Leksyon 2 Materyal sa Pagpangandam sa Klase

Pagsunod sa mga Propeta sa Ginoo

Tingali inyong nakita ang mga tawo nga mitubag sa lahi kaayo nga paagi ngadto sa mga mensahe nga gisangyaw sa mga propeta. Ang mga tawo sa Basahon ni Mormon nagsagol-sagol usab ang mga reaksyon. Unsa ang atong makat-unan gikan sa mga tawo ug sa mga propeta sa Basahon ni Mormon kabahin sa pagsunod sa Ginoo ug sa Iyang mga mensahe? Samtang magtuon ka, hunahunaa kon unsaon nimo sa pagtubag uban sa hugot nga pagtuo ug pagkamasulundon ngadto sa pulong sa Dios nga gisangyaw pinaagi sa Iyang mga propeta.

Seksyon 1

Sa unsa nga paagi ang mga pasidaan sa mga propeta nagpasabut sa gugma sa Ginoo alang kanako?

Si Presidente Henry B. Eyring sa Unang Kapangulohan miingon:

Tungod kay ang Dios mabination, Siya mitawag og mga sulugoon aron sa pagpasidaan sa mga katawhan sa piligro. Kana nga tawag sa pagpasidaan gihimong mas gipanghingusgan ug mas importante tungod kay sa pagkatinuod kanang mga pasidaan sa labing bililhon mao ang mahitungod sa piligro nga wala pa mahunahunai sa mga tawo nga tinuod. (“A Voice of Warning,” Ensign, Nob. 1998, 32)

Pagtuon agi og Pagpangandam alang sa Klase

Basaha ang 1 Nephi 1:4, nga mangita kon si kinsa ang gipadala sa Ginoo sa pagpasidaan sa mga tawo sa Jerusalem ug unsa ang mensahe nga ilang gisangyaw.

Sama sa daghang propeta nga nauna kaniya, si Lehi nag-ampo alang sa katawhan sa Jerusalem. Unya gibati niya ang Espiritu ug nakita si Jesukristo sa panan-awon. Ang Ginoo nagpakita kang Lehi og usa ka basahon ug nagsugo kaniya sa pagbasa niini. (Tan-awa sa 1 Nephi 1:5–12.)

Pagtuon agi og Pagpangandam alang sa Klase

Basaha ang 1 Nephi 1:13–14, nga mangita kon unsay nasabtan ni Lehi mahitungod sa Ginoo. Mahimo nimong markahan ang unsay imong makit-an.

Si Elder D. Todd Christofferson sa Korum sa Napulog Duha ka mga Apostoles mitudlo:

Ang makaaghat sa pagpalanog sa tingog sa pasidaan mao ang gugma—gugma sa Dios ug gugma sa isigkatawo. Ang pagpasidaan mao ang pagpakabana. (“Ang Tingog sa Pagpasidaan,” Liahona, Mayo 2017, 109)

Pagtuon agi og Pagpangandam alang sa Klase

Basaha ang 1 Nephi 1:19–20, nga mangita kon sa unsang paagi mitubag ang mga tawo sa Jerusalem ngadto sa mensahe nga gipaambit ni Lehi.

Sa atong panahon, ang Ginoo mitawag og 15 ka kalalakin-an (ang mga sakop sa Unang Kapangulohan ug ang Korum sa Napulog Duha ka mga Apostoles) isip mga propeta, mga manalagna, ug mga tigpadayag. Si Elder Ulisses Soares sa Korum sa Napulog Duha ka mga Apostoles mitudlo sa mosunod mahitungod sa presensya sa mga propeta sa kalibutan:

Ang pagkaadunay mga propeta usa ka timaan sa gugma sa Dios alang sa Iyang mga anak. Ipahibalo nila ang mga saad ug ang tinuod nga kinaiyahan sa Dios ug ni Jesukristo ngadto sa Ilang katawhan. (“Ang mga Propeta Mamulong pinaagi sa Gahum sa Espiritu Santo,” Liahona, Mayo 2018, 98)

Mitudlo usab si Nephi nga ang Manluluwas mao ang sentro sa unsay gitudlo ug gisulat sa mga propeta.

Pagtuon agi og Pagpangandam alang sa Klase

Basaha ang 2 Nephi 25:26, nga mangita kong nganong ang mga propeta motudlo ug mopamatuod ni Jesukristo.

Pamalandong agi og Pagpangandam alang sa Klase

Sa unsang paagi ang mga propeta mitabang sa imong hugot nga pagtuo diha sa Manluluwas nga molambo? Unsa ang bag-ohay nga propetikanhong mensahe ang nakatabang kanimo nga mas makasabut sa kinaiyahan sa Dios ug ni Jesukristo?

Seksyon 2

Sa unsang paagi nga akong masayran nga ang buhi nga propeta nagrepresentar sa Ginoo?

Hunahunaa kon unsa kaha ang pamation nga mahimong usa sa mga anak ni Lehi sa dihang siya misulti kanila nga ang Ginoo gusto nga sila mobiya sa ilang panimalay ug mobiyahe ngadto sa kamingawan. Unsa kaha ang imong reaksyon ngadto niini nga mensahe?

