Leksyon 28 Materyal sa Magtutudlo

Duol ngadto kang Kristo

Sa wala pa gitapos ang iyang rekord, si propeta Moroni midapit sa tanang magbabasa sa “[pag]duol ngadto kang Kristo, ug paghingpit diha kaniya” (Moroni 10:32). Niining leksyon ang mga estudyante adunay oportunidad sa pagpasabot kon nganong importante ang pagtukod sa ilang mga kinabuhi diha sa pundasyon ni Jesukristo ug sa pagkonsiderar unsay ilang mahimo aron mas hingpit nga makaduol ngadto Kaniya. Makabaton usab sila og oportunidad sa pagpaambit kon sa unsang paagi nga ang ilang pagtuon sa Basahon ni Mormon atol niining kursoha nakatabang kanila sa pagduol ngadto kang Jesukristo.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Awhaga ang mga estudyante sa pagpadayon sa pag-apil sa institute. Diha sa tibuok kalibotan nga debosyonal alang sa mga young adult, si Elder D. Todd Christofferson miingon, “Ganahan ko sa institute. Ako manghinaot nga kamong tanan kinsa nakabaton og oportunidad dili lang basta magpa-enroll, apan motambong ug aktibong moapil sa institute. Usa kini sa labing nindot nga mga butang nga atong mahimo diha sa Simbahan” (“Choice and Commitment” [Ene. 12, 2020], broadcasts.ChurchofJesusChrist.org). Awhaga ang mga estudyante sa pagkompleto sa mga gikinahanglan alang niini nga kurso ug sa pagpadayon sa pag-apil sa institute.

Si Helaman nagtudlo sa iyang anak nga mga lalaki sa pagtukod diha sa pundasyon ni Jesukristo.

Ipakita ug basaha ang mosunod nga pamahayag ni Elder Neil L. Andersen. Dapita ang mga estudyante sa pagkonsiderar kon sa unsang paagi nga ang pagtulun-an ni Elder Andersen adunay kalabotan sa ilang kaugalingong managlahi nga mga kahimtang.

Batan-ong mga higala, walay kalinaw sa kalibotan samtang nagkaduol ang Ikaduhang Pag-anhi sa Manluluwas. Ang mga kasulatan namahayag nga “ang tanan nga mga butang magkaguliyang.” [Doktrina ug mga Pakigsaad 88:91]. …

Dugang pa sa mga gipanagna nga mga linog ug mga gubat [tan-awa sa Dallin H. Oaks, “Pagpangandam alang sa Ikaduhang Pag-anhi,” Liahona, Mayo 2004, 7–10] mao ang espirituhanong mga alimpulos nga makaibut kaninyo gikan sa inyong espirituhanon nga pundasyon ug mopadpad sa inyong espiritu ngadto sa mga dapit nga wala ninyo dahuma, usahay dili kaayo ninyo mamatngunan nga naalsa na kamo.

Ang labing kuyaw nga mga alimpulos mao ang mga tintasyon sa kaaway. Ang sala kanunay nga usa ka bahin sa kalibutan, apan lisud kaayong likayan, ibaliwala, ug dili dawaton. (“Espirituhanong mga Alimpulos,” Liahona, Mayo 2014, 18)

• Unsa ang pipila sa “espirituhanong mga alimpulos ang giatubang sa mga young adult karon? (Mahimo nimong ilista ang mga tubag sa mga estudyante diha sa pisara.)

• Unsaon ninyo nga makapangandam og maayo alang sa espirituhanog mga alimpulos nga inyong atubangon? (Mahimo nimong ipasabot nga si Elder Andersen mihatag og susamang pangutana diha sa iyang pakigpulong ug dayon mikutlo sa Helaman 5:12.)

Basaha og dungan ang Helaman 5:12 , ug dapita ang mga estudyante sa pagtino og usa ka baruganan nga makatabang nila nga makasugakod sa ilang espirituhanong mga alimpulos. (Gamit ang mga tubag sa mga estudyante, mahimo nimong isulat ang usa ka baruganan sama sa mosunod diha sa pisara: Kon kita motukod sa atong sukaranan diha ni Jesukristo, si Satanas walay gahom sa paglaglag kanato.)

• Sa unsang paagi kaha nga ang mga tawo kinsa nagtukod sa ilang mga kinabuhi diha sa kalibotanong mga mithi o mga pilosopiya mahimong maapektohan sa espirituhanon nga mga alimpulos?

