Leksyon 12 Materyal sa Magtutudlo: Ang Atong Panginahanglan sa Espirituhanong Pagkatawo Pag-usab
“Leksyon 12 Materyal sa Magtutudlo: Ang Atong Panginahanglan sa Espirituhanong Pagkatawo Pag-usab,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 12 Materyal sa Magtutudlo,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 12 Materyal sa Magtutudlo
Ang Atong Panginahanglan sa Espirituhanong Pagkatawo Pag-usab
Sa atong napukan nga kahimtang, kita dili takus sa pagpuyo diha sa presensya sa Dios. Tungod ni Jesukristo ug pinaagi sa Iyang maulaong gahum, kita mahimong sa espirituhanon nga paagi matawo pag-usab isip Iyang mga anak sa pakigsaad ug makasarang alang sa celestial nga kahimayaan. Niini nga leksyon, ang mga estudyante makabaton sa oportunidad sa paglig-on sa ilang pagsabut sa espirituhanong pagkatawo pag-usab ug makapasabut kon unsaon ni Jesukristo sa pag-usab sa atong mga kasingkasing. Ang mga estudyante makatino usab kon unsay ilang buhaton nga mas mamaayo ang pagpuyo sa doktrina ni Kristo aron sa paglig-on sa ilang pagkakabig.
Mga Sugyot alang sa Pagtudlo
Pagpalambo sa Atong Pagtudlo ug Pagkat-on
Tabangi ang mga estudyante sa pag-angkon og responsibilidad alang sa ilang kaugalingon nga pagkat-on. “Ang pagkat-on kinahanglan nga pagabuhaton sa [estudyante]. Busa ang [estudyante] mao ang kinahanglan nga palihukon” (Teaching the Gospel: A Handbook for CES Teachers and Leaders [1994], 14). Si Sister Virginia H. Pearce, usa ka kanhi magtatambag sa Kinatibuk-ang Kapangulohan sa Young Women naka-obserbar: “Ang usa ka hanas nga magtutudlo dili maghunahuna, ‘Unsay akong buhaton sa klase karon?’ apan mangutana, ‘Unsay buhaton sa akong mga estudyante sa klase karon?’; dili, ‘Unsay akong itudlo karon?’ apan hinoon, ‘Unsaon nako pagtabang ang akong mga estudyante nga makadiskubre unsay ilang kinahanglang mahibaloan?’ [Teaching the Gospel: A Handbook for CES Teachers and Leaders, 13]” (“The Ordinary Classroom—a Powerful Place for Steady and Continued Growth [Ang Ordinaryo nga Kwartong-Klasehanan––usa ka Gamhanang Dapit alang sa Kanunay ug Padayong Pagtubo],” Ensign, Nob. 1996, 12).
Ang katawhan ni Hari Benjamin nakasinati og espirituhanong pagkatawo pag-usab.
Ipakita ang mosunod nga pamahayag ni Presidente Dallin H. Oaks: “Dili … igo alang kanato nga mapatuo sa ebanghelyo; kita kinahanglan gayud nga molihok ug mohunahuna aron nga kita makabig niini” (“The Challenge to Become [Ang Hagit nga Mahimo],” Ensign, Nob. 2000, 32).
Pahinumdumi ang mga estudyante nga diha sa seksyon 1 sa materyal sa pagpangandam ilang gibasa ang asoy kabahin sa espirituhanong pagkatawo pag-usab sa mga katawhan ni Hari Benjamin. Kon kinahanglan, ang mga estudyante makaribyu sa Mosiah 4:2–3 ug sa Mosiah 5:2–7, mangita sa koneksyon tali sa doktrina ni Kristo ug sa pagkakabig. Makapangutana ka og pipila o sa tanang mosunod nga mga pangutana sa pagpalig-on sa pagsabut sa mga estudyante sa mga kamatuoran nga ilang ilhon.
Unsa nga mga bahin sa doktrina ni Kristo ang gigamit sa mga katawhan ni Hari Benjamin, ug giunsa niini pag-impluwensya ang ilang espirituhanong pagkatawo pag-usab? (Tabangi ang mga estudyante sa pag-ila og baruganan nga susama ngadto sa mosunod: Samtang kita maningkamot sa pagpuyo sa doktrina ni Kristo, ang Manluluwas mousab sa atong mga kasingkasing ug motabang kanato nga matawo pag-usab sa espirituhanong paagi.)
