Leksyon 27 Materyal sa Magtutudlo

Hugot nga Pagtuo, Paglaom, ug Gugmang Putli

Si Presidente Dieter F. Uchtdorf, kanhi sa Unang Kapangulohan, mitudlo, “Ang hugot nga pagtuo, ang paglaum, ug ang gugmang putli magkauban sa usag usa ug samtang ang usa naglambo, ang uban usab molambo” (“Ang Walay Kinutuban nga Gahum sa Paglaum,” Liahona, Nob. 2008, 23). Niining leksyon, ang mga estudyante makahimo sa pagpasabot kon unsaon sa pagpalambo ug pagdugang sa ilang hugot nga pagtuo ug paglaom diha sa Manluluwas nga si Jesukristo ug diha sa Iyang ebanghelyo. Sila makaila usab kon unsa ang ilang mahimo aron mas hingpit nga mapalambo ang Kristohanong hiyas sa gugmang putli.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Paggamit og haom nga lainlaing pamaagi. Aron mapanindot pa ang kasinatian sa pagkat-on sa mga estudyante, paggamit og mga pamaagi sa pagtudlo, sama sa mga pangutana, mga panaghisgotan sa klase, mga istorya, mga pasulit, mga ehemplo gamit ang tinuod nga mga panghitabo sa kinabuhi, tukma nga mga pasiaw, mga butang, mga hulagway, mga kinutlo, buluhaton sa grupo, mga presentasyon sa magtutudlo, ug mga presentasyon diha sa pisara o audiovisual. Hinumdumi kanunay nga ang mga pamaagi sa pagtudlo mao ang mga paagi sa paglambo sa pagkat-on ug kinahanglan nga dili mahimo nga mao ang katuyoan niini mismo. (Tan-awa sa Gospel Teaching and Learning: A Handbook for Teacher and Leaders in Seminaries and Institutes of Religion [2012], 66.)

Si Mormon nagtudlo sa koneksyon tali sa hugot nga pagtuo ug paglaom.

Ipakita ang kauban nga hulagway sa usa ka pisi nga daghan og kolor ug sa gipatong-patong nga mga bloke. Ipasabot nga ang nagkalain-laing mga kolor niining mga butanga nagrepresentar sa hugot nga pagtuo, paglaom, ug gugmang putli.

pisi ug mga dulaang bloke

• Sa unsa nga mga paagi kaha nga ang hugot nga pagtuo, paglaom, ug gugmang putli mas nahisama sa gilubid nga mga grano sa pisi kay sa gitumpi nga mga bloke?

Ipakita ang mosunod nga pamahayag ni Elder Chi Hong (Sam) Wong sa Seventy:

Elder Chi Hong (Sam) Wong

Ang hugot nga pagtuo, paglaum, ug gugmang putli … nagkalambigit sa usag usa. Dili kita makahuman sa pagtukod og hugot nga pagtuo, ug dayon magbaton og paglaom, o human makabaton og paglaom, sa katapusan makapalambo og gugmang putli. Kining tanan nagkahiusa. Ug samtang kini magkalambigit, kini tanan makatabang paghulma sa atong kinaiya ug pagpamatuod. (“Hugot nga Pagtuo, Paglaum, ug Gugma nga Putli: May Kalabutan nga mga Hiyas,” Liahona, Dis. 2016, 19)

Dapita ang mga estudyante sa pagribyu sa Moroni 7:33, 38, 40–43, nga mangita kon unsa ang gitudlo niining mga bersikulo mahitungod sa koneksyon tali sa hugot nga pagtuo ug paglaom.

• Unsa man ang atong makat-onan gikan niini nga mga bersikulo kabahin sa relasyon tali sa hugot nga pagtuo ug paglaom? (Ang mga estudyante mahimong mopahayag og daghang mga kamatuoran, lakip sa mosunod: Samtang mopalambo kita sa atong hugot nga pagtuo diha ni Jesukristo, makabaton kita og paglaom nga pinaagi sa Iyang Pag-ula ug Pagkabanhaw, kita pagabuhion ngadto sa kinabuhing dayon.)

