Leksyon 24 Materyal sa Magtutudlo

Ang Gahom sa Ginoo sa Pagluwas

Ang mga kasinatian sa katawhan ni Limhi ug sa katawhan ni Alma parehong nagpakita sa abilidad sa Ginoo sa pagsuporta ug pagluwas niadtong kinsa modangop Kaniya atol sa ilang mga pagsulay. Niini nga leksyon, ang mga estudyante mopalawom sa ilang pagsabot kon sa unsang paagi nga sila makapalambo og mahangturong panglantaw kabahin sa gahom sa Ginoo sa pagluwas. Dapiton usab ang mga estudyante sa pagtino unsay ilang mabuhat aron magamit ang gahom sa Ginoo samtang atubangon nila ang ilang kaugalingon nga mga pagsulay.

Mga Sugyot alang sa Pagtudlo

Ang mga Lamanite miulipon sa katawhan ni Alma ug sa katawhan ni Limhi.

Dapita ang mga estudyante sa pagpaambit og mga ehemplo sa mga pagsulay nga sa kasamtangan nasinati nila o sa mga tawo nga ilang nailhan.

• Unsa ang pipila ka lain-laing mga rason sa atong mga pagsulay? (Mahimong makatabang ang pagrebyo sa mga ehemplo sa seksyon 1 sa materyal sa pagpangandam.)

• Unsay komon nga mga pangutana, mga kabalaka, o mga pagbati nga mahimong bation sa mga tawo kon mag-atubang sila og mga pagsulay?

Pagpalambo sa Atong Pagtudlo ug Pagkat-on

Susiha ang mga konsepto ug mga pangutana inubanan sa mahangturong panglantaw. Ang mga estudyante mahimong maghunahuna mahitungod sa mga isyu ug mga pangutana gamit ang mga ideya nga ilang nadungog sa eskwelahan o trabahoan o sa social media. Sa kasagaran kini nga mga tinubdan naghatag lamang og kalibotanon nga panglantaw, nga wala magkonsiderar sa mga pagtulun-an sa ebanghelyo. Pangita og mga kahigayonan sa pagtabang sa mga estudyante nga magbansay sa paghunahuna og usab sa mga isyu ug mga pangutana sa “kinatibuk-ang kahulugan niini sa plano sa kaluwasan ug sa mga pagtulun-an sa Manluluwas” (Mahinungdanon nga Dokumento sa Doctrinal Mastery [2018], “Pag-angkon og Espirituhanong Kahibalo,” parapo 8).

Katawhan ni Alma

Rebyoha og kadiyot ang mga kahimtang nga maoy hinungdan nga ang katawhan ni Alma giulipon sa mga Lamanite. Mahimo nimong dapiton ang mga estudyante sa paghunahuna kon unsa kahay gibati sa katawhan ni Alma, kinsa matarong nga nagpuyo, nga nawad-an og kalit sa ilang kagawasan ug napugos sa pagserbisyo sa mga Lamanite.

Dapita ang mga estudyante sa pagrebyo sa Mosiah 23:21–24, nga mangita og posible nga mga rason nga ang Ginoo mitugot sa katawhan ni Alma nga moagi og mga pagsulay.

• Sumala niini nga mga bersikulo, unsay katuyoan sa Ginoo sa pagtugot sa katawhan ni Alma nga moagi niini nga mga pagsulay?

• Sa unsa nga mga paagi nga ang pagtinguha sa pagsabot sa mahangturong panglantaw sa Ginoo bahin sa mga pagsulay makatabang kanato sa paghunahuna og usab kon unsaon nato pagtan-aw ang atong kaugalingong mga pagsulay?

Awhaga ang mga estudyante sa pagpangita og mga kamatuoran dinhi sa tibuok nga leksyon nga makatabang kanila nga makaangkon og mahangturong panglantaw sa ilang mga pagsulay.

Katawhan ni Limhi

Pahinumdomi ang mga estudyante nga ang katawhan ni Limhi naulipon usab. Iminubo [summarize] ang mga kahimtang nga naglibot sa ilang pagkabihag. Dapita ang mga estudyante sa pagbasa sa Mosiah 21:6–12, nga mangita kon giunsa pagtinguha sa katawhan ni Limhi sa pag-eskapo sa pagkaulipon. Ikonsiderar ang pagpangutana sa mosunod:

• Unsay nahitabo sa katawhan ni Limhi samtang misulay sila sa pagluwas sa ilang kaugalingon gikan sa pagkaulipon?

• Unsay mga problema ang mahimo natong masugatan samtang mosulay kita sa pagbuntog sa atong mga pagsulay nga dili magtinguha sa tabang sa Ginoo? Unsa kahay makapugong kanato sa pagdangop ngadto sa Ginoo atol sa atong mga pagsulay?

Dapita ang mga estudyante sa pagrebyo sa Mosiah 21:13–16, o hangyoa ang usa ka estudyante sa pagminubo unsay gibuhat sa katawhan ni Limhi human nga nakaamgo nga dili nila maluwas ang ilang kaugalingon gikan sa pagkaulipon. Dayon dapita ang usa ka estudyante sa pagminubo kon sa unsang paagi ang katawhan ni Limhi naluwas sa kataposan. Ikonsiderar ang pagpangutana sa usa o mas daghan pa sa mosunod nga mga pangutana aron sa pagtabang sa mga estudyante nga makapalambo og mahangturong panglantaw sa ilang kaugalingon nga mga pagsulay:

• Unsay inyong nakat-onan gikan sa kasinatian sa katawhan ni Limihi mahitungod kon sa unsang paagi nga ang Dios mosuporta o moluwas niadtong kinsa modangop kaniya atol sa ilang mga pagsulay? (Agi og dugang sa mga kamatuoran nga ipaambit sa mga estudyante, tabangi sila sa pag-ila og usa ka baroganan nga susama sa mosunod: Kon atong ipaubos ang atong kaugalingon ug motawag sa Dios, Siya motubag sa atong mga pag-ampo ug moluwas kanato gikan sa atong mga pagsulay sa Iyang kaugalingon nga panahon.)

