Leksyon 26 Materyal sa Magtutudlo

Human sa Pagsulay sa Inyong Hugot nga Pagtuo

Ang Basahon ni Mormon nagrekord og daghang ehemplo sa mga tawo kinsa milihok nga adunay hugot nga pagtuo kang Jesukristo atol sa mga panahon sa pagsulay ug nakadawat og mga pagsaksi nga mikumpirmar sa ilang hugot nga pagtuo. Kini nga leksyon mohatag sa mga estudyante sa kahigayonan sa pagpasabot kon ngano nga ang pagpakita og hugot nga pagtuo kang Jesukristo mag-una sa pagdawat og espirituhanon nga pagsaksi ug sa pagtino kon sa unsang paagi nga sila makalihok nga adunay mas dako nga pagtuo diha Kaniya kon mag-atubang sila og mga pagsulay. Ang mga estudyante maghunahuna usab kon unsa nga dinasig sa hugot nga pagtuo nga mga buhat ang ilang mahimo aron makaangkon o mapalawman ang ilang pagsaksi sa Basahon ni Mormon.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Pagpaambit og tinuod nga mga istorya ug mga asoy. Aron sa pagpalambo sa interes sa mga estudyante sa pagkat-on, ikonsiderar ang pagpaambit og tinuod nga mga istorya o mga asoy gikan sa mga kinabuhi sa mga propeta, kasaysayan sa Simbahan, mga pakigpulong sa kinatibuk-ang komperens-ya, mga magasin sa Simbahan, o sa imong kaugalingon nga kinabuhi o dapita ang mga estudyante sa pagpaambit sa ilang mga kasinatian. Kana nga mga istorya mahimong mohulagway sa mga baruganan sa ebanghelyo ug makatabang sa mga estudyante nga mobati sa kamatuoran ug kamahinungdanon niini.

Si Moroni nagtudlo sa kamahinungdanon sa paglihok nga adunay hugot nga pagtuo.

Ipakita ang mosunod nga asoy ni Elder D. Todd Christofferson (mahimo nimong isulti nga ang mga estudyante nakabasa mahitungod niini nga kasinatian sa seksyon 1 sa materyal sa pagpangandam):

Elder D. Todd Christofferson

Kaniadto sa wala pa ako tawaga isip General Authority, ako nag-atubang og personal nga ekonomikanhong hagit nga nagpadayon sulod sa daghang mga tuig. Usahay kini nga hagit nakahulga sa kaayohan sa akong pamilya ug nako, ug ako naghunahuna nga kami nag-atubang og krises sa pinansyal. Nag-ampo ako og milagro nga makaluwas namo. Bisan tuod og mihalad ko niana nga pag-ampo sa daghang higayon uban sa pagkamatinud-anon ug kinasingkasing nga tinguha, ang tubag sa katapusan mao ang “Dili.” (“Hangad sa Dios Matag Adlaw,” Liahona, Peb. 2015, 49–50)

• Sa unsa nga mga paagi nga ang sama niini nga kasinatian mohagit sa hugot nga pagtuo sa usa ka tawo kang Jesukristo?

• Unsa ang pipila ka tinuod nga kinabuhi nga mga ehemplo kon sa unsang paagi nga ang hugot nga pagtuo sa mga tawo masulayan o masukod?

Dapita ang mga estudyante sa pagrebyu sa mga pagtulun-an ni Moroni mahitungod sa hugot nga pagtuo diha sa Ether 12:3–7, 12, 18, ug dayon ipangutana ang mga mosunod:

• Unsa ang atong makat-onan gikan ni Ether ug Moroni mahitungod sa pagpakita og hugot nga pagtuo? (Lakip sa ubang mga kamatuoran, ang mga estudyante mahimong moila og sama sa mosunod: Kita dili makadawat og espiritwal nga saksi hangtod human sa pagsulay sa atong hugot nga pagtuo.)

• Ngano kaha nga gilaoman kita nga molihok nga adunay hugot nga pagtuo sa dili pa kita makadawat og espiritwal nga saksi gikan sa Dios?

• Sa unsa nga mga paagi kita mapanalanginan samtang magpabilin kita nga matinud-anon ngadto kang Jesukristo atol sa atong mga pagsulay? (Mahimo nimong rebyuhon ang pamahayag ni Elder Christofferson diha sa seksyon 1 sa materyal sa pagpangandam.)

Dapita ang mga estudyante sa paghunahuna og mga ehemplo diha sa Basahon ni Mormon bahin sa mga tawo nga milihok nga adunay hugot nga pagtuo kang Jesukristo sa dihang nag-atubang og mga pagsulay o oposisyon. Kon gikinahanglan, hatagi sila og pipila ka minuto nga magtuon sa mga asoy sa mga tawo nga ilang nahunahunaan. (Ang mga estudyante nga nakakompleto sa kalihokan sa pagtuon diha sa seksyon 2 sa materyal sa pagpangandam mahimong morebyu sa unsay ilang natun-an na.)