Pagtuon agi og Pagpangandam alang sa Klase

Basaha ang 1 Nephi 2:11–13, 16–17, nga mangita kon sa unsang paagi mitubag ang mga anak nga lalaki ni Lehi ngadto niya ug ngadto sa mensahe sa Ginoo sa paghawa sa Jerusalem. Mahimo nimong markahan ang unsay imong makit-an.

Si Presidente Eyring mipasabut:

Sa pamilya ni Lehi, kadto lamang kinsa adunay hugot nga pagtuo ug kinsa sa ilang mga kaugalingon nakadawat og mapanghimatuoron nga pagpadayag nakakita sa kakuyaw ug sa agianan ngadto sa kahilwasan. Alang niadto nga walay hugot nga pagtuo, ang pagbalhin ngadto sa kamingawan ingon og dili lamang binuang apan makuyaw. (“Mga Kasiguroan sa Tambag,” Liahona Hunyo 2008, 7)

Irekord ang Imong mga Hunahuna

Hunahunaa ang pagsulat diha sa imong journal sa mga tubag sa mosunod nga mga pangutana: Unsa ang imong nakat-onan gikan sa mga ehemplo sa mga anak nga lalaki ni Lehi nga makagiya sa akong mga tubag ngadto sa propetikanhong mga pagtulun-an? Kanus-a ka nakadawat og usa ka pagsaksi sa usa ka tawag sa propeta o sa usa ka mensahe sa propeta?

Seksyon 3

Unsa ang akong makat-unan kon unsay reaksyon sa mga tawo diha sa Basahon ni Mormon sa mga mensahe sa Ginoo nga gisangyaw pinaagi sa mga propeta?

Pagtuon agi og Pagpangandam alang sa Klase

Pagpili og usa o mas daghan pa sa mosunod nga mga ehemplo sa usa ka propeta nga nagsangyaw sa usa ka mensahe gikan sa Ginoo. Samtang magtuon ka, pangitaa kon sa unsang paagi mitubag ang mga tawo. Tinoa ang mga baruganan nga imong makat-onan mahitungod sa pagtubag ngadto sa mga propeta. Hunahunaa ang pagsulat sa mga baruganan nga imong makit-an ug dad-a kini ngadto sa klase.

• Hari Benjamin: Mga Pulong ni Mormon 1:17–18; Mosiah 2:9; 4:1–3

• Abinadi: Mosiah 12:1, 9; 13:1–3; 15:11; 17:11–20

• Alma: Mosiah 17:1–4; 18:1–3, 14–16

• Nephi, anak nga lalaki ni Helaman: Helaman 7:11–13, 17–20; 8:4, 7–9

• Samuel: Helaman 13:2–5, 8, 11; 16:1–3, 6–7, 15–18

Samtang nagserbisyo isip Unang Magtatambag diha sa Kinatibuk-ang Kapangulohan sa Young Women, si Sister Carol F. McConkie mitudlo sa mosunod:

Kita dunay kapilian. Mahimo kitang mobaliwala, magtiaw-tiaw, motamay, o mosukol batok sa mga pulong ni Kristo nga gipamulong pinaagi sa Iyang gi-orden nga mga sulugoon. Apan ang Manluluwas nagtudlo nga kadtong mobuhat sa ingon isalikway gikan sa Iyang mga katawhan sa pakigsaad [tan-awa sa 3 Nephi 20:23]. …

… Unta kita mopili sa pagbarug uban sa mga propeta ug magpuyo sumala sa ilang mga pulong hangtud mahiusa kita diha sa hugot nga pagtuo, maputli diha kang Kristo, ug mapuno sa kahibalo sa Anak sa Dios. (“Pagpuyo sumala sa mga Pulong sa mga Propeta,” Liahona, Nob. 2014, 77)

Gusto pa og Dugang? (Opsyonal)

Unsa ang gitudlo sa mga titulo nga manalagna ug Apostol mahitungod sa katungdanan sa usa ka propeta?

Aron makat-on og dugang mahitungod sa usa ka katungdanan sa usa ka propeta isip usa ka manalagna, pagtuon sa Mosiah 8:16–18.

Aron makat-ong og dugang sa katungdanan sa usa ka Apostoles, basaha “Calling an Apostle of the Lord,” sa ChurchofJesusChrist.org.

Unsaon nako nga makaila ug makabaton sa akong kaugalingong pagpamatuod sa mga propeta sa bag-ong panahon?

Si Nephi Nag-ampo alang kang Laman ug Lemuel | 1 Nephi 2:8–24

Nakakuha og kumpirmasyon si Nephi gikan sa Ginoo nga ang iyang amahan nagsulti sa kamatuoran, ug nag-ampo usab siya alang ni Laman ug ni Lemuel.

Sa iyang pakigpulong “Ang Propeta sa Dios” (Liahona, Mayo 2018, 24–27), si Elder Neil L. Andersen sa Korum sa Napulog Duha ka mga Apostoles nagtudlo mahitungod sa katungdanan sa mga propeta, sa ilang tinguha sa pagdala kanato sa Manluluwas, ug sa atong abilidad sa pagka sayud alang sa atong kaugalingon nga sila gitawag sa Dios.