Leksyon 1 Materyal sa Magtutudlo: Ang Basahon ni Mormon: Lain nga Tugon ni Jesukristo
“Leksyon 1 Materyal sa Magtutudlo: Ang Basahon ni Mormon: Lain nga Tugon ni Jesukristo,” Mga Pagtulun-an ug Doktrina sa Basahon ni Mormon (2021)
“Leksyon 1 Materyal sa Magtutudlo,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 1 Materyal sa Magtutudlo
Ang Basahon ni Mormon: Lain nga Tugon ni Jesukristo
Si Bishop Gérald Caussé, Presiding Bishop, mipamatuod, “Ang labing mahinungdanong mensahe sa Basahon ni Mormon mao ang pagpahiuli sa tinuod nga kahibalo bahin sa mahinungdanong tahas ni Jesukristo sa kaluwasan ug kahimayaan sa katawhan” (“Usa ka Buhi nga Saksi sa Buhi nga Kristo,” Liahona, Mayo 2020, 39).
Ang Basahon ni Mormon nag-agni kanato nga motuo kang Jesukristo ug nagdasig kanato sa pagbuhat og maayo. Isip usa ka resulta niini nga leksyon, ang mga estudyante moila og importante nga mga panalangin nga mahimo nilang madawat pinaagi sa ilang pagtuon sa Basahon ni Mormon, mopasabot unsay mahimo nilang buhaton aron mas mapaduol kang Jesukristo, ug magplano kon unsaon nila nga mahimong mas kugihan nga mga tigkat-on.
Timan-i: Kon posible, kontaka ang mga estudyante kinsa nagparehistro alang niini nga kurso sa dili pa ang ilang unang adlaw sa klase, ug dapita sila sa pagbasa sa materyal sa pagpangandam sa klase alang sa unang leksyon sa dili pa ang klase. Siguroa nga ang tanang ubang mga estudyante adunay kopya sa leksyon 1 materyal sa pagpangandam sa sinugdanan sa unang klase. Gamita ang materyal sa pagpangandam atol sa inyong panaghisgot sa klase aron masabtan sa mga estudyante sa sugod pa lang kon sa unsang paagi kini makatabang kanila sa pagpangandam alang sa klase ug pagpalambo sa ilang kasinatian atol sa klase.
Mga Sugyot alang sa Pagtudlo
Ang Basahon ni Mormon mousab sa inyong kinabuhi.
Human sa pag-abiabi sa mga estudyante ug sa pag-ilaila og kadiyot kanila, siguroa nga sila adunay magamit nga materyal sa pagpangandam sa klase alang niini nga leksyon. Dayon ipakita ug basaha ang mosunod nga pamahayag gikan ni Presidente Russell M. Nelson:
Imahe
Presidente Russell M. Nelson
Adunay impluwensyal kaayong panghitabo kon ang usa ka anak sa Dios magtinguha og dugang nga kahibalo bahin Kaniya ug sa Iyang Pinalangga nga Anak. Walay laing dapit diin kana nga mga kamatuoran mas tin-aw nga gitudlo ug sa impluwensyal nga paagi kay sa diha sa Basahon ni Mormon. …
Unsa ang inyong nakat-onan maghitungod sa mensahe sa Basahon ni Mormon gikan kang Presidente Nelson? (Samtang magpaambit ang mga estudyante, mahimo nimong isulat ang mga kamatuoran nga susama sa mosunod diha sa pisara: Ang pagtuon sa Basahon ni Mormon motabang kanako nga makaila sa Langitnong Amahan ug ni Jesukristo. Kini mousab sa akong kinabuhi.)
Ikonsiderar ang pagpaambit sa imong pagpamatuod kon sa unsang paagi ang Basahon ni Mormon nakaimpluwensya sa imong kahibalo ug relasyon sa Langitnong Amahan ug ni Jesukristo.
Unsa nga piho nga mga tudling sa kasulatan, mga istorya, mga hitabo, doktrina, o mga baruganan gikan sa Basahon ni Mormon ang mipalambo sa imong kahibalo sa Langitnong Amahan ug ni Jesukristo?
Ipasabut nga ang dakong bahin sa Basahon ni Mormon gisulat sa upat ka nag-unang mga tagsulat: Nephi, Jacob, Mormon, ug Moroni. Ipakita o iapud-apod ang mosunod nga tsart. Dayon dapita ang mga estudyante isip usa ka klase o magpares sa pagbasa sa mga tudling ubos sa “Kasinatian” diha sa ikaduha nga kolum, nga mangita kon unsay nakahimong takus sa matag tigsulat nga mahimong saksi ni Jesukristo.
Nag-unang mga Tagsulat sa Basahon ni Mormon
Materyal sa Magtutudlo alang sa Mga Pagtulun-an ug Doktrina sa Basahon ni Mormon—Leksyon 1
Human og hatag og igong panahon sa mga estudyante, dapita sila sa pagpaambit unsay ilang nakat-onan gikan niini nga mga tudling.
Hunahunaa nga nakig-istorya sa usa ka tawo kinsa nahibaloan ninyo nga nakakita ug nakaistorya ni Jesukristo. Ihulagway kon sa unsang paagi kamo maminaw ug motubag sa mga pulong niana nga tawo. Nasayod sa unsay inyong nasayran kabahin ni Nephi, Jacob, Mormon, ug Moroni, sa unsang paagi kamo magbasa ug magtuon sa Basahon ni Mormon nga lahi gikan sa ubang mga libro?
