Leksyon 14 Materyal sa Pagpangandam sa Klase: Pagkahimong mga Himan diha sa mga Kamot sa Dios
Leksyon 14 Materyal sa Pagpangandam sa Klase: Pagkahimong mga Himan diha sa mga Kamot sa Dios,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 14 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 14 Materyal sa Pagpangandam sa Klase
Pagkahimong mga Himan diha sa mga Kamot sa Dios
Imahe
batan-ong lalaki nakigbahin sa Basahon ni Mormon
Hunahunaa kon pila ka mga tawo ang imong makita kada adlaw kinsa sa pagkakaron wala makatagamtam sa mga panalangin sa ebanghelyo ni Jesukristo. Unsaon kaha pag-usab sa ilang mga kinabuhi kon sila makakat-on pa og dugang mahitungod sa plano sa Langitnong Amahan alang sa ilang kalipay? Samtang ikaw magtuon sa mga ehemplo sa mga misyonaryo diha sa Basahon ni Mormon, paghunahuna sa mainampuong paagi mahitungod sa usa ka tawo nga mahimo kang makigbahin sa ebanghelyo. Hinumdumi nga samtang ikaw makigbahin sa ebanghelyo ngadto sa uban, ikaw nag-apil diha sa pagpundok sa Israel.
Seksyon 1
Sa unsa nga paagi nga ang paglig-on sa akong pagkakabig magdugang sa akong tinguha sa pagpakigbahin sa ebanghelyo?
Ang upat ka anak nga mga lalaki ni Mosiah (Ammon, Aaron, Omner, ug Himni) kauban ni Alma nga Batan-on sa dihang usa ka anghel mipakita ug misugo kaniya sa paghinulsol. Ang tanang lima ka batan-ong mga lalaki miabut sa pagbati og lawom nga kasubo tungod sa ilang mga lihok, mihinulsol sa ilang mga sala, ug nakabig ngadto sa Ginoo. Human sa ilang pagkakabig, sila “mga himan diha sa mga kamot sa Dios sa pagdala sa daghan ngadto sa kasayuran sa kamatuoran, oo, ngadto sa kasayuran sa ilang Manunubos” (Mosiah 27:36).
Imahe
icon, pagtuon
Pagtuon agi og Pagpangandam alang sa Klase
Basaha ang Mosiah 28:1–3, mangita kon giunsa sa pagkakabig sa anak nga mga lalaki ni Mosiah pag-impluwensya sa ilang tinguha sa pagpakigbahin sa ebanghelyo ug paghimong mga himan diha sa mga kamot sa Dios.
Human sa mga katuigan sa misyonaryo nga pagserbisyo taliwala sa mga Lamanite, si Ammon misulti sa mosunod ngadto sa iyang igsoong mga lalaki: “Ug kini mao ang panalangin nga gitugyan ngari kana[m]o, nga k[ami] nahimo nga mga himan diha sa mga kamot sa Dios aron sa pagpahinabo niining dako nga buluhaton (Alma 26:3).
Si Presidente Dallin H. Oaks sa Unang Kapangulohan mitudlo sa mosunod mahitungod kon unsaon sa atong pagkakabig pag-impluwensya sa atong tinguha sa pagpakigbahin sa ebanghelyo:
Imahe
Presidente Dallin H. Oaks
Ang pagpakigbahin sa ebanghelyo dili palas-anon apan kalipay. Unsay atong gitawag og “buhat sa member missionary” dili usa ka programa apan kinaiya sa gugma ug pagtabang niadtong naglibut kanato. Kini usa usab ka oportunidad sa pagsaksi kon unsa ang atong gibati mahitungod sa gipahiuli nga ebanghelyo sa atong Manluluwas. Sama sa gitudlo ni Elder Ballard, “Usa ka labing mahinungdanong ebidensya sa atong pagkakabig ug kon unsay atong gibati mahitungod sa ebanghelyo sa atong kinabuhi mao ang atong pagkaandam nga makigbahin niini ngadto sa uban” [M. Russell Ballard, “Karon Mao ang Panahon,” Liahona, Ene. 2001, 89]. (“Pakigbahin sa Gipahiuli nga Ebanghelyo,” Liahona, Nob. 2016, 60)
Imahe
icon, pamalandong
Pamalandong agi og Pagpangandam alang sa Klase
Pag-ila og ehemplo gikan sa mga kasulatan o kasaysayan sa Simbahan kabahin sa unsang paagi ang pagkakabig makadugang sa tinguha sa usa ka tawo ug pagkaandam nga mahimong himan diha sa mga kamot sa Dios ug makigbahin sa ebanghelyo. Tambong sa klase nga andam nga mopakigbahin sa imong ehemplo.
Seksyon 2
Unsaon nako nga mahimong usa ka mas epektibo nga himan diha sa mga kamot sa Dios?
Ang anak nga mga lalaki ni Mosiah ug kadtong kinsa miuban kanila nakigharong og “usa ka luog ug magahi ug usa ka mabangis nga mga katawhan” samtang sila nagpadayon sa pagtudlo sa mga Lamanite (Alma 17:8, 14). Samtang sila naghago taliwala kanila, kini nga mga misyonaryo “nag-antus sa hilabihan, diha sa lawas ug diha sa hunahuna, sama sa kagutom, kauhaw ug kakapoy, ug usab sa dako nga paghago diha sa espiritu” (Alma 17:5).
Imahe
icon, pagtuon
Pagtuon agi og Pagpangandam alang sa Klase
Basaha ang Alma 17:2–3, 9–11, mangita alang sa unsay gibuhat sa anak nga mga lalaki ni Mosiah aron madawat ang espiritu sa pagpadayag ug sa pag-andam nga mahimong epektibo nga mga himan diha sa mga kamot sa Dios. Hunahunaa ang pagmarka sa unsay imong makit-an.
Unsa nga mga lihok ang labing mitabang kanimo aron mahimong takus alang sa Espiritu nga mahimong mas epektibong himan diha sa mga kamot sa Dios?
Seksyon 3
Unsaon sa Espiritu pagtabang kanako nga mas maayo nga moserbisyo sa uban ug makigbahin sa ebanghelyo?
Ang anak nga mga lalaki ni Mosiah nahimong mga himan diha sa mga kamot sa Dios, nagtabang sa pagdala og daghan sa mga Lamanite ngadto sa Manluluwas. Mibiyahe si Ammon nga nag-inusara ngadto sa yuta ni Ishmael ug gigapos ug gidala sa atubangan ni Hari Lamoni. Gipangutana sa hari si Ammon mahitungod sa iyang mga tuyo, ug miingon si Ammon nga gusto niyang mopuyo uban sa mga Lamanite, tingali uban sa tibuok niyang kinabuhi. Kini nakapahimuot sa hari, ug si Ammon nahimong usa sa iyang mga sulugoon. (Tan-awa sa Alma 17:19–25.)
Gipadala si Ammon sa pagbantay sa mga panon sa hari. Sa dihang ang mga kawatan misulay sa pagtibulaag sa mga karnero, nasanta ni Ammon sa iyang saplong ug espada ang ilang mga paninguha. Ang mga kawatan natingala sa gahum ni Ammon ug milayas. (Tan-awa sa Alma 17:25, 33-38.)
Sa dihang nahibaloan sa hari ang kalampusan ni Ammon sa pagpanalipod sa iyang mga panon, siya nahingangha ug nahibulong kon si Ammon ba mao ang “Gamhanang Espiritu kinsa mipadala sa ingon nga mga dagko nga mga silot diha niini nga mga katawhan” (Alma 18:2). “Si Ammon, ingon nga puno uban sa Espiritu sa Dios” (bersikulo 16), nakasabut sa mga hunahuna sa hari, gihatagan og solusyon ang iyang mga kabalaka, ug nagsugod sa pagtudlo kaniya sa ebanghelyo (tan-awa sa Alma 18:15–24).
Imahe
icon, pagtuon
Pagtuon agi og Pagpangandam alang sa Klase
Basaha ang Alma 18:33–35, ug hunahunaa kon unsa ang imong makat-unan gikan ni Ammon mahitungod sa pagkahiman diha sa mga kamot sa Dios.
Mituo si Hari Lamoni sa mga pulong ni Ammon ug nakabig ngadto sa ebanghelyo ni Jesukristo. Nakatudlo usab si Ammon sa asawa ni Lamoni ug sa mga sulugoon sa hari. Daghan kanila ang mituo sa mga pagtulun-an ni Ammon ug mipamatuod nga ang “ilang mga kasingkasing nausab” (Alma 19:33). Tungod kay si Ammon nahimong himan diha sa mga kamot sa Dios, “ang buluhaton sa Ginoo misugod taliwala sa mga Lamanite” (Alma 19:36).
Samtang ang atong mga kasinatian dili ingon ka mahinuklugon sa kang Ammon, kita makahimo og kalainan sa kinabuhi sa uban kon kita mag-andam sa atong mga kaugalingon nga mahimong himan diha sa mga kamot sa Dios.
Si Elder Dieter F. Uchtdorf sa Korum sa Napulog Duha ka mga Apostoles mipasabut kon sa unsa nga paagi kita makahimo sa pagpakigbahin sa ebanghelyo ngadto sa uban:
Imahe
Elder Dieter F. Uchtdorf
Bisan asa ka sa kalibutan, adunay daghang mga kahigayunan sa pagpaambit sa maayong balita sa ebanghelyo ni Jesukristo ngadto sa mga tawo nga imong mahimamat, ikauban sa pag-eskwela, ug ikauban sa pagpuyo o katrabaho, o ikauban sa paghalubilo. …
Sa bisan unsang paagi nga natural o normal para nimo, ipaambit sa mga tawo ngano nga si Jesukristo ug ang Iyang Simbahan importante para nimo. …
Pag-ampo dili lang aron makaplagan sa mga misyonaryo ang mga pinili. Pag-ampo kada adlaw sa tibuok ninyong kasingkasing aron inyong mapalgan kadtong kinsa moduol ug motan-aw,moduol ug motabang, ug moduol ug magpabilin. (“Misyonaryo nga Buhat: Pagpakigbahin sa Unsay Anaa sa Inyong Kasingkasing,” Liahona, Mayo 2019, 15, 17.)
Imahe
icon, pamalandong
Pamalandong agi og Pagpangandam alang sa Klase
Unsa ang pipila ka mga butang nga imong nahimo sa pagpakigbahin sa ebanghelyo sa “natural ug normal” nga mga paagi? Kinsa ang mosulod sa hunahuna kon ikaw maghunahuna mahitungod sa pagdapit og usa ka tawo nga mas magpaduol ngadto sa Manluluwas? Unsa kaha ang imong buhaton nga mahimong himan diha sa kamot sa Ginoo sa pagtabang niadto nga imong gihunahuna?