• Unsa ang nakapahimo ni Jesukristo nga mao lang ang siguradong pundasyon nga katukoran sa atong mga kinabuhi? (Mahimo nimong dapiton ang mga estudyante sa pagribyu sa pamahayag ni Sister Sheri L. Dew diha sa seksyon 1 sa materyal sa pagpangandam.)

• Unsa kaha ang makapugong kanato gikan sa pagtukod o pagpabilin sa atong sukaranan diha ni Jesukristo? Sa unsang paagi nga kita makabuntog niining mga hagit?

Dapita ang mga estudyante sa pagpaambit og pipila ka piho nga mga aksyon nga ilang gihimo aron matukod ang ilang mga kinabuhi diha ni Jesukristo. (Mahimo nga imong ilista ang ilang mga tubag diha sa pisara.) Human nga ang mga estudyante nakapaambit sa ilang mga kasinatian, hatagi sila og panahon sa pagsulat og usa ka aksyon nga ilang mahimo aron mas hingpit nga matukod ang ilang kinabuhi diha sa Ginoo.

Gitapos ni Moroni ang Basahon ni Mormon pinaagi sa pagdapit sa tanan sa pagduol ngadto ni Jesukristo.

Ikonsiderar ang pagpaambit og usa ka kasinatian mahitungod kon sa unsang paagi nga ang kinabuhi sa usa ka tawo nausab samtang siya mipili sa pagduol ngadto kang Kristo. Dapita ang mga estudyante sa paghisgot unsa ang ilang makat-onan gikan sa kasinatian.

Basaha og dungan ang Moroni 10:32–33, ug dapita ang mga estudyante sa paghisgot kon nganong kini nga imbitasyon tukma alang sa katapusang kapitulo sa Basahon ni Mormon. Tabangi ang mga estudyante sa pag-ila gikan niining mga bersikulo og usa ka baruganan nga susama sa mosunod: Kon kita moduol ngadto ni Jesukristo, kita mahimong putli ug hingpit pinaagi sa Iyang grasya.

• Unsaon ninyo sa pagpasabot kon unsa ang kahulugan sa “duol ngadto kang Kristo” ngadto sa usa ka tawo kinsa nakadungog niining imbitasyon sa unang higayon? (Tingali makatabang ang paghangyo sa mga estudyante sa pagribyu sa pamahayag ni Elder D. Todd Christofferson diha sa seksyon 2 sa materyal sa pagpangandam.)

• Unsa ang ipasabut sa “ilimud ang [atong mga kaugalingon] sa tanan nga dili diosnon”? (Moroni 10:32).

• Ngano nga atong gikinahanglan ang grasya ni Jesukristo aron mahimong hingpit? Unsa ang atong mahimo aron madapit ang makapalig-on nga gahom sa Ginoo, o grasya, diha sa atong mga kinabuhi? (Awhaga ang mga estudyante sa pagribyu sa pamahayag ni Presidente Tad R. Callister diha sa seksyon 2 sa materyal sa pagpangandam.)

Awhaga ang pipila ka mga estudyante sa pagpaambit kon sa unsang paagi nga ang grasya sa Ginoo nakatabang kanila sa pagduol ngadto ni Jesukristo.

Basaha og dungan ang imbitasyon ni Moroni diha sa Ether 12:41 ug pahinumdumi ang mga estudyante nga sila gidapit sa pagpamalandong kon giunsa nila sa pagsanong kini nga imbitasyon. Dapita ang mga estudyante sa pagpakli sa seksyon 3 sa materyal sa pagpangandam ug ribyuha ang tulo ka mga opsyon ubos sa ulohan “Irekord ang Imong mga Hunahuna.” Hatagi ang mga estudyante og panahon sa pagribyu kon unsa ang ilang gisulat, o, kon wala sila nakahigayon sa pagpangandam, awhaga sila sa pagpili og usa sa mga opsyon ug mag-andam og pipila ka mga hunahuna nga ikapaambit.

Human sa igong panahon, dapita ang mga estudyante sa pagpaambit unsa ang ilang gisulat. (Kon aduna kay dako nga klase, mahimo nimong bahinon ang imong mga estudyante ngadto sa mga grupo aron ang tanan adunay oportunidad sa pagpaambit.)

Samtang tapuson nimo kining leksyon ug kurso, ikonsiderar ang pagpamatuod kon sa unsang paagi nga ang Basahon ni Mormon nakatabang nimo sa pagduol ngadto kang Kristo. Awhaga ang mga estudyante sa pagpadayon sa pagduol ngadto kang Kristo pinaagi sa pagtuon sa Basahon ni Mormon sa kada adlaw.