Nganong kini importante ang pag-ila sa tahas sa Manluluwas diha sa imong espirituhanong pagkatawo pag-usab ug pagkakabig?
Unsa ang imong nahibaloan mahitungod ni Jesukristo nga nagdasig kanimo sa pagduol Kaniya sa pag-usab sa imong kasingkasing?
Giunsa ni Jesukristo pag-usab ang imong kasingkasingi? Unsa ang imong gibati ngadto Kaniya alang sa pagtabang kanimo sa paghimo niana nga kausaban? (Awhaga ang mga estudyante sa pagpakigbahin og mga kasinatian nga dili kaayo personal, o dapita sila sa pagrekord og kasinatian diha sa ilang mga journal.)
Sa unsa nga mga paagi nga ang matag elemento sa doktrina ni Kristo (hugot nga pagtuo, paghinulsol, bunyag, ang gasa sa Espiritu Santo, ug ang paglahutay ngadto sa katapusan) naghimong posible alang sa Manluluwas sa pag-usab sa imong kasingkasing?
Dapita ang mga estudyante sa paghunahuna mahitungod sa kausaban sa kasingkasing nga ilang gusto nga masinati, ug pangutan-a:
Gilubong sa Anti-Nephi-Lehi ang ilang mga hinagiban.
Ipasabut nga bisan og nahuman na ang usa ka tawo sa pagsinati og dakong kausaban sa kasingkasing, ang iyang pagkamaunungon sa hinayhinay mawad-an og kalig-on. Ipakita ang mosunod nga pamahayag ni Elder Dale G. Renlund:
Imahe
Elder Dale G. Renlund
Kitang tanan nasayud sa mga indibidwal kinsa aduna niini nga dakong kausaban sa kasingkasing apan sa kapulihay mitugyan sa pagka kinaiyanhon [natural] nga tawo. Sila walay pagtagad sa ilang pagsimba ug debosyon sa Dios, ang ilang mga kasingkasing nahimong tig-a, ug unya namiligro ang ilang mahangturong kaluwasan. (“Pagpatunhay sa Dako og Kausaban nga Kasingkasing,” Liahona, Nob. 2009, 98)
Ngano kaha nga ang usa ka tawo nga nakasinati og dakong kausaban sa kasingkasing mahimong walay panumbaling sa iyang pagsimba ug pagkamaunungon ngadto sa Dios?
Sa paghatag og kalahi ngadto sa mga indibidwal nga gihulagway ni Elder Renlund, hunahunaa ang pagpakita sa mosunod nga hulagway. Dapita ang mga estudyante sa pagpasabut sa istorya kabahin sa mga Anti-Nephi-Lehi ug sa paghulagway kon unsa ang hinungdan sa paglubong sa mga Anti-Nephi-Lehi sa ilang mga hinagiban sa gubat.
Samtang ang mga estudyante makigbahin sa unsay ilang nahibaloan mahitungod sa mga Anti-Nephi-Lehi, mahimo nimong gamiton ang pipila sa mosunod nga mga tudling sa pagtabang sa mga estudyante sa pag-ila sa giladmon sa kausaban sa mga katawhan ug sa pagkakabig ngadto ni Jesukristo: Alma 23:6–7; Alma 24:9–11, 15; ug Alma 27:27.
Unsa ang nagpugong sa mga Anti-Nephi-Lehi sa pagkamahimong walay pagpanumbaling sa ilang pagsimba ug pagkamaunungon ngadto sa Dios?
Unsa nga mga leksyon gikan niini nga mga tudling ang makatabang kanimo sa paglambo sa imong mga paningkamot nga mahimong “malig-on diha sa hugot nga pagtuo diha kang Kristo, gani hangtud sa katapusan” (Alma 27:27)?
Mahimo nimong dapiton ang mga estudyante sa pagpamalandong kon unsa nga mga hinagiban sa pagsukol ang nagpugong kanila gikan sa personal nga pagsinati og dakong kausaban sa kasingkasing.
