“Leksyon 6 Materyal sa Pagpangandam sa Klase: Ang Walay Kinutuban nga Pag-ula ni Jesukristo,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 6 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 6 Materyal sa Pagpangandam sa Klase
Ang Walay Kinutubang Pag-ula ni Jesukristo
Unsa ang imong mga pagbati ug mga hunahuna samtang ikaw namalandong kabahin sa pag-antus sa Manluluwas didto sa Tanaman sa Getsemani ug didto sa krus? Si Presidente Russell M. Nelson mitudlo, “Ang Basahon ni Mormon naghatag sa kahingpitan sa labing masaligon nga pagsabut sa Pag-ula ni Jesukristo nga makaplagan bisan asa” (“Ang Basahon ni Mormon: Unsa kaha ang Imong Kinabuhi Kon Wala Kini?” Liahona, Nob. 2017, 62). Samtang ikaw magtuon unsay gitudlo sa Basahon ni Mormon mahitungod ni Jesukristo ug sa Iyang Pag-ula, paghunahuna mahitungod kon sa unsa nga paagi Siya mitubos kanimo gikan sa mga epekto sa Pagkapukan ug mihimo niini nga posible alang kanimo nga mahimong mas mahisama Kaniya ug sa atong Amahan sa Langit.
Seksyon 1
Nganong ako nagkinahanglan nga modawat sa Pag-ula ni Jesukristo?
Sa mga 74 BC, si propeta Alma nangulo og usa ka misyon ngadto sa mga Zoramite, kinsa dihay dautan nga paagi sa pagsimba ug mitudlo nga “walay Kristo” (Alma 31:16). Sa dihang si Alma ug Amulek misangyaw ngadto sa usa ka pundok sa kabus nga mga Zoramite kinsa gipapahawa sa ilang mga dapit sa pagsimba, mitudlo sila kanila kon unsaon pagsimba ang Dios ug maisugon nga mipamatuod nga si Kristo moabut ug mobuhat og usa ka walay kinutuban nga Pag-ula.
Kita nahibalo gikan sa mga kasulatan ug mga pagpadayag niining moderno nga panahon nga ang “Pag-ula ni [Jesukristo] naglakip sa Iyang pag-antus alang sa mga sala sa katawhan, sa pagpaagas sa Iyang dugo, ug sa Iyang kamatayon ug sa misunod nga pagkabanhaw gikan sa lubnganan” (Giya ngadto sa mga Kasulatan, “Pag-ula, Pag-ula sa Dugo,” scriptures.ChurchofJesusChrist.org).
Pagtuon agi og Pagpangandam alang sa Klase
Basaha ang Alma 34:8–10, mangita sa unsay gitudlo ni Amulek mahitungod sa atong panginahanglan alang sa Pag-ula ni Jesukristo.
Gitudlo ni Presidente Russell M. Nelson ang mosunod mahitungod sa walay kinutuban nga Pag-ula sa Manluluwas:
“Ang Pag-ula [ni Jesukristo] walay kinutuban—walay katapusan. Kadto usab walay kinutuban diin ang tanang katawhan maluwas gikan sa walay katapusan nga kamatayon. Kadto walay kinutuban kon hisgutan ang hilabihan Niya nga pag-antus. Kadto walay kinutuban sa panahon, nga mitapos sa nag-una nga sundanan sa pagsakripisyo og hayop. Walay kinutuban kini sa gidak-on—kinahanglan kadtong pagahimoon karon gayud dayon. Ug ang grasya sa Pag-ula molugway dili lamang sa walay kinutubang gidaghanon sa katawhan, apan ngadto usab sa walay kinutubang gidaghanon sa mga kalibutan nga Iyang gilalang. Kadto walay kinutuban sa bisan unsang tawhanong pangsukod o mortal nga panabut.
Si Jesus mao lamang ang makahalad sa ingon nianang walay kinutuban nga pag-ula, kay gipakatawo Siya sa mortal nga inahan ug imortal nga Amahan. Tungod nianang talagsaong katungod sa pagkatawo, si Jesus usa ka walay kinutuban nga Binuhat. (“Ang Pag-ula,” Liahona, Mayo. 2019, 85–86)
Si propeta Jacob mihatag usab og usa ka gamhanang pakigpulong nga nagtubag sa atong panginahanglan alang sa walay kinutubang Pag-ula sa Manluluwas ug giunsa ni Jesus pagluwas kanato gikan sa mga epekto sa Pagkapukan ug sa mga sangputanan sa atong mga sala.
Pagtuon agi og Pagpangandam alang sa Klase
Tun-i ang 2 Nephi 9:6–10, 19–22, mangita sa unsa unta kahay mahitabo kon wala ang walay kinutuban nga Pag-ula sa Manluluwas.
