Leksyon 5 Materyal sa Magtutudlo

Ang Pagkapukan ni Adan ug ni Eva ug ang Gasa sa Kabubut-on

Si propeta Lehi mitudlo nga ang Pagkapukan ni Adan ug ni Eva mipahinabo sa mahangturong mga katuyoan sa Dios alang sa Iyang mga anak (tan-awa sa 2 Nephi 2:15–25). Niini nga leksyon ang mga estudyante adunay oportunidad sa pagpasabut kon sa unsa nga paagi ang Pagkapukan ni Adan ug ni Eva, kabubut-on, ug ang Pag-ula ni Jesukristo mga importante ngadto sa plano sa Langitnong Amahan sa katubsanan. Ang mga estudyante mohunahuna usab kon unsay ilang mabuhat nga mahimong mas maayo ang paggamit sa ilang kabubut-on aron mahimong mas mahisama sa Langitnong Amahan ug ni Jesukristo.

Mga Sugyot alang sa Pagtudlo

Nagtudlo si Lehi sa iyang anak nga lalaki nga si Jacob mahitungod sa mga epekto sa Pagkapukan.

Ipasabut nga ang klase nagsugod og bag-ong yunit mahitungod sa plano sa Langitnong Amahan sa katubsanan. Kini mahimong makatabang sa pagpasabut nga sa kadaghan nga mga ngalan nga gihatag ngadto sa plano sa Langitnong Amahan, ang usa sa labing kasagarang mga ngalan nga gigamit diha sa Basahon ni Mormon mao “ang plano [laraw] sa katubsanan” (tan-awa, sama pananglit sa, Jacob 6:8; Alma 12:30, 32–33; 34:31).

Ipakita ang mosunod nga pamahayag, ug dapita ang mga estudyante sa pagbana-bana niini pinasubay diha sa mga pagtulun-an sa Basahon ni Mormon: Ang Pagkapukan ni Adan ug ni Eva usa ka masulub-on nga sayop o aksidente nga supak sa plano sa Dios.

Human ang mga estudyante makigbahin sa ilang mga panabut, ipakita ang mosunod nga kamatuoran: Ang Pagkapukan ni Adan ug ni Eva maoy usa ka importanting bahin sa plano sa Langitnong Amahan alang sa Iyang mga anak.

Sa pagpalig-on sa pagsabut sa mga estudyante kabahin niini nga kamatuoran, isulat ang mosunod nga wala mahuman nga mga pamahayag diha sa pisara (lakipi og daghan nga luna tali sa mga kapahayag):

Kon si Adan ug si Eva wala mokaon sa bunga, …

Tungod kay sila mikaon sa bunga, …

Dapita ang mga estudyante sa pagribyu sa 2 Nephi 2:19–25 ug ipaila ang mga sangputanan o mga epekto sa Pagkapukan nga ilang magamit sa pagkompleto sa matag pamahayag. Hangyoa ang mga estudyante sa pag-report kon unsa ang ilang nakit-an. Ilista ang ilang mga tubag diha sa pisara ubos sa matag pundok sa mga pulong.

Ipakita ug basaha ang mosunod nga pamahayag ni Elder Orson F. Whitney sa Korum sa Napulog Duha ka mga Apostoles:

Elder Orson F. Whitney

Ang pagkapukan ni Adan maoy usa ka lakang padulong sa ubos, apan kadto usa usab ka lakang padulong sa unahan––usa ka lakang diha sa mahangturong martsa sa tawhanong kauswagan. (Sa Conference Report, Abr. 1908, 90)

• Sa unsa nga paagi nga ang Pagkapukan “usa ka lakang padulong sa ubos” ug “usa ka lakang padulong sa unahan” sa atong espirituhanong pag-uswag? (Isip kabahin sa imong panaghisgot, mahimo nimong dapiton ang mga estudyante sa pagribyu sa mga pamahayag ni Elder Bruce C. Hafen ug Elder Jeffrey R. Holland diha sa seksyon 1 sa materyal sa pagpangandam ug sa pagpakigbahin kon unsay labing maayo ngadto kanila.)

• Sa unsa nga paagi nga ang pagsabut sa Pagkapukan nagtabang kanimo sa pagkakita nga gani ang mga hagit sa pagka-mortal mga kabahin sa plano sa Langitnong Amahan?

