Leksyon 22 Materyal sa Magtutudlo

Pagpanalipod sa Atong Kaugalingon batok sa Sayop nga mga Doktrina sa Kataposang mga Adlaw

Si Presidente Ezra Taft Benson mitudlo nga “ang Basahon ni Mormon nagbutyag sa mga kaaway ni Kristo [ug] nagbuntog sa bakak nga mga doktrina” (Mga Pagtulun-an sa mga Presidente sa Simbahan: Ezra Taft Benson [2014], 158). Niini nga leksyon, ang mga estudyante moila sa mga taktika nga gigamit sa kaaway sa paglaglag sa hugot nga pagtuo kang Jesukristo ug sa Iyang ebanghelyo. Ang mga estudyante motino usab kon unsaon nila nga makagamit sa tabang sa Manluluwas aron sa pagpalig-on sa ilang kaugalingon batok niana nga mga taktika.

Mga Sugyot alang sa Pagtudlo

Si Nephi nanagna sa sayop nga mga pagtulun-an sa kataposan nga mga adlaw.

Hangyoa ang mga estudyante sa paghunahuna og panahon diin sila (o usa ka tawo nga ilang nailhan) nakasugat og mga ideya o mga pagtulun-an nga nagpahuyang o naghagit sa ilang pagtuo kang Jesukristo ug sa Iyang gipahiuli nga ebanghelyo. Dapita ang usa o duha ka estudyante nga magpaambit og kadiyot sa ilang mga kasinatian.

• Sa unsang paagi kaha nga ang Basahon ni Mormon makapanalipod kanato batok sa mga ideya o mga pagtulun-an nga makapahuyang sa atong pagtuo kang Jesukristo ug sa Iyang ebanghelyo? (Ikonsiderar ang pagribyu sa mga pamahayag ni Presidente Benson ug Presidente Russell M. Nelson diha sa seksyon 1 sa materyal sa pagpangandam.)

Isulat ang pulong Sayop nga mga Pagtulun-an sa pisara. Dapita ang mga estudyante sa pagrebyo sa 2 Nephi 28:7–9, 20–22, 29–30 ug sa pagpangita og mga pagtulun-an nga mohaom ubos niini nga ulohan. Dayon isulat ang mga tubag sa mga estudyante ubos sa ulohan diha sa pisara.

• Unsa ang pipila ka ehemplo niini nga mga pagtulun-an nga inyong nailhan sa atong panahon? Sa unsa nga mga paagi nga kining mga pagtulun-an nagtinguha sa pagpahuyang sa pagtuo diha kang Jesukristo ug sa Iyang ebanghelyo?

• Unsay imong nahimo aron sa pagpanalipod sa imong kaugalingon batok niining sayop nga mga ideya?

Si Sherem, Nehor, ug Korihor nagtinguha sa paglaglag sa pagtuo diha kang Jesukristo.

Ipasabot nga ang uban niadtong diha sa Basahon ni Mormon kinsa mitudlo og sayop nga mga doktrina mao ang tulo ka anti-kristo: si Sherem, Nehor, ug Korihor. Ang matag usa misulay sa paglaglag sa pagtuo niadtong kinsa mituo kang Jesukristo.

Hatagi ang mga estudyante og pipila ka minuto sa pagrebyo sa asoy nga ilang gitutokan diha sa seksyon 2 sa materyal sa pagpangandam. Dapita ang mga estudyante nga wala magtuon sa usa niini nga mga asoy sa pagbuhat sa ingon atol niining panahona.

Human sa igo nga panahon, dapita ang mga estudyante sa pagporma og gagmay nga mga grupo uban niadtong kinsa mituon sa pareho nga asoy. Hangyoa ang matag grupo sa pagtudlo og usa ka sakop sa grupo isip lider sa grupo. Hatagi ang matag lider sa grupo og kopya sa gisukip nga handout, “Pagbutyag sa mga Taktika ni Satanas.”

Pagbutyag sa mga Taktika ni Satanas

Materyal sa Magtutudlo alang sa Mga Pagtulun-an ug Doktrina sa Basahon ni Mormon—Leksyon 22

Pahinumdom ngadto sa lider sa panaghisgot: Giyahi ang imong grupo sa paghisgot sa mosunod nga mga pangutana. Dapita ang mga sakop sa grupo sa paggamit sa mga kasulatan ug mga pamahayag sa mga lider sa Simbahan diha sa seksyon 2 sa materyal sa pagpangandam. Awhaga ang tanang mga sakop sa inyong grupo sa pag-apil. Hinoon, kinahanglan walay usa nga mobati nga gipugos sa pagpaambit sa ilang mga hunahuna.

