Leksyon 25 Materyal sa Magtutudlo

Pag-ampo ug Personal nga Pagpadayag

Ang Ginoo nga si Jesukristo nagsugo, “Kamo kinahanglan gayud nga mag-ampo sa kanunay ngadto sa Amahan sa akong ngalan” (3 Nephi 18:19). Ang Basahon ni Mormon naghulagway og mahinungdanon nga mga baroganan mahitungod sa pag-ampo ug personal nga pagpadayag. Kini nga leksyon makatabang sa mga estudyante sa pagsusi sa kalidad sa ilang mga pag-ampo ug pagtino kon unsay ilang mabuhat aron sa pagpalambo sa ilang mga pag-ampo. Ang mga estudyante adunay kahigayonan usab sa paghunahuna kon unsay ilang mabuhat aron sa pagpalambo sa ilang kapasidad sa pagdawat og personal nga pagpadayag.

Mga Sugyot alang sa Pagtudlo

Si Amulek nagtudlo sa mga Zoramite sa kamahinungdanon sa pag-ampo.

Pahinumdom: Samtang hisgotan nimo ang mga paagi sa pagpalambo sa personal nga mga pag-ampo atol niini nga leksyon, pahinumdomi ang mga estudyante nga ang bisan unsang paningkamot sa pag-ampo dalaygon. Mahimo nimong ipasabot nga ang mosunod nga pagsusi sa kaugalingon [self-assessment] gituyo sa pagpalig-on [empower] sa mga estudyante aron mas magpaduol sa Dios pinaagi sa pag-ampo, dili sa pagwagtang sa ilang kadasig sa ilang mga paningkamot sa pag-ampo. Ang pagsusi sa kaugalingon motabang og andam sa mga estudyante sa paghisgot kon unsay gitudlo ni Amulek mahitungod sa pag-ampo sa Alma 34:17–28.

Ipakita ang mosunod nga mga pamahayag, ug dapita ang mga estudyante sa pagsukod sa ilang kaugalingon gamit ang sukdanan nga 1 hangtod 5 (1=supak gayod, ug 5=uyon gayod).

1. Ako adunay personal nga pag-ampo kada adlaw. 

2. Ang akong mga pag-ampo makahuluganon ug kinasingkasing. 

3. Nag-ampo ako alang sa akong pisikal ug espiritwal nga mga panginahanglan. 

4. Nangayo ako og tabang sa pagbuntog sa mga tintasyon sa yawa. 

5. Nag-ampo ako alang sa ubang mga tawo. 

6. Kanunay akong naningkamot nga mag-ampo sa akong kasingkasing. 

Awhaga ang mga estudyante sa paghunahuna mahitungod sa ilang mga tubag samtang imong hisgotan ang mga pagtulun-an ni Amulek bahin sa pag-ampo.

Pilia ang usa sa mosunod nga mga opsyon:

1. Ipakita ang mosunod nga hulagway sa usa ka lalaki nga nag-ampo diha sa Rameumptom:

   

Dapita ang mga estudyante sa paghulagway og kadiyot sa pamaagi sa mga Zoramite sa pag-ampo ug sa pagpaambit sa unsay ilang hunahuna mahitungod niini nga pamaagi.

Pahinumdomi ang mga estudyante nga si Amulek sa wala madugay mitudlo og mahinungdanon nga mga baroganan mahitungod sa pag-ampo ngadto sa usa ka mapainubsanon nga grupo sa mga Zoramite. Dapita ang mga estudyante sa pagrebyu sa Alma 34:17–28 ug pagtino og mga kamatuoran nga matandi sa atong kasamtangang mga kahimtang.

Isip kabahin niini nga panaghisgot, mahimo usab nimong hangyoon ang mga estudyante sa pagpaambit kon sa unsang paagi kaha nga mausab nila og sulat ang pipila niini ka mga bersikulo ngadto sa moderno nga pinulongan nga mahimong adunay kalabotan sa ilang mga kahimtang (tan-awa sa “Irekord ang Imong mga Hunahuna” nga kalihokan sa seksyon 1 sa materyal sa pagpangandam).

Ang mga estudyante mahimong mopaambit og mga kamatuoran nga susama sa mosunod: Ang atong Amahan sa Langit gusto nga kita motawag Kaniya pinaagi sa pag-ampo sa tanan nga mga panahon ug sa tanan nga mga dapit. Kinahanglan nga mag-ampo kita alang sa atong temporal ug espiritwal nga mga kabalaka. Ang pag-ampo kinahanglan nga kinasingkasing ug matinuoron. Kinahanglan nga mag-ampo kita sa pribado. Kinahanglan nga mag-ampo kita alang sa ubang tawo. Kinahanglan nga dili lang kita mag-ampo alang sa uban apan magtinguha usab sa pagserbisyo kanila.

