Leksyon 17 Materyal sa Magtutudlo: Mahimong Sakop sa Simbahan sa Ginoo

“Leksyon 17 Materyal sa Magtutudlo: Mahimong Sakop sa Simbahan sa Ginoo,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)

“Leksyon 17 Materyal sa Magtutudlo,” Materyal sa Magtutudlo alang sa Mga Pagtulun-an ug Doktrina sa Basahon ni Mormon

Leksyon 17 Materyal sa Magtutudlo

Mahimong Sakop sa Simbahan sa Ginoo

Sama sa Iyang gihimo sa Iyang mga sumusunod didto sa Palestina, si Jesukristo miorganisar sa Iyang Simbahan taliwala sa mga Nephite ug mga Lamanite. Mitawag siya og napulog duha ka mga disipulo ug mihatag kanila og awtoridad sa pagkapari aron pangulohan ang Iyang Simbahan. Kini nga leksyon makahatag sa mga estudyante og oportunidad aron matutukan ang ordinansa sa sakramento ug motino kon unsa ang ilang mahimo aron mahimo kining mas makahuluganon ug nakasentro ni Kristo nga kasinatian. Ang mga estudyante mahimo usab nga motino kon unsa ang ilang mahimo aron matabangan ang uban nga mobati nga nahisakop ug maabi-abi diha sa ilang kaugalingong mga ward o branch.

Mga Sugyot alang sa Pagtudlo

Gipasiugdahan ni Jesukristo ang sakramento ug misugo sa mga tawo nga kanunayng magpundok ug walay usa ka tawo nga did-an sa pag-apil sa ilang pagsimba.

Ipakita ang mosunod nga mga imahe, ug pahinumdumi ang mga estudyante nga isip kabahin sa Iyang pagpangalagad taliwala sa mga Nephite ug mga Lamanite, si Jesukristo mitugyan sa awtoridad sa pagkapari ngadto sa Iyang napulog duha ka mga disipulo ug miorganisar sa Iyang Simbahan (tan-awa sa 3 Nephi 11:18–22; 12:1; 18:5, 37; 26:17–21).

Imahe

Si Kristo kauban sa Tulo ka Disipulo nga mga Nephite, ni Gary L. Kapp

Nganong mobati man kamo nga kini mahinungdanon nga ang Ginoo mibutang og taas nga prayoridad sa pag-establisar sa Iyang Simbahan, sa karaan ug sa atong panahon? (Mahimo nimong dapiton ang mga estudyante sa pagribyu sa pamahayag ni Elder D. Todd Christofferson sa seksyon 1 sa materyal sa pagpangandam.)

Ipasabot nga samtang adunay daghang aspeto sa Simbahan nga ato pang makat-onan, kini nga leksyon motutok lang sa duha ka aspeto. Ipakita ang mosunod nga mga pangutana, ug dapita ang mga estudyante sa pagpili og pangutana nga maoy labing gusto nilang ipadayon sa pagsuhid:

Unsa man ang akong buhaton aron mahimo ang sakramento nga usa ka mas makahuluganon nga bahin sa akong kasinatian sa simbahan?
Sa unsang paagi nga ako makatabang sa paghimo og usa ka mas maabi-abihon ug makapaapil nga kasinatian sa tanang tawo diha sa simbahan?

Pagpalambo sa Atong Pagtudlo ug Pagkat-on

Ang mga panaghisgotan ug mga buluhaton sa gamayng grupo makatabang sa mga estudyante nga mas makakat-on og maayo. Ang paghimo og ginagmayng mga grupo makatugot sa mas daghang mga estudyante nga moapil ug makahatag og luwas nga palibot diin sila makapaambit sa ilang mga hunahuna, mga pagbati, ug mga kasinatian sa usag usa. Ang gagmayng grupo makatabang usab sa mga estudyante nga makapalambo og mga kahanas sa sosyal ug sa komunikasyon. Aron matabangan ang mga estudyante nga makaangkon og makahuluganong kasinatian sa ginagmay nga mga grupo, tingali makatabang ang paghatag sa mosunod: (1) mga kapanguhaan sama sa mga kinutlo, mga kopya sa mga pakigpulong sa kinatibuk-ang komperensya, o ubang mga handout, (2) klaro nga mga instruksyon ug makapaukyab sa hunahuna nga mga pangutana, ug (3) daghang oras sa panaghisgot.

