Leksyon 18 Materyal sa Pagpangandam sa Klase

Pagkahimong Sama sa Langitnong Amahan ug ni Jesukristo

batan-ong babaye nga naghangad sa langit

Atol sa Iyang pagpangalagad ngadto sa mga Nephite ug mga Lamanite, si Jesus nangutana sa Iyang napulog duha ka mga disipulo, “Unsa nga matang sa mga tawo kamo mahisama?” (3 Nephi 27:27). Kon ang Ginoo mangutana kaninyo niini nga pangutana, unsaon ninyo sa pagtubag? Unsaon ninyo sa pagkab-ot sa inyong hingpit nga potensyal? Samtang mag-andam kamo alang sa klase, ikonsiderar kon sa unsang paagi ang mga pagtulun-an sa Manluluwas makatabang kaninyo nga matubag kining mga pangutana. Pagpili og usa ka piho nga butang nga inyong mahimo aron mahimong mas mahisama Kaniya.

Seksyon 1

Mahimo ba gayod ako nga hingpit sama sa Langitnong Amahan ug ni Jesukristo?

Atong mabasa diha sa Bag-ong Tugon mahitungod ni Jesus nga nagtudlo sa Wali sa Bukid, diin naglakip og mga pagtulun-an nga sa katapusan makatabang sa Iyang mga disipulo nga mahimong hingpit (tan-awa sa Mateo 5–7). Pagkahuman sa Iyang Pagkabanhaw, si Jesus mipakita didto sa yuta sa Bountiful ug mitudlo og susama nga wali (tan-awa sa 3 Nephi 12–14).

Dihang hapit na mosugod sa Iyang mensahe ngadto sa mga tawo, si Jesus mipamatuod nga kadtong kinsa “mopatalinghog sa mga pulong” sa Iyang gipili nga napulog duha ka mga disipulo mapanalanginan (3 Nephi 12:1). Siya mitudlo sa mga Kabulahanan, namahayag nga Siya mituman sa balaod ni Moises, ug mitudlo sa mas taas nga balaod sa ebanghelyo.

Ang Pagbisita sa Manluluwas ngadto sa Katawhan sa Amerika, ni Glen S. Hopkinson

icon, pagtuon

Pagtuon agi og Pagpangandam alang sa Klase

Basaha ang 3 Nephi 12:19–20, 46–48, nga mangita kon unsa ang atong dangatan kon kita moduol ngadto kang Kristo ug maningkamot sa pagsunod sa Iyang mas taas nga balaod.

Ang uban sa mga tawo mahimong maglibog o mabug-atan sa mga sugo sa Manluluwas nga magmahimong hingpit. Mahimong makatabang nga masayod nga diha sa mga kasulatan, ang pulong nga hingpit mahimong nagpasabot og “sangkap, tibuok, ug bug-os nga paglambo; lubos nga matarong” ug nga “ang tinuod nga mga sumusunod ni Kristo mahimo nga hingpit pinaagi sa grasya ug Pag-ula” (Giya ngadto sa mga Kasulatan, “Hingpit,” scriptures.ChurchofJesusChrist.org).

icon, pagtuon

Pagtuon agi og Pagpangandam alang sa Klase

Basaha ang Moroni 10:32–33, ug pangitaa kon sa unsang paagi nga ang kahingpitan nagkinahanglan sa atong paningkamot ug sa grasya sa Ginoo.

Ang Palas-anon Gitangtang, Ni Anne Marie Oborn

Usa ka paagi sa paghulagway sa grasya mao kini: “Ang pulong nga grasya, sumala sa gigamit diha sa mga kasulatan, nagpasabot sa makaabag nga gahum ug espirituhanon nga pagpaayo nga gitanyag sa kalooy ug gugma ni Jesukristo. … Aron madawat kining makaabag nga gahum, kita kinahanglan gayod nga motuman sa ebanghelyo ni Jesukristo. … Ang Ginoo misaad nga kon magpaubos kita sa atong kaugalingon sa Iyang atubangan ug magbaton og hugot nga pagtuo diha Kaniya, ang Iyang grasya makatabang nato sa pagbuntog sa tanang personal nga kahuyang (tan-awa sa Ether 12:27)” (“Grace,” Gospel Topics, topics.ChurchofJesusChrist.org).

Si Elder Jeffrey R. Holland sa Korum sa Napulog Duha ka mga Apostoles mitudlo:

Elder Jeffrey R. Holland

“Ang atong bugtong paglaum alang sa tinuod nga kahingpitan mao ang pagdawat niini isip gasa gikan sa langit—dili kini nato makab-ot sa ato lang nga paningkamot [“mapaningkamutan”]. Busa, ang grasya ni Kristo nagtanyag kanato dili lamang sa kaluwasan gikan sa kasubo ug sala ug kamatayon apan sa kaluwasan usab gikan sa atong kaugalingong makanunayon nga pagpanaway sa kaugalingon. …

… Kon kita magpadayon, nan diha sa kahangturan ang paghashas kanato mahuman ug makompleto. …

… Mopamatuod ko nga niini nga oras ug sa matag oras Siya, uban sa nalansangan nga mga kamot, nagtanyag kanato sa samang grasya, naggunit kanato ug nag-awhag kanato, nagdumili sa pagbuhi kanato hangtud nga luwas kita nga makauli diha sa paggakos sa atong Langitnon nga mga Ginikanan. (“Busa, Kamo Kinahanglan Magmahingpit—sa Katapusan,” Liahona, Nob. 2017, 41, 42)

icon, pamalandong

Pamalandong agi og Pagpangandam alang sa Klase

Unsa ang kahulogan niini nganha kaninyo nga masayud nga si Jesukristo mipadangat sa Iyang grasya nganha kaninyo ug miandam og usa ka paagi alang kaninyo aron mamahimong sama Kaniya ug sa Iyang Amahan?

