Leksyon 15 Materyal sa Magtutudlo

Pagpangandam alang sa Pag-anhi ni Jesukristo

Niini nga yunit ang mga estudyante magtuon sa importanting mga panghitabo ug mga pagtulun-an nga konektado sa pagpangalagad ni Jesukristo taliwala sa mga Nephite ug mga Lamanite. Samtang mangandam ka sa paghisgot sa materyal niini nga yunit, pangita og mga paagi sa pagtabang sa mga estudyante nga mapalawman ang ilang pagpamatuod kabahin sa Iyang balaan nga misyon.

Niini nga leksyon ang mga estudyante makabaton og usa ka oportunidad sa pagtuon kon sa unsang paagi nga ang Basahon ni Mormon nakahatag og usa ka sumbanan sa pagpangandam alang sa Ikaduhang Pag-anhi sa Manluluwas. Sila mokonsiderar kon unsa ang ilang mahimo aron mabuntog ang mga pagbati sa kahadlok ug makatubag sa mga mensahe nga lagmit maoy hinungdan sa pagduha-duha aron sila mobati nga mas naandam na alang sa Iyang pagbalik.

Mga Sugyot alang sa Pagtudlo

Si Samuel ang Lamanite nanagna sa mga timailhan nga mag-una sa pagkatawo ni Jesukristo.

Ipakita ang kauban nga imahe sa Ikaduhang Pag-anhi ni Jesukristo, ug ipangutana:

• Unsa ang gipanagna nga mga timailhan o mga kahimtang nga may kalabotan sa katapusang mga adlaw ug sa Ikaduhang Pag-anhi nga tingali makapahimo sa mga tawo nga mobati og kabalaka? (Kon ang mga estudyante maglisod sa pag-ila og mga timailhan sa mga panahon, mahimo nimo silang dapiton sa pagribyu og kadiyot sa “Timailhan sa mga Panahon, Mga” nga tampo diha sa Giya ngadto sa mga Kasulatan [tan-awa sa scriptures.ChurchofJesusChrist.org].)

• Unsa ang atong makat-onan gikan sa kamatuoran nga ang Ginoo nagpadayag og mga timailhan sa dili pa Siya moabot ngadto sa Iyang mga katawhan?

• Sa unsang paagi nga ang Basahon ni Mormon makatabang kanato nga mobati nga dili kaayo mahadlok, mas naandam, ug mas malipayon mahitungod sa pagbalik sa Ginoo dinhi sa yuta? (Mahimo nimong ribyuhon ang Pamahayag ni Presidente Benson diha sa pasiuna sa materyal sa pagpangandam.)

Pagpalambo sa Atong Pagtudlo ug Pagkat-on

Hatagi ang mga estudyante og mga oportunidad sa pagpalig-on sa usag usa. Kita magpundok isip mga disiplulo ni Jesukristo dili lang sa pagkat-on alang sa atong kaugalingon apan sa pagtabang ug pagpalig-on sa usag usa (tan-awa sa Moroni 6:4–5). Panahon sa klase, pangita og mga paagi sa pagmugna og mga oportunidad aron ang mga estudyante makahigayon sa paghimo og higala ngadto sa higala nga mga panag-istoryahanay. Usa ka talagsaong panahon alang niini nga mga panag-istoryahanay mahimo tingali kon ang mga estudyante gidapit nga makig-istorya sa usa ka pares o magporma og usa ka gamayng pundok sa panaghisgot. Atol sa panaghisgot sa klase, matngoni ang dili pagdominar sa panag-istoryahanay. Pananglitan, sa dili pa ka motubag ngadto sa pangutana o kabalaka sa estudyante, ikonsiderar ang pagdapit og una sa iyang higala o mga higala sa pagtubag. Imbis mopaambit sa imong paborito nga personal nga kasinatian, awhaga ang mga estudyante sa pagpaambit sa ilang mga kasinatian. Dili lang basta mangita og mga oportunidad sa paghatag sa imong pagpamatuod, apan hatagi ang mga estudyante og oportunidad sa paghatag sa ilang pagpamatuod usab.

Ipakita ang mosunod nga pangutana: Sumala sa Helaman 14:9–13, nganong si Samuel miadto man aron sa pagsangyaw ug pagpanagna ngadto sa mga Nephite?

Ikonsiderar ang pagdapit sa mga estudyante nga magpares-pares sa pagtuon sa gihatag nga tudling ug maghisgot kon unsaon nila sa pagtubag ang pangutana. Dapita ang pipila ka estudyante sa pagpaambit unsay ilang nakat-onan. Base sa mga komentaryo sa mga estudyante, ikonsiderar kon hain sa mosunod ang imong ipangutana aron matabangan ang mga estudyante nga maandam sa paggamit sa unsay ilang nakat-onan:

• Sa unsang paagi nga ang pagkahibalo ug pagtuo sa mga timailhan ug mga katingalahan sa pag-anhi ni Kristo makapausab sa atong mga kinabuhi? (Hatagi ang mga estudyante og oras sa paghisgot niining pangutana sa usag usa, ug dayon dapita sila sa pagpaambit sa ilang mga panabot diha sa klase. Tabangi ang mga estudyante nga moila og usa ka baruganan nga susama sa mosunod: Ang pagkahibalo ug pag-ila sa mga timailhan sa pag-anhi ni Kristo makatabang sa paggiya kanato nga motuo diha Kaniya ug maghinulsol sa atong mga sala.)

