Leksyon 23 Materyal sa Pagpangandam sa Klase

mga young adult nga naglakaw ug nag-istorya

Pagkamasulundon sa mga Sugo sa Dios

Niini nga yunit ikaw adunay kahigayonan sa paghunahuna unsaon nimo nga makapalambo sa imong pagsalig sa Dios. Usa ka importante nga elemento sa pagsalig sa Dios mao ang pagkat-on nga mahimong andam sa pagsunod sa Iyang mga sugo. Unsa ka importante alang kanimo ang pagsunod sa mga sugo sa Dios? Aduna bay usa ka sugo nga alang kanimo lisod kaayo nga tumanon? Samtang magtuon ka sa Basahon ni Mormon agi og pagpangandam alang sa klase, pamalandongi ang katuyoan sa mga sugo sa Dios ug ang mga panalangin nga imong madawat samtang magtinguha ka sa pagsunod sa ehemplo sa Manluluwas sa pagkamasulundon.

Seksyon 1

Unsa ang akong makat-onan mahitungod sa pagkamasulundon gikan kang Jesukristo?

Gikan sa Bag-ong Tugon atong makat-onan nga si Jesukristo miadto kang Juan Bautista aron magpabunyag aron sila “makatuman … sa tanan nga gisugo sa Dios” (Mateo 3:13–17). Sumala sa narekord sa Basahon ni Mormon, si Nephi mipasabot ngano nga si Jesukristo, kinsa walay sala, gibunyagan (tan-awa sa 2 Nephi 31:6–7).

icon, pagtuon

Pagtuon agi og Pagpangandam alang sa Klase

Basaha ang 2 Nephi 31:6–7, 10, ug pangitaa ang mga kinaiya ni Jesukristo nga gihatagan og gibug-aton ni Nephi.

Si Juan nga nagbunyag ni Jesukristo

Sa dihang si Jesukristo mipakita ngadto sa mga Nephite sa yuta sa Bountiful, Iyang gihatagan og importansya ang pagsunod sa mga sugo sa Iyang Amahan. Si Elder Jeffrey R. Holland sa Korum sa Napulog Duha ka mga Apostoles nakaobserbar:

Elder Jeffrey R. Holland

Sa tanang mensahe nga gikan sa langitnon nga mga pagtulun-an, unsa ang pamahayag nga gidala [sa Manluluwas]? Ang matinud-anon nga mga Nephite naminaw samtang namulong siya: “Ako ang kahayag ug ang kinabuhi sa kalibutan; ug Ako nakainom gikan sa pait nga kopa nga gihatag sa Amahan ngari kanako, ug gihimaya ang Amahan sa akong pagpas-an sa mga sala sa kalibutan, diin pinaagi niini Ako mituman sa kabubut-on sa Amahan sa tanan nga mga butang gikan sa sinugdanan” [3 Nephi 11:11]. Kalim-an ug unom ka mga pulong. Ang labing mahinungdanon sa iyang yutan-on nga misyon. Pagkamasulundon ug pagkamaunungon ngadto sa kabubut-on sa Amahan, bisan unsa pa kapait ang kopa o kasakit sa bugti. (Christ and the New Covenant [1997], 251)

Duol sa kataposan sa Iyang pangalagad taliwala sa mga Nephite, ang Ginoo mipahayag: “Ako mianhi dinhi sa kalibutan aron sa pagbuhat sa kabubut-on sa akong Amahan, tungod kay ang akong Amahan mipadala kanako” (3 Nephi 27:13).

icon, pamalandong

Pamalandong agi og Pagpangandam alang sa Klase

Unsay imong makat-onan mahitungod sa pagkamasulundon gikan sa ehemplo ni Jesukristo?

Seksyon 2

Sa unsa nga mga paagi nga ako mapanalanginan pinaagi sa pagsunod sa mga sugo sa Dios?

Sa dili pa dugay human si Lehi ug ang iyang pamilya mibiya gikan sa Jerusalem padulong ngadto sa kamingawan, si Laman ug Lemuel misugod sa pagbagulbol batok sa ilang amahan. Naguol tungod sa ilang tig-a nga mga kasingkasing, si Nephi nag-ampo alang sa iyang mga igsoon nga lalaki. Agi og tubag sa iyang pangamuyo, ang Ginoo mitudlo ni Nephi og importante nga kamatuoran mahitungod sa pagkamasulundon. (Tan-awa sa 1 Nephi 2:11–12, 18–21.)

