Leksyon 13 Materyal sa Magtutudlo

Ang Pagpundok sa Israel sa Katapusang mga Adlaw

Dinhi niini nga yunit atong pagahisgutan ang tataw nga mga pagtulun-an sa Basahon ni Mormon mahitungod sa pagkatibulaag ug pagpundok sa Israel. Gitibulaag sa Ginoo ang karaang Israel tungod kay sila midumili sa Iyang pakigsaad, apan misaad Siya sa pagpundok kanila sa katapusang mga adlaw. Dinhi niini nga leksyon makabaton ang mga estudyante og oportunidad sa pagpasabut sa mga panalangin ug mga responsibilidad ingon nga kabahin sa balay ni Israel. Sila usab pagaawhagon sa paghunahuna kon unsaon nga sila makatabang og usa ka tawo “sa matag habig sa tabil … nga mopadulong sa paghimo og mga pakigsaad sa Dios” (Russell M. Nelson ug Wendy W. Nelson, “Hope of Israel” [tibuok kalibutan nga debosyonal sa mga kabatan-onan, Hunyo 3, 2018], dugang ngadto sa New Era ug Ensign, 15, HopeofIsrael.ChurchofJesusChrist.org).

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Tabangi ang mga estudyante sa pagdiskubre og mga koneksyon. Kon ang mga estudyante mobati nga unsay ilang gitun-an adunay kalabutan ngadto sa mga kahimtang sa ilang mga kinabuhi, sila mas may kalagmitan nga moapil og pagkat-on nga motabang kanila sa paghimo og matarung nga lihok. Samtang ikaw mag-andam og mga leksyon hunahunaa ang kaagi sa imong mga estudyante, mga kasinatian sa kultura, mga hilig, mga pangutana, ug mga pakigbisog. Pagmatngon sa dili pagsulti sa mga estudyante kon unsa ang koneksyon ngadto sa ilang mga kinabuhi, hinoon, tabangi sila sa pagdiskubre og koneksyon alang sa ilang mga kaugalingon.

Nagtudlo si Lehi ug Nephi mahitungod sa pagkatibulaag ug pagpundok sa Israel.

Ipakita ang mosunod nga talan-awon:

Ang imong higala nga si Becky mao pa lamang ang pagtambong sa iyang unang miting sa sakramento. Human sa pagsimba gipangutana mo siya kon unsa ang iyang gibati mahitungod niini. Mitubag siya:“Ang mga tawo mahigalaon ug ang mga pakigpulong makapaikag, apan ako sa tinuod nalibug sa dihang usa ka mamumulong misulti mahitungod sa pagpundok sa Israel ug miingon nga kini ang labing importanting butang nga nahitabo sa yuta karon.” Dayon siya nangutana: “Unsa ang pagpundok sa Israel, ug nganong kini importante kaayo sa inyong simbahan?”

Dapita ang mga estudyante sa paghisgot uban sa usa ka pares kon sa unsa nga paagi sila motubag sa pangutana ni Becky. (Kon gikinahanglan, ang mga estudyante makaribyu usab sa seksyon 1 sa materyal sa pagpangandam.) Human ang mga estudyante makahatag sa ilang mga tubag, dapita ang pipila sa pakigbahin kon unsa ang ilang nakat-unan og gibati mahitungod sa balay ni Israel samtang sila magsultihanay.

Hunahunaa ang pagpakita sa nag-uban nga hulagway. Dapita ang mga estudyante sa pagribyu sa seksyon 2 sa materyal sa pagpangandam (ilabina sa 1 Nephi 10:12–14 ug 1 Nephi 15:12–15). Dayon hangyoa ang usa ka estudyante sa pagpasabut og daklit kon giunsa ni Lehi ug Nephi paggamit sa kahoy nga oliba sa paghisgot mahitungod sa pagkatibulaag ug pagpundok sa Israel.

kahoy nga oliba

Mahimo nimong isulat ang mosunod nga wala mahuman nga pamahayag diha sa pisara: Ang usa ka tawo ipundok ngadto sa balay ni Israel kon siya …

Samtang ang mga estudyante makigbahin sa ilang mga panabut, i-rekord ang ilang mga tubag, nga mahimong nag-apil sa mosunod nga kamatuoran: Ang usa ka tawo ipundok ngadto sa balay ni Israel kon siya nakadawat sa kahingpitan sa ebanghelyo, moabut sa usa ka kahibalo nga si Jesukristo mao ang atong Ginoo ug Manunubos, ug naghimo ug naghupot sa mga pakigsaad sa ebanghelyo. Mahimo nimong gamiton ang pipila sa mosunod nga mga pangutana aron matabangan ang mga estudyante nga malig-on ang ilang pagsabut kabahin sa pagpundok sa Israel:

• Sa unsa nga paagi ang pagpundok sa Israel may kalabutan ngadto niadtong kinsa mga buhi ug niadtong kinsa nangamatay?

• Ngano kaha si Presidente Nelson miingon nga ang pagpundok sa Israel mao “ang labing importanting butang nga nahitabo sa yuta karon” (“Paglaum sa Israel” 8)? (Mahimo nimong ribyuhon ang iyang pamahayag diha sa pasiuna ug mga seksyon 1 ug 2 sa materyal sa pagpangandam.)