Hangyoa ang mga estudyante nga hilom nga mobasa og tudling nga ilang gusto gikan sa ikatulo nga kolum sa tsart, nga giulohan og “Katuyoan,” ug mangita og usa o dugang pa nga mga rason nganong girekord niana nga tigsulat ang iyang mensahe. Human mohatag og igong panahon sa mga estudyante, dapita sila sa pagpaambit sa unsay ilang nadiskubrihan.
Basaha og dungan ang 2 Nephi 33:10 ug tinoa kon sa unsang paagi ang mga pulong sa mga propeta sa Basahon sa Mormon makapanalangin ug makausab sa atong mga kinabuhi.
Unsay inyong nakat-onan gikan ni Nephi mahitungod sa mga katuyoan sa iyang rekord? (Mahimong moila ang mga estudyante og kamatuoran nga susama sa mosunod: Ang mensahe sa Basahon ni Mormon nag-agni kanato nga motuo kang Ginoong Jesukristo ug mobuhat og maayo.)
Sa unsang paagi ang Basahon ni Mormon nakatabang kaninyo sa pagbuhat og maayo ug pagtuo kang Jesukristo?
Hatagi og panahon ang mga estudyante nga mamalandong kon unsaon nila nga mahimong mas nakasentro kang Kristo nga kasinatian ang ilang pagtuon sa Basahon ni Mormon. Mahimo kang modapit og pipila ka estudyante sa pagpaambit sa ilang mga hunahuna.
Ang materyal sa pagpangandam sa klase nag-awhag og pagkat-on.
Pagpalambo sa Atong Pagtudlo ug Pagkat-on
Saligi ang pagpangandam sa imong mga estudyante. Pangita og mga pamaagi sa pagdasig sa mga estudyante sa pagtuon sa materyal sa pagpangandam sa klase sa dili pa ang klase. Dayon gamita ang ilang pagpangandam atol sa klase. Ang pagbuhat sa ingon makapadasig sa mga tigkat-on nga moangkon og mas dako nga responsibilidad alang sa ilang kaugalingong pagkat-on. Atol sa kurso, hatagi ang mga estudyane og mga kahigayonan sa pagpaambit kon sa unsang paagi ang materyal sa pagpangandam nakapanindot sa kalidad sa ilang personal nga pagtuon sa Basahon ni Mormon ug nakapalambo sa ilang kasinatian sa klase.
Tungod kay kini ang unang klase ug daghang estudyante ang tingali walay kahigayonan sa pagtuon sa materyal sa pagpangandam sa wala pa ang klase, mahimong basahon ninyo og dungan ang seksyon 3 sa materyal sa pagpangandam sa klase ug dayon mangutana:
Unsay inyong nadiskobrehan mahitungod sa pagpangandam alang sa espirituhanon nga pagkat-on gikan sa imbitasyon sa Manluluwas diha sa 3 Nephi 17:3?
Sa unsa nga mga pamaagi nga kita makaandam sa atong mga hunahuna ug mga kasingkasing alang sa pagkat-on niini nga klase?
Sa unsang paagi nga ang pagbasa sa materyal sa pagpangandam, lakip sa gitakda nga mga tudling sa Basahon ni Mormon, sa dili pa ang klase makapalambo sa inyong kapasidad sa pagkat-on gikan sa usag usa ug sa Espiritu Santo atol sa klase? (Mahimong makatabang ang pagdapit sa mga estudyante sa pagbatyag kon sa unsang paagi ang mga imbitasyon sa pagtuon, pagpamalandong, pagrekord, o paghisgot nga makita diha sa materyal sa pagpangandam sa klase makatabang kanila nga kinaugalingong makat-on pa og dugang ug makapalambo usab sa ilang kasinatian sa pagkat-on diha sa klase.)
Dapita ang mga estudyante sa pagribyu o pagkompleto sa “I-rekord ang Imong mga Hunahuna” nga kalihokan diha sa seksyon 3 sa materyal sa pagpangandam.
Ikonsiderar ang pagdapit sa mga estudyante sa pagkompleto sa “Ipaambit sa Imong Magtutudlo” nga kalihokan nga duol sa katapusan sa materyal sa pagpangandam kon wala pa nila mahimo.
Samtang tapuson nimo ang klase, ikaw o usa ka estudyante ang mahimong makapamatuod kon sa unsang paagi ang pagtambong nga andam sa pagkat-on nga magkauban makapanalangin sa mga kinabuhi sa tanang mga sakop sa klase samtang magtinabangay mo nga mahimong mas sama sa Langitnong Amahan ug ni Jesukristo.
Alang sa Sunod nga Higayon
Ipasabot nga ang sunod nga klase mahitungod sa pagtubag sa propetikanhong tambag. Pangutan-a ang estudyante kon unsa nga bag-ohay lang nga mga mensahe gikan sa mga propeta ang personal nga nakaapekto kanila. Mahimo usab kang mangutana nila sa paghunahuna sa bisan unsang propetikanhong mga mensahe nga tingali mahagiton alang sa pipila ka tawo sa pagdawat. Dapita ang mga estudyante sa paghunahuna niini nga mga mensahe ug sa posibling sangputanan niini samtang magtuon sila sa materyal sa pagpangandam alang sa sunod nga klase.