Leksyon 8 Materyal sa Pagpangandam sa Klase

Kinabuhi human sa Kamatayon

Ang Mahangturong Siyudad [The City Eternal], ni D. Keith Larson

Si Presidente Russell M. Nelson mitudlo: “Dili kinahanglan natong tan-awon ang kamatayon isip usa ka kaaway. Uban sa hingpit nga pagsabut ug pagpangandam, ang hugot nga pagtuo moilis sa kahadlok. Ang paglaum mopapahawa sa pagkawalay paglaum” (“Doors of Death [Mga Pultahan sa Kamatayon],” Ensign, Mayo 1992, 74). Samtang ikaw magtuon niini nga materyal sa pagpangandam, hunahunaa kon unsa ang gitudlo sa Basahon ni Mormon mahitungod sa kamatayon ug sa kinabuhi human sa kamatayon nga makatabang kanimo sa “pagpangandam sa pagsugat sa Dios” (Alma 12:24).

Seksyon 1

Unsay mahitabo human kita mamatay?

Human si Corianton, usa ka anak nga lalaki ni Alma nga Batan-on, mibiya sa pagpangalagad ug mihimo og sekswal nga pagpakasala, nakigsulti ang iyang amahan kaniya mahitungod sa kabug-at sa iyang mga lihok. Gitan-aw ni Alma si Corianton nga naguol mahitungod sa iyang kinabuhi human sa kamatayon ug ang silot nga naghulat sa makasasala. Gitudloan ni Alma ang iyang anak nga lalaki nga samtang ang tanang mga katawhan mabanhaw, ang matarung lamang ang mopuyo uban sa Dios.(tan-awa sa Alma 40:1, 9–10, 25–26). Mipasabut usab siya kon unsay mahitabo sa atong mga espiritu tali sa kamatayon ug sa Pagkabanhaw.

icon, pagtuon

Pagtuon agi og Pagpangandam alang sa Klase

Samtang ikaw magbasa sa pipila sa mga pagtulun-an ni Alma mahitungod sa kalibutan sa espiritu diha sa Alma 40:11–14, itandi ang mga kalainan tali sa kasinatian sa matarung ug ang kasinatian sa dautan. (Sa dihang si Alma migamit sa hugpong sa mga pulong “kawanangan sa kangitngit,”siya nagpasabut sa kahimtang sa dautan tali sa kamatayon ug sa Pagkabanhaw og wala magpasabut ngadto sa katapusang kahimtang ni Satanas ug sa iyang mga sumusunod. Tan-awa sa Giya ngadto sa mga Kasulatan, “Impyerno,” scriptures.ChurchofJesusChrist.org.)

The Commissioned [Ang Pagkatinugyanan], ni Harold I. Hopkinson

Gitudlo ni Presidente Joseph Fielding Smith kining mahitungod sa hugpong sa mga pulong “dad-on sa panimalay ngadto niana nga Dios kinsa mihatag kanila og kinabuhi”:

Presidente Joseph Fielding Smith

[Kini nga hugpong sa mga pulong] yanong nagpasabut nga ang ilang mortal nga pagpakabuhi natapos, ug sila mobalik ngadto sa kalibutan sa mga espiritu, diin ibutang sila sa usa ka dapit sumala sa ilang mga buhat uban sa makiangayon o sa dili makiangayon, didto aron sa paghulat sa pagkabanhaw. (Joseph Fielding Smith, Answers to Gospel Questions, comp. Joseph Fielding Smith Jr. [1958], 2:85)

Si Presidente Dallin H. Oaks sa Unang Kapangulohan miingon usab sa mosunod mahitungod sa kalibutan sa espiritu:

Presidente Dallin H. Oaks

Kita sayud gikan sa mga kasulatan nga human mamatay ang atong mga lawas magpadayon kitang magpuyo isip mga espiritu didto sa kalibutan sa espiritu. Ang kasulatan nagtudlo usab nga kining kalibutan sa espiritu gibahin tali sa mga “matarung” o “makiangayon” samtang buhi pa ug niadtong mga nagpakadautan. Naghulagway usab kini kon giunsa sa pipila ka matinud-anong mga espiritu pagtudlo sa ebanghelyo ngadto sa mga dautan o masinupakon (tan-awa sa 1 Pedro 3:19; Doktrina ug mga Pakigsaad 138:19–20, 29, 32, 37). Labing importante, ang bag-ong pagpadayag nagpahibalo nga ang buhat sa kaluwasan magpadayon didto sa kalibutan sa espiritu (tan-awa sa Doktrina ug mga Pakigsaad 138:30–34, 58), ug bisan kon giawhag kita sa dili paglangan sa atong paghinulsol dinhi sa mortalidad (tan-awa sa Alma 13:27), gitudloan kita nga ang ubang paghinulsol posible didto (tan-awa sa Doktrina ug mga Pakigsaad 138:58).(“Salig sa Ginoo,” Liahona, Nob. 2019, 26-27)

icon, pamalandong

Pamalandong agi og Pagpangandam alang sa Klase

Sa unsa nga paagi ang pagbaton og husto nga pagsabut sa kalibutan sa espiritu makatabang kanimo sa paghimo og maayong mga pagpili?

Seksyon 2

Sa unsa nga paagi ang pagtuo sa Pagkabanhaw nagdala kanako og paglaum?

Sa dihang si Alma ug si Amulek mitudlo sa mga katawhan sa Ammonihah, usa ka abogado nga ginganlan og Zeezrom misulay sa pagtuis sa mga pulong ni Amulek ug sa pagdaot sa iyang pagtudlo mahitungod ni Jesukristo. Agi og tubag, maisugong mipamatuod si Amulek nga ang Pagkabanhaw ug kaluwasan gikan sa sala moabut lamang pinaagi ni Jesukristo.

icon, pagtuon

Pagtuon agi og Pagpangandam alang sa Klase

Basaha ang Alma 11:42–44, ug pangitaa ang mga panalangin nga atong madawat pinaagi sa Pagkabanhaw.

batan-ong babaye naka- wheelchair nanggakus

Nagpamatuod sa importansya sa Pagkabanhaw, si Presidente Susan W. Tanner, kanhi Kinatibuk-ang Presidente sa Young Women mitudlo:

Presidente Susan W. Tanner

Kining mga sagrado nga mga lawas, nga kita mapasalamaton kaayo, nag-antus gikan sa kinaiyanhong [natural] mga limitasyon. Ang pipila sa mga tawo nahimugso nga adunay mga kakulangan, ug ang pipila nag-antus sa mga kasakit sa balatian sa tibuok nilang mga kinabuhi. Tanan kanato samtang nagka-edad nagsinati sa atong mga lawas nga sa inanay nagsugod sa pagkahinay. Sa higayon nga mahitabo kini, mangindahay na kita sa adlaw nga ang atong mga lawas mamaayo ug mahingpit. Kita nagpaabut sa Pagkabanhaw nga gihimong posible ni Jesukristo. … Nakahibalo ako nga pinaagi kang Kristo kita makasinati sa kahingpitan sa kalipay nga anaa lamang sa higayon nga ang espiritu ug ang elemento dili na gayud magkabulag (tan-awa sa D&P 93:33). (“Ang Kabalaan sa Lawas,” Liahona, Nob. 2005, 15)

icon, pamalandong

Pamalandong agi og Pagpangandam alang sa Klase

Sa unsa nga paagi nga ang pagbaton og usa ka pagpamatuod sa Pagkabanhaw makatabang kanimo sa pag-atubang sa mga hagit sa kinabuhi uban ang mas dakong paglaum ug kaisug?

Seksyon 3

Unsa ang akong mabuhat nga mas mamaayo ang pagpangandam sa pagsugat sa Dios?