• Sa unsa nga paagi nga ang mga kahimtang nga gidala sa Pagkapukan nagtugot kanato sa oportunidad sa pag-uswag sa espirituhanon nga paagi ug pag-angkon og hingpit nga kalipay? (Tan-awa sa 2 Nephi 2:25.)

Isip kabahin sa inyong panaghisgot, hunahunaa ang pagpakita sa mosunod nga pamahayag ni Presidente Russell M. Nelson ug ang pagdapit og estudyante sa pagbasa niini og kusog:

Presidente Russell M. Nelson

Klaro, si Lehi nahibalo sa oposisyon, kabalaka, kaguol, kasakit, kasagmuyo, ug kasubo. Apan maisugon ug walay pagpanagana siyang mipahayag sa usa ka baruganan nga gipadayag sa Ginoo: “Ang mga tawo naingon, nga unta sila makabaton og hingpit nga kalipay” [2 Nephi 2:25]. Handurawa! Sa tanang mga pulong nga mahimo unta niyang gamiton sa paghulagway sa matang ug katuyoan sa atong kinabuhi dinhi sa mortalidad, iyang gipili ang mga pulong hingpit nga kalipay!

Ang kinabuhi puno sa mga pagtipas ug kapakyasan, mga pagsulay ug mga hagit sa tanang matang. Malagmit ang matag usa kanato adunay mga panahon nga ang kaguol, kasakit, ug kawalay paglaum halos misanap kanato. Bisan pa niana ania kita dinhi aron makabaton og hingpit nga kalipay?

Oo! Ang tubag usa ka lanog nga oo!” (“Hingpit nga Kalipay ug Espirituhanon nga Pagsugakod,” Liahona, Nob. 2016, 82)

Pagdapit og mga estudyante sa pag-ila sa hilum og usa ka piho nga hagit nga ilang giatubang. Ipakita ang mosunod nga pangutana ug hangyoa ang mga estudyante sa pagpamalandong sa ilang mga tubag ngadto niini nga pangutana ug sa pagrekord sa ilang mga hunahuna. (Ingon nga angay, dapita ang usa o duha ka mga estudyante sa pagpakigbahin unsay ilang nasulat. Pahinumdumi ang mga estudyante nga dili nila ipakigbahin ang mga kasinatian nga personal o pribado ra kaayo.)

• Sa unsa nga paagi nga ang pagsabut sa mga katuyoan sa Pagkapukan nagtabang kanako sa pagtan-aw niini nga kasinatian isip usa ka oportunidad alang sa espirituhanong kauswagan ug hingpit nga kalipay?

Nagtudlo si Lehi nga kita luwas sa pagpili sa kagawasan ug kinabuhing dayon pinaagi ni Jesukristo.

Ipakita ang mosunod nga pamahayag ni Presidente Russell M. Nelson: “[Ang Pagkapukan] mipalihok sa duha ka suod nga magkauban nga dugang nga mga gasa gikan sa Dios, hapit ingon ka bililhon sa kinabuhi mismo—kabubut-on ug pagkamay-tulubagon” (“Constancy amid Change,” Ensign, Nob. 1993, 34).

• Unsa ang pipila ka mga sitwasyon nga giila ni Lehi nga naghimo sa kabubut-on ug pagkamay-tulubagon nga posible? (Kon gikinahanglan, dapita ang mga estudyante sa pagribyu sa seksyon 2 sa materyal sa pagpangandam. Mahimo nimong hangyoon ang mga estudyante nga sa daklit ipasabut kon ngano ang matag usa niini nga mga sitwasyon nagkinahanglan sa kabubut-on nga maanaa.)

Pagbasa og dungan sa 2 Nephi 2:26–29 , mangita og dugang nga mga paagi nga ang atong kabubut-on maapektuhan pinaagi sa Pag-ula sa Manluluwas ug sa Iyang pagtubos kanato gikan sa mga epekto sa Pagkapukan. Mga baruganan nga mahimong ilhon sa mga estudyante gikan niini nga tudling nag-apil sa mosunod: Ang matubsanon nga sakripisyo sa Manluluwas nagtugot kanato sa kagawasan sa pagpili sa kinabuhing dayon. Ang plano sa Langitnong Amahan naghatag sa gikinahanglan nga mga sitwasyon alang kanato sa pagpili sa kaluwasan ug kinabuhing dayon pinaagi ni Jesukristo o sa pagpili og pagkabihag ug kamatayon pinaagi sa yawa.