Dapita ang mga estudyante aron magporma og ginagmayng grupo (tulo ngadto sa upat ka tawo kada grupo) uban niadtong kinsa mipili sa samang pangutana. Hatagi ang matag grupo sa handout nga mohaom sa ilang pangutana. (Ang mga handout anaa sa kataposan niining leksyon.) Dapita ang mga estudyante sa paggamit sa mga pangutana ug mga kapanguhaan diha sa handout aron makamugna og makahuluganong panaghisgotan. Samtang ang mga grupo maghisgot, mahimo ka nga molibot sa kwarto ug motanyag og giya ug tabang kon gikinahanglan.

Human sa paghatag sa mga grupo og daghang oras sa paghisgot sa ilang hilisgotan, dapita ang mga estudyante sa pagpaambit sa klase og pipila ka mga baruganan nga ilang nakat-onan gikan sa mga pagtulun-an sa Manluluwas ngadto sa mga tawo. Tingali imong masuta nga makatabang ang pagtutok sa usa ka hilisgotan sulod sa pipila ka minuto ug dayon mopadayon sa sunod nga hilisgotan.

Ang mga estuyante mahimong moila og mga baruganan nga susama sa mosunod:

Kon kita moambit sa sakramento, makasaksi kita ngadto sa Langitnong Amahan sa atong kaandam nga kanunayng mohinumdom ni Jesukristo ug motuman sa Iyang mga sugo.
Samtang kita moambit sa sakramento ug maningkamot nga kanunayng mohinumdom ni Jesukristo, kita makabaton sa Espiritu Santo uban kanato.
Ang Ginoo nagsugo kanato sa pagkamadapiton ug mopaapil sa tanang anak sa Dios ug sa pagtabang kanila nga moduol ngadto Kaniya.

Samtang giila ang mga baruganan, mahimo nimong hangyoon ang mga estudyante sa pagsulat niini diha sa pisara. Ikonsiderar ang paghangyo sa mga estudyante sa pagpaambit og bisan unsang hunahuna o mga pangutana mahitungod sa bisan unsa niining mga baruganan.

Ipakita ang mosunod nga mga pangutana, ug dapita ang mga estudyante sa pagpili og usa o duha niini aron pamalandongan. Mahimo nimong awhagon ang mga estudyante sa pagsulat sa bisan unsang hunahuna ug mga pagbati nga moabot kanila.

Unsa man ang akong buhaton aron maandam ang akong kaugalingon sa pag-ambit sa sakramento ug sa paghimo niini nga usa ka mas makahuluganon ug nakasentro ni Kristo nga kasinatian?
Unsa ang akong buhaton aron matabangan ang uban aron mobati nga giabi-abi ug mobati nga nahisakop sa Simbahan ni Jesukristo?

Alang sa Sunod nga Higayon

Dapita ang mga estudyante sa paghunahuna mahitungod sa pipila ka mga kahimtang sa kalibotan sa ilang palibot nga nakapahimong lisod sa pagsunod sa ebanghelyo. Awhaga ang mga estudyante sa pagtuon sa materyal sa pagpangandam alang sa sunod nga klase, nga mangita kon unsa ang ilang makat-onan gikan sa mga ehemplo sa mga tawo diha sa Basahon ni Mormon kinsa naningkamot sa pagpakabuhi nga matarong bisan nagpuyo sa usa ka dautan nga palibot.