Pagpalambo sa Atong Pagtudlo ug Pagkat-on

Tan-awa kon kinahanglan na nimong hinayan ang dagan sa pagtudlo aron makaangkon og mas lawom nga pagsabot. Ang mas lawom nga pagsabot dili mahimong dali-dalion. Samtang maminaw ka sa mga komentaryo sa mga estudyante ug mosunod sa giya sa Espiritu Santo, makahibalo ka kon importante na nga hinayan ang dagan sa leksyon ug tugutan ang mga estudyante nga mas hingpit nga matuki ang ilang kaugalingon nga mga hunahuna, mga pagbati, mga pangutana, o mga kabalaka. Ikonsiderar ang mosunod nga mga ehemplo:

• Kon ang usa ka estudyante mamahayag nga ang pag-ampo nakahimo og mahinungdanon nga kalainan sa iyang kinabuhi, mahimo kang mangutana, “Pwede ka bang mohatag og ehemplo sa unsay imong gipasabot?”

• Kon ang usa ka estudyante mopadayag og kabalaka nga siya mibati nga layo sa Langitnong Amahan, mahimo kang mosulti, “Mahinungdanon kaayo kini nga butang. Gahinan nato og igong panahon isip usa ka klase ang pagpaambit kon unsay nakatabang kanato og maayo nga maduol sa Langitnong Amahan.”

• Kon ang usa ka estudyante mohimo og komento nga nagpakita nga nahasol siya sa panaghisgot sa klase, mahimo kang mosulti, “Dili ako sigurado kon nakasabot ba ako sa imong kabalaka. Mahimo ka bang mopaambit og dugang bahin sa unsay imong gihunahuna ug gibati?”

(Tan-awa sa Pagtudlo ug Pagkat-on sa Ebanghelyo: Usa ka Handbook alang sa mga Magtutudlo ug sa mga Lider sa Seminaries and Institutes of Religion [2012], 77.)

Samtang ang mga estudyante mopaambit og mga baroganan ug sa ilang moderno nga panahon nga mga pagsulat og usab sa mga bersikulo sa Alma 34, hunahunaa kon hain sa mosunod ang mahimo nimong ipangutana aron labing makatabang sa imong mga estudyante nga mohimo og epektibo, matarong nga aksyon.

• Nganong mahinungdanon nga ilakip ang Langitnong Amahan sa tanang bahin sa atong kinabuhi? Unsa ang kalainan nga makita ninyo sa inyong kinabuhi kon kamo mobuhat og matinuoron ug kanunay nga pag-ampo?

• Unsa ang mga babag nga tingali nagpugong kaninyo sa pagbuhat og matinuoron nga pag-ampo? Sa unsang paagi ninyo matangtang kini nga mga babag?

• Kanus-a kamo “nangamuyo” o “mibubo” sa inyong kasingkasing ngadto sa Dios, ug unsay nahimong epekto niini? Sa unsang paagi nga tuyoon natong “himo[on] nga ang [atong] mga kasingkasing puno, magpadayon sa pag-ampo”? (Alma 34:27).

• Nganong ang pag-ampo usa ka gamhanan kaayo nga pwersa sa pagbuntog sa gahom sa yawa? (Makatabang ang pagbasa sa 2 Nephi 32:8 ug 3 Nephi 18:15, 18.) Sa unsang paagi nga ang pag-ampo nakatabang kaninyo sa pagbatok sa tintasyon?

• Unsa nga mga panalangin ang miabot sa inyong kinabuhi samtang nag-ampo ug nagserbisyo kamo sa ubang mga tawo? Kanus-a kamo mibati sa mga pag-ampo sa uban alang kaninyo? Kinsa ang inyong nailhan nga tingali nanginahanglan sa inyong hugot nga pagtuo, mga pag-ampo, ug serbisyo?

Ikonsiderar ang pagpaambit sa mosunod nga pamahayag ni Elder David A. Bednar sa Korum sa Napulog Duha ka mga Apostoles:

Ako nagdahom nga kitang tanan nakahibalo na nga ang pag-ampo importante sa atong espirituhanong kalamboan ug proteksyon. Pero unsay atong nahibaloan dili makita kanunay sa unsay atong gibuhat. Ug bisan og kita nakahibalo sa kaimportante sa pag-ampo, kitang tanan makapalambo sa pagkamakanunayon ug kaepektibo sa atong personal ug pamilya nga mga pag-ampo. (“Pangayo pinaagi sa Hugot nga Pagtuo,” Liahona, Mayo 2008, 94)

Hangyoa ang mga estudyante sa pagpamalandong sa ilang mga tubag sa pagsusi sa kaugalingon diha sa sinugdanan sa leksyon. Awhaga sila sa pagsukod sa ilang kaugalingon nga personal nga mga paningkamot ug irekord kon unsay ilang mabuhat aron sa pagpalambo sa ilang komunikasyon sa Dios.

Si Nephi nagtinguha ug nakaangkon og personal nga pagpadayag.

