Leksyon 14 Materyal sa Magtutudlo

Pagkahimong mga Himan diha sa mga Kamot sa Dios

Human ang anak nga mga lalaki ni Mosiah naghinulsol ug nakabig ngadto sa ebanghelyo ni Jesukristo, nahimo silang gamhanan nga mga misyonaryo ug mitabang sa daghang mga Lamanite sa pagduol ngadto Kaniya. Kini nga leksyon mohatag sa mga estudyante og oportunidad sa pagpakigbahin kon sa unsa nga paagi ang paglig-on sa ilang kaugalingon nga pagkakabig makadugang sa ilang tinguha sa pagpakigbahin sa ebanghelyo ngadto sa uban. Ang mga estudyante mohunahuna kon unsa ang ilang mabuhat nga mahimong mas epektibo nga mga himan diha sa mga kamot sa Dios samtang sila nagpundok sa Israel sa pagpangandam alang sa Ikaduhang Pag-anhi sa Ginoo.

Mga Sugyot alang sa Pagtudlo

Si Alma ug ang anak nga mga lalaki ni Mosiah nakabig ug nanglakaw aron sa pagsangyaw ngadto sa mga Lamanite.

Ipakita ang mosunod nga mga pamahayag. Hangyoa ang mga estudyante sa paggrado sa hilom nga paagi sa ilang mga kaugalingon alang sa matag pahayag gikan sa 1 ngadto sa 5 (1 = supak gyud kaayo ug 5 = uyon gyud kaayo).

1. Ako nagtinguha sa pagpakigbahin sa ebanghelyo ngadto sa uban.

2. Nag-ampo ako alang sa mga oportunidad nga makapakigbahin sa ebanghelyo.

3. Ang pagpakigbahin sa ebanghelyo usa ka normal ug natural nga bahin sa akong kinabuhi.

4. Naningkamot ako nga mahimong epektibo nga himan diha sa mga kamot sa Dios pinaagi sa pagpakigbahin sa Iyang ebanghelyo.

Human ang mga estudyante may panahon sa pagbuhat niining kaugalingong paghatag og grado, ipakita ang mosunod nga pangutana: Unsay akong mabuhat nga mahimong usa ka mas epektibo nga himan sa pagpakigbahin sa ebanghelyo ni Jesukristo? Dapita ang mga estudyante sa pagpaminaw ug sa pagrekord sa bisan unsa nga mga pag-aghat nga makatabang kanila sa pagtubag niini nga pangutana.

Pahinumdumi ang mga estudyante nga ang anak nga mga lalaki ni Mosiah nahimong mga himan diha sa mga kamot sa Dios samtang sila mipuasa ug miampo alang sa Iyang Espiritu ug misangyaw sa Iyang ebanghelyo (tan-awa sa Alma 17:3, 9, 11; 26:3, 15). Dapita ang mga estudyante sa pagbasa sa Mosiah 27:35–36 ug Mosiah 28:1–3, mangita alang sa unsa nga paagi ang mga kasingkasing sa anak nga mga lalaki ni Mosiah nausab human sa ilang pagkakabig.

Pagpalambo sa Atong Pagtudlo ug Pagkat-on

Pangutana og mga makadapit sa pagkat-on diha sa kasingkasing. Kon ikaw makamatikod nga ang mga estudyante nakasabut og usa ka baruganan sa ebanghelyo diha sa ilang mga hunahuna, pangutana og makapabalhin sa kasinatian sa pagkat-on ngadto sa ilang mga kasingkasing. Kini nga mga matang sa mga pangutana nagtugot sa mga estudyante sa pagsiksik sa ilang kaugalingon nga mga kasingkasing, paggamit sa ilang kaugalingong mga kasinatian, ug sa pagpakigbahin sa ilang mga pagpamatuod. Ang mao nga mga pangutana mahimong sama sa usa niining mosunod nga mga porma: “Kanus-a nimo nasinati … ?” “Giunsa nimo pagkahibalo … ?” o “Unsa ang imong gibati mahitungod sa … ?”