1. Unsa nga mga taktika ang gigamit niini nga anti-kristo sa paglaglag sa pagtuo sa mga tawo diha kang Jesukristo ug sa Iyang ebanghelyo?

2. Unsa ang pipila ka modernong mga ehemplo sa sayop nga mga ideya nga gitudlo o mga pamaagi nga gigamit sa anti-kristo niini nga asoy? Giunsa pagpakatap ni Satanas kini nga mga ideya sa atong panahon?

Pag-andam sa pagpaambit og usa ka taktika ug usa ka moderno nga ehemplo niana nga taktika ngadto sa klase.

© 2021 by Intellectual Reserve, Inc. All rights reserved.

Pagbutyag sa mga Taktika ni Satanas

iapud-apod nga materyal sa magtutudlo

Human ang mga estudyante nakahisgot sa mga pangutana sa giapod-apod nga materyal, dapita ang matag lider sa grupo sa pagsulat sa pisara og usa o mas daghan pa nga mga taktika ni Satanas nga giila ug gihisgotan sa ilang grupo. Awhaga ang matag lider sa grupo sa pagpaambit kadiyot og moderno nga ehemplo sa usa niini nga mga taktika. Mahimo silang mosulat og pipila ka kamatuoran nga susama sa mosunod:

• Si Satanas mogamit og pag-ulog-ulog ug gahom sa pagpamulong aron ipahilayo ang mga tawo sa pagpakita og pagtuo diha kang Jesukristo ug sa pagsunod sa Iyang mga propeta (tan-awa sa Jacob 7:4). (Mahimong makatabang ang pagpasabot nga kasagaran kadtong nag-atake sa atong relihiyon nagbuhat sa ingon gamit ang katunga nga mga kamatuoran, pinulongan nga makapakugang, dili balanse nga mga pangatarongan, sayop nga mga pamahayag, ug mga kamatuoran nga wala sa konteksto. Kini nga mga pangatorangan kanunay nga makasurprisa sa mga tigpaminaw ug daw makataronganon apan gituyo aron makamugna og pagduhaduha. [Tan-awa sa Dallin H. Oaks, “Reading Church History” (pakigpulong ngadto sa mga religious educator sa Church Educational System, Ago. 16, 1985), 1–27.])

• Si Satanas mogamit og mga bakak nga gisagolan og kamatuoran aron sa paglingla sa mga tawo (tan-awa sa Alma 1:4; tan-awa usab sa Jacob 7:7).

• Si Satanas mogamit og bakak nga mga doktrina aron sa pag-agni kanato nga ibaliwala ang Dios ug mangatarongan sa paghimo og sala (tan-awa sa Alma 1:4; 30:17–18).

• Si Satanas nagtinguha sa pagwagtang sa pagtuo sa katawhan kang Jesukristo pinaagi sa pagbugalbugal sa ilang kahibalo o sa ilang mga gituohan (tan-awa sa Alma 30:13–16, 27–28).

Pahinumdom: Kon ang mga estudyante mopaambit og moderno nga mga ehemplo nga maoy mahimong hinungdan sa kalibog o panagbingkil, sunda ang Espiritu sa pagpaklaro sa bisan unsa nga dili husto nga mga pamahayag ug sa paggiya sa panaghisgot balik ngadto sa mga kamatuoran nga gitudlo dinhi niini nga leksyon.

Human nakapresentar ang mga lider sa grupo, ikonsiderar ang pagpangutana:

• Unsay labing mahinungdanon kaninyo mahitungod kon giunsa pagtubag nila ni Jacob, Gideon, ug Alma ang mga pulong ug mga buhat sa mga anti-kristo?

Ikonsiderar ang pagsulat sa mosunod nga dili kompleto nga pamahayag diha sa pisara: Atong mabuntog ang mga hagit sa atong pagtuo kang Jesukristo ug sa Iyang ebanghelyo pinaagi sa …

Pagpalambo sa Atong Pagtudlo ug Pagkat-on

Pag-ila ug pagsabot sa mga baroganan ug doktrina. Tuguti ang mga estudyante nga moila og mga kamatuoran gikan sa mga kasulatan ug sa mga pulong sa mga propeta. Dapita sila sa pagpasabot kon ngano nga mahinungdanon kanila ang piho nga mga kamatuoran. Hangyoa usab ang mga estudyante sa paghunahuna kon unsay gitudlo sa mga baroganan ug doktrina kanila mahitungod sa Ginoo nga si Jesukristo. Ang pagbuhat sa ingon motabang kanila nga makasabot sa kaimportante sa mga kamatuoran ug mobati nga nadasig sa paggamit niini.

