Leksyon 3 Materyal sa Magtutudlo

Damgo ni Lehi sa Kahoy sa Kinabuhi

Ang damgo ni Lehi sa kahoy sa kinabuhi makatabang kanato nga masayud kon unsaon sa pagsinati sa gugma sa Dios ug sa pagtagamtam sa mga panalangin sa Pag-ula sa Manluluwas. Niini nga leksyon, ang mga estudyante motino unsay makatabang o makababag sa ilang mga paningkamot sa pagduol ngadto kang Kristo. Sila makaangkon og usa ka oportunidad sa pagtino unsa ang ilang mahimo aron himoon ang pulong sa Dios nga usa ka mas taas nga prayoridad diha sa ilang kinabuhi.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Tinguhaa nga matutukan ang tig-kat-on. Si President Dallin H. Oaks miingon, “Ang usa ka magtutudlo sa ebanghelyo, sama sa Agalon nga atong giserbisyohan, motutok sa kinatibuk-an niadtong mga tawo nga gitudloan” (“Gospel Teaching,” Ensign, Nob. 1999, 79). Samtang ikaw magtinguha nga motutok sa tigkat-on, pangutan-a ang imong kaugalingon sa mosunod nga mga pangutana: Unsay akong mahimo aron mas makasabut sa kaagi, sa mga kasinatian, sa mga hagit ug sa mga panginahanglan sa akong mga estudyante? Unsaon nako sila sa pagtabang nga makapalig-on sa unsay ila nang nahibaloan? Unsaon nako sila sa pagtabang nga mahimong aktibo nga mga tigkat-on ug makatampo sa pagkat-on sa uban? Unsa ang akong buhaton sa pagdapit kanila nga mas magpaduol sa Manluluwas?

Si Lehi adunay panan-awon sa kahoy sa kinabuhi.

Damgo ni Lehi, ni Greg K. Olsen

Ipakita ang gisukip nga hulagway sa panan-awon ni Lehi sa kahoy sa kinabuhi, ug hangyoa ang mga estudyante sa pagpakigbahin og gamay kon unsa ang ilang nahibaloan sa panan-awon. Mahimo ka nga mohangyo og usa ka estudyante sa pagminubo [summarize] sa istorya sa damgo ni Lehi.

Dapita ang mga estudyante sa pagribyu sa 1 Nephi 8:10–12 ug 1 Nephi 11:21–22, nga pakisayran diha sa materyal sa pagpangandam, nga mangita kon giunsa ni Lehi ug ni Nephi sa paghulagway sa kahoy sa kinabuhi ug ang bunga niini.

Base sa panabut sa mga estudyante sa damgo ni Lehi, mahimo nimong ipangutana ang mosunod:

• Unsay girepresentar sa kahoy ug sa bunga niini? (Tan-awa sa seksyon 1 sa materyal sa pagpangandam.)

• Unsa ang gitudlo sa pagkahulagway ni Lehi sa kahoy ug sa bunga ngari kanato mahitungod sa gugma sa Dios ug sa Pag-ula sa Manluluwas?

• Unsa ang gitudlo niini nga mga bersikulo ngari kanato mahitungod sa pag-angkon og kalipay? (Ang mga estudyante mahimong motino og usa ka kamatuoran nga susama sa mosunod: Ang pagduol ngadto kang Kristo ug pag-ambit sa mga panalangin sa Iyang Pag-ula makahatag kanato og kalipay.)

• Sa unsang paagi ang mga panalangin sa Pag-ula sa Manluluwas “labing madanihon sa tanan nga mga butang”? (1 Nephi 8:12; 11:22).

Ipakita ang mosunod nga pamahayag ni Presidente Russell M. Nelson.

Presidente Russell M. Nelson

Mga kaigsoonan, ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.