Ipakita ang mosunod nga mga pamahayag ni Presidente Julie B. Beck, kanhi Kinatibuk-ang Presidente sa Relief Society, ug ni Presidente Russell M. Nelson, ug hangyoa ang mga estudyante sa pagpasabot kon nganong sa ilang hunahuna kini nga mga mensahe mahitungod sa pagpadayag mahimong labing mahinungdanon alang sa mga young adult karon.

Ang abilidad nga mahimong sarang, makadawat, ug makalihok sa personal nga pinadayag mao lamang ang labing importante nga kahanas nga mahimong maangkon niining kinabuhia. (“Ug Ibabaw sa mga Sulugoong Babaye Niadtong mga Adlawa Igabu-bu Ko ang Akong Espiritu,” Liahona, Mayo 2010, 11.)

Wala gayud sukad nga mas importante nga makahibalo unsaon sa pagpaminaw sa Espiritu nga mamulong kaninyo kay sa karon. …

Ako mousab sa akong hangyo alang ninyo nga inyong buhaton bisan unsa ang makapadugang sa inyong espirituhanong kapasidad sa pagdawat og personal nga pagpadayag. (“Paminaw Kaniya,” Liahona, Mayo 2020, 90)

Isulat ang mosunod nga dili kompleto nga mga pahayag ug mga tudling sa kasulatan diha sa pisara:

• Gipalambo ni Nephi ang iyang kapasidad sa pagdawat og pagpadayag pinaagi sa …

• (Basaha ang 1 Nephi 10:17–19; tan-awa usab sa 1 Nephi 2:16.)

• Gipakunhod ni Laman ug Lemuel ang ilang kapasidad sa pagdawat og pagpadayag pinaagi sa …

• (Basaha ang 1 Nephi 15:2–4, 8–11; tan-awa usab sa 1 Nephi 2:11–12.)

Dapita ang mga estudyante nga magtrabaho nga magpares o sa gagmay nga mga grupo ug magtuon sa mga tudling sa kasulatan mahitungod ni Nephi o kang Laman ug Lemuel ug dayon mokompleto sa usa sa mga pahayag nga anaa sa pisara. Ang mga tubag sa mga estudyante mahimong maglakip sa mosunod:

Gipalambo ni Nephi ang iyang kapasidad sa pagdawat og pagpadayag pinaagi sa pagtinguha nga makahibalo sa kamatuoran, pagsalig sa unsay iyang nahibaloan mahitungod sa Dios, pagpakita og hugot nga pagtuo kang Jesukristo, paghinulsol, ug makugihong pagtinguha og mga tubag gikan sa Dios.

Gipakunhod ni Laman ug Lemuel ang ilang kapasidad sa pagdawat og pagpadayag pinaagi sa pagpatig-a sa ilang mga kasingkasing, dili pagtuo nga ang Ginoo motubag kanila, pagpakiglalis sa usag usa, ug pagkapakyas sa pagpangutana sa Dios sa ilang mga pangutana.

• Sa unsang paagi nga ang mga kinabuhi ni Nephi, Laman, ug Lemuel naimpluwensyahan pinaagi sa ilang mga kapasidad sa pagdawat og pagpadayag? Sa unsang paagi nga ang pagpalambo sa inyong kapasidad sa pagdawat og pagpadayag mahimong makaimpluwensya sa inyong kinabuhi? (Mahimo nimong dapiton ang mga estudyante sa pagrebyo sa Alma 12:9–10.)

Hatagi ang mga estudyante og panahon sa pagpamalandong ug pagsulat sa ilang mga hunahuna mahitungod sa mosunod nga mga pangutana. Samtang mamalandong sila, mahimo nimong ipakita ang pamahayag ni Presidente Nelson sa seksyon 2 sa materyal sa pagpangandam.

• Unsay inyong nakat-onan niini nga leksyon gikan sa mga ehemplo ni Nephi, Laman, ug Lemuel mahitungod sa pagdawat og pagpadayag? Unsay kinahanglan ninyong hunongon sa pagbuhat o sugdan sa pagbuhat aron sa pagpalambo sa inyong kapasidad sa pagdawat og pagpadayag?

Ikonsiderar ang pagtapos sa leksyon pinaagi sa pag-awhag og usa o duha ka estudyante sa pagpaambit kon sa unsang paagi nga ang pagdawat og pagpadayag nakapanalangin sa ilang kinabuhi.

Alang sa Sunod nga Higayon

Hangyoa ang mga estudyante sa paghunahuna og kasamtangang pagsulay nga ilang gisinati o nga gisinati sa usa ka tawo nga ilang nailhan. Samtang sila mangandam alang sa sunod nga klase, dapita sila sa pag-ila og mga kamatuoran nga makatabang kanato sa pag-atubang uban sa hugot nga pagtuo, kaisog, ug paglaom sa atong mga pagsulay.