Sa pagtabang sa mga estudyante sa paggamit kon unsay ilang nakat-unan niini nga leksyon ug yunit, han-aya ang mga estudyante sa ginagmay nga grupo ug pagtudlo og usa ka lider sa panaghisgot alang sa matag grupo. Ihatag ang mosunod nga handout ngadto sa matag grupo, ug siguroha nga ang mga estudyante adunay igo nga panahon nga makahimo og makahuluganong panaghisgot. Ingon nga itugot sa panahon, dapita ang mga estudyante nga makigbahin ngadto sa klase kon unsay ilang nahisgutan.
Ginagmay nga Grupong Panaghisgot sa Espirituhanong Pagkatawo Pag-usab
Materyal sa Magtutudlo alang sa Mga Pagtulun-an ug Doktrina sa Basahon ni Mormon—Leksyon 12
Mubo nga sulat ngadto sa lider sa panaghisgot. Palihug pangulohi ang usa ka panaghisgot mahitungod sa mosunod nga talan-awon uban sa miyembro sa imong grupo. Awhaga ang tanang miyembro sa imong grupo sa pag-apil. Bisan pa niana, kinahanglan nga walay usa nga mobati nga napugos nga makigbahin sa ilang mga hunahuna.
Nagustuhan ni Pablo ang iyang misyonaryong serbisyo ug mibati nga ang ebanghelyo mituhop og lawom ngadto sa iyang kasingkasing. Mipauli siya sa iyang panimalay gikan sa iyang misyon nga napuno sa hingpit nga kalipay ug dako nga mga pagpaabut alang sa iyang kaugmaon. Human nga nauli siya sa panimalay sulod sa pipila ka mga semana, misugod siya sa pagbati nga wala siya kinahanglana ug biniyaan. Kasagaran niyang gibati ang pag-inusara. Sa paningkamot nga mabuntog kini nga mga pagbati, miapil siya og daghan nga nagkalain-laing mga kalihokan ug mga proyekto. Sa hinay-hinay, misugod siya sa pagbale-wala sa iyang personal nga mga pag-ampo ug pagtuon sa kasulatan. Ang iyang pagtambong sa simbahan nagkapanagsa, ug bag-ohay natintal siya sa pagbalik ngadto sa pipila ka dili maayo nga mga kinaiya nga iyang naandan sa wala pa ang iyang misyon.
Panaghisgot nga mga Pangutana:
Unsa nga mga kamatuoran mahitungod sa espirituhanong pagkatawo pag-usab ug ang usa ka kausaban sa kasingkasing ang tingali labing may koneksyon sa sitwasyon ni Pablo?
Kon si Pablo imong higala, unsa ang imong ipakigbahin ngadto kaniya mahitungod ni Jesukristo nga tingali makatabang kaniya sa paghimog balik og kausaban sa kasingkasing?
Unsa nga mga leksyon ang makat-unan ni Pablo gikan sa mga Anti-Nephi-Lehi?
Hunahunaa ang paghatag sa mga estudyante og pipila ka minutos sa pag-report sa unsay ilang nakat-unan diha sa grupo nila nga panaghisgot. Mahimo usab tingali nga hatagan mo sila og panahon nga mamalandong kon unsay ilang gibati nga nadasig sa pagbuhat tungod sa unsay ilang nakat-unan ug gibati karon. Hunahunaa ang pagdapit kanila sa pagpakigbahin kon giunsa sa ilang pagsabut ug pagpamatuod sa doktrina ni Kristo pagtubo samtang sila nagtuon niini nga yunit.
Alang sa Sunod nga Higayon
Samtang ikaw nangandam sa pagtapos sa klase, mahimo nimong ipakita ang mosunod nga pamahayag ni Presidente Nelson: “Gusto namong mamulong ninyo kabahin sa labing dako nga hagit, ang labing dako nga kawsa, ug sa labing dako nga buhat sa yuta. Ug gusto namo kamong dapiton nga mahimong kabahin niini!” (Russell M. Nelson ug Wendy Nelson, “Paglaum sa Israel” [tibuok kalibutan nga debosyonal sa mga kabatan-onan, Hunyo 3, 2018], dugang ngadto sa New Era ug Ensign, 3, HopeofIsrael.ChurchofJesusChrist.org). Samtang ang mga estudyante nagtuon sa materyal sa pagpangandam alang sa sunod nga klase, awhaga sila sa paghunahuna sa ilang tahas dinhi niining dako nga kawsa: ang pagpundok sa Israel.