Kon [kita] mosentro … [diha] ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabut gikan ug tungod Kaniya. … Russell M. Nelson, ( “Hingpit nga Kalipay ug Espirituhanon nga Pagsugakod,” Liahona, Nob. 2016, 82)

• Unsa ang imong buhaton aron si Jesukristo mas matutukan og dako diha sa imong kinabuhi aron imong masinati ang mas dakong kalipay? (Hatagi ang mga estudyante og igong panahon sa pagpamalandong ug pagrekord ang ilang mga hunahuna.)

Si Lehi ug Nephi nakat-on nga ang pulong sa Dios mogiya ngadto sa Manluluwas ug sa Iyang Pag-ula.

Bahina ang klase ngadto sa tulo ka grupo, ug hatagi ang matag estudyante sa mosunod nga handout.

Mga Babag sa Pagdawat sa Bunga sa Kahoy sa Kinabuhi

Materyal sa Magtutudlo alang sa Mga Pagtulun-an ug Doktrina sa Basahon ni Mormon—Leksyon 3

Basaha kini nga parapo isip usa ka grupo: Diha sa panan-awon ni Lehi sa kahoy sa kinabuhi, ang hugaw nga suba, “mga gabon sa kangitngit” (1 Nephi 12:17), ug ang “dako ug lapad nga gambalay” (1 Nephi 8:26) nakapahimo sa mga tawo nga naglisud sa pag-abut o pagpabilin diha sa kahoy ug moambit sa bunga niini. Diha sa materyal sa pag-andam sa klase, tingali imo nang natino ang pipila ka bag-ong panahon nga mga ehemplo niining mga piligro o mga pagbalda nga makapahilayo sa mga tawo gikan sa Manluluwas. Uban sa mga sakop sa inyong grupo, hisguti ang mga paagi nga ang mga young adult karon makasugat sa mosunod nga mga sitwasyon:

Kahugaw o sala (suba sa kahugaw: 1 Nephi 8:13; 12:16; 15:27)

Mga paglingla ug mga tintasyon (“gabon sa kangitngit”: 1 Nephi 8:23; 12:17)

Garbo ug pagbiay-biay gikan sa kalibutan (sa “dako ug lapad nga gambalay”: 1 Nephi 8:25–28; 12:18)

Hisguti: Sa unsa nga mga paagi ang mga ehemplo nga inyong gihisgutan makapugong sa usa ka young adult gikan sa pagduol kang Jesukristo ug magtagamtam sa mga panalangin sa Iyang Pag-ula? Sa unsang paagi nga ikaw misulay sa pagbuntog niining mga babag sa imong kaugalingong kinabuhi?

© 2021 sa Intellectual Reserve, Inc. All rights reserved.

Mga Babag sa Pagdawat sa Bunga sa Kahoy sa Kinabuhi

iapud-apod nga materyal [handout] sa magtutudlo

Human sa igong panahon, dapita ang pipila ka mga estudyante nga mopakigbahin diha sa klase unsa ang ilang nahisgutan sa ilang grupo.

Dapita ang mga estudyante sa pagribyu unsa ang ilang nakat-unan mahitungod sa upat ka grupo sa mga tawo nga nakita ni Lehi diha sa iyang panan-awon (tan-awa sa seksyon 3 sa materyal sa pagpangandam). Isulat sa pisara ang mosunod nga mga ulohan: Grupo 1 (1 Nephi 8:21–23), Grupo 2 (1 Nephi 8:24–28), Grupo 3 (1 Nephi 8:30, 33), Grupo 4 (1 Nephi 8:31–32).

• Unsa ang tahas sa gunitanan nga puthaw, o pulong sa Dios, diha sa matag grupo? (Isulat ang mga tubag sa estudyante ubos sa tukma nga ulohan.)

• Unsa ang kahulugan kabahin sa hugpong sa mga pulong nga sila “wala maminaw” sa 1 Nephi 8:33? Unsa kaha ang susama niini sa atong panahon?