• Sa unsang paagi nga kita makasalig sa giplano nga panahon sa Ginoo imbis sa atong kaugalingon samtang mag-atubang kita og mga pagsulay? (Mahimong makatabang ang pagrebyo sa pamahayag ni Presidente Dallin H. Oaks sa seksyon 2 materyal sa pagpangandam.)

• Unsa nga mga panalangin ang inyong nadawat samtang misunod kamo sa kabubut-on sa Ginoo ug misalig sa Iyang panahon alang sa inyong kinabuhi?

Mahimo kang mohatag og pipila ka minuto sa mga estudyante aron sa pagpamalandong og usa ka pagsulay nga sa kasamtangan ilang giatubang ug sa pagtino kon unsaon nila sa paghunahuna niini og usab gamit ang mahangturon nga panglantaw.

Ang Ginoo milig-on sa katawhan ni Alma ug miluwas kanila gikan sa pagkaulipon.

Pahinumdomi ang mga estudyante nga ang katawhan ni Alma naulipon usab sa mga Lamanite. Hatagi ang mga estudyante og pipila ka minuto sa pagrebyo sa Mosiah 24:10–16, nga mangita og mga pagkapareho ug mga kalainan tali sa mga pagsulay nga nasinati sa katawhan ni Alma ug sa katawhan ni Limhi.

• Unsa nga mga pagkapareho ang inyong nakit-an? Sa unsang paagi ang mga kasinatian sa duha ka grupo managlahi? (Ang posible nga mga tubag mahimong maglakip sa mosunod: Ang duha ka grupo sa katawhan gisuportahan sa Ginoo ug sa kataposan naluwas; ang pagkaulipon sa katawhan ni Alma miabot isip usa ka pagsulay sa ilang pagtuo samtang naningkamot sila sa pagsunod sa Ginoo, samtang ang pagkaulipon sa katawhan ni Limhi miabot tungod sa sala; ang katawhan ni Alma midangop dihadiha dayon sa Dios, samtang ang katawhan ni Limhi midangop Kaniya human sa pagsulay una sa pagluwas sa ilang kaugalingon nga silasila lamang.)

• Unsay ebidensya ang inyong nakita bahin sa gugma sa Ginoo niining duha ka asoy?

• Unsay dugang nga mga leksyon ang atong makat-onan gikan sa kasinatian sa katawhan ni Alma mahitungod kon sa unsang paagi nga ang Dios mosuporta o moluwas niadtong kinsa modangop kaniya atol sa ilang mga pagsulay? (Samtang ang mga estudyante mopaambit og mga kamatuoran nga ilang natino, tabangi sila sa pagtino og baroganan nga susama sa mosunod: Kon kita mopakita og hugot nga pagtuo ug pailob atol sa atong mga kasakit ug motawag sa Dios, Siya mahimong molig-on kanato aron mas makapas-an sa atong mga alantoson. Pahinumdom: Si Alma nga Batan-on nagtudlo og susama nga baroganan sa Alma 36:3, 27.)

Bahina ang klase ngadto sa mga grupo nga adunay duha o tulo ka estudyante, ug dapita sila sa pagrebyo sa pamahayag ni Elder David A. Bednar sa seksyon 3 sa materyal sa pagpangandam. Ipakita ang mosunod nga mga pangutana, ug dapita ang mga estudyante sa paghisgot niini sa ilang mga grupo:

• Sa unsang paagi nga makatabang ang pagkahibalo nga ang Ginoo dili dihadiha dayon mokuha sa atong mga pagsulay?

• Sumala ni Elder Bednar, sa unsang paagi nga ang pagtuman sa atong mga pakigsaad makahatag kanato og dugang nga kusog samtang mag-atubang kita og mga pagsulay?

• Sa unsang paagi nga ang Ginoo misuporta ug mipalig-on kaninyo, o sa usa ka tawo nga inyong nailhan, samtang milahutay kamo og pagsulay o mipas-an og alantoson? Unsa nga mga panalangin ang miabot tungod kay wala dayon maluwas gikan sa pagsulay?

Dapita ang usa o duha ka estudyante sa pagpaambit unsay labing mahinungdanon alang kanila sa ilang panaghisgot sa grupo. Hatagi ang mga estudyante og pipila ka minuto sa pagrekord og bisan unsang impresyon nga ilang nadawat kabahin kon sa unsang paagi nga sila makapalambo sa ilang pagsalig sa Ginoo samtang mag-atubang sila og mga pagsulay.

Alang sa Sunod nga Higayon

Pangutana sa mga estudyante kon sila ba adunay bisan unsang pangutana nga ganahan nila nga tubagon sa Ginoo. Awhaga sila nga tun-an og maayo ang Basahon ni Mormon ug ang materyal sa pagpangandam alang sa sunod nga klase aron makita kon unsay ilang makat-onan mahitungod sa pagdawat og mga tubag gikan sa Ginoo.