“Leksyon 7 Materyal sa Pagpangandam sa Klase: Ang Makapalig-on nga Gahum ni Jesukristo,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 7 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 7 Materyal sa Pagpangandam sa Klase
Ang Makapalig-on nga Gahum ni Jesukristo
Paghunahuna sa makadiyot sa mga panahon nga ikaw nakigbisog sa pisikal, mental, emosyonal, og sa espirituhanong paagi. Paghunahuna usab mahitungod sa mga paagi nga ikaw mibati og kaluya o kakulang. Si Presidente Dallin H. Oaks sa Unang Kapangulohan mi-obserbar, “Tungod sa Iyang Pag-ula, ang Manluluwas adunay gahum sa pagtabang––sa pag-abag––sa tanang mortal nga sakit ug kasakit” (Nalig-on pinaagi sa Pag-ula ni Jesukristo,” Liahona, Nob, 2015, 62). Samtang ikaw magtuon pa og dugang sa Pag-ula ni Jesukristo, hunahunaa kon giunsa sa Ginoo pagtabang ug pagpadayon sa pagtabang kanimo sa paglahutay og mga kasakit ug pagbuntog sa kahuyang diha sa imong kinabuhi.
Seksyon 1
Unsaon sa Manluluwas pagtabang kanako sa akong mga kasakit ug mga kahuyang?
Si Presidente Tad R. Callister kanhi Kinatibuk-ang Pangulo sa Sunday School, namulong sa gilapdon sa Pag-ula sa Manluluwas niini nga paagi:
Ang Pag-ula ni Jesukristo … [mihimong] posible alang nato nga makabalik ngadto sa presensya sa Dios, mahimong mas sama Kaniya, ug makaangkon og kahingpitan sa himaya. Kini gihimo pinaagi sa pagbuntog sa upat ka babag:
Pisikal nga kamatayon
Espirituhanong kamatayon tungod ni Adan ug sa atong mga sala
Atong mga kasakit ug mga kahuyang
Atong mga kahuyang ug mga pagkadili hingpit
(“Ang Pag-ula ni Jesukristo,” Liahona, Mayo 2019, 85)
Sa leksyon 6, “Ang Walay Kinutuban nga Pag-ula ni Jesukristo,” atong gitubag ang unang duha ka mga babag. Karon, atong hunahunaon kon giunsa sa Pag-ula sa Manluluwas pagbuntog sa ikatulo ug ikaupat nga mga babag.
Mga 83 BC, si Alma nga Batan-on mibiya isip pangulong maghuhukom aron siya makatudlo sa pulong sa Dios sa tibuok kayutaan. Didto sa siyudad sa Gideon, nanagna si Alma nga ang Manunubos matawo sa yuta ug mopuyo taliwala sa Iyang mga katawhan ug nga Siya mosinati sa tanang mga kasakit, mga sakit, ug mga tintasyon sa mortalidad.
Pagtuon agi og Pagpangandam alang sa Klase
Basaha ang Alma 7:11–12, ug pangitaa ang mga rason kon nganong si Jesukristo midala niining mortal nga mga kasinatian diha mismo sa Iyang Kaugalingon.