Makabaton kita og hingpit nga pagsalig nga pinaagi sa walay kinutubang Pag-ula sa Manluluwas makahinulsol kita sa atong mga sala ug mahimong limpyo. Si Presidente Tad R. Callister, kanhi Kinatibuk-ang Presidente sa Sunday School, mihatag sa mosunod nga pahimatngon mahitungod sa pagbutang og mga kinutuban diha sa Pag-ula sa Ginoo:
Dihay okasyon, nakahimamat ko og buotan nga mga Santos kinsa naglisud sa pagpasaylo sa ilang kaugalingon, kinsa inosente apan sayop nga mibutang og kinutuban sa matubsanong mga gahum sa Manluluwas. Wala tuyoa, ilang giusab ang walay kinutuban nga Pag-ula ngadto sa dunay kinutuban nga sa usa ka paagi dili makatabang sa ilang piho nga sala o kahuyang. Apan kini usa ka walay kinutuban nga Pag-ula tungod kay kini naglakip ug naglangkob sa matag sala ug kahuyang, ingon man usab sa matag abuso o kasakit nga nahimo sa uban. (“Ang Pag-ula ni Jesukristo,” Liahona, Mayo 2019, 86)
Pamalandong agi og Pagpangandam alang sa Klase
Sa unsa nga paagi nga ang pagkahibalo nga ang Pag-ula sa Manluluwas walay kinutubang nakaapekto sa paagi sa imong pagsabut ug pagtubag sa imong kaugalingong mga pakigbisog ug mga kabalaka? Ikaw ba sa tinuoray nagtuo nga ang walay kinutubang Pag-ula ni Jesukristo makatabang ug makaluwas kanimo?
Seksyon 2
Sa unsa nga paagi ang Pag-ula ni Jesukristo nagtabang kanako sa pagbuntog sa kinaiyanhon [natural] nga tawo?
Sa nagsingabut ang katapusan sa kinabuhi ni Hari Benjamin, mihatag siya og usa ka gamhanang pakigpulong nga nakasentro ni Kristo ngadto sa iyang katawhan. Atol niini nga sermon gipakigbahin niya kon unsa ang gitudlo sa anghel kaniya mahitungod sa pangalagad ug Pag-ula ni Jesukristo. Siya mitudlo nga kita makabuntog sa kinaiyanhon, o makasasala, nga bahin sa atong mga kaugalingon pinaagi lamang sa Pag-ula sa Ginoo.
Pagtuon agi og Pagpangandam alang sa Klase
Basaha ang Mosiah 3:19, mangita alang sa unsay imong mabuhat sa pagbuntog sa kinaiyanhon nga tawo.
Si Elder David A. Bednar sa Korum sa Napulog Duha ka mga Apostoles mihatag sa mosunod nga mga panabut mahitungod sa natural nga lalaki o babaye:
Sa pipila ka matang, ang kinaiyanhon nga tawo nga gihulagway ni Hari Benjamin buhi ug maayo diha sa matag usa kanato (tan-awa sa Mosiah 3:19). Ang natural nga lalaki o babaye dili mahinulsulon, kalibutanon ug mahilayon (tan-awa sa Mosiah 16:5; Alma 42:10; Moses 5:13), mapatuyangon ug mapasulabihon, ug puno sa garbo ug hakog. Sama sa gitudlo ni Presidente Spencer W. Kimball, “Ang ‘kinaiyanhon nga tawo’ mao ang ‘kalibutanong tawo’ kinsa mitugot og linuog nga init nga mga pagbati nga mongiub sa iyang espirituhanon nga mga kahilig” (“Ocean Currents and Family Influences,” Ensign, Nob. 1974, 112). …
Ang tukmang matang sa pagsulay sa mortalidad, ma-summarize sa mosunod nga pangutana: Ako ba mosunod sa mga kahilig sa kinaiyanhon nga tawo, o motugyan ba ako sa mga pagdani sa Balaang Espiritu ug mosalikway sa kinaiyanhon nga tawo ug mahimo nga usa ka santos pinaagi sa Pag-ula ni Kristo ang Ginoo (tan-awa sa Mosiah 3:19)? Kana mao ang pagsulay. Ang tanang gana, tinguha, kahilig, ug diha-diha nga gusto sa kinaiyanhon nga tawo mabuntog pinaagi sa Pag-ula ni Jesukristo. Kita ania sa yuta aron sa pagpalambo og diosnong mga kinaiya ug pugngan ang tanang kahigal. (“Kita Nagtuo sa Pagkaputli,” Liahona, May 2013, 42, 43)
Pamalandong agi og Pagpangandam alang sa Klase
Gibati na ba nimo sukad nga ingon og ikaw dili makapugong o makabuntog sa mga gana ug diha-diha nga mga gusto sa kinaiyanhon nga lalaki o babaye? Sa unsa nga paagi nga ang mga pagtulun-an diha sa Mosiah 3:19 magdala kanimo og paglaum nga ikaw makahimo og matarung nga mga kausaban ug mahimong mas mahisama sa Manluluwas?