Leksyon 26 Materyal sa Pagpangandam sa Klase

Human sa Pagsulay sa Inyong Hugot nga Pagtuo

batan-ong lalaki nga namentana

Nakaampo ka ba sukad alang sa usa ka milagro? Nagtinguha ka ba og mas lawom sa espirituhanon nga pagsaksi ni Jesukristo ug sa Iyang ebanghelyo? Aduna bay bisan unsang butang nga gilaoman nimo nga madawat gikan sa Ginoo sa imong kinabuhi karon? Hunahunaa ang mahitungod niini nga mga paglaom ug mga tinguha samtang magtuon ka og dugang mahitungod sa hugot nga pagtuo ug sa unsang paagi nga ang Basahon ni Mormon nagtudlo kanato sa paggamit niini.

Seksyon 1

Sa unsang paagi nga ang paggamit og hugot nga pagtuo diha ni Jesukristo makatabang kanako nga magkat-on ug molambo samtang mag-atubang ko og mga pagsulay?

Sa basahon ni Ether, si Moroni mirekord nga samtang ang mga gubat, rebelyon, ug kadaotan mibuntog sa Jaredite nga katilingban, ang Ginoo mipadala sa propeta nga si Ether sa pagpahayag og hugot nga pagtuo, paghinulsol, ug paglaom ngadto sa katawhan.

icon, pagtuon

Pagtuon agi og Pagpangandam alang sa Klase

Basaha ang Ether 12:3–7, 12, 18, ug hunahunaa kon nganong gikinahanglan ang hugot nga pagtuo sa atong espiritwal nga pag-uswag.

Tungod ang Ginoo nahigugma kanato ug gusto nga kita mouswag, naghatag Siya kanato og mga kahigayonan sa pagsulay sa atong hugot nga pagtuo diha Kaniya. Si Elder Richard G. Scott sa Korum sa Napulog Duha ka mga Apostoles miingon:

Elder Richard G. Scott

Matag higayon nga inyong sulayan ang inyong hugot nga pagtuo—kana mao, nga molihok nga magpakatakus sa usa ka pagdasig—kamo makadawat sa nagpamatuod nga ebidensya sa Espiritu. Samtang kamo nagduhaduha sa inyong pagsabut, sa pagpakita og hugot nga pagtuo, kamo giyahan nga makakaplag og mga solusyon nga dili ninyo mabatunan sa laing paagi. (“Ang Makapausab nga Gahum sa Hugot nga Pagtuo ug Maligdong nga Kinaiya,” Liahona, Nob. 2010, 44)

batan-ong babaye nga nagtan-aw sa pagsalop sa adlaw

Hunahunaa ang mahitungod sa mga panahon sa imong kinabuhi diin ikaw milihok nga inubanan sa hugot nga pagtuo diha sa Ginoo ug nakadawat og espiritwal nga pagpamatuod pagkahuman. Si Elder D. Todd Christofferson sa Korum sa Napulog Duha ka mga Apostoles kaniadto mipasabot kon sa unsang paagi nga ang pagpabilin nga matinud-anon atol sa usa ka pagsulay nakatabang kaniya nga molambo sa espiritwal nga paagi:

Elder D. Todd Christofferson

Bisan og ako nag-antus kaniadto, samtang ako naghinumdom karon, mapasalamaton ako nga walay dali nga solusyon sa akong problema. Ang kamatuoran nga ako napugos sa pagduol sa Dios alang sa panabang sa daghang mga tuig nagtudlo nako unsaon sa pag-ampo ug makakuha og mga tubag sa pag-ampo ug nagtudlo nako sa usa ka praktikal kaayo nga paagi sa pagbaton og hugot nga pagtuo sa Dios. Akong nailhan ang akong Manluluwas ug akong Langitnong Amahan sa paagi ug sa matang nga dili unta mahitabo sa laing paagi o mas dugay pa unta nga makab-ot. … Nakakat-on ko sa pagsalig sa Ginoo sa tibuok nakong kasingkasing. Nakakat-on ko sa paglakaw uban Kaniya adlaw-adlaw. (“Hangad ngadto sa Dios Matag Adlaw,” Liahona, Peb. 2015, 50)

icon, pamalandong

Pamalandong agi og Pagpangandam alang sa Klase

Unsa nga mga leksyon ang imong nakat-onan o unsa nga mga panalangin ang imong nadawat samtang ikaw nagpabilin nga matinud-anon atol sa mga panahon sa panglimbasog? Sa unsang paagi nga kini nga matang sa kasinatian makatabang kanimo nga mas mapaduol ngadto kang Jesukristo?

Seksyon 2

Sa unsang mga paagi nga ako mapanalinganan ug mapalig-on pinaagi sa pagpakita og hugot nga pagtuo diha ni Jesukristo?