• Unsa ang imong namatikdan mahitungod sa mga tinguha sa anak nga mga lalaki ni Mosiah? Unsa ang atong makat-unan gikan sa paagi sa ilang pagkakabig pag-impluwensya sa ilang tinguha nga mahimong mga himan diha sa mga kamot sa Dios? (Mahimo nimong dapiton ang mga estudyante sa pagribyu sa pamahayag ni Presidente Dallin H. Oaks diha sa seksyon 1 sa materyal sa pagpangandam. Naggamit sa mga tubag sa mga estudyante, isulat diha sa pisara ang usa ka baruganan nga susama sa mosunod: Samtang ang atong pagkakabig nag-uswag, ang atong tinguha ug pagkaandam nga mahimong himan diha sa mga kamot sa Dios ug ang pakigbahin sa ebanghelyo nagtubo.)

• Ngano kaha nga ang pag-uswag sa atong pagkakabig naglig-on sa atong tinguha sa pagpakigbahin sa ebanghelyo? Sa unsa nga paagi nga ang pagsabut niini nga baruganan nagtabang kanato sa pag-andam alang sa mga misyon o mahimong mas maayo sa pagpakigbahin sa ebanghelyo diha sa atong inadlaw-adlaw nga mga kinabuhi?

• Unsa ang pipila sa mga ehemplo gikan sa mga kasulatan o kasaysayan sa Simbahan ang nagpakita niini nga baruganan? Unsa nga mga kasinatian ang nagtabang kanimo nga mahibalo nga kini nga mga baruganan tinuod? (Mahimo nimong dapiton ang pipila ka mga estudyante sa pagpakigbahin sa ilang mga ehemplo ug personal nga mga kasinatian nga adunay pares.)

Hatagi ang mga estudyante og pipila ka mga minuto sa pagribyu sa paggrado sa kaugalingon nga ilang gibuhat ug sa pagpamalandong sa pangutana nga gipaila diha sa pagsugod sa klase. Hunahunaa ang pagdapit kanila sa pagrekord sa mga hunahuna ug mga pagbati nga sila aduna atol sa klase.

Ang anak nga mga lalaki ni Mosiah nahimong mga himan diha sa mga kamot sa Ginoo.

Pagdapit og mga estudyante sa pagpakigbahin og bisan unsa nga mga hagit nga ilang gisinati samtang sila naninguha sa pagpakigbahin sa ebanghelyo. (Mahimo nimong ilista ang ilang mga tubag diha sa pisara ug sa paghisgot kon sa unsa nga paagi kini nga mga hagit makapugong kanato gikan sa pagpakigbahin sa ebanghelyo.)

Isulat ang mosunod nga wala mahuman nga pamahayag diha sa pisara: Kita mahimo nga mas epektibo nga mga himan diha sa mga kamot sa Dios kon kita …

Sa daklit ribyuha ang mga hagit nga giatubang sa anak nga mga lalaki ni Mosiah samtang sila misugod sa pagsangyaw sa ebanghelyo taliwala sa mga Lamanite (tan-awa sa seksyon 2 sa materyal sa pagpangandam). Dapita ang mga estudyante sa pagribyu sa Alma 17:2–3, 9–11, mangita alang sa unsay gibuhat sa anak nga mga lalaki ni Mosiah sa pagbuntog sa ilang mga hagit ug sa paghimong epektibo nga mga himan diha sa mga kamot sa Dios.

• Naggamit sa unsay atong nakat-unan gikan sa anak nga mga lalaki ni Mosiah, unsaon nato sa pagkompleto ang pamahayag diha sa pisara aron sa pagporma og usa ka baruganan? (Naggamit sa mga pulong sa estudyante, kompletoha ang pamahayag aron kini magporma og baruganan nga susama sa mosunod: Kita makahimo nga mas epektibo nga mga himan diha sa mga kamot sa Dios samtang kita mag-ampo, magpuasa, ug magsiksik sa mga kasulatan.)