Dapita ang mga estudyante sa pagkompleto niini nga pamahayag gamit ang unsay ilang nakat-onan gikan sa mga pulong ug buhat nila ni Jacob, Gideon, ug Alma. Ang mga estudyante mahimong mokompleto sa pamahayag gamit ang pipila sa mosunod nga mga paagi:

• … paghinumdom sa milabay nga mga kasinatian nga nakapalig-on sa atong pagtuo diha Kaniya (tan-awa sa Jacob 7:5).

• … pagsalig sa giya gikan sa Espiritu Santo (tan-awa sa Jacob 7:8).

• … pagsalig sa mga pulong sa mga propeta ug sa pagpaambit sa atong mga pagpamatuod kang Jesukristo ug sa Iyang ebanghelyo (tan-awa sa Jacob 7:9–12; Alma 1:7; 30:39–44).

• … pagsalig sa Ginoo ug pagtugyan sa sangpotanan sa Iyang mga kamot (tan-awa sa Jacob 7:13–14).

Hangyoa ang mga estudyante sa pagpamalandong hain sa mga nakompleto nga mga pamahayag sa pisara ang ilang personal nga nasinati. Dapita ang pipila sa mga estudyante sa pagpaambit kon unsay ilang nahibaloan ug gibati mahitungod sa ilang gipili nga pamahayag.

Aron sa pag-awhag sa mga estudyante nga mohimo og matarong nga aksiyon, ikonsiderar ang pagpakita sa mosunod nga mga pangutana ug pagdapit sa mga estudyante sa pagpamalandong sa grupo sa mga pangutana nga labing mahinungdanon alang sa ilang kahimtang. Mahimo usab nimong dapiton ang mga estudyante sa pagrekord sa ilang mga hunahuna ug mga pagbati.

• Aduna bay usa ka tawo, blog, o website nga akong gi-follow nga nagpahuyang sa akong pagtuo diha ni Jesukristo ug sa Iyang gipahiuli nga ebanghelyo? Sa pagkonsiderar sa unsay akong nakat-onan ug gibati karon, unsay akong kinahanglang buhaton aron mas mapanalipdan pa ang akong pagtuo batok niadtong kinsa nagtinguha sa pagpahuyang niini?

• Kinsa ang akong nailhan nga nanglimbasog sa iyang pagtuo tungod sa impluwensya sa mga mensahe o sa mga tawo kinsa mibatok ni Jesukristo ug sa Iyang gipahiuli nga ebanghelyo? Sa pagkonsiderar sa unsay akong nakat-onan ug gibati karon, unsay akong mahimong isulti o buhaton aron sa pagtabang niini nga tawo nga mapalig-on ang iyang pagtuo?

• Sa unsa nga paagi nga ang mas matinud-anon nga pagtuon sa Basahon ni Mormon makadugang sa akong gahom sa pagbatok sa mga tawo o mga mensahe nga nagtinguha sa pagpahuyang sa akong pagtuo? Unsay akong mabuhat aron sa pagpalambo sa akong kasamtangang pamaagi sa pagtuon sa Basahon ni Mormon?

• Unsa ang pipila ka piho nga mga paagi nga akong madapit ang Manluluwas aron sa pagtabang kanako sa pagpalambo o pagpalig-on sa akong pagtuo diha Kaniya ug sa Iyang ebanghelyo?

Alang sa Sunod nga Higayon

Dapita ang mga estudyante sa paghunahuna kon unsa ang labing lisod nga pagsulay sa pagkamasulundon nga nasinati sa ilang kinabuhi sukad. Dayon ipakita kanila ang usa ka hulagway sa Manluluwas diha sa Getsemani, ug dapita sila sa pagtuon sa sunod nga materyal sa pagpangandam sa leksyon uban sa tumong nga magkat-on gikan kang Jesukristo mahitungod kon unsaon sa pagsalig ug pagsunod sa mga direksyon gikan sa Langitnong Amahan.