• Nganong ang paglaom konektado kaayo sa hugot nga pagtuo ug pagsalig diha sa Pag-ula ni Jesukristo ug sa Iyang Pagkabanhaw?

Dapita ang mga estudyante nga ribyuhon ang pamahayag ni Presidente M. Russell Ballard diha sa seksyon 1 sa materyal sa pagpangandam.

• Makahunahuna ba kamo og mga ehemplo nga tingali inyong nakita sa mga kinabuhi sa mga tawo nga nagpakita sa mga kamatuoran sa gitudlo ni Presidente Ballard?

Ikonsiderar ang pagpaambit sa mosunod nga kinutlo sa usa ka sulat nga gipadala ngadto ni Presidente Russell M. Nelson gikan sa usa ka higala kinsa nanglimbasog sa usa ka personal nga problema:

“Ang kahasol sa tanlag ug ang kapakyas nga akong gibati ingon og naghimo nga imposible para nako ang paghinulsol. Mawad-an na ko sa akong hugot nga pagtuo. Ang mga sala ang nag-una, ang pagduhaduha ang misunod. …

“Ang akong masakit nga pagkamaduhaduhaon, ang akong pagpanuko, ang akong kakulang sa direksyon, ang akong pagkadili makahimo og desisyon, ang akong kawad-on sa pagsalig sa kaugalingon maoy hinungdan sa pag-antos ug sa depresyon. Ang akong pamilya, ang akong kaugmaon, ug ang akong hugot nga pagtuo ang namiligro. Mawad-an na ko sa paglaom.” (“A More Excellent Hope,” Ensign, Peb. 1997, 60)

Dapita ang mga estudyante sa pagribyu sa Ether 12:4, 32 ug sa pamahayag ni Presidente Uchtdorf sa seksyon 2 sa materyal sa pagpangandam, ug hisgoti kon unsa ang mahimo sa tagsulat niining sulat aron mahibalik ang paglaom.

• Unsa ang labing makatabang kaninyo aron ang paglaom mahimong usa ka aktibong bahin sa inyong inadlaw adlaw nga kinabuhi?

• Base sa unsay imong nahunahunaan ug gibati atol niining leksyon, unsa nga mga kausaban nga imong gibati nga nadasig ka sa paghimo aron madugangan ang imong kapasidad sa pagsinati og paglaom? (Mahimo nimong hatagan ang mga estudyante og panahon sa pagsulat sa ilang mga hunahuna ug mga pagbati.)

Si Mormon nagtudlo sa importansya sa pagtinguha sa gasa sa gugmang putli.

Pangutan-a ang mga estudyante sa mosunod:

• Gikan sa inyong pagtuon ug sa inyong kasinatian, unsaon ninyo pagpasabot kon unsa ang gugmang putli?

Dapita ang usa ka estudyante sa pagbasa og kusog sa Moroni 7:43–44, 48, ug ipangutana:

• Sa inyong hunahuna sa unsang paagi nga ang hugot nga pagtuo ug paglaom diha ni Jesukristo konektado ngadto sa gasa sa gugmang putli?

• Unsa ang gitambag ni Mormon nga atong buhaton kon kita tinud-anay nga magtinguha sa gasa sa gugmang putli? (Tabangi ang mga estudyante sa pagtino og usa ka baruganan nga susama sa mosunod: Kon kita mag-ampo sa tibuok kasingkasing ug mosunod ni Jesukristo, kita mapuno sa gugmang putli.)

Ikonsiderar ang paghatag sa mga estudyante og pipila ka minuto sa pagpamalandong sa mga higayon sa dihang sila nag-ampo alang sa tabang aron makabaton og gugmang putli ug unsa ang nahitabo isip resulta.

Dapita ang mga estudyante nga maghimo og ginagmayng grupo, ug hatagi ang matag grupo sa mosunod nga iapud-apod nga materyal.

Mga Ehemplo sa Gugmang Putli sa Inadlaw-adlaw nga Kinabuhi

Materyal sa Magtutudlo alang sa Mga Pagtulun-an ug Doktrina sa Basahon ni Mormon—Leksyon 27

Isip usa ka grupo, tinguhaa nga mapalawman ang inyong panabot sa gugmang putli pinaagi sa pagkompleto sa usa o duha sa mosunod nga mga kalihokan:

1. Basaha ang Moroni 7:45–47, ug ilha ang mga pulong nga gigamit ni Mormon nga naghulagway og gugmang putli. Dayon magpuli-puli sa pagkompleto sa mosunod nga pangutana: “Unsa kaha ang gugmang putli kon …” (Pananglitan, “Unsa kaha ang gugmang putli kon kamo makigsumpaki sa usa ka tawo? kon ang usa ka tawo mipasakit kaninyo”) Gamit ang mga pagtulun-an diha sa Moroni 7:45–47, tubaga ang mga pangutana nga inyong gihimo.

2. Ribyuha ang pamahayag ni Presidente Jean B. Bingham diha sa seksyon 3 sa materyal sa pagpangandam, ug ipaambit ang mga ehemplo kon sa unsang paagi nga si Jesukristo mao “ang hingpit nga ehemplo sa gugmang putli” (“Akong Dad-on ang Kahayag sa Ebanghelyo Sulod sa Akong Panimalay,” Liahona, Nob. 2016, 6). Samtang inyong hisgotan ang nagkalainlaing mga ehemplo, ikonsiderar ang pagpangutana sa usag usa og mga pangutanana nga makatabang kaninyo nga magamit ang unsay inyong nakat-onan gikan sa ehemplo sa Manluluwas.

3. Ribyuha ang pamahayag ni Presidente Thomas S. Monson sa seksyon 3 sa materyal sa pagpangandam, ug ipaambit ang mga ehemplo sa gugmang putli nga inyong nasaksihan diha sa kinabuhi sa mga tawo nga inyong nahibaloan. Hisgoti unsa ang gitudlo niining mga ehemplo mahitungod sa gugmang putli ug sa unsang paagi nga kining mga ehemplo makatabang kanato aron mas mahisama ni Jesukristo sa atong inadlaw adlaw nga mga kinabuhi.

© 2021 sa Intellectual Reserve, Inc. All rights reserved.

Mga Ehemplo sa Gugmang Putli sa Inadlaw-adlaw nga Kinabuhi

iapud-apod nga materyal sa magtutudlo

Human sa igong panahon, dapita ang pipila ka estudyante sa pagpaambit sa unsay ilang gihisgotan diha sa ilang mga grupo.

Ipakita ang mosunod nga mga pangutana, ug dapita ang mga estudyante sa pagpili og usa nga ilang gibati nga labing haom sa ilang kasamtangan nga mga kahimtang. Awhaga ang mga estudyante sa pagsulat sa bisan unsa nga mga gibati o mga panghunahuna nga ilang nadawat.

• Kinsay nagkinahanglan nga mobati sa gugma sa Manluluwas pinaagi kanako? Unsa ang akong mahimo aron matabangan kining tawo nga mobati sa Iyang gugma?

• Sa unsang paagi nga ako napananalanginan pinaagi sa Kristohanong mga pulong o mga buhat sa laing tawo?

• Kanus-a nga ang pagpakita og Kristohanong gugma nakadala kanako nga mas mapaduol ngadto ni Jesukristo ug sa Langitnong Amahan?

• Unsa ang akong gihimo sa kasamtangan (o wala gihimo) nga nakapugong kanako sa pagtinguha (o pagbaton) sa gasa sa gugmang putli?

Awhaga ang mga estudyante sa pagtakda og usa ka tumong kon unsaon nga sila makabaton sa Kristohanong mga hiyas sa hugot nga pagtuo, paglaom, ug gugmang putli aron sila mas mahisama ni Jesukristo.

Alang sa Sunod nga Higayon

Hangyoa ang mga estudyante sa pag-adto sa sunod nga klase nga andam na sa paghisgot kabahin kon sa unsang paagi nga ang Basahon ni Mormon modala sa mga tawo ngadto ni Jesukristo. Awhaga ang mga estudyante sa paghunahuna mahitungod sa mga kasinatian nga ilang naangkon sa Basahon ni Mormon atol niining kurso nga nakapalig-on sa ilang pagpamatuod ug relasyon sa Langitnong Amahan ug ni Jesukristo.