Pagpalambo sa Atong Pagtudlo ug Pagkat-on

Awhaga ang mga estudyante sa paghimo og matarung nga mga lihok. Si Elder David A. Bednar sa Korum sa Napulog Duha ka mga Apostoles mitudlo, “Ang tinuod nga hugot nga pagtuo nagtumong diha ni Ginoong Jesukristo ug sa kanunay mosangpot sa matarung nga aksyon” (“Ask in Faith [Pangayo pinaagi sa Hugot nga Pagtuo],” Liahona, Mayo 2008, 95). Samtang ikaw nagtudlo, hatagi ang mga estudyante og makahuluganong mga oportunidad sa pagpamalandong kon unsaon nila sa paglihok diha sa hugot nga pagtuo ug sa paggamit unsay ilang nakat-unan. Samtang ikaw kanunay nag-awhag sa mga estudyante sa pagpamalandong ug sa paggamit unsay ilang nakat-unan, ikaw makatabang kanila sa pagdugang sa ilang kapasidad sa paghimo og matarung nga lihok.

Hunahunaa hain sa mosunod nga mga pangutana ang mahimong makatabang sa imong mga estudyante nga labing makasabut sa kabubut-on ug sa paghukom alang sa ilang mga kaugalingon unsang matarung nga mga lihok ang ilang kinahanglan nga buhaton sa ilang mga kinabuhi. (Ikaw mahimong mopili og usa sa mosunod nga pundok sa mga pangutana ug moawhag sa mga estudyante sa pagrekord sa ilang mga hunahuna ug mga pagbati.)

• Unsa kaha ang gipasabut nga kita mahimong “gawasnon sa kahangturan … sa pagbuhat alang sa [atong] mga kaugalingon ug nga dili pagaaghaton, gawas kon kini mao ang silot sa balaod sa mahinungdanon ug katapusan nga adlaw”? (2 Nephi 2:26). Unsa ang usa ka butang nga imong gibati nga ikaw nadasig sa pagbuhat aron ikaw makabuhat og matarung nga lihok karon?

• Unsa ang pipila ka mga ehemplo sa gagmay nga mga pagpili nga imong himoon sa matag adlaw ang makahatag og impluwensya sulod sa dugay nga panahon? Unsa nga matang sa inadlaw-adlaw nga mga pagpili ang motabang kanimo nga mas mapaduol ngadto ni Jesukristo ug sa mahangturong kinabuhi? Unsa ang pipila sa karon nga mga pagpili ang imong gihimo nga tingali nagpugong o nagpakunhod sa imong espirituhanong pagtubo o mga oportunidad?

• Sa unsa nga paagi ang Pag-ula ni Jesukristo mitugot kanimo sa pagkat-on gikan sa imong mga kasaypanan? (Ribyuha ang Elder Bruce C Hafen nga pamahayag sa seksyon 3 sa materyal sa pagpanagandam kon gikinahanglan.) Unsa ang usa ka butang nga ikaw makakat-on gikan sa usa ka sala nga imong nabuhat o usa ka sayop nga imong nahimo?

Human sa igong panahon, dapita ang bisan hain nga estudyante kinsa gusto nga mopakigbahin sa ilang mga hunahuna o pagpamatuod sa pagbuhat sa mao. Ipasabut ngadto sa mga estudyante nga sila kinahanglan nga dili makigbahin og bisan unsa nga personal ra kaayo o pagsulti mahitungod sa piho nga mga sala nga ilang nabuhat. Awhaga ang mga estudyante sa pagbuhat sa unsay ilang nasulat ug napamalandong karon. Ipamatuod ang mga baruganan diha sa leksyon ug ang tinguha sa Ginoo sa pagtabang sa mga estudyante sa paggiya sa ilang mga pagpili sa kinabuhi.

Alang sa Sunod nga Higayon

Ipasabut nga atol sa sunod nga klase atong pagahisgutan ang Pag-ula ni Jesukristo. Awhaga ang mga estudyante sa pagtuon nga mabinantayon sa materyal nga pagpangandam ug sa pagpamalandong kon ngano nga ang Basahon ni Mormon naghulagway sa Pag-ula ni Jesukristo isip walay kinutuban ug mahangturon (tan-awa sa 2 Nephi 9:7; Alma 34:10).