Mga Panalangin sa Sakramento

Materyal sa Magtutudlo alang sa Mga Pagtulun-an ug Doktrina sa Basahon ni Mormon—Leksyon 17

Mga Instruksyon alang sa Panaghisgotan sa mga Lider

Gamita ang mosunod nga mga instruksyon aron makapahigayon og usa ka panaghisgotan uban sa mga sakop sa inyong grupo. Awhaga ang tanang mga sakop sa inyong grupo sa pag-apil. Hinoon, kinahanglan walay usa nga mobati nga gipugos sa pagpaambit sa ilang mga hunahuna.

Unsa man ang akong buhaton aron mahimo ang sakramento nga usa ka mas makahuluganon nga bahin sa akong kasinatian sa simbahan?

Ribyuha ang 3 Nephi 18:6–12; 20:8–9 ug ang mga pagtulun-an gikan nila ni Elder David A. Bednar ug D. Todd Christofferson sa seksyon 2 sa materyal sa pagpangandam. Dayon hisgoti ang mosunod nga mga pangutana:

Unsa ang atong gisaksi sa Langitnong Amahan kon kita moambit sa sakramento?
Sa unsang mga paagi nga ang sakramento mas makapaduol kanato ngadto sa Manluluwas? Sa unsa nga paagi nga ang inyong kinabuhi lahi kon kamo mas nakatutok kang Jesukristo ug kon kamo mobati nga mas duol ngadto Kaniya?
Sumala nila ni Elder Bednar ug Christofferson, sa unsang paagi nga ang sakramento makaapekto sa atong mga kinabuhi ug kinaiya matag semana? Aduna bay andam nga mopamatuod niining mga panalangin gikan sa ilang kaugalingong kasinatian?
Unsa man ang nakatabang kaayo kaninyo aron mahimo ang sakramento nga usa ka makahuluganon ug nakasentro ni Kristo nga kasinatian?

Mga Panalangin sa Sakramento

Imahe

iapud-apod nga materyal sa magtutudlo

Pag-abi-abi sa Tanang Tawo ngadto sa Simbahan

Materyal sa Magtutudlo alang sa Mga Pagtulun-an ug Doktrina sa Basahon ni Mormon—Leksyon 17

Mga Instruksyon alang sa Panaghisgotan sa mga Lider

Sa unsang paagi nga ako makatabang sa paghimo og usa ka mas maabi-abihon ug makapaapil nga kasinatian sa tanang tawo diha sa simbahan?

Mahimo nimong sugdan ang inyong panaghisgotan pinaagi sa pag-ila og pipila ka komon nga mga rason nganong ang mga tawo dili mobati nga kabahin sa ilang ward o branch. Paggahin og oras sa pagribyu sa 3 Nephi 18:22–25 usa sa pamahayag ni Sister Carol F. McConkie in seksyon 3 sa materyal sa pagpangandam. Dayon hisgoti ang mosunod nga mga pangutana:

Unsa nga mga pagtulun-an ug mga baruganan gikan niining mga bersikulo nga sa inyong paminaw importante nga masabtan sa tanang miyembro sa Simbahan? Ngano man?
Unsa ang labing makahuluganon sa pamahayag ni Sister McConkie diha kaninyo? Sa inyong hunahuna unsa kaha ang gipasabot sa “motan-aw [sa uban] sama sa pagtan-aw ni Kristo”?
Unsa nga mga ehemplo sa kinabuhi sa Manluluwas ang nagpakita sa Iyang tinguha sa pagkamadapiton ug mopaapil sa tanang anak sa Dios nga bisan unsa pa man ang ilang mga kahimtang?
Sa unsang paagi nga kita makasunod sa ehemplo sa Manluluwas nga mas mopaapil ug madapiton ngadto sa mga miyembro ug mga bisita kinsa motambong sa atong mga ward o mga branch? Unsa ang nahimo sa mga tawo nga nakatabang nimo nga mobati nga naapil ug gi-abi-abi sa simbahan?

Pag-abi-abi sa Tanang Tawo ngadto sa Simbahan

Imahe

iapud-apod nga materyal sa magtutudlo 2