Si Nephi nga nag-ampo

icon, pagtuon

Pagtuon agi og Pagpangandam alang sa Klase

Basaha ang 1 Nephi 2:20–21, ug pangitaa unsay nakat-onan ni Nephi mahitungod sa pagkamasulundon.

Namulong bahin sa saad niini nga kasulatan, si Bishop Gérald Caussé, ang Presiding Bishop, mitudlo:

Bishop Gérald Caussé

Kini nga saad importante sa istorya ug sa mga pagtulun-an sa Basahon ni Mormon. Makita kini sa 18 ka lain-laing mga bersikulo, ug sa pito sa 15 ka basahon. Bisan og ang panalangin sa kauswagan nga gihisgutan niini nga mga kasulatan kasagaran bahin sa espirituhanon, naglakip usab kini sa abilidad sa mga katawhan sa Dios nga makatagamtam sa ekonomikanhong kauswagan ug mahimong mapaningkamuton sa kaugalingon sa temporal nga paagi. (“Ang mga Espirituhanong Pundasyon sa Simbahan Bahin sa Pinansyal nga Pagpaningkamot sa Kaugalingon,” Liahona, Agosto 2018, 10)

Si Hari Benjamin nga nagsangyaw gikan sa tore

Dihang nagkaduol na si Hari Benjamin sa kataposan sa iyang kinabuhi, iyang gipundok ang iyang katawhan aron sa pagpamulong og kataposang wali. Isip kabahin sa iyang wali, mitudlo siya nga kitang tanan “dili mapuslanon nga mga sulugoon” ug kanunay nga utangan sa Dios (Mosiah 2:20–21). Sa konteksto sa atong pagkautangan, si Hari Benjamin mitudlo ngano nga gikanahanglan sa Dios kanato nga mosunod sa Iyang mga sugo.

icon, pagtuon

Pagtuon agi og Pagpangandam alang sa Klase

Basaha ang Mosiah 2:22, 41, ug ikonsiderar kon sa unsang paagi nga ang pagsunod sa mga sugo sa Dios motugot kanato nga makasinati sa kamaayo sa Dios.

batan-ong lalaki nga nagpahiyom

Nagkomentaryo bahin sa katuyoan sa mga sugo sa Dios, si Presidente Jean B. Bingham, Kinatibuk-ang Presidente sa Relief Society, mitudlo:

Presidente Jean B. Bingham

Ngano nga ang Dios mihatag kanato og mga sugo? Kini ba aron sa pagdaogdaog kanato, aron maulipon ngadto Kaniya? Kini ba aron sa pagtangtang sa bisan unsang kahigayonan alang sa tinuod nga kalipay niini nga kalibotan? Dili, ang katugbang mao ang tinuod: Ang Dios mihatag kanato og mga sugo tungod kay nahigugma Siya kanato. Gusto Niya nga ilikay kita sa kasakit, kagul-anan, ug pagbasaol. Nasayod Siya nga ang bugtong paagi aron tinuoray nga malipay niini nga kinabuhi ug makasinati og walay kinutoban nga kalipay sa umaabot nga kalibotan mao ang pagsunod sa ehemplo ni Jesukristo sa pagkamasulundon ngadto sa mga balaod sa Dios. (“Obedience Brings Blessings” [pakigpulong nga gihatag sa commencement didto sa Brigham Young University–Hawaii, Abr. 21, 2018], speeches.byuh.edu)

icon, paghisgot

Hisgoti agi og Pagpangandam alang sa Klase

Uban sa usa ka higala o sakop sa pamilya, hisgoti kon sa unsang paagi nga ang pagkamasulundon ngadto sa mga sugo sa Dios nakapanalangin sa inyong kinabuhi.

Seksyon 3

Unsa ang akong makat-onan mahitungod sa pagkamasulundon gikan sa batan-ong mga manggugubat?

Si Elder David A. Bednar sa Korum sa Napulog Duha ka mga Apostoles mitudlo, “Ang matinud-anon nga pagtuman sa mga sugo sa Dios gikinahanglan sa pagdawat sa Espiritu Santo.” Gihisgotan dayon niya ang bahin sa batan-ong mga manggugubat isip usa ka ehemplo sa pagkamasulundon ug miingon nga kita “kinahanglang maningkamot nga mahimong sama sa [kanila]” (“Dawata ang Espiritu Santo,” Liahona, Nob. 2010, 96, 97).