Ingon nga narekord diha sa Ether 12:7–22, si Moroni mihatag og mga ehemplo sa mga tawo kinsa mipakita og hugot nga pagtuo ug napanalanginan og mga milagro, mga pagpadayag, kaluwasan, pagkakabig, ug mga saad. Nag-istorya bahin sa igsoon nga lalaki ni Jared, kinsa mibalhin sa bukid sa Zerin pinaagi sa gahom sa Ginoo, si Moroni mihukom, “Ug kon siya wala pay hugot nga pagtuo kini dili [mabalhin]; busa [ang Ginoo] molihok human ang mga tawo makabaton og hugot nga pagtuo” (Ether 12:30).

Si Presidente Russell M. Nelson mitudlo:

Presidente Russell M. Nelson

Ang hugot nga pagtuo kang Jesukristo moduso kanato sa pagbuhat og mga butang nga dili unta nato buhaton. Ang pagtuo nga modasig kanato sa paglihok naghatag kanato og dugang access ngadto sa Iyang gahum. (“Pagdawat sa Gahum ni Jesukristo diha sa Atong Kinabuhi,” Liahona, Mayo 2017, 41)

icon, pagtuon

Pagtuon agi og Pagpangandam alang sa Klase

Pangita og tudling o asoy diha sa Basahon ni Mormon nga naghulagway og katawhan nga nakadawat og balaanon nga tabang human mipakita og hugot nga pagtuo diha ni Jesukristo. Kon ganahan ka og pipila ka ehemplo, ikonsiderar ang pagbasa sa mosunod:

• Ether 6:2–12 (Ang mga Jaredite mitabok sa dagat gamit ang mga kasko [barges].)

• 1 Nephi 3:4–7; 4:1–19 (Si Nephi mibalik sa balay ni Laban. Mahimo usab nimong tan-awon ang video sa Basahon ni Mormon “Si Nephi Gisugo sa Espiritu sa Pagpatay ni Laban (1 Nephi 4:1–19)” [3:26].)

Human sa imong pagtuon sa usa niini nga mga tudling o sa usa nga imong nahunahunaan, pamalandongi ang mosunod nga mga pangutana ug irekord ang imong mga tubag. Pag-andam sa pagpaambit sa imong mga panabot diha sa klase.

1. Sa unsang paagi nga ang indibidwal o ang katawhan mipakita og hugot nga pagtuo kang Jesukristo? Unsa nga mga panalangin ug balaanon nga gahom ang gihatag sa Ginoo human sila mipakita og hugot nga pagtuo diha Kaniya?

2. Unsa nga mga baroganan o mga pamaagi ang inyong makat-onan gikan niini nga asoy? Sa unsang paagi nga magamit ninyo kini sa inyong kinabuhi?

Mga Kasko sa Jaredite, ni Gary E. Smith

Si Elder L. Whitney Clayton sa Kapangulohan sa Seventy mitudlo sa mosunod kabahin sa pagpuyo pinaagi sa hugot nga pagtuo:

Elder L. Whitney Clayton

Ang Dios naghangyo kanato sa pagsabut Kaniya—sa pagsalig Kaniya ug pagsunod Kaniya. Naghangyo Siya kanato nga “ayaw pakiglalis tungod kay kamo wala makakita.” Nagpasidaan siya kanato nga dili kita magdahum og sayon nga mga tubag o dali nga mga solusyon gikan sa langit. Mamaayo ra ang tanan kon mobarug kita nga lig-on panahon sa “pagsulay sa [atong] hugot nga pagtuo,” bisan unsa pa ka lisud sagubangon kana nga pagsulay o unsa ka hinay moabut sa tubag [tan-awa sa Ether 12:6]. Wala ko magpasabut sa “walay hunahuna nga pagsunod” [tan-awa sa Boyd K. Packer, “Agency and Control,” Ensign, Mayo 1983, 66–68] apan sa mahunahunaon nga pagsalig diha sa hingpit nga gugma ug hingpit nga panahon sa Ginoo. (“Unsa gani Iyang Isugo Kaninyo, Buhata Ninyo,” Liahona, Mayo 2017, 99)

icon, pamalandong

Pamalandong agi og Pagpangandam alang sa Klase

Unsa kaha ang gihangyo sa Ginoo nga ipabuhat kanimo nga magkinahanglan kanimo nga molihok nga adunay hugot nga pagtuo? Sa unsang paagi ka makapakita sa imong pagsalig Kaniya samtang mopadayon ka sa imong kinabuhi?

Seksyon 3

Unsa ang akong kinahanglan nga buhaton aron makaangkon o makapalig-on sa akong personal nga pagsaksi sa Basahon ni Mormon?