Kabahin niining talagsaon nga pagtulun-an sa Basahon ni Mormon, ang Tigdumalang Bishop Gérald Caussé naka-obserbar:
Agig dugang sa pagdala sa kabug-at sa atong mga sala, gidala mismo ni Kristo sa Iyang Kaugalingon ang atong mga kasub-anan, mga kahuyang, mga pag-antus, ug mga balatian ug tanang kalisdanan nga dala sa mortal nga kondisyon sa tawo. Walay kaguol, kasakit, o kasub-anan nga wala Niya giantus alang kanato [Tan-awa sa Alma 7:11–12]. (“Usa ka Buhi nga Saksi sa Buhi nga Kristo,” Liahona, Mayo 2020, 39)
Si Elder David A. Bednar sa Korum sa Napulog Duha ka mga Apostoles mitudlo usab:
Diha sa higayon sa kahuyang mahimong mosinggit kita, “Walay nahibalo sama sa unsa kini. Walay makasabut.” Apan ang Anak sa Dios hingpit nga nakahibalo ug nakasabut, kay Iyang nabati ug napas-an ang atong indibidwal nga mga alantuson. Ug tungod sa Iyang walay katapusan ug mahangturong sakripisyo (tan-awa sa Alma 34:14), Siya adunay hingpit nga pagsabut ug makalugway ngari kanato sa Iyang bukton sa kalooy. Siya makakab-ot, makahikap, makaabag, makaayo, ug makalig-on kanato nga mahimong mas labaw kay sa ato mismong mahimo ug makatabang kanato sa pagbuhat niana nga kita dili gayud makahimo nga magsalig lamang sa atong kaugalingong gahum. (“Makadaug sa Ilang mga Alantuson,” Liahona, Mayo 2014, 90)
Irekord ang Imong mga Hunahuna
Unsaon nga makatabang kanimo ang pagkahibalo nga ang Manluluwas sa hingpit nakasabut sa tanan nimong mga kasakit ug mga kahuyang? Kanus-a nimo gibati ang Iyang pagtabang, paghupay, o paglig-on kanimo samtang ikaw nagsinati og mga hagit diha sa imong kinabuhi?
Seksyon 2
Sa unsa nga paagi ang Manluluwas motabang kanako sa akong mga kahuyang ug mga pagkadili hingpit?
Isip ang katapusang tagsulat sa Basahon ni Mormon, gitapos ni Moroni ang usa ka minubo sa mga palid sa Ether, nga naglangkub sa istorya sa mga Jaredite ug sa mga panulat sa igsoong lalaki ni Jared. Natingala si Moroni sa gahum sa sinulat sa igsoong lalaki ni Jared ug mipahayag sa iyang kabalaka mahitungod sa kahuyang nga iyang gihunahuna sa iyang kaugalingong sinulat ug sa sinulat sa ubang mga propeta sa Basahon ni Mormon.
Pagtuon agi og Pagpangandam alang sa Klase
Basaha sa Ether 12:23–27, ug hunahunaa kon unsa ang gibati ni Moroni mahitungod sa iyang mga kakulangan. Pamalandunga kon unsaon sa tubag sa Ginoo pagpanalangin sa imong kinabuhi.
Ang pagbutang sa atong mga kahuyang ug pagkadili hingpit diha sa mahangturon nga panan-aw, si Sister Michelle D. Craig, Unang Magtatambag sa Kinatibuk-ang Kapangulohan sa Young Women, mitudlo:
Siyempre, kitang tanan mapakyas sa atong balaanong potensyal, ug dunay kamatuoran sa pagkaamgo nga kon mag-inusara ang atong paningkamot dili igo. Pero ang maayong balita sa ebanghelyo mao nga pinaagi sa grasya sa Dios, kita igo na. …
Ang makatingala nga kamatuoran mao nga ang atong mga kahuyang mahimong usa ka panalangin kon makapahimo kini natong mapainubsanon ug makapadangup nato ngadto kang Kristo. …
Gani, ang mga milagro ni Jesus kasagaran magsugod sa pag-ila sa unsay wala makab-ot, panginahanglan, kapakyasan, o pagkadili igo. (“Balaan nga Pagkawala Matagbaw,” Liahona, Nob. 2018, 54)
Pamalandong agi og Pagpangandam alang sa Klase
Kanus-a nimo nakita, uban sa panabang sa Manluluwas, ang usa ka kahuyang nga nahimong panalangin sa imong kinabuhi o diha sa kinabuhi sa usa ka tawo nga imong kaila?
Seksyon 3
Unsaon ko pagdapit sa hingpit ang grasya sa Ginoo nganhi sa akong kinabuhi?
