“Leksyon 16 Materyal sa Pagpangandam sa Klase: Jesukristo Nangalagad sa Tinagsa-tagsa,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 16 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 16 Materyal sa Pagpangandam sa Klase
Jesukristo Nangalagad sa Tinagsa-tagsa
Ang pagpangalagad sa nabanhaw nga Kristo taliwala sa mga tawo didto sa yuta sa Bountiful nakahatag kanato og usa ka gamhanang pagsaksi sa kabalaan ni Jesukristo ug usa ka tulukibon nga ehemplo sa pagpangalagad sa uban. Samtang magtuon kamo niining materyal, pamalandungi unsa ang inyong mahimo aron mapalig-on ang inyong pagsaksi nga si Jesukristo mao ang inyong Manluluwas. Samtang kamo mamalandong kon giunsa Niya sa pagpangalagad, mainampuong mokonsiderar kon si kinsa kaha ang nagkinahanglan nga mobati sa gugma sa Manluluwas pinaagi kaninyo.
Seksyon 1
Unsaon nako sa pagpalig-on sa akong pagpamatuod nga si Jesukristo mao ang akong Manluluwas?
Pagkahuman sa dakong kalaglagan ug sa tulo ka adlaw nga kangitngit nga naghatag og timailhan ngadto sa mga katawhan nga ang Manluluwas namatay, mga 2,500 ka mga kalalakin-an, kababayen-an, ug kabataan ang nanagpundok libot sa templo didto sa yuta sa Bountiful. Nakadungog sila og usa ka tingog, nga sa sinugdanan wala nila masabti. Sa ilang pagpadayon og paminaw, ilang nasabtan nga mao kadto ang tingog sa Langitnong Amahan nga nagpaila sa Iyang Anak, si Jesukristo. (Tan-awa sa 3 Nephi 11:1–10.) Ang Manluluwas mikanaog gikan sa langit ug namahayag: “Tan-awa, Ako mao si Jesukristo, kinsa gipamatud-an sa mga propeta nga moanhi sa kalibutan” (3 Nephi 11:10).
Kabahin niining higayona si Elder Jeffrey R. Holland sa Korum sa Napulog Duha ka mga Apostoles miingon:
“Kana nga pagpakita ug kadto nga pamahayag mao ang labing mahinungdanong panghitabo, diha sa tibuok kasaysayan sa Basahon ni Mormon. Usa kadto ka pagpakita ug lagda nga mipahibalo ug midasig sa matag propeta nga Nephite sulod sa milabayng unom ka gatos ka tuig. . …
Ang tanan naghisgot bahin kaniya, nanganta bahin kaniya, nangandoy bahin kaniya, ug nag-ampo alang sa iyang pagpakita—apan siya dinhi gayod sa pagkatinuod. Ang labing nindot nga mga panahon! Ang Dios nga mihimo sa matag ngitngit nga kagabhion ngadto sa mahayag nga kabuntagon miabot na. (Christ and the New Covenant: The Messianic Message of the Book of Mormon [1997], 250–51)
Pagtuon agi og Pagpangandam alang sa Klase
Basaha ang 3 Nephi 11:13–17, ug pangitaa unsay gibuhat sa katawhan aron mapalig-on ang ilang mga pagpamatuod nga si Jesus mao ang nabanhaw nga Kristo.
Pamalandong agi og Pagpangandam alang sa Klase
Unsa ang inyong makat-onan mahitungod sa kinaiya ni Jesukristo gikan sa Iyang pagpakighimamat sa mga Nephite ug mga Lamanite?
Si Elder Walter F. González sa Seventy mitudlo sa mosunod mahitungod sa kasinatian sa mga tawo bahin sa pagsaksi sa nabanhaw nga Kristo:
“Moduol ngari kanako, nga kamo unta mobati ug makakita.” [3 Nephi 18:25]. Sugo kini sa Manluluwas ngadto sa mga namuyo sa karaang Amerika. Ilang nahikap sa ilang mga kamot ug nakita sa ilang mga mata nga si Jesus mao ang Kristo. Kini nga sugo importante kanato karon ingon nga kini importante kanila kaniadto. Sa pagduol nato kang Kristo, mabati nato ug “nasayud sa pagkatinuod” [3 Nephi 11:15]—dili pinaagi sa atong mga kamot ug mga mata apan sa atong tibuok kasingkasing ug hunahuna—nga si Jesus mao ang Kristo.
