Leksyon 11 Materyal sa Magtutudlo

Padayon sa Paglahutay sa Unahan diha sa Dalan sa Pakigsaad

Ang hugot nga pagtuo diha ni Jesukristo ug ang paghinusol sa atong mga sala mao ang unang mga lakang diha sa dalan sa pakigsaad ngadto sa kinabuhing dayon. Pinaagi sa ordinansa sa bunyag, misulod kita ngadto sa usa ka pakigsaad nga relasyon uban sa atong Langitnong Amahan ug ni Jesukristo. Atol niini nga leksyon, ang mga estudyante makahimo sa pakigbahin og mga ehemplo kon unsaon pagsunod sa ilang pakigsaad sa bunyag sa matag adlaw nga kinabuhi, sa pagpamatuod sa balaang impluwensya sa Espiritu Santo, ug sa pag-ila kon unsay ilang mabuhat aron sa paglahutay hangtud sa katapusan uban ang mas dako nga paglaum ug hingpit nga kalipay.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Pag-awhag og kinaiya sa pagpangutana. Si Presidente Henry B. Eyring sa Unang Kapangulohan mi-obserbar: “Ang pagpangutana ug ang pagtubag anaa sa kinauyokan sa tanang pagkat-on ug sa tanang pagtudlo” (“The Lord Will Multiply the Harvest” [satellite broadcast sa pakigpulong ngadto sa mga magtutudlo sa relihiyon diha sa Sistema nga Pang-edukasyon sa Simbahan, Peb. 6 1998, 5–6]). Kita kasagaran mogamit niini nga baruganan ngadto sa mga magtutudlo kinsa mangutana ug sa mga estudyante kinsa motubag kanila. Samtang ang epektibo nga mga pangutana gikan sa mga magtutudlo makatabang sa pagkat-on sa estudyante, ang mga pangutana gikan sa mga estudyante makahimo usab og gamhanang tahas diha sa kasinatian sa pagkat-on. Paninguha sa paghimo og usa ka kahimtang sa pagkat-on diin ang mga pangutana sa estudyante, giawhag, gitamud, ug mahunahunaong gitubag. Ang usa ka maalamong magtutudlo dili dinali o diha-diha dayon motubag sa matag pangutana sa mga estudyante. Mahimo silang modapit og ubang mga estudyante sa pagtubag, motudlo ngadto kanila sa dinasig nga tinubdan, o modapit kanila sa paggahin og oras human sa klase sa pagbuhat og dugang nga pagtuon ug dayon mo-report sila sa unsay ilang nakat-unan.

Nagtudlo si Alma ug si Nephi sa importansya sa atong pakigsaad sa bunyag ug sa gasa sa Espiritu Santo.

Ipakita ang mosunod nga pamahayag ni Elder Benjamin M. Z. Tai sa Seventy:

Ang plano sa buhatunon sa Ginoo alang kanato—ang doktrina ni Kristo—labing klaro nga gitudlo diha sa Basahon ni Mormon. Kini naglakip sa … paghimo ug pagtuman sa mga pakigsaad ngadto sa Dios pinaagi sa mga ordinansa sama sa bunyag. Kini motabang kanato nga magpabilin diha sa dalan sa pakigsaad padulong Kaniya. (“Ang Gahum sa Basahon ni Mormon sa Pagkakabig,” Liahona, Mayo 2020, 46)

• Sa unsa nga mga paagi nakaapekto ang imong bunyag sa imong abilidad nga mahimong mas mahisama sa Langitnong Amahan ug ni Jesukristo?

Ipakita kining wala mahuman nga pamahayag: Kon kita bunyagan kita makigsaad sa …

Dapita ang mga estudyante sa pagribyu sa Mosiah 18:8–10, mangita sa pipila ka mga butang nga kita nakigsaad nga mobuhat ug mahimo sa panahon nga kita bunyagan. (Ang mga tubag sa mga estudyante mahimong maglakip sa mosunod: Sa panahon nga kita bunyagan kita nakigsaad sa pagtambayayong sa usag usa nga mga alantuson; sa pagbangutan uban niadto nga nagbangutan; paghupay niadto nga nagkinahanglan sa kahupayan; mobarug isip mga saksi sa Dios; moalagad Kaniya; mosunod sa Iyang mga sugo.)