Human sa kalaglagan sa Nephite nga sibilisasyon, nag-inusarang nahibilin si Moroni sa pagkompleto sa Basahon ni Mormon. Sa wala pa silyohi ang rekord, mitanyag siya og pipila ka pulong sa pagtambag ug pag-awhag. Giaghat niya ang umaabot nga mga mambabasa nga tagdon ang Basahon ni Mormon uban sa hugot nga pagtuo aron makadawat sila og personal nga saksi gikan sa Espiritu Santo nga kini tinuod.

Si Moroni nga nagsulat diha sa bulawan nga mga palid

icon, pagtuon

Pagtuon agi og Pagpangandam alang sa Klase

Basaha ang imbitasyon ni Moroni diha sa Moroni 10:3–5, ug ikonsiderar ang pagmarka kon sa unsang paagi nga kita makapakita og hugot nga pagtuo kang Jesukristo ug makahibalo nga ang Basahon ni Mormon tinuod.

duha ka young adult nga nagbasa sa Basahon ni Mormon

Samtang nagserbisyo isip usa ka sakop sa Korum sa Seventy, si Elder Gene R. Cook mipasabot kon sa unsang paagi nga ang pagdawat sa imbitasyon ni Moroni usa ka buhat sa hugot nga pagtuo:

Elder Gene R. Cook

Bantayi ang espesyal nga paagi diin kita makadawat og mga tubag gikan sa Dios: kita kinahanglang “mangutana sa kinasingkasing, uban sa tinuod nga katuyoan, nga may hugot nga pagtuo kang Kristo” [Moroni 10:4]. Hunahunaa pag-usab ang pinulongan nga “may hugot nga pagtuo kang Kristo.” Kini nagtimaan sa usa ka importante nga kahimtang sa hunahuna. Ang pagbaton og hugot nga pagtuo kang Kristo nagpasabot nga kita modawat nga adunay Dios, modawat nga pinaagi sa gahom sa iyang Anak nga si Jesukristo, ang Dios mahimong motubag sa atong pag-ampo; ug motuo nga ang Dios mahimong mopadayag sa kamatuoran ngari kanato. Gitangtang nato ang atong kaugalingon diha sa dili aktibo nga posisyon pinaagi sa pagpakita og hugot nga pagtuo diha ni Jesukristo. Molihok kita! Bisan tuod og tingali ang atong pagtuo gamay ra, mobuhat kita sama sa gitudlo ni Alma: kita “[m]agbansay sa usa ka tipik sa hugot nga pagtuo, oo, bisan [kita] kutob ra sa pagtinguha sa pagtuo [nga ang Dios makatabang kanato], tugoti kini nga tinguha nga molihok [dinhi kanato]” (Alma 32:27). (“Moroni’s Promise,” Ensign, Abr. 1994, 14)

icon, irekord

Irekord ang Imong mga Hunahuna

Hunahunaa kon sa unsang paagi nga ang imbitasyon ug saad ni Moroni nagsunod sa sumbanan sa pagkadawat og saksi human makapakita og hugot nga pagtuo (tan-awa sa Ether 12:6). Unsa man ang imong kasinatian bahin sa pagkadawat og saksi sa kamatuoran sa Basahon ni Mormon? Unsa ang imong mabuhat aron makaangkon og imong kaugalingon nga pagpamatuod sa Basahon ni Mormon o mapalawoman ang pagpamatuod nga imo nang naangkon?

Gusto pa og Dugang? (Opsyonal)

Sa unsang paagi nga ang pagsulay sa hugot nga pagtuo makapausab sa akong kinabuhi alang sa mas maayo?

Elder Neil L. Andersen

Sa pakigpulong nga“Pagsulay sa Inyong Hugot nga Pagtuo” (Liahona, Nob. 2012, 39–42), si Elder Neil L. Andersen sa Korum sa Napulog Duha ka mga Apostoles mihisgot kon sa unsang paagi nga ang pagpabilin nga matinud-anon atol sa pagsulay sa atong hugot nga pagtuo mahimong mosangpot ngadto sa espiritwal nga paglambo.

Unsa ang yano nga mga paagi nga ako makalihok nga adunay hugot nga pagtuo sa akong kaugalingon nga kinabuhi?

Sa unsang paagi nga ang pag-angkon ug pagpalawom sa akong pagpamatuod sa Basahon ni Mormon makausab sa akong kinabuhi?

Ang mosunod nga mga kapanguhaan naglangkob og mga asoy sa mga tawo kansang mga kinabuhi nausab samtang nakaangkon sila og pagpamatuod sa Basahon ni Mormon o misalig niini atol sa usa ka mahagiton nga panahon:

• Ang artikulo nga “Ang Imong Pagpamatuod ug ang Basahon ni Mormon” (Liahona, Sept. 2017):

  • Portia Marjorie J. Alvaro, “Pagdawat sa Hagit sa usa ka Propeta” (54)

  • “Ang Basahon nga Miluwas sa Akong Kinabuhi” (55)