Leksyon 25 Materyal sa Pagpangandam sa Klase: Pag-ampo ug Personal nga Pagpadayag
“Leksyon 25 Materyal sa Pagpangandam sa Klase: Pag-ampo ug Personal nga Pagpadayag,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 25 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 25 Materyal sa Pagpangandam sa Klase
Pag-ampo ug Personal nga Pagpadayag
Imahe
batan-ong babaye nga nagbasa sa mga kasulatan
Si Jesukristo misaad, “Kay ang matag usa nga mangayo, makadawat; ug siya nga mangita, makakaplag; ug ngadto kaniya nga motuktok, pagaablihan” (3 Nephi 14:8). Si Presidente Russell M. Nelson miingon bahin niini nga saad: “Kining walay tagal nga tanyag sa paghatag og personal nga pagpadayag gipaabut ngadto sa tanan Niyang mga anak. Morag hapit na dili katuohan. Apan tinuod kini!” (“Pangayo, Pangita, Panuktok,” Liahona, Nob. 2009, 81). Samtang magtuon ka niini nga materyal, hunahunaa ang kaepektibo sa imong mga pag-ampo ug kon unsay imong mabuhat aron sa pagpalambo sa imong kapasidad sa pagdawat og personal nga pagpadayag.
Seksyon 1
Unsa man ang akong mabuhat aron sa paghimo sa pag-ampo nga mas makahuluganon nga bahin sa akong kinabuhi?
Sa dihang nangulo si Alma ug Amulek og usa ka grupo sa mga misyonaryo aron sa pagkuha og balik sa mga Zoramite nga hingpit nga mibiya sa kamatuoran, natingala sila samtang nakasaksi sila kon sa unsang paagi nga ang mga Zoramite misimba ug nag-ampo sa ilang mga sinagoga. Nagbarog sa ibabaw sa usa ka bantawan nga gitawag nila og Rameumptom, ang mga indibidwal nagpuli-puli sa pagsaysay og sinulat nga pag-ampo, nga namahayag nga walay Kristo ug nga ang Dios mipili kanila aron maluwas. Human matapos ang simba, ang mga Zoramite mamauli, nga “dili na gayud maghisgot sa ilang Dios” hangtod nga mobalik sila pagkasunod semana. (Tan-awa sa Alma 31:12–24.) Sa wala madugay, nakatudlo si Alma ug Amulek sa ebanghelyo, lakip na sa tinuod nga kahulugan ug katuyoan sa pag-ampo, ngadto sa usa ka grupo sa mapainubsanon nga mga Zoramite (tan-awa sa Alma 32–34).
Basaha ang Alma 34:17–28, ug tinoa ang mga baroganan nga gitudlo ni Amulek sa mga Zoramite mahitungod sa pag-ampo.
Imahe
icon, irekord
Irekord ang Imong mga Hunahuna
Pagpili og usa o duha ka bersikulo gikan sa Alma 34:17–28, ug isulat og usab ang bersikulo o mga bersikulo nga ingon og si Amulek namulong gamit ang pinulongan sa panahon karon ngadto sa usa ka tawo nga kaedad nimo. Sama pananglit, hunahunaa ang mahitungod sa tambag nga mag-ampo “alang sa inyong mga panon sa umahan” (bersikulo 25), ug gamita ang sama nga ideya sa atong moderno nga mga kahimtang. Pag-andam sa pagpaambit sa imong giusab nga mga bersikulo diha sa klase. Hunahunaa kon sa unsang paagi tingali magamit nimo ang mga pagtulun-an ni Amulek aron sa pagpalambo sa kamatinuoron ug kamakanunayon sa imong kaugalingon nga mga pag-ampo.
Seksyon 2
Unsay akong mahimo aron makadawat og personal nga pagpadayag?
Duol sa sinugdanan sa Basahon ni Mormon, gisulat ni Nephi ang iyang tinguha nga makasabot ug makabaton og personal nga pagsaksi sa damgo sa iyang amahan bahin sa kahoy sa kinabuhi ug sa iyang ubang mga pagtulun-an (tan-awa sa 1 Nephi 10:17).
Imahe
icon, pagtuon
Pagtuon agi og Pagpangandam alang sa Klase
Basaha ang 1 Nephi 10:17–19, ug pangitaa kon unsay atong makat-onan gikan kang Nephi mahitungod sa pagbaton og personal nga pagpadayag. (Pahinumdom: “Ang mga misteryo sa Dios mao ang mga espirituhanon nga mga kamatuoran nga mahibaloan lamang pinaagi sa pagpadayag” [Giya ngadto sa mga Kasulatan, “Misteryo sa Dios, Mga,” scriptures.ChurchofJesusChrist.org].) Sama pananglit, usa ka misteryo sa Dios ang napadayag ngari kanato kon kita makadawat og pagsaksi gikan sa Espiritu Santo nga ang Basahon ni Mormon tinuod.