Sa iyang mga panulat, mipamatuod si Nephi nga gigiyahan ni Moises ang mga anak ni Israel gawas sa pagkabihag pinaagi sa gahum ug grasya sa Dios. Misulat si Nephi, “Ingon nga buhi ang Ginoong Dios walay lain nga ngalan nga gihatag ubos sa langit gawas nga kini mao si Jesukristo … diin ang tawo mahimo nga maluwas” (2 Nephi 25:20). Gitudloan ni Nephi ang iyang mga katawhan nga ang grasya lamang ni Jesukristo, dili ang bugtong nga pagkamasulundon ngadto sa balaod ni Moises, ang makaluwas kanila. Ang grasya mao ang usa ka “balaang paagi sa tabang o kusog, gihatag pinaagi sa buhong nga kalooy ug gugma ni Jesukristo” (Bible Dictionary, “Grace [Grasya]”).
Pagtuon agi og Pagpangandam alang sa Klase
Basaha ang 2 Nephi 25:23, 29, mangita alang sa inyong tahas sa pagdapit sa grasya sa Ginoo nganha sa inyong kinabuhi.
Ang hugpong sa mga pulong “human sa tanan nga atong mabuhat” (2 Nephi 25:23) makasanap. Hunahunaa kon sa unsa nga paagi makatabang kanato ang mosunod nga mga pamahayag gikan sa duha ka mga miyembro sa Korum sa Napulog Duha ka mga Apostoles sa pagsabut kon unsa ang kahulugan niini nga hugpong sa mga pulong.
Wala kinahanglana nga mokab-ut kita og lebel sa kapasidad o kamaayo sa dili pa motabang ang Dios—ang balaang tabang atong masinati bisan kanus-a, bisan asa pa kita diha sa dalan sa pagkamasulundon. Apan nasayud ko nga lapas pa sa pagtinguha sa Iyang tabang, kinahanglan kita nga magkugi, maghinulsol, ug mopili sa Dios aron Siya makatabang gayud kanato uban sa kaangayan ug moral nga kabubut-on. (D. Todd Christofferson, “Gawasnon sa Kahangturan, nga Molihok alang sa Ilang Kaugalingon,” Liahona, Nob. 2014, 19)
Ang Ginoo, pinaagi sa Iyang grasya, motabang sa matag usa nato sa pagpas-an sa atong krus ug mohimo sa atong luwan nga magaan. … Palihug ayaw paghunong human sa sunod-sunod nga kapakyasan ug mokonsiderar sa inyong kaugalingon nga dili makahimo sa pagbiya sa mga sala ug pagbuntog sa adiksyon. Mograbe pa hinoon kon kamo mohunong sa pagsulay ug human niana magpadayon sa kahuyang ug sa sala! Paningkamot kanunay kutob sa inyong mahimo, magpakita pinaagi sa inyong mga buhat sa tinguha nga malimpyo ang kaugalingon, sumala sa gitudlo sa Manluluwas. Usahay ang mga sulbad sa piho nga mga hagit moabut human sa daghang bulan nga padayong paningkamot. Ang saad makita diha sa Basahon ni Mormon nga “pinaagi sa grasya kita maluwas, human sa tanan nga atong mabuhat,”[2 Nephi 25:23] magamit niini nga mga kahimtang. Palihug hinumdumi nga ang gasa sa grasya sa Manluluwas “dili kinahanglang limitado sa panahon sa ‘human’ sa tanan nga atong mabuhat. Kita makadawat sa Iyang grasya sa dili pa, atol sa, ug human sa panahon nga kita migahin sa atong kaugalingong paningkamot” [tan-awa sa Bruce C. Hafen, The Broken Heart: Applying the Atonement to Life’s Experiences (1989), 155–56]. (Ulisses Soares, “Magpas-an sa Atong Krus,” Liahona, Nob. 2019, 113–14)
Ipaambit ang Inyong Nakat-unan
Hunahunaa ang pagpakigbahin ngadto sa usa ka higala o sakop sa pamilya kon unsay imong nakat-unan mahitungod sa hugpong sa mga pulong “pinaagi sa grasya kita maluwas, human sa tanan nga atong mabuhat,” (2 Nephi 25:23). Unsaon kaha nimo sa pagpadayon og dapit sa makalig-on nga gahum sa Manluluwas nganha sa imong kinabuhi aron sa pagtabang sa pipila sa imong mga kahuyang o kakulangan karon?