Leksyon 9 Materyal sa Magtutudlo

Hugot nga Pagtuo diha ni Jesukristo

Ang doktrina ni Jesukristo naghimo kanato nga mausab, mahimo nga sama sa atong Manluluwas, ug modawat sa tanan nga mga panalangin nga Iyang gihimo nga maanaa kanato pinaagi sa Iyang Pag-ula. Dinhi niini nga leksyon hisgutan sa mga estudyante ang unang elemento sa doktrina sa Ginoo: hugot nga pagtuo diha ni Jesukristo. Makabaton sila sa oportunidad sa pag-ila sa mga panalangin sa hugot nga pagtuo ug makapasabut kon unsaon sa pagpalambo og hugot nga pagtuo diha ni Jesukristo. Ang mga estudyante makatino usab kon unsay ilang buhaton sa paglig-on sa ilang hugot nga pagtuo diha sa Ginoo.

Mga Sugyot alang sa Pagtudlo

Si Alma nagtudlo sa mga Zoramite kon unsaon sa pagpatubo sa ilang hugot nga pagtuo diha ni Jesukristo.

Mahimo nimong sugdan ang leksyon pinaagi sa pagpakita sa pasiuna nga parapo diha sa materyal sa pagpangandam ug sa paghangyo og estudyante sa pagbasa niini og kusog. Ikaw makapamatuod nga ang hugot nga pagtuo, paghinulsol, bunyag, ang gasa sa Espiritu Santo, ug paglahutay hangtud sa katapusan makaabli sa pultahan alang ni Jesukristo sa pag-usab kanato sa tinuoray ngadto sa mas balaan ug mas malipayon nga mga tawo. Atol niini nga panaghisgot sa klase, dapita ang mga estudyante sa paghunahuna kon unsaon kaha nila sa pagpatubo sa ilang nga pagtuo diha ni Jesukristo ug sa Iyang gahum sa pag-usab, pag-ayo, ug pagtabang kanila.

Dapita ang usa ka andam nga estudyante sa pagpakigbahin unsaon niya sa pagpasabut kon unsa ang hugot nga pagtuo ug kon ngano ang hugot nga pagtuo diha ni Jesukristo importante kaayo.

Ipakita ug pagdungan og basa sa mosunod nga talan-awon:

Ang imong higala sa kolehiyo, si Victoria, nagdako sa usa ka Kristyano nga panimalay. Wala gayud siya sukad magduhaduha sa pagkabalaan ni Jesukristo hangtud usa sa ilang mga propesor mihatag og pagduda kabahin sa pagkatinuod sa Iyang mga milagro, Pag-ula, ug Pagkabanhaw. Nahasol si Victoria sa unsay iyang nadungog. Tungod kay siya nahibalo nga ikaw relihiyoso ug nagtuo ni Jesukristo, nangutana siya giunsa nimo pagkahibalo nga si Jesus sa tinuod mao ang Anak sa Dios ug ang Manluluwas sa kalibutan. Siya usab nangutana kon unsaon niya sa pag-angkon og mas dako nga hugot nga pagtuo diha Kaniya.

• Unsaon nimo pagtubag sa mga pangutana ni Victoria?

Samtang ang mga estudyante nagtubag, hunahunaa ang paggamit sa mosunod nga mga tudling sa kasulatan ug mga pangutana aron sa pagtabang og paglig-on sa panaghisgot, pinasikad sa mga panginahanglan sa imong mga estudyante.

Pagpalambo sa Atong Pagtudlo ug Pagkat-on

Paniid, paminaw, ug sabta. Walay duha ka mga estudyante o mga klase nga parehas gyud kaayo. Samtang ikaw naniid ug naminaw sa imong mga estudyante, tinguhaa ang pagsabut sa ilang tinuod nga espirituhanong mga interes ug mga panginahanglan. Pangutana ug takdo sa panahon ug may koneksyon nga mga pangutana ug kana nga mogiya ngadto sa matarung nga lihok. Ang mga pangutana sa tibuok niini nga leksyon makaaghat, makagiya, ug makadasig kanimo samtang ikaw nangulo sa panaghisgot sa klase. Ang pipila sa imong kinasingkasing nga mga pangutana mahimong kadto nga miabut sa imong hunahuna samtang ikaw nagtudlo. Apan hinumdumi usab nga ikaw wala paabuta nga mangutana sa tanan nga mga pangutana. Ang mga estudyante makapangutana usab og kinasingkasing nga mga pangutana nga nagpakita og lawom nga panabut ngadto sa mga kamatuoran sa ebanghelyo.

Kon gikinahanglan, pahinumdumi ang mga estudyante nga gitudloan ni Alma ang usa ka pundok sa timawa nga mga Zoramite kon unsaon ang paglihok uban ang hugot nga pagtuo diha sa pulong sa Dios makatabang sa paglig-on sa atong hugot nga pagtuo. Mahimo nimong dapiton ang mga estudyante sa pagribyu sa Alma 32:21, 27–30, 41–43, mangita alang sa mga baruganan nga makatabang ni Victoria. Samtang ang mga estudyante makigbahin sa mga baruganan nga gitudlo ni Alma, hunahunaa ang pagpangutana sa pipila sa mosunod nga mga pangutana:

• Unsaon nimo pagpasabut ang kahulugan sa katin-awan ni Alma sa hugot nga pagtuo sa usa ka paagi nga bisan ang bata makasabut? (Tan-awa sa Alma 32:21.)

• Sumala sa Alma 32:27–30, sa unsa nga paagi nga ang paggamit sa hugot nga pagtuo mogiya ngadto sa pagtubo sa hugot nga pagtuo? (Mahimo nga ang mga estudyante moila og usa ka baruganan nga susama sa mosunod: Samtang kita naggamit sa hugot nga pagtuo ug nag-eksperimento sa pulong sa Dios, makadawat kita og espirituhanong panghimatuod ug ang atong hugot nga pagtuo malig-on. Hunahunaa ang pagsulat niini nga baruganan, o usa ka susamang baruganan gamit ang mga pulong sa mga estudyante, diha sa pisara.) Kanus-a nimo nagamit kini nga baruganan ug mibati sa imong hugot nga pagtuo nga nalig-on? Unsa nga tambag kaha ang imong ihatag ngadto sa usa ka tawo kinsa nawad-an og kadasig tungod kay siya naglihok nga may hugot nga pagtuo apan wala pa makasinati sa mga bunga sa hugot nga pagtuo? (Mahimo kining makatabang ang pagribyu sa pamahayag ni Presidente Dieter Uchdorf sa seksyon 1 sa materyal sa pagpangandam.)

• Sumala ni Alma sa Alma 32:28, unsaon nato sa pagkahibalo kon ang pulong maayo ba diha sa pag-eksperimento sa atong hugot nga pagtuo? (Ang mga estudyante mahimong moila og mga hugpong sa mga pulong sama sa “nagtubo nga mga tinguha,” “pagpadako sa akong kalag,” “pagdan-ag sa akong salabutan,” ug “pagkaanindot ngari kanako.”) Kon ikaw nakasinati sa bisan hain niini nga mga epekto, unsaon nimo sa pagpasabut sa imong kasinatian ngadto sa laing tawo?

• Unsa ang gitudlo ni Elder Jeffrey R, Holland mahitungod ni Jesukristo ug sa Iyang kalabutan ngadto sa binhi, sa bunga, ug sa kahoy? (Tan-awa sa seksyon 2 sa materyal sa pagpangandam.) Sa unsa nga paagi nga ang paglihok diha sa hugot nga pagtuo ug ang pagtanom kang Jesukristo ug sa Iyang ebanghelyo diha sa imong kasingkasing miimpluwensya sa imong pagpamatuod ug pagkakabig? Unsa ang imong mabuhat sa pag-amuma sa kahoy uban sa mas maampingon nga pag-amuma niini aron kini mas mogamot og lawom diha sa imong kasingkasing?

• Unsay imong nahibaloan mahitungod sa Manluluwas nga nakapatubo sa imong kompyansa ug pagsalig diha Kaniya?

Nagtudlo si Mormon mahitungod sa gahum ug mga panalangin sa paggamit sa hugot nga pagtuo diha ni Jesukristo.

Dapita ang mga estudyante sa pagribyu sa Moroni 7:25–26, 33, ug ipamatuod nga samtang kita naggamit og hugot nga pagtuo diha ni Jesukristo, kita makabaton sa gahum sa pagbuhat unsa ang angay ni Kristo. (Mahimo ka nga mopasabut nga niining kinatibuk-ang kahulugan sa pulong nga angay naghulagway og usa ka butang nga mopanalangin kanato nga nagsubay sa kabubut-on sa Dios.) Pahinumdumi ang mga estudyante nga sila gidapit diha sa materyal sa pagpangandam sa pag-ila sa mga katawhan diha sa Basahon ni Mormon kinsa nakadawat og mga panalangin o nakasinati og mga milagro samtang sila migamit og hugot nga pagtuo diha ni Jesukristo (tan-awa sa seksyon 3). Dapita ang mga estudyante isip usa ka klase o diha sa ginagmay nga mga grupo sa panaghisgot sa pagpakigbahin sa ilang mga ehemplo. Ang mosunod nga mga pangutana mahimong mopalig-on sa ilang panaghisgot:

• Sa unsa nga paagi kini nga mga tawo nagpakita sa ilang hugot nga pagtuo diha ni Jesukristo?

• Unsa ang pipila sa mga panalangin o mga milagro nga ilang nadawat pinaagi sa paggamit sa hugot nga pagtuo diha ni Jesukristo?

• Unsa nga mga panalangin o mga milagro ang inyong nadawat pinaagi sa paggamit sa hugot nga pagtuo diha ni Kristo? (Mahimo nimong ribyuhon ang pamahayag ni Presidente Richard G. Scott diha sa seksyon 3 sa materyal sa pagpangandam.)

Hatagi ang mga estudyante og panahon sa pagpamalandong sa ilang kaugalingon nga hugot nga pagtuo diha ni Jesukristo ug sa paghunahuna kon unsay ilang kinahanglan nga buhaton aron sa paglig-on ug paggamit sa hugot nga pagtuo diha Kaniya.

Alang sa Sunod nga Higayon

Ipasabut nga ang atong hugot nga pagtuo diha ni Jesukristo dayag lamang nga mogiya ngadto sa paghinulsol, ang ikaduhang importanting baruganan sa doktrina ni Kristo (tan-awa sa Helaman 14:13). Dapita ang mga estudyante sa pagtuon sa ang materyal sa pagpangandam ug pamalandonga nganong ang paghinulsol kinahanglan nga tan-awon isip usa ka gasa nga pagadawaton ug dili usa ka makalilisang nga palas-anon nga pagalikayan.