Daghang mga katuigan human magtudlo sa Ammonihah, si Alma ug Amulek miadto og lain nga misyon, niini nga panahon ngadto sa mibiya sa kamatuoran nga mga Zoramite. Misugod si Alma ug si Amulek sa pagbaton og kalampusan taliwala sa mas mapainubsanong bahin sa mga katawhan. Human sa pagtudlo sa mga katawhan sa pagtan-aw ngadto ni Jesukristo ug sa pagtuo diha sa gahum sa Iyang Pag-ula, gidapit sila ni Amulek sa pagpangandam sa pagsugat sa Dios.

icon, pagtuon

Pagtuon agi og Pagpangandam alang sa Klase

Hunahunaa kon unsa ang imong mabuhat aron mas mamaayo ang pagpangandam sa pagsugat sa Dios samtang ikaw nagbasa sa Alma 34:32–34.

babaye namalandong

Namulong sa importansya sa pagpangandam karon sa pagsugat sa Dios, si Presidente Henry B. Eyring sa Unang Kapangulohan mitudlo:

Presidente Henry B. Eyring

“Delikado ang pulong nga sa umaabut nga adlaw [unya na lang] kon ang ipasabut niini “dili karong adlawa.” “Sa umaabot nga adlaw maghinulsol ko.” “Sa umaabot nga adlaw ako siyang pasayloon.” …

“Ang mga kasulatan nagtataw sa peligro sa paglangay-langay. … Karong adlawa usa ka bililhong gasa sa Dios. Ang hunahuna nga “Sa umaabut nga adlaw ako gyud” mahimong makasakmit sa mga kahigayunan sa panahon ug sa mga panalangin sa kahangturan. (“Karong Adlawa,” Liahona, Mayo 2007, 89)

Sa dihang si Alma nga Batan-on nangalagad ngadto sa mga katawhan diha sa yuta sa Zarahemla, nagutana siya og daghang makapahunahuna nga mga pangutana aron sa pagtabang kanila sa paghunahuna kon unsay ilang kinahanglan gayud nga buhaton nga maandam sa pagbarug sa atubangan sa Dios (tan-awa sa Alma 5).

icon, pagtuon

Pagtuon agi og Pagpangandam alang sa Klase

Basaha ang Alma 5:15–17, 19. 27, 33, ug hunahunaa kon unsaon nimo pagtubag ang mga pangutana ni Alma.

icon, irekord

Irekord ang Imong mga Hunahuna

Human mamalandong sa mga pangutana ni Alma, hunahunaa kon unsaon kaha nimo pagtubag ang mosunod nga pangutana gikan ni Presidente Oaks: “Kon [ikaw] nahibalo nga [ikaw] makigkita sa Ginoo ugma––pinaagi sa [imong] kamatayon nga wala sa oras o pinaagi sa Iyang kalit nga pag-abut––unsa may [imong] buhaton karon?” (“Pagpangandam alang sa Ikaduhang Pag-anhi,” Liahona, Mayo 2004, 9).

Gusto pa og Dugang? (Opsyonal)

Unsaon sa plano sa kaluwasan pagtabang kanako sa pagtan-aw sa kamatayon gikan sa mahangturong panan-aw?

Asa ako makakat-on pa og dugang mahitungod sa katuyoan ug importansya sa Pagkabanhaw?

Sa 3 Nephi 11:1–17 atong mabasa ang asoy sa nabanhaw nga Kristo nga nagpakita ngadto sa mga 2,500 ka mga tawo didto sa yuta sa Bountiful.

Ang mosunod nga mga propeta sa Basahon ni Mormon naghatag og dugang mga pagtulun-an mahitungod sa Pagkabanhaw: Lehi (tan-awa sa 2 Nephi 2:8), Jacob (tan-awa sa 2 Nephi 9:10–12), Abinadi (tan-awa sa Mosiah 15:20–24; 16:7–8), Samuel nga Lamanite (tan-awa sa Helaman 14:15–17), ug Mormon (tan-awa sa Mormon 7:5–7).

Unsa ang akong kinahanglan nga buhaton kon ako adunay dili matubag nga mga pangutana mahitungod sa kinabuhi human sa kamatayon?

Presidente Dallin H. Oaks

Diha sa iyang pakigpulong “Salig sa Ginoo” (Liahona, Nob. 2019, 26–29), si Presidente Oaks mitudlo og pipila ka mga butang nga kita nahibalo mahitungod sa kinabuhi human sa kamatayon ug nag-aghat kanato sa pagsalig diha sa Ginoo kabahin niadtong mga butang nga wala pa nato mahibaloi.