Pahinumdumi ang mga estudyante nga sila gidapit sa paghunahuna og mga ehemplo nga ilang nakita sa mga katawhan nga nagtamud sa ilang mga pakigsaad sa bunyag. Hatagi ang mga estudyante og pipila ka mga minuto sa paghinumdom sa ilang mga ehemplo ug sa pakigbahin sa ilang mga ideya ngadto sa usa ka pares o sa ginagmay nga mga grupo. Human sila makigbahin sa ilang mga ehemplo sa usag usa, hunahunaa ang pagpangutana sa mga estudyante sa mosunod nga mga pangutana:

• Unsa ang pipila ka mga ehemplo ni Jesukristo sa pagsunod sa Iyang pakigsaad sa bunyag sa paghupay, paglig-on, ug pagbangutan kauban sa uban?

• Unsa ang imong nakat-unan sa imong kinabuhi mahitungod sa pagbangutan uban niadtong kinsa nagbangutan o naghupay niadtong nagkinahanglan og kahupayan? (Mahimo nimong ribyuhon ang kinutlo ni Elder Dale G. Renlund diha sa seksyon 1 sa materyal sa pagpangandam.) Unsa nga kalainan ang nahimo sa dihang ikaw misulay sa pagtan-aw sa uban sa paagi nga ang Langitnong Amahan nagtan-aw kanila?

Ipasabut nga samtang kita nagsunod sa atong pakigsaad sa bunyag ang Ginoo nagsaad kanato sa pakig-uban sa Espiritu Santo. Dapita ang mga estudyante sa pagribyu sa 2 Nephi 31:13, 17 ug sa pagpangita alang sa unsaon kita pagpanalangin kon atong madawat ang gasa sa Espiritu Santo.

• Unsaon nimo pagpasabut ang kahulugan sa bunyag sa kalayo ug pagmamulong sa pinulongan sa mga anghel ngadto sa usa ka tawo nga nag-andam alang sa bunyag? (Hunahunaa ang pagribyu sa mga pamahayag ni Presidente Boyd K. Packer ug Elder David A. Bednar diha sa seksyon 2 sa materyal sa pagpangandam.) Sa unsa nga mga paagi ikaw nakasinati niini nga mga panalangin?

Mahimo nimong hatagan ang mga estudyante og panahon sa pagpamalandong sa mosunod nga mga pangutana:

• Unsa ang akong gibuhat aron sa pagdapit sa mga panalangin sa Espiritu Santo nganhi sa akong kinabuhi? Unsa ang angay nakong ipadayon og buhat, sugdan og buhat, o hunungon og buhat aron ako makapahimulos sa makapabalaang gahum sa Espiritu Santo sa mas hingpit nga paagi?

Nagtudlo si Nephi sa importansya sa paglahutay ngadto sa katapusan.

Hunahunaa ang paggamit sa mosunod nga istorya nga gipakigbahin ni Elder Robert D. Hales sa Korum sa Napulog Duha ka mga Apostoles o usa nga imong kaugalingon nga nagpakita sa importansya sa paglahutay sa malisud nga mga kahimtang:

Sa 1968 usa ka magdadagan sa lumba sa dagan [marathon runner] nga ginganlan og John Stephen Akhwari mi-representar sa Tanzania sa usa ka tibuok kalibutan nga lumba. “Lapas og gamay sa usa ka oras human [ang mananaog] mitabok sa sangkoanan nga linya, si John Stephen Akhwari … nagpadulong sa natad dagananan, ang katapusang lalaki nga nakahuman sa lumba. [Bisan og nag-antus gikan sa kaluya, mga pamikog sa bitiis, tumang kauhaw, ug pagkanahisalaag,] usa ka tingog mitawag gikan sa sulod sa iyang kaugalingon sa pagpadayon, ug mao nga mipadayon siya. … Sa dihang gipangutana siya nganong iyang gihuman ang lumba nga dili man gyud siya makadaog, mitubag si Akhwari, “Ang akong nasud wala mopadala kanako sa 8050 ka kilometros nga biyahe aron sa pagsugod sa lumba; gipadala ako sa akong nasud aron sa paghuman sa lumba.” (“Behold, We Count Them Happy Which Endure,” Ensign, Mayo 1998, 76)