Human sa igo nga panahon, bahina ang klase ngadto sa gagmay nga mga grupo aron sa paghisgot sa mosunod nga mga pangutana (pahinumdomi ang mga estudyante nga mitubag sila og susama nga mga pangutana sa seksyon 2 sa materyal sa pagpangandam):

1. Sa unsang paagi nga ang indibidwal o ang katawhan mipakita og hugot nga pagtuo kang Jesukristo? Unsa nga mga panalangin ug balaanon nga gahom ang gihatag sa Ginoo human sila mipakita og hugot nga pagtuo diha Kaniya? (Mahimong makatabang ang pagpasabot nga ang ubang mga panalangin mahimong dili moabot hangtod sa sunod nga kinabuhi.)

2. Unsa nga mga baroganan o mga pamaagi ang inyong makat-onan gikan niini nga asoy? Sa unsang paagi nga magamit ninyo kini sa inyong kinabuhi?

Mahimo usab nimong dapiton ang mga estudyante sa pagpamalandong sa mga baruganan nga ilang gihisgotan ug sa pagrekord sa ilang personal nga mga hunahuna ug mga impresyon mahitungod niini.

Si Moroni nagdapit sa mga mambabasa sa pagtinguha og usa pagsaksi kabahin sa Basahon ni Mormon.

Ipakita ang mosunod nga sitwasyon:

Hunahunaa nga bag-o lang ninyong gihatagan ang usa ka suod nga higala og usa ka kopya sa Basahon ni Mormon ug mipamatuod nga kini tinuod. Agig tubag ang inyong higala miingon, “Salamat sa pagpaambit niini kanako. Nakadungog ko og daghang nagkalain-lain nga mga opinyon mahitungod sa Basahon ni Mormon. Adunay usa ka tawo gani nga mipasidaan kanako nga dili kini basahon, tungod kay napuno kini sa mga bakak.”

• Unsaon kaha ninyo pagtubag ang mga pagduhaduha sa inyong higala mahitungod sa Basahon ni Mormon?

• Sa unsang paagi kaha ninyo magamit ang mga pagtulun-an diha sa Ether 12:6 niini nga sitwasyon?

Dapita ang usa ka estudyante sa pagbasa og kusog sa Moroni 10:3–5. Hangyoa ang klase sa pagsunod sa pagbasa, nga mangita kon sa unsang paagi nga kita makaangkon og pagpamatuod sa Basahon ni Mormon.

• Unsa ang kinahanglan natong buhaton kon gusto kita nga makaangkon og pagpamatuod sa Basahon ni Mormon? (Ang mga estudyante mahimong moila sa mosunod o susama nga baroganan: Aron makaangkon og pagpamatuod sa Basahon ni Mormon, kinahanglan natong hinumdoman ug pamalandongan ang kaluoy sa Ginoo samtang magbasa kita sa basahon ug dayon mangutana sa Dios kon kini tinuod ba uban sa kinasingkasing, tinuod nga katuyoan, ug hugot nga pagtuo kang Jesukristo.)

• Sa unsang paagi nga ang pagdawat sa imbitasyon ni Moroni nagpakita sa unsay atong nakat-onan mahitungod sa paglihok nga adunay hugot nga pagtuo? (Mahimong makatabang alang sa mga estudyante ang pagrebyo sa pamahayag ni Elder Gene R. Cook sa seksyon 3 sa materyal sa pagpangandam.)

Pahinumdomi ang mga estudyante nga sa seksyon 3 sa materyal sa pagpangandam gidapit sila sa pagpamalandong ug pagrekord sa ilang kasinatian bahin sa pag-angkon og espirituhanon nga pagsaksi nga ang Basahon ni Mormon tinuod. Dapita ang pipila ka estudyante sa pagpaambit sa unsay ilang nasinati ug nakat-onan sa pagtinguha ug pagdawat og espiritwal nga pagsaksi sa Basahon ni Mormon.

Ikonsiderar ang pagpaambit sa mosunod nga pamahayag ni Presidente Henry B. Eyring sa Unang Kapangulohan mahitungod sa saad ni Moroni:

Presidente Henry B. Eyring

Ako nanghinaut nga kamong tanan nakatino na niana nga saad diha kaninyo o nga inyo kining buhaton sa daling panahon. Ang tubag tingali dili moabut sa usa ug gamhanan nga espirituhanong kasinatian. Alang kanako kini hilum nga miabut sa sinugdanan. Apan kini moabut nga mas nagkakusog matag panahon nga ako mobasa ug mag-ampo kabahin sa Basahon ni Mormon.

Ako wala magsalig kon unsa ang nahitabo sa milabay nga panahon. Aron ang akong buhi nga pagpamatuod sa Basahon ni Mormon malig-on, akong gidawat ang saad ni Moroni sa kanunay. Wala ko gipakaingon nga ang panalangin sa pagpamatuod usa ka walay puas nga katungod. (“Usa ka Buhing Pagpamatuod,” Liahona, Mayo 2011, 127)

• Unsa ang inyong gibuhat, o unsa ang mahimo ninyo nga buhaton, aron sa pagpalig-on sa inyong pagpamatuod sa Basahon ni Mormon?

Alang sa Sunod nga Higayon

Dapita ang mga estudyante sa paghunahuna kon unsa kaha ang ilang kinabuhi kon sila walay bisan unsa nga pagtuo, paglaom, o gugmang putli. Samtang sila mangandam alang sa sunod nga klase, dapita sila sa pagpamalandong kon unsa ang ilang mabuhat aron mas hingpit nga magamit kini nga Kristohanong mga hiyas sa ilang kinabuhi.