Ang batan-ong mga manggugubat mga anak sa mga Lamanite kinsa nakabig ngadto sa Ginoo human sila gitudloan sa mga anak nga lalaki ni Mosiah. Kini nga mga Lamanite gitawag og katawhan ni Ammon o ang Anti-Nephi-Lehi. Human sa ilang pagkakabig, ang mga Anti-Nephi-Lehi misaad sa Dios nga dili na gayod sila mogamit sa ilang mga hinagiban sa gubat. (Tan-awa sa Alma 23:4–7, 16–17.) Wala madugay, ang ilang batan-on nga mga anak nga lalaki, kinsa wala mihimo niini nga pagkigsaad, mipili sa pag-apil sa kasundalohan sa Nephite ug sa pagpanalipod sa ilang nasod. Ang batan-ong mga manggugubat mitinguha nga si Helaman ang mahimo nila nga lider. Nakig-away sila sa pipila ka gubat batok sa mga Lamanite. Samtang nakaangkon sila og daghang samad, sa milagroso nga paagi, walay usa kanila ang namatay sa gubat. (Tan-awa sa Alma 53:10–19; 57:22–25; 58:39.)

Duha ka Libo nga Batan-ong mga Manggugubat, ni Arnold Friberg

icon, pagtuon

Pagtuon agi og Pagpangandam alang sa Klase

Basaha ang Alma 57:21, 27; 58:40. Sa paglantaw lapas sa konteksto sa usa ka militar nga panagsungi, tan-awa unsay imong makat-onan mahitungod sa pagkamasulundon gikan sa mga ehemplo sa batan-ong mga manggugubat.

Namulong ngadto sa mga ginikanan mahitungod sa pagtudlo sa kaimportante sa pagkamasulundon ngadto sa ilang mga anak, si Presidente Russell M. Nelson mihatag sa mosunod nga tambag:

Presidente Russell M. Nelson

Itudlo ang hugot nga pagtuo sa pagsunod sa tanang mga sugo sa Dios, kay nakahibalo nga kini gihatag aron sa pagpanalangin sa Iyang mga anak ug paghatag kanila sa hingpit nga kalipay [tan-awa sa 2 Nephi 2:25]. Pahimangno-i sila nga makasugat sila og mga tawo nga pilion lang ang mga sugo nga ilang tumanon ug mobaliwala sa uban nga ilang gipiling supakon. Gitawag ko kini nga pangkarinderya nga pagkamasulundon. Kini nga binuhatan sa pagpili-pili dili magsilbi. Mopadulong kini ngadto sa kauyamot. Aron andam nga mosugat sa Dios, kita motuman sa tanan Niyang mga sugo. Nagkinahanglan og hugot nga pagtuo ang pagtuman niini, ug ang pagtuman sa Iyang mga sugo makapalig-on niana nga pagtuo. (“Atubanga ang Umaabut uban sa Hugot nga Pagtuo,” Liahona, Mayo 2011, 35)

Usahay mobati kita og kabug-at samtang maningkamot kita nga mosunod sa tanang mga sugo sa Dios uban sa katukma. Sa pagtabang kanato nga makasabot kon sa unsang paagi nga ang Manluluwas makadugang sa atong kapasidad nga mahimong masulundon, si Elder Bednar mitudlo:

Elder David A. Bednar

Mga kaigsoonan, importante kaayo alang kanatong tanan ang paghinumdom nga ang pag-uswag sa mas taas ug mas mahagiton nga espirituhanong ang-ang sa pagkamasulundon dili lamang mahitungod sa dugang nga personal nga determinasyon, dugang nga kaisog sa pangisip, ug dugang nga gahom sa kabubut-on; hinoon, kini makab-ot pinaagi sa makaabag nga gahom sa Pag-ula ni Ginoong Jesukristo. (“In a State of Happiness (Mormon 7:7)” [debosyonal sa Brigham Young University–Idaho, Ene. 6, 2004], byui.edu)

icon, pamalandong

Pamalandong agi og Pagpangandam alang sa Klase

Base sa imong nakat-onan mahitungod sa pagkamasulundon dinhi niini nga leksyon, unsa nga tambag ang imong ihatag sa usa ka tawo kinsa naglisod sa pagtuman sa mga sugo?

Gusto pa og Dugang? (Opsyonal)

Asa ako makakat-on pa mahitungod sa mga panalangin sa pagkamasulundon?

Si Presidente Thomas S. Monson mitudlo nga ang pagsunod sa ehemplo sa pagkamasulundon sa Ginoo nagbukas sa labing dako nga mga panalangin sa Dios (“Ang Pagkamasulundon Makahatag og Panalangin,” Liahona, Mayo 2013, 89–92).

Sa unsa nga paagi nga ang tukma nga pagkamasulundon makapanalipod kanako gikan sa kadaot?