• Nganong ang mga timailhan ug mga katingalahan nga konektado sa Ikaduhang Pag-anhi sa Ginoo makapadugang man sa atong paglaom ug dili makapadugang sa atong kahadlok? Sa unsa nga mga paagi nga ang mga timailhan ug mga katingalahan nga may kalabotan sa Ikaduhang Pag-anhi nagpakita sa gugma ug pagpakabana sa Dios alang sa Iyang mga anak?

• Unsa nga propetikanhong pagtulun-an o timailhan sa Ikaduhang Pag-anhi ang nakadasig kaninyo aron mas makaandam alang sa pagbalik sa Ginoo? (Aron matabangan ang mga estudyante nga makita kon sa unsang paagi nga gipakita ang gugma sa Dios sa atong panahon, mahimo nimo silang dapiton sa pagpaambit o pagpangita unsa ang bag-ohay lang nga gitudlo sa buhi nga mga propeta ug mga apostoles mahitungod sa pagpangandam alang sa pagbalik sa Ginoo.)

Ipakita ang mosunod nga pamahayag ni D. Todd Christtofferson:

Una, ug ang mahinungdanon alang sa pagbalik sa Ginoo, mao ang presensya sa mga tawo diha sa yuta nga naandam na sa pagdawat Kaniya atol sa Iyang pag-anhi. (“Pagpangandam alang sa Pagbalik sa Ginoo,” Liahona, Mayo 2019, 82)

Hatagi ang mga estudyante og pipila ka minuto aron makapamalandong ug makasulat sa ilang mga hunahuna mahitungod sa mosunod nga pangutana:

• Unsa ang gikinahanglan ninyong sugdan nga buhaton o hunungon sa pagbuhat aron kamo mobati nga mas naandam sa pagdawat ni Jesukristo atol sa Iyang pag-anhi?

Ang hugot nga pagtuo sa mga tumutuo nasulayan samtang sila makanunayon nga nagpaabot nga matuman ang gipanagna nga mga timailhan.

Ikonsiderar ang pagbahin sa imong klase ngadto sa ginagmay nga mga grupo. Dapita ang matag grupo sa pagribyu sa Helaman 16:13–22 ug 3 Nephi 1:4–15, 22 nga magdungan, mangita kon giunsa ni Satanas sa pagmugna og kalibog kabahin sa pagkatawo sa Manluluwas ug giunsa pagtubag sa mga matinud-anon. Human sa igong panahon, pagdapit og usa ka tawo sa matag grupo aron mopaambit unsa ang iyang nadiskubrihan. Samtang mopaambit ang mga estudyante sa ilang mga panabot, ikonsiderar ang pagpangutana og pipila o tanan sa mosunod nga mga pangutana aron matabangan nga mapalawman ang panaghisgutan sa imong klase:

• Sa unsang paagi nga kining samang mga taktika sa pagpakatap og pagduha-duha gigamit sa atong panahon?

• Unsa ang gibuhat sa uban nga mga Nephite ug Lamanite aron magpabilin nga matinud-anon sa dihang nag-atubang sila og pagduha-duha ug oposisyon gikan sa mga dili tumutuo? (Mahimo nimong ipakita ang baruganan sama sa mosunod: Ang pagsalig sa Ginoo ug ang makanunayong pagbantay alang sa Iyang pag-anhi makatabang kanato sa pagtubag uban sa hugot nga pagtuo batok sa pagduda ug pagduha-duha.)

• Unsa ang atong mahimo aron masiguro nga kita magpabilin nga lig-on ug makanunayon samtang kita magpaabot sa Ikaduhang Pag-anhi ni Jesukristo? (Ikonsiderar ang pagribyu sa mga pamahayag ni Presidente Bonnie L. Oscarson ug Elder D. Todd Christofferson sa seksyon 2 sa materyal sa pagpangandam.)

• Sa unsang paagi nga ang pagsalig diha sa Ginoo nakatabang kaninyo kon mag-atubang sa mga dili matuohon ug sa mga mensahe nga tingali makamugna og pagduha-duha? Unsaon nato sa pagtabang ang usag usa nga magpabiling makanunayon samtang kita nangandam alang sa pagbalik sa Ginoo?

Dapita ang mga estudyante sa pagpamalandong sa hilum sa unsay ilang nakat-onan ug gibati mahitungod ni Jesukristo ug sa Ikaduhang Pag-anhi samtang sila nangandam ug miapil niining klase. Dayon hatagi ang mga estudyante og panahon sa pagpaambit sa ilang mga pagpamatuod sa Ginoo ug sa paglaom nga ilang naangkon nga Siya mobalik.

Alang sa Sunod nga Higayon

Ipasabot nga atol sa sunod nga klase, ang mga estudyante makaangkon og oportunidad sa pagkonsiderar unsa kaha ang bation kon maanaa sa presensya sa Manluluwas ug makigdait uban Kaniya. Samtang magtuon ang mga estudyante sa materyal sa pagpangandam sa klase, dapita sila sa pagpangita sa unsay ilang makat-onan mahitungod sa kinaiyahan ug kinaiya ni Jesukristo gikan sa Iyang pagpangalagad taliwala niadtong anaa sa Amerika.