Seksyon 2

Unsay akong mahimo aron mas mahimong sama ni Jesukristo?

Samtang si Jesus mipadayon sa pagtudlo sa mga Nephite, mipaambit Siya og talagsaon nga mga baruganan kalabot kon unsaon sa pagpakabuhi pinasubay sa mas taas nga balaod sa Iyang ebanghelyo. Si Presidente Harold B. Lee miingon:said:

Presidente Harold B. Lee

Si Kristo wala lamang moanhi sa kalibotan aron sa pag-ula alang sa mga sala sa katawhan apan sa paghatag og ehemplo sa atubangan sa kalibotan sa sumbanan sa kahingpitan sa balaod sa Dios ug sa pagkamasulundon ngadto sa Amahan. Sa iyang Wali sa Bukid ang Magtutudlo naghatag kanato ingon og usa ka pagpadayag sa iyang kaugalingong kinaiya, nga hingpit, … ug sa pagbuhat sa ingon naghatag kanato sa usa ka sundanan alang sa atong kaugalingon nga mga kinabuhi. (Decisions for Successful Living [1973], 55–56)

Jesukristo, ni Harry Anderson

icon, pagtuon

Pagtuon agi og Pagpangandam alang sa Klase

Ang pagpaningkamot sa pagsunod subay niining mga pagtulun-an makatabang sa matag usa kanato nga sa katapusan mahimong hingpit sama sa Manluluwas. Ribyuha sa makadiyot ang mosunod nga lista sa mga hilisgutan diha sa 3 Nephi 12–14, ug moila og usa o duha ka dapit nga ganahan ninyong matutokan.

Pagkahuman sa pagpili sa inyong hilisgutan o mga hilisgutan, tun-i ug pamalandongi og maayo ang kauban nga mga tudling sa kasulatan. Aron mapalawman ang inyong pagsabot sa hilisgutan, ikonsiderar ang pagpangita sa mga pakisayran alang sa mga bersikulo nga inyong gitun-an.

• Kristohanong mga Hiyas (ang Kabulahanan) (3 Nephi 12:3–12)

• Kasuko (3 Nephi 12:21–24)

• Sekswal nga Kaputli (3 Nephi 12:27–28)

• Kamatinuoron ug Kaligdong (3 Nephi 12:33–37)

• Paghigugma sa mga Kaaway (3 Nephi 12:38–44)

• Pagserbisyo sa Husto nga mga Rason (3 Nephi 13:1–4)

• Pag-ampo ug Pagpuasa (3 Nephi 13:5–18)

• Mga Bahandi sa Langit (3 Nephi 13:19–24)

• Paghukom sa Uban (3 Nephi 14:1–5)

icon, irekord

Irekord ang Imong mga Hunahuna

Pag-ila og usa o mas daghang baruganan nga gitudlo diha sa tudling o mga tudling nga imong basahon nga makatabang kanimo nga mas mahisama sa Manluluwas. Isulat ang imong mga pagbati samtang mokonsiderar sa mosunod nga mga pangutana:

• Sa unsa kaha nga paagi nga ang pagsunod sa baruganan dinhi niining tudling sa kasulatan makatabang nako nga mahimong mas mahisama ni Jesukristo?

• Giunsa ni Jesus sa pagpakita og ehemplo niining baruganan?

• Sa unsang paagi nga ang baruganan nakapanalangin sa akong kinabuhi o sa mga kinabuhi sa uban?

• Unsay akong mahimo aron mas magamit kining baruganan sa akong kinabuhi?

Gusto pa og Dugang? (Opsyonal)

Asa ko makakat-on pa og dugang mahitungod sa wali sa Manluluwas ngadto sa mga Nephite?

Alang sa dugang impormasyon 3 Nephi 12–14, tan-awa sa kapitulo 41 sa Book of Mormon Student Manual (Church Educational System manual, 2009), 302–11, o kapitulo 3 sa New Testament Student Manual (Church Educational System manual, 2018), nga naghisgot sa Wali sa Bukid (tan-awa sa Mateo 5–7).

Unsa ang akong buhaton kon ako manglimbasog sa ideya nga mahimong hingpit niining kinabuhia?

Elder Jeffrey R. Holland

Sa iyang pakigpulong nga “Busa, Kamo Kinahanglan Magmahingpit—sa Katapusan” (Ensign o Liahona, Nob. 2017, 40–42), Si Elder Holland naghatag og importanting tambag alang niadtong kinsa nawad-an og kadasig tungod kay sila naghunahuna nga sila dili mahimong hingpit.