Leksyon 2 Materyal sa Magtutudlo

Pagsunod sa mga Propeta sa Ginoo

Ang mga propeta sa Ginoo nagpadayag ug nagtudlo sa pulong sa Dios. Kon mopatalinghog kita sa ilang mga pagtulun-an, kita makasinati sa gahum sa pulong sa Dios sa atong mga kinabuhi. Human niini nga leksyon kinahanglan ang mga estudyante makapasabot kon sa unsang paagi kita mapanalanginan kon kita mosalig sa mga propeta sa Dios ug sa mga mensahe nga sila gitawag sa pagsangyaw. Ang mga estudyante motimbang-timbang usab sa ilang kaugalingon nga mga paningkamot sa pagpatalinghog sa kasamtangan nga propetikanhong tambag.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Ipahaum ang materyal sa leksyon sa pagkab-ot sa mga panginahanglan sa mga estudyante. Usahay ang mga leksyon naglangkob og mas daghang materyal kay sa imong mahisgutan og maayo sa klase. Kay sa mosulay sa paghisgot sa tanan diha sa plano sa leksyon, tutoki ang mga kasulatan ug materyal nga maoy makatabang og maayo sa imong mga estudyante nga mohimo og epektibo, matarung nga buhat aron mahimo silang mas sama sa Langitnong Amahan ug ni Jesukristo. Pagtinguha og giya gikan sa Espiritu Santo ug gikan sa mga estudyante aron sa pagtabang nimo nga makahibalo unsa nga mga baruganan, mga pangutana, ug mga kalihokan ang gamiton sa klase.

Ang Ginoo nagpadala kang Lehi aron sa pagpanagna ngadto sa katawhan sa Jerusalem.

Sugdi ang klase pinaagi sa paghangyo sa mga estudyante sa pagpamalandong sa usa ka higayon dihang ang usa ka tawo negatibong mitubag sa usa ka mensahe o ideya nga ilang gisulayan sa pagpaambit.

• Ngano nga ang mga miyembro, mga misyonaryo, ug mga propeta nagpadayon sa pagpaambit og mga mensahe nga nasayod sila nga mahimong dili magustohan?

Lehi Nagsangyaw sa Jerusalem, ni Del Parson

Ipakita ang usa ka litrato ni Lehi nga nagsangyaw. Dapita ang usa ka estudyante sa paghulagway sa kahimtang sa sinugdanan sa Basahon ni Mormon nga girekord diha sa 1 Nephi 1. (Kon dunganon nimo og tudlo ang unang duha ka leksyon niini nga kurso, mahimong walay kahigayonan ang mga estudyante sa pagtuon sa materyal sa pagpangandam alang niini nga leksyon. Mahimo nimong dapiton ang usa ka estudyante sa pagbasa og kusog sa 1 Nephi 1:4.)

• Unsa ang atong makat-onan mahitungod sa Ginoo ug sa Iyang mga propeta sa sinugdanan sa Basahon ni Mormon? (Hunahunaa ang pagbasa o pagribyu uban sa mga estudyante sa pamahayag ni Presidente Henry B. Eyring diha sa seksyon 1 sa materyal sa pagpangandam.)

Ipasabot nga diha sa usa ka panan-awon, ang Ginoo mihatag kang Lehi og libro nga basahon. Mibasa si Lehi nga ang Jerusalem malaglag. (Tan-awa sa 1 Nephi 1:12–13.)

Basaha og dungan ang 1 Nephi 1:14, nga mangita kon unsay reaksyon ni Lehi sa panan-awon.

• Unsay nakat-onan ni Lehi mahitungod sa kinaiya sa Ginoo? Sa inyong hunahuna sa unsa nga paagi kini nga kahibalo bahin sa kalooy sa Ginoo nakaapekto sa lig-on nga tinguha ni Lehi nga managna ngadto sa katawhan sa Jerusalem?

Dapita ang mga estudyante sa pagbasa sa 1 Nephi 1:18–19, nga mangita sa unsay atong makat-onan mahitungod sa mga propeta gikan sa kasinatian ni Lehi. Tabangi ang mga estudyante nga makakita og mga kamatuoran sama sa mosunod: Ang mga propeta nagpahayag sa mga pulong ug kabubut-on sa Ginoo. Ang mga propeta nagtudlo ug nagpamatuod ni Jesukristo ug sa katubsanan nga moabot pinaagi Kaniya.

• Unsay pipila ka bag-o nga mga mensahe gikan sa atong buhi nga mga propeta ug apostoles nga nagpahayag sa mga pulong ug kabubut-on sa Ginoo?

Dapita ang mga estudyante sa pagribyu sa mga pamahayag ni Elder D. Todd Christofferson ug Elder Ulisses Soares diha sa seksyon 1 sa materyal sa pagpangandam ug sa pagpaambit kon unsay labing mahinungdanon ngadto kanila.

• Sa unsang paagi kini nga mga pamahayag nakaapekto sa inyong pagbati mahitungod sa kasamtangang mga propeta? Sa unsang paagi kini nakaapekto sa inyong pagbati mahitungod kang Jesukristo?

• Unsa nga bag-ong propetikanhong mga mensahe ang nakatabang ninyo nga mas maayong nakaila sa gugma sa Dios alang sa Iyang mga anak? (Ang mga estudyante namalandong og pangutana nga susama niini sa dihang nagtuon sila sa seksyon 1 sa materyal sa pagpangandam.)

Si Nephi nakadawat og pagmatuod nga ang mga propeta nagtudlo sa pulong sa Dios.

Dapita ang mga estudyante sa pag-ila og pipila ka propetikanhong mga pagtulun-an nga tingali lisud dawaton sa mga tawo sa atong panahon. (Timan-i: Kon gikinahanglan, pahinumdumi ang mga estudyante nga ang atong tuyo dili ang pagsaway sa mga propeta sa Ginoo apan ang paghisgot kon sa unsang paagi kita makatubag uban sa hugot nga pagtuo ngadto sa usa ka propetikanhon nga mensahe nga kita o usa ka tawo nga atong nailhan mahimong naglisod sa pagsabot o pagdawat.)

• Ngano man nga usahay mahagiton ang pagdawat sa unsay gipahayag sa usa ka propeta?

Ipakita o ipangutana ang mosunod nga pangutana: Unsay akong mabuhat kon naglisod ko sa usa ka butang nga gitudlo sa usa ka propeta? Samtang ang mga estudyante maghisgot niini nga pangutana, ayaw pagpanagana sa paggamit sa tanan o sa pipila sa mosunod nga materyal aron sa pagtabang nila og hunahuna kon unsaon nila pagtubag kon sila o usa ka tawo nga ilang nailhan aduna niini nga kabalaka.

Hangyoa ang mga estudyante sa paghunahuna kon unsa kaha ang gibati sa pamilya ni Lehi sa dihang si Lehi miingon kanila nga gusto sa Ginoo nga mobiya sila sa ilang mga panimalay ug mobiyahe paingon ngadto sa kamingawan.

• Unsay reaksyon ni Laman ug Lemuel sa pagbiya sa ilang panimalay? Unsay reaksyon ni Nephi? (Dapita sila sa pagribyu sa 1 Nephi 2:11–13, 16–17. Mahimo nimong ipasabot nga ang kasingkasing ni Nephi tingali nagkinahanglan usab og pagpalumoy [tan-awa sa 1 Nephi 2:16].)

• Unsa ang pipila sa nagkalain-laing mga pamaagi nga ang mga tawo diha sa Basahon ni Mormon mitubag sa mga propeta ug sa ilang mga mensahe? (Mahimong hatagan nimo og panahon ang mga estudyante sa pagribyu sa unsay ilang nakat-onan samtang nagtuon sa seksyon 3 sa materyal sa pagpangandam.) Unsa man ang mga sangpotanan sa ilang mga reaksyon? Kanus-a kamo nakakita og susama nga mga ehemplo niining nagkalain-laing mga matang sa mga tubag sa atong panahon?

• Unsa ang atong makat-onan gikan sa tubag ni Nephi sa mensahe sa iyang amahan? Unsa ang tahas sa Ginoo sa pagtabang kanato nga masayod kon tinuod ba ang mga pulong sa Iyang mga propeta? (Mahimong moila ang mga estudyante og baruganan sama niini: Kon atong ipaubos ang atong mga kaugalingon ug moduol ngadto sa Ginoo, makatabang Siya sa pagpalumoy sa atong mga kasingkasing ngadto sa katinuod sa mga pulong sa mga propeta.)

Basaha ang mosunod nga pamahayag ni Presidente Russell M. Nelson:

Presidente Russell M. Nelson

Mahimo kamong masayod sa inyong kaugalingon kon unsay tinuod ug unsay dili pinaagi sa pagkat-on sa pag-ila sa mga paghunghong sa Espiritu. …

Akong hinigugmang kaigsoonan, nangamuyo ako kaninyo nga tininuod nga magtinguha og pagmatuod gikan sa Espiritu nga unsay akong gisulti kaninyo tinuod ug gikan sa Ginoo. Siya mipahayag nga kita mahimong magtinguha og kahibalo gikan sa langit ug maglaum nga makadawat niini [tan-awa sa Doktrina ug mga Pakigsaad 42:61]. …

Pangutan-a ang inyong Langitnong Amahan kon tinuoray ba kaming mga apostoles ug mga propeta sa Ginoo. (“The Love and Laws of God” [pakigpulong nga gihatag sa usa ka debosyonal sa Brigham Young University, Sept. 17, 2019], 4–5, speeches.byu.edu)

• Unsa ang inyong mga kasinatian sa pagkat-on sa inyong kaugalingon sa katinuod sa balaanon nga tawag o mensahe sa usa ka propeta?

Samtang imong tapuson ang panaghisgot mahitungod sa pangutana “Unsay akong mabuhat kon naglisod ko sa usa ka butang nga gitudlo sa usa ka propeta?” ikonsiderar ang paghatag og panahon sa mga estudyante sa pagpamalandong ug pagsulat sa unsay ilang nabati o nakat-onan nga mahimong makatabang kanila o sa laing tawo kinsa adunay susama nga pangutana.

Mahimo nimong dapiton ang pipila ka estudyante sa pagpaambit sa unsay ilang lahi nga buhaton sa umaabot kon naglisod sila sa usa ka butang nga gitudlo sa usa ka propeta.

Alang sa Sunod nga Higayon

Mahimo nimong ipakita ang usa ka litrato sa panan-awon ni Lehi sa kahoy sa kinabuhi ug dapiton ang mga estudyante sa paghunahuna samtang magtuon sila sa materyal sa pagpangandam alang sa sunod nga klase kon unsa ang matudlo niini nga panan-awon kanato mahitungod sa gahom sa pulong sa Dios.