Samtang namalandong si Nephi sa mga pagtulun-an ni Lehi, siya “gibayaw sa Espiritu sa Ginoo” ug nakadawat sa iyang kaugalingon nga panan-awon (1 Nephi 11:1). Niini nga panan-awon si Nephi nakadawat og dugang nga kahibalo mahitungod sa damgo sa iyang amahan bahin sa kahoy sa kinabuhi, sa mortal nga pangalagad sa Manluluwas, sa kaugmaon sa iyang kaliwatan, ug sa Pagpahiuli sa ebanghelyo sa kataposan nga mga adlaw (tan-awa sa 1 Nephi 11–14).
Imahe
icon, pamalandong
Pamalandong agi og Pagpangandam alang sa Klase
Unsay gisaligan ug gituohan ni Nephi mahitungod sa Dios nga mipalambo sa iyang kapasidad sa pagdawat og personal nga pagpadayag?
Human niini nga kasinatian sa pagpadayag, mibalik si Nephi ngadto sa tolda sa iyang amahan ug nakakita sa iyang igsoon nga mga lalaki nga “naglalis sa usag usa mahitungod sa mga butang diin gipamulong [ni Lehi] ngadto kanila” (1 Nephi 15:2).
Basaha ang 1 Nephi 15:3–4, 8–11, ug hunahunaa kon nganong naglisod si Laman ug Lemuel sa pagsabot sa mga pagtulun-an ni Lehi.
Imahe
icon, pamalandong
Pamalandong agi og Pagpangandam alang sa Klase
Unsa nga pangutana o mga pangutana ang imong gipadangat sa Ginoo, ug unsa man ang imong kasinatian? Aduna bay mga kabalaka o mga pangutana nga imo untang mapadangat sa Ginoo pinaagi sa pag-ampo apan wala mahimo? Kon mao, unsay nakapugong kanimo sa pag-ampo mahitungod niini?
Sa kaulahian diha sa Basahon ni Mormon, atong mabasa ang mahitungod sa usa ka abogado nga ginganlan og Zeezrom kinsa misulay sa pagdaot sa mga pagtulun-an ni Alma ug Amulek. Human nga si Zeezrom nasakpan ni Amulek sa iyang mga bakak, si Zeezrom nahimong mapainubsanon ug misugod sa kinasingkasing nga pagpangutana kang Alma mahitungod sa ebanghelyo. Si Alma mitudlo kang Zeezrom nga ang mga misteryo sa Dios, o pagpadayag, mahimong ihatag lamang ngadto niadtong kinsa mapainubsanon ug matinud-anon. (Tan-awa sa Alma 11:21–13:31.)
Basaha ang Alma 12:9–10, ug hunahunaa kon sa unsang paagi kaha nga ang imong kasamtangang kinaiya ug mga binuhatan lagmitmakapalambo o makapakunhod sa imong kapasidad sa pagdawat og pagpadayag.
Namulong bahin sa unsay atong mabuhat aron sa pagpalambo sa atong kapasidad sa pagdawat og pagpadayag, si Presidente Nelson mitudlo:
Imahe
Presidente Russell M. Nelson
Pangita og mingaw nga lugar diin kamo kanunay makaadto. Ipaubos ang inyong kaugalingon atubangan sa Dios. Ibubo ang inyong kasingkasing ngadto sa inyong Langitnong Amahan. Dangop Kaniya alang sa mga tubag ug alang sa kahupayan.
Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—oo, ang mga tinguha sa inyong kasingkasing. Ug dayon maminaw! Isulat ang mga ideya nga masulod sa inyong hunahuna. Irekord ang inyong mga gibati ug sundi kini sa paglihok sa unsay giaghat nga angay ninyong buhaton. Kon inyong balik-balikon kini nga proseso matag adlaw, matag bulan, matag tuig, kamo “molambo ngadto sa baruganan sa pagpadayag” [Mga Pagtulun-an sa mga Presidente sa Simbahan: Joseph Smith (2007), 154–155]. …
Walay lain nga makabukas sa kalangitan sama sa kombinasyon sa nagtubo nga kaputli, hingpit nga kamasulundon, sinserong nangita, inadlaw nga pagbasa sa mga pulong ni Kristo diha sa Basahon ni Mormon [tan-awa sa 2 Nephi 32:3], ug regular nga panahon nga ipasalig alang sa buhat sa templo ug family history. …
Unsa ang imong nahimo kaniadto nga nakatabang kaayo kanimo sa pagdawat og pagpadayag? Unsa ang dugang nga mga lakang nga imong mahimo aron sa pagpalambo sa imong kapasidad sa pagdawat og pagpadayag?