Usa ka paagi nga maduol kang Kristo mao ang pagtinguha sa pagkat-on sa importanting mga kamatuoran pinaagi sa atong kasingkasing. Sa pagbuhat nato sa ingon, ang mga impresyon nga gikan sa Dios makahatag nato og kahibalo nga dili nato madawat sa laing paagi. (“Pagkat-on pinaagi sa Atong mga Kasingkasing,” Liahona, Nob. 2012, 81)
Irekord ang Imong mga Hunahuna
Samtang mamalandong ka sa imong pagpamatuod ni Jesukristo, isulat sa imong personal nga journal ang usa ka kasinatian nga nakapalig-on sa imong pagpamatuod Kaniya. O, kondili, makapangita ka og usa ka himno nga nagpahayag sa unsay imong gibati mahitungod sa Manluluwas ug isulat ang imong mga gibati kon ikaw makadungog o mokanta niining himno.
Seksyon 2
Unsa ang akong makat-onan mahitungod sa pagpangalagad gikan sa ehemplo sa Manluluwas?
Human nga ang Manluluwas mihatag sa matag indibidwal og higayon nga mohikap sa timaan sa mga samad sa Iyang mga kamot ug mga tiil, Siya mitawag og napulog duha ka mga disipulo ug mitudlo sa mga katawhan og daghang importanting mga kamatuoran (tan-awa sa 3 Nephi 11–16). Samtang nangandam si Jesus sa pagbiya, miingon Siya, “Ako nakasabot nga … kamo dili makasabot sa akong tanan nga mga pulong,” ug Siya midapit sa mga tawo nga mopauli ngadto sa ilang mga panimalay, mamalandong sa unsay Iyang gitudlo kanila, ug mangandam sa ilang kaugalingon alang sa Iyang pagbalik sa sunod nga adlaw (3 Nephi 17:1–3).
Pagtuon agi og Pagpangandam alang sa Klase
Basaha ang 3 Nephi 17:5–10, ug pangitaa ang mga paagi nga ang Ginoo mipakita og ehemplo sa pagkamabination ug kalooy samtang Siya nangalagad taliwala sa mga katawhan.
Human nga ang Manluluwas miayo sa mga katawhan, misugo Siya nga ang tanan nga “ilang gagmay nga mga bata kinahanglan dad-on” ngadto Kaniya (3 Nephi 17:11) ug ang tanan kinahanglan nga mangluhod. Siya dayon mihalad og usa ka pag-ampo alang kanila nga “mahinungdanon ug kahibulongan” (sa mga bersikulo 16–17) nga ang mga katawhan gibuntog sa kalipay. (Tan-awa sa 3 Nephi 17:10–19.)
Pagtuon agi og Pagpangandam alang sa Klase
Basaha ang 3 Nephi 17:19–24 ug pamalandongi nganong ang pagpangalagad nakahatag og kalipay sa Manluluwas.
Si Presidente Jean B. Bingham, Kinatibuk-ang Presidente sa Relief Society, mitudlo mahitungod sa kaimportante sa pagsunod sa ehemplo sa Manluluwas samtang kita mangalagad:
Sa katapusan ang importante, nga ang tinuod nga pagpangalagad nabuhat og tagsa-tagsa uban ang gugma isip mao ang hinungdan. Ang bili ug ang ganti ug ang kahibulongan sa sinserong pagpangalagad mao nga kini sa tinuod makapausab og mga kinabuhi! Kon bukas ang atong mga kasingkasing ug andam sa paghigugma ug pag-apil, pag-awhag ug paghupay, ang gahum sa atong pagpangalagad dili kapugngan. Uban sa gugma isip ang hinungdan, ang mga milagro mahitabo. …
Ang Manluluwas mao ang atong panig-ingnan sa tanan—dili lamang sa unsay kinahanglan natong buhaton apan nganong kita kinahanglan nga mobuhat niini [tan-awa sa Mga Taga-Efeso 5:2]. (“Pagpangalagad sama sa Gibuhat sa Manluluwas,” Liahona, Mayo 2018, 106)
Pamalandong agi og Pagpangandam alang sa Klase
Paghunahuna og usa ka tawo nga lagmit nagkinahanglan sa inyong tabang. Unsaon ninyo sa pagsunod sa ehemplo sa Manluluwas ug sa pagpakita og kamabination ug kalooy ngadto niining indibidwal?