Leksyon 20 Materyal sa Magtutudlo

Ang mga Panalangin sa Relihiyoso nga Kagawasan

Ang kagawasan sa relihiyon usa ka sukaranan nga tawhanong katungod. Ang Basahon ni Mormon naglangkob og daghang mga ehemplo sa mga panalangin sa relihiyoso nga kagawasan ug sa mga sangpotanan sa pagpugong sa relihiyoso nga kagawasan. Niini nga leksyon, ang mga estudyante adunay kahigayonan sa pag-ila sa mga panalangin sa relihiyoso nga kagawasan ug sa pagtino kon unsay ilang mabuhat aron sa pagtabang sa pagpreserbar ug pagpanalipod niini sa atong panahon.

Mga Sugyot alang sa Pagtudlo

Nagtukod si Hari Mosiah og matang sa panggobyerno nga nanalipod sa relihiyoso nga kagawasan.

Pahibalo: Ang kahimtang sa relihiyoso nga kagawasan nagkalain-lain gayod sa tibuok kalibotan. Samtang imong hisgotan ang relihiyoso nga kagawasan, magmahimong sensitibo sa lahi nga mga kahimtang sa dapit diin ikaw nagpuyo. Awhaga ang mga estudyante nga matinahorong mamulong bahin sa mga gobyerno, ubang mga simbahan, ug sa tanang relihiyoso nga mga tradisyon.

Pahinumdomi ang mga estudyante nga agi og pagpangandam alang sa klase, gidapit sila nga makig-istorya sa usa o mas daghan pa nga mga tawo sa lain nga tinuohan. Ang mga estudyante giawhag sa pagpangutana niini nga mga indibidwal kon ngano nga ang ilang relihiyon importante kanila ug kon nakasinati ba sila sukad og relihiyoso nga pagpangdaogdaog. Dapita ang pipila ka estudyante sa pagpaambit sa unsay ilang nakat-onan gikan sa ilang mga panag-istoryahanay o gikan sa ilang nangagi nga mga kasinatian uban niadtong anaa sa lain nga mga tinuohan.

Ikonsiderar ang pagpangutana sa usa o mas daghan pa sa mosunod nga mga pangutana:

• Unsaon ninyo sa paghatag og kahulugan ang relihiyoso nga kagawasan? (Kon gikinahanglan, dapita ang mga estudyante sa pagrebyo sa pasiuna ug sa seksyon 1 sa materyal sa pagpangandam.)

• Ngano kaha nga importante alang sa tanang tawo ang pagkadunay katungod sa pagpahayag ug paglihok sa ilang relihiyoso nga mga gituohan? (Mahimong makatabang ang pagrebyo sa ikanapulog usa nga artikulo sa hugot nga pagtuo ug sa pamahayag ni Joseph Smith sa seksyon 1 sa materyal sa pagpangandam.)

• Sa unsang paagi kaha nga ang atong mga kinabuhi maapektohan kon kita dili gawasnon sa pagpahayag o paglihok sa atong labing importante nga mga gituohan, lakip na sa atong relihiyoso nga mga panglantaw? Unsa ang pipila ka ehemplo sa relihiyoso nga