• Sa unsa nga mga paagi nga atong gipasidunggan ang kinabuhi ug sakripisyo ni Jesukristo kon kita moapil sa pagpundok sa Israel?

• Sa unsa nga paagi ang imong kinabuhi naimpluwensya o giunsa ang mga kinabuhi sa mga sakop sa imong pamilya napanalanginan pinaagi sa pagpundok sa Israel?

Hunahunaa ang pagdapit sa mga estudyante sa pagpamalandong kon unsa kaha ang ilang bation ug unsaon nila sa pagtubag kon ang propeta personal nga mangutana kanila niini nga pangutana: “Gusto ka ba nga mahimong usa ka dakong bahin sa labing dako nga hagit, sa labing dako nga kawsa, ug sa labing dako nga buhat sa yuta karon?” (“Paglaum sa Israel,” 8).

Nagtawag si Jesukristo og mga sulugoon sa pagtabang diha sa buhat sa pagpundok sa Israel.

Sa daklit ribyuha kon giunsa paggamit ni Jacob ang pasumbingay ni Zenos sa kahoy sa oliba sa pagtudlo mahitungod sa pagpundok ug pagkatibulaag sa Israel (tan-awa sa seksyon 3 sa materyal sa pagpangandam). Ipasabut nga sa tunga-tunga ngadto sa pasumbingay ang Ginoo sa ubasan naguol tungod kay ang mga kahoy sa oliba (nga nagrepresentar sa mga katawhan sa Ginoo) wala mamunga og maayong bunga. Dapita ang mga estudyante sa pagbasa sa Jacob 5:47, 51, mangita alang sa mga pagbati sa Ginoo mahitungod sa balay sa Israel.

• Unsa ang gitudlo niini nga mga bersikulo kanato mahitungod sa kinaiya ni Jesukristo?

• Sa unsa nga paagi nga ang dako nga kabalaka sa Ginoo alang kanimo nag-impluwensya sa imong mga pagbati alang Kaniya?

Dapita ang mga estudyante sa pagribyu sa Jacob 5:61–62, 70–72, mangita alang sa atong tahas sa pagtabang sa Ginoo sa pagpundok sa Israel. (Tabangi ang mga estudyante sa pag-ila sa mosunod nga baruganan: Samtang kita makugihon nga maghago uban sa Ginoo sa pagtabang sa pagpundok sa Israel, kita pagapanalanginan uban sa hingpit nga kalipay.)

• Nganong importante kini alang sa matag usa kanato ang pagtabang sa Ginoo sa pagpundok sa Israel?

• Unsa nga mga butang ang atong mahimo sa pagpundok sa Israel? (Ang mga estudyante mahimong mogahin og pipila ka panahon sa paglista og mga ideya ug sa paghisgot mahitungod kon giunsa nila pag-apil diha sa pagpundok sa Israel. Mahimo usab ikaw nga moribyu sa pamahayag ni Presidente Nelson sa seksyon 3 sa materyal sa pagpangandam.)

• Unsa ang imong gibati sa dihang ikaw nakatabang og usa ka tawo sa bisan hain nga habig sa tabil nga mapundok ngadto sa balay ni Israel?

Mahimo nimong tapuson ang leksyon pinaagi sa pagpakigbahin sa mosunod nga pamahayag o sa pagsalida og usa ka video clip (time code 32:19 ngadto sa 33:37) sa mosunod nga pamahayag ni Presidente Nelson gikan sa pakigpulong “Paglaum sa Israel”:

Presidente Russell M. Nelson

Ang matag propeta namulong mahitungod sa atong panahon, sa diha nga ang Israel pagapundukon ug ang kalibutan pagaandamon alang sa Ikaduhang Pag-anhi sa Manluluwas. Hunahunaa kini! Sa tanang mga katawhan kinsa nakapuyo sukad niini nga planetang yuta, kita mao kinsa ang makahimo sa pag-apil niini nga katapusan, dakong panagpundok nga hitabo. Unsa ka makapahinam kana! (“Paglaum sa Israel,” 8)

Pahinumdumi ang mga estudyante nga agi og pagpangandam alang niini nga leksyon, sila gidapit sa pag-ila og usa ka tawo––sa bisan hain nga habig sa tabil––sila makatabang sa paghimo og mga lakang ngadto sa paghimo og mga pakigsaad uban sa Dios (tan-awa sa mga seksyon 2 ug 3 sa materyal sa pagpangandam). Hatagi ang mga estudyante og panahon sa pagpamalandong, pagrekord sa ilang mga panghunahuna, ug sa pagtapos sa ilang plano sa kalihokan. Kon gibati nimo nga kini angay, dapita ang pipila ka mga estudyante sa pakigbahin kon unsay ilang gibati nga nadasig nga buhaton.

Alang sa Sunod nga Higayon

Ipasabut sa mga estudyante nga ang pagtabang sa pagpundok sa Israel, kita gidapit nga mahimong mga himan diha sa mga kamot sa Dios ug sa pakigbahin sa Iyang ebanghelyo ngadto sa tanang mga tawo. Samtang ang mga estudyante nagbasa diha sa pagpangandam alang sa sunod nga klase, dapita sila sa paghunahuna kon unsay ilang mabuhat nga gani mahimong mas epektibong mga himan diha sa mga kamot sa Dios sa pakigbahin sa ebanghelyo.