• Unsa ang pipila ka mga rason nga mahimong pilion ni John Akhwari ang dili paghuman sa lumba?

• Sa unsa nga paagi nga ang kasinatian ni John maitandi ngadto sa mga hagit nga mahimo natong atubangon kon maningkamot sa pagsunod sa atong mga pakigsaad?

• Unsa ang pipila ka mga rason nga ang usa ka tawo mahimong mopili sa dili pagpabilin nga matinud-anon sa iyang mga pakigsaad?

Sa pagpalambo og panaghisgot, mahimo nimong dapiton ang mga estudyante sa pagpundok ngadto sa ginagmay nga mga grupo ug sa pagbasa sa 2 Nephi 31:15–16, 19–21, mangita sa unsay kahulugan niining paglahutay ngadto sa katapusan. (Mahimo ka usab nga modapit kanila sa pagbasa sa pipila ka mga kasulatan nga gilista diha sa Giya ngadto sa mga Kasulatan ubos sa hilisgutan “Lahutay.”)

Human sa igong panahon, dapita ang mga estudyante sa pakigbahin kon unsay ilang nakat-unan. (Ang mga estudyante mahimong moila sa mga kamatuoran nga susama sa mosunod: Samtang kita mopadayon sa paglahutay uban sa pagkamakanunayon ni Kristo diha sa higpit ug pig-ot nga dalan ug molahutay ngadto sa katapusan, ang Langitnong Amahan mopanalangin kanato og kinabuhing dayon.) Hunahunaa hain sa mosunod nga mga pangutana ang labing maayong makatabang sa imong mga estudyante sa pagsabut og mas lawom niini nga baruganan:

• Unsa ang kahulugan niini nganha kanimo ang pagpadayon sa paglahutay uban ang pagkamakanunayon ni Kristo? uban sa usa ka kahayag sa paglaum?

• Unsa ang pipila sa mga ehemplo gikan sa kinabuhi sa Manluluwas, gikan sa usa ka tawo diha sa Basahon ni Mormon o gikan sa usa ka tawo nga imong kaila nga makatabang kanato nga mas makasabut kon unsa ang kahulugan sa paglahutay ngadto sa katapusan? (Ang mga estudyante mahimong nakarekord og mga tubag ngadto niini nga pangutana samtang ilang gitun-an ang seksyon 3 sa materyal sa pagpangandam.)

• Sa unsa nga mga paagi imong mapadayon ang paglahutay uban ang pagkamakanunayon diha ni Kristo? Unsa ang usa ka butang nga imong mahimo sa paglahutay ngadto sa katapusan uban ang mas dakong paglaum ug hingpit nga kalipay?

Mahimo nimong tapuson pinaagi sa pakigbahin sa imong pagpamatuod o sa pagdapit og usa ka estudyante sa pakigbahin sa iyang pagpamatuod sa mga kamatuoran nga giila dinhi niini nga leksyon.

Alang sa Sunod nga Higayon

Pangutan-a ang mga estudyante kon unsay ilang isulti ngadto sa usa ka tawo kinsa mangutana kanila kon sila natawo ba pag-usab. Dapita ang mga estudyante sa pagbasa sa materyal sa pagpangandam alang sa sunod nga klase ug pamalandonga kon unsa ang kahulugan sa mahimong matawo pag-usab sa espirituhanong paagi ug sa tinuoray makabig ngadto sa ebanghelyo ni Jesukristo.