• Unsa ang paglaum ang anaa alang niadtong kinsa mihunong sa pagsunod sa pagtulun-an ug nahisalaag gikan sa dalan? (Mahimo nimong hangyoon ang mga estudyante sa pagribyu sa pamahayag ni Sister Ann M. Dibb diha sa materyal sa pagpangandam.)

Ipasabut nga samtang si Nephi nag-ampo aron masabtan ang damgo sa iyang amahan, gipakita kaniya ang usa ka panan-awon ug nasayran ang kahulogan sa damgo. Pagkahuman niana siya mitudlo sa iyang mga igsoong lalaki kon unsa ang girepresentar sa gunitanan nga puthaw. Dapita ang usa ka estudyante sa pagbasa og kusog sa 1 Nephi 15:23–24. Dayon ipangutana:

• Unsa ang imong nakat-onan gikan sa pagpasabut ni Nephi ug sa imbitasyon ngadto sa iyang mga igsoong lalaki? (Taliwala sa uban pang mga kamatuoran, ang mga estudyante mahimong motino og usa ka baruganan nga susama sa mosunod: Ang paggunit sa pulong sa Dios makapahimo kanato nga mabatokan ang pagsulay ni Satanas sa pagdala kanato palayo gikan ni Jesukristo.)

• Sa inyong hunahuna unsa ang buot ipasabut sa “kanunay [naggunit] pag-ayo” sa pulong sa Dios? (1 Nephi 8:30).

Ipakita ang mosunod nga pamahayag ni Elder Kevin W. Pearson sa Seventy.

Elder Kevin W. Pearson

Gawas kon kita sa “kanunay naggunit” [1 Nephi 8:30] sa pulong sa Dios ug nagsunod niini, mahimo kitang buta sa espirituhanon imbis nga mahunahunaon sa espirituhanon. Siksika ang Basahon ni Mormon ug ang mga pulong sa buhi nga propeta kada adlaw, kada adlaw, kada adlaw! Mao kini ang yawe sa espirituhanong pagpakabuhi ug makalikay sa pagpangilad. Kon wala kini, espirituhanong kitang mawala. ( “Pagpabilin diha sa Ebanghelyo,” Liahona, Mayo 2015, 115)

Hangyoa ang mga estudyante sa pagpaambit kon sa unsang paagi nga ang paggunit sa pulong sa Dios nakatabang kanila nga makalahutay sa espirituhanong paagi o makalikay sa pagpangilad. Dapita sila sa pagpaambit usab kon sa unsang paagi ang pulong sa Dios nakatabang kanila nga mas magpaduol ngadto kang Jesukristo ug sa Iyang maulaon nga gahum.

Aron matabangan ang mga estudyante nga makabuhat sa unsay ilang gitun-an ug gibati, tingali imong ipakita ang mosunod nga mga pangutana ug dapiton ang mga estudyante sa pagpamalandong ug pagsulat sa ilang mga tubag.

• Unsay akong buhaton aron mas maayong makagunit sa pulong sa Dios?

• Kinsa kaha ang mahimong mapanalanginan pinaagi sa pagpaminaw sa akong pagpamatuod sa kaimportante sa paggunit sa pulong sa Dios?

Hunahunaa ang pagdapit og pipila ka mga estudyante sa pagpaambit sa unsay ilang gisulat.

Alang sa Sunod nga Higayon

Kalabut sa panaghisgutan mahitungod sa gunitanan nga puthaw, mahimo nimong dapiton ang mga estudyante sa paghunahuna mahitungod kon unsa sila ka makugihon sa ilang pagtuon sa kasulatan karong bag-o. Samtang sila magtuon sa materyal sa pagpangandam alang sa sunod nga klase, dasiga sila sa paghunahuna kon unsaon sa paghimo sa personal nga pagtuon sa kasulatan nga usa ka prayoridad nga makapaduol kanila ngadto sa Manluluwas.