Dapita ang mga estudyante sa pag-ila gikan sa Alma 17:2–3 kon unsa nga espiritwal nga mga panalangin ang miabut ngadto niini nga mga misyonaryo samtang sila miampo, mipuasa, ug misiksik sa mga kasulatan. (Tabangi ang mga estudyante sa pag-ila og lain nga baruganan nga susama sa mosunod: Samtang kita nag-ampo, nagpuasa, ug nagsiksik sa mga kasulatan, makadawat kita sa espiritu sa pagpadayag.)

• Giunsa sa espiritu sa pagpadayag pagtabang ni Ammon nga mahimong epektibo nga himan diha sa mga kamot sa Dios? (Mahimo nimong dapiton ang usa ka estudyante sa pag-asoy og usab sa daklit sa kasinatian ni Ammon uban kang Hari Lamoni ug dayon basaha ang Alma 18:33–35.)

• Nganong importante ang pagbaton sa espiritu sa pagpadayag samtang kita naningkamot nga mahimong himan diha sa mga kamot sa Dios?

• Giunsa sa espiritu sa pagpadayag sa pagtabang kanimo nga mahimong mas epektibo nga himan diha sa mga kamot sa Dios?

Hunahunaa ang pagdapit sa usa ka estudyante sa pagbasa sa mosunod nga pamahayag ni Presidente Russel M. Nelson:

Presidente Russell M. Nelson

Kon kita magtinguha nga maminaw—tinuod nga pagpaminaw—[Jesukristo], kita giyahan nga makahibalo unsay buhaton sa bisan unsa nga sirkumstansya. …

Ako mousab sa akong hangyo alang ninyo nga inyong buhaton bisan unsa ang makapadugang sa inyong espirituhanong kapasidad sa pagdawat og personal nga pagpadayag. (“Paminaw Kaniya,” Liahona, Mayo 2020, 89, 90)

Dapita ang mga estudyante sa pagribyu sa pamayahag ni Elder Diether F. Uchtdorf diha sa seksyon 3 sa materyal sa pagpangandam ug pamalandonga ang mosunod nga mga pangutana:

• Kinsa ang akong madapit nga mas magpaduol sa Manluluwas?

• Unsa ang akong mabuhat nga mahimong himan diha sa mga kamot sa Dios aron sa pagtabang niadtong mga indibidwal nga mas magpaduol ngadto ni Kristo?

Mahimo nimong hatagan ang mga estudyante og panahon sa pagrekord sa ilang mga hunahuna ug mga pagbati. Mahimo usab nimong dapiton ang bisan kinsa nga andam nga mga estudyante sa pagpakigbahin unsay ilang plano nga buhaton.

Ipasabut nga tungod sa ilang pagpangandam, ang anak nga mga lalaki ni Mosiah nakadawat usab sa espiritu sa pagpadayag ug nakahimo sa pagtudlo uban ang gahum ug awtoridad. (Kini mahimong makatabang sa pagpasabut nga ang hugpong sa mga pulong “espiritu sa pagpadayag” mahimong nagpasabut ngadto sa “ang pagpamatuod ni Jesus” [Pinadayag 19:10].) Ipaniguro sa mga estudyante nga kita usab makadawat og susamang mga panalangin samtang kita nangandam nga mahimong mga himan diha sa mga kamot sa Dios.

Hunahunaa ang pagpakigbahin sa imong pagpamatuod nga uban sa panabang sa Ginoo, ang matag usa kanato mahimong himan diha sa Iyang mga kamot ug makatabang sa pagpundok sa Israel.

Alang sa Sunod nga Higayon

Hangyoa ang mga estudyante sa paghunahuna kon unsa sila kaandam alang sa Ikaduhang Pag-anhi ni Kristo. Ipasabut nga ang sunod nga yunit mao ang mahitungod sa pagduaw sa Manluluwas ngadto sa mga Nephite didto sa mga Amerika. Samtang ang mga estudyante nangandam alang sa ilang sunod nga klase, awhaga sila sa pagpangita kon unsang mga hitabo nga naggiya ngadto sa pagpakita sa Manluluwas ngadto sa mga Nephite ang makatudlo kanila mahitungod sa pagpangandam alang sa Iyang pagbalik sa katapusan nga mga adlaw.