahuyang ngadto sa kalig-on. Ipakita ang mga kamatuoran nga giila sa mga estudyante aron sila makahimo niini nga kapanguhaan sa mosunod nga kalihokan.

Pagpalambo sa Atong Pagtudlo ug Pagkat-on

Tabangi ang mga estudyante nga makahibalo ug makasabut sa mga baruganan ug sa doktrina. Human maila sa mga estudyante ang mga baruganan ug doktrina gikan sa mga kasulatan ug sa mga pulong sa mga propeta, tabangi sila sa pagsabut sa mga kahulugan ug gagmay nga mga kausaban niini nga mga kamatuoran ug sa unsa nga paagi kini nga mga kamatuoran makaapekto sa ilang mga kinabuhi. Kini nga kahibalo ug pagsabut moabut samtang ang mga estudyante nagpasabut og usa ka pamahayag sa doktrina o baruganan ug makigbahin og mga ehemplo ug mga kasinatian nga kalabut ngadto niini. Pag-ampo alang sa panabang sa pagpangutana nga moabli sa mga hunahuna ug mga kasingkasing sa mga estudyante ngadto sa koneksyon ug importansya sa mga baruganan nga ilang giila.

Dapita ang mga estudyante sa pagpasabut, isip usa ka klase o sa ginagmay nga mga grupo, kon unsa ang kahulugan niini nga mga baruganan ngadto kanila.

Sa pagtabang sa mga estudyante sa paghunahuna ug pagbati nga mas lawom mahitungod niini nga mga baruganan, mahimo nimong ipakita ang pipila sa mosunod nga mga pangutana ug papilia ang mga estudyante hain ang hisgutan og dungan. Tingali walay igo nga panahon sa paghisgot sa tanan niini.

• Sa unsa nga paagi ang usa ka kahuyang mahimong usa ka panalangin ngadto sa usa ka tawo? (Kon tinguhaon, gamita nga kapanguhaan ang pamahayag ni Sister Michelle D. Craig diha sa seksyon 2 sa materyal sa pagpangandam.)

• Unsaon nimo pagpasabut ang grasya sa Ginoo ngadto sa usa ka tawo kinsa mibati nga siya dili makahimo sa pagbiya sa usa ka sala o naandan nga buhat?

• Unsa ang imong nakat-unan mahitungod sa Manluluwas pinaagi sa pagsinati sa proseso sa pagpaubos sa imong kaugalingon ug sa pagsalig sa Iyang grasya diha sa imong kinabuhi?

• Unsa ang atong himoon sa pagdapit og hingpit sa grasya sa Ginoo nganhi sa atong mga kinabuhi? (Hunahunaa ang pagribyu sa 2 Nephi 25:23, 29 ug sa mga pamahayag sa mga lider sa Simbahan diha sa seksyon 3 sa materyal sa pagpangandam.)

Ipamatuod (o dapita ang usa ka estudyante sa pagpamatuod), sa Pag-ula sa Manluluwas, ilabi na sa Iyang gahum sa pagtabang kanato sa pagbuntog sa mga kasakit, kasub-anan, kahuyang, ug kakulangan.

Hatagi ang mga estudyante og panahon sa pagpamalandong o pagrekord og personal nga mga panghunahuna nga ilang gibati atol sa leksyon karon. Mahimo kang modapit kanila sa paghunahuna sa mosunod nga mga pangutana: Unsa kaha ang gusto sa Ginoo nga imong buhaton aron sa pag-angkon og mas dako nga agianan ngadto sa Iyang grasya? Unsa ang imong mabuhat sa pag-atubang og usa ka bag-ong kahuyang uban sa mas dakong pagpaubos ug hugot nga pagtuo diha ni Kristo?

Alang sa Sunod nga Higayon

Hangyoa ang mga estudyante sa paghunahuna kon unsay ilang mga pangutana mahitungod sa kalibutan sa espiritu, Pagkabanhaw, o Katapusang Paghukom. Samtang sila nangandam alang sa sunod nga klase, dapita sila sa paghunahuna mahitungod sa unsay ilang gibuhat sa pagpangandam alang sa kinabuhi human sa kamatayon.