Leksyon 23 Materyal sa Magtutudlo

Pagkamasulundon sa mga Sugo sa Dios

Kini nga yunit mohatag sa mga estudyante og kahigayonan sa paghunahuna unsa ang ilang mabuhat aron mas mosalig sa Ginoo samtang atubangon nila ang mga hagit sa kinabuhi. Niini nga leksyon ang mga estudyante makapasabot kon giunsa ni Jesukristo sa pagpakita og hingpit nga pagsalig sa Langitnong Amahan pinaagi sa pagtuman sa tanan Niya nga mga sugo. Ang mga estudyante moila usab sa mga panalangin sa pagkamasulundon ug maghunahuna unsay ilang mabuhat aron mas masunod ang ehemplo sa pagkamasulundon ni Jesukristo.

Mga Sugyot alang sa Pagtudlo

Si Jesukristo misunod sa kabubut-on sa Amahan sa tanang butang.

Ipakita ang gisukip nga mga hulagway ni Jesukristo. Dayon dapita ang mga estudyante sa pagrebyo sa 2 Nephi 31:6–7, 10; 3 Nephi 11:11; 27:13 ug pangitaa unsay atong makat-onan mahitungod sa pagkamasulundon gikan sa ehemplo sa Manluluwas.

Si Juan Bautista nagbunyag ni Jesus

Si Jesus nag-ampo sa Getsemani

Ang Paglansang sa Krus, ni Carl Heinrich Bloch

• Unsay atong makat-onan mahitungod sa pagkamasulundon gikan sa ehemplo ni Jesukristo? (Ang mga estudyante mahimong moila og pipila ka kamatuoran nga susama sa mosunod: Pinaagi sa mapainubsanong pagtugyan ngadto sa kabubut-on sa Langitnong Amahan sa tanang butang, si Jesukristo mitakda og hingpit nga ehemplo sa pagkamasulundon nga atong sundon.)

• Ngano kaha nga ang pagkaandam ni Jesukristo nga motuman sa Amahan mahinungdanon sa kalamposan sa Iyang yutan-ong misyon? Sa unsang paagi nga ang pagkamasulundon mahinungdanon sa inyong kalamposan niini nga kinabuhi ug sa sunod?

• Sa unsang paagi nga ang ehemplo sa pagkamasulundon sa Manluluwas makadasig ug makapalig-on kaninyo nga mahimong mas manunuton sa kabubut-on sa Langitnong Amahan?

Aron sa pagtabang sa mga estudyante nga mas makasabot unsay ilang makab-ot pinaagi sa ilang kaugalingon nga pagkamasulundon, mahimo nimong ipaambit ang mosunod nga pamahayag ni Elder Von G. Keetch sa Seventy:

Elder Von G. Keetch

Ang tinuod nga pagkamasulundon … mao ang hingpit nga pagtugyan sa atong kaugalingon ngadto [sa Langitnong Amahan] ug motugot kaniya nga motakda sa atong dalan sa panahon sa kahamugaway ug sa kalisud, nakasabut nga mas makatabang Siya sa paghimo kanato kon unsay gusto Niya nga kita mamahimo kay sa atong mahimo nga kita ra. …

… Nagtimaan [ang mga sugo] sa paagi nga kinahanglan kita nga molihok—ug mas importante, motabang kini kanato nga makasabut kon unsay angayan nga kita mamahimo. (“Bulahan ug Malipayon Kadtong Nagtuman sa mga Sugo sa Dios,” Liahona, Nob. 2015, 117)

• Unsay inyong mahimo aron mas hingpit nga makasunod sa ehemplo sa pagkamasulundon sa Manluluwas? (Makatabang ang paghatag sa mga estudyante og panahon sa pagpamalandong ug pagrekord sa ilang mga hunahuna ug mga pagbati.)

Dapita ang mga estudyante sa pagbasa sa 1 Nephi 2:20–21, ug ikonsiderar ang pagpaambit sa mosunod nga kahimtang:

Nasagmuyo si Marcel sa saad sa Basahon ni Mormon nga kadtong kinsa motuman sa mga sugo sa Dios mouswag. Makugihon siyang nagtuman sa mga sugo apan adunay gamay ra kaayo nga kwarta ug naglisod sa pagbayad sa iyang mga bayranan matag bulan. Wala siya mobati nga mauswagon kaayo.

Dapita ang mga estudyante sa pagrebyo sa unsay ilang nakat-onan sa seksyon 2 sa materyal sa pagpangandam nga makatabang ni Marcel sa pagpalapad sa iyang pagsabot sa lain-laing paagi nga ang Ginoo mopauswag ug mopanalangin niadtong kinsa motuman sa Iyang mga sugo.

• Unsay mahimo ninyong ipaambit kang Marcel sa pagtabang kaniya sa pagpalapad sa iyang pagsabot sa lain-laing paagi nga kita mouswag ug mapanalanginan samtang motuman kita sa mga sugo sa Dios?

Aron mapalambo ang inyong panaghisgot, mahimo nimong ipakita ang mosunod nga mga tudling ug dapiton ang mga estudyante sa pagpili og usa o duha nga tun-an: 1 Nephi 3:7; 1 Nephi 17:3; 1 Nephi 20:18; 1 Nephi 22:31; Mosiah 2:41; Alma 12:9–10; Alma 50:22–23; 3 Nephi 14:24–25.

Pagkahuman og tuon sa mga estudyante sa ilang gipili nga mga kasulatan, ipakita ang mosunod nga dili kompleto nga pamahayag ug hangyoa ang mga estudyante sa pagpaambit kon unsaon nila sa pagkompleto niini: Samtang tumanon nako ang mga sugo sa Dios, …

Pagpalambo sa Atong Pagtudlo ug Pagkat-on

Hatag og pagpamatuod. Hunahunaa ang kamahinungdanon sa pagpamatuod diha sa inyong klase. Aduna bay kahigayonan kanunay ang imong mga estudyante sa pagpamatuod kon sa unsang paagi nga ang mga kamatuoran sa ebanghelyo ni Jesukristo nakaapekto sa ilang kinabuhi? Nadungog ug nabati ba nila ang imong pagsaksi sa ebanghelyo sa Ginoo? Unsa pa ang imong mabuhat aron makapalambo og palibot diin ang pagpaambit og pagpamatuod usa ka komon ug natural nga bahin sa kasinatian sa pagkat-on?

• Kanus-a nga kamo o ang usa ka tawo nga inyong kaila nakasinati og bisan unsa nga mga panalangin nga gitino niini nga mga tudling pinaagi sa pagtuman sa mga sugo sa Dios? (Mahimo nimong awhagon ang mga estudyante sa pagpaambit sa unsay ilang nakat-onan samtang gihisgotan nila kini nga pangutana uban sa usa ka higala o sakop sa pamilya agi og pagpangandam alang sa klase.)

Ang batan-ong mga manggugubat misunod nga walay pagkasayop.

Mahimo nimong ipakita ang gisukip nga hulagway ug dapiton ang usa ka estudyante sa pagsugilon sa istorya sa batan-ong mga manggugubat (tan-awa sa seksyon 3 sa materyal sa pagpangandam).

Duha ka Libo nga Batan-ong mga Manggugubat, ni Arnold Friberg

Dapita ang mga estudyante sa pagrebyo sa Alma 57:21, 27; 58:40 ug sa pagpangita kon unsay gitudlo niini nga mga tudling kabahin sa pagkamasulundon. Ikonsiderar hain sa mosunod ang mahimo nimong ipangutana aron matabangan gayod ang imong mga estudyante sa pagdiskobre unsay ilang gikinahanglan nga makat-onan gikan sa ehemplo sa batan-ong mga manggugubat.

• Unsay atong makat-onan mahitungod sa pagkamasulundon gikan sa kasinatian sa batan-ong mga manggugubat? (Ang mga estudyante mahimong motino og kamatuoran nga susama sa mosunod: Samtang maningkamot kita nga mosunod nga walay pagkasayop sa mga mando sa Dios ug padayon nga mosalig Kaniya, Siya mopanalangin kanato.)

• Unsa kahay ipasabot sa pagpaningkamot alang sa hingpit nga pagkamasulundon? Sa unsang paagi nga ang hingpit nga pagkamasulundon lahi sa taphaw nga pagkamasulundon? (Mahimo nimong rebyohon ang pamahayag ni Presidente Russell M. Nelson sa seksyon 3 sa materyal sa pagpangandam. Base sa inyong panaghisgot, mahimo usab nimong ikonsiderar ang pagpaambit sa mosunod nga pamahayag ni Presidente Nelson: “Ang pagkamasulundon magdala og kalamposan; ang hingpit nga pagkamasulundon magdala og mga milagro” [sa R. Scott Lloyd, “Elder Nelson Delivers Spiritual Thanksgiving Feast to MTCs,” Church News, Dis. 4, 2013, ChurchofJesusChrist.org].)

• Unsa nga pagtulun-an o sugo ang gikinahanglan ninyong buhaton nga walay pagkasayop? (Dapita ang mga estudyante nga hilom nga mamalandong niini nga pangutana ug mokonsiderar sa pagsulat og plano sa unsay ilang mahimo aron makab-ot kini nga kausaban.)

• Nganong importante ang pagsalig sa makaabag nga gahom sa Pag-ula sa Manluluwas samtang maningkamot kita nga mosunod nga walay pagkasayop sa mga sugo sa Dios? (Makatabang ang pagrebyo sa ikaduha nga pamahayag ni Elder David A. Bednar sa seksyon 3 sa materyal sa pagpangandam.) Kanus-a ninyo nabati ang makaabag nga gahom sa Manluluwas nga mitabang kaninyo nga mahimong mas masulundon sa mga sugo sa Dios?

Aron sa pagtabang sa mga estudyante sa pagsusi sa unsay ilang nakat-onan mahitungod sa pagkamasulundon, ikonsiderar ang paghisgot sa mosunod nga sitwasyon:

Si Maria ug Francesco bag-ohay lang nga nahimong kaslonon ug mitakda og petsa aron maminyo. Karon nga sila mihimo og pasalig nga magminyo, nahimo silang mas nagkawalay pakabana mahitungod sa pagtuman sa balaod sa kaputli. Mibati sila nga husto ang ilang gibuhat sa “pagtuis sa mga lagda” tungod kay gihigugma nila ang usag usa ug mihimo og pasalig nga magminyo.

• Base sa unsay inyong nakat-onan mahitungod sa pagkamasulundon sa mga sugo sa Dios, unsa nga tambag ang inyong mahatag ngadto kang Maria ug Francesco?

• Sa unsang paagi nga ang hingpit nga pagkamasulundon makapanalangin, makagiya, ug makapanalipod ni Maria ug Francesco samtang mangandam sila sa ilang umaabot nga kaminyoon?

Alang sa Sunod nga Higayon

Ipasabot nga atol sa sunod nga klase, makat-onan nato ang mahitungod sa pagkaulipon sa katawhan ni Limhi ug sa katawhan ni Alma. Awhaga ang mga estudyante sa pagkompleto sa materyal sa pagpangandam alang sa sunod nga klase ug pangitaa kon sa unsang paagi nga ang kaluwasan niini nga mga tawo nahimong posible lamang sa dihang gibutang nila ang ilang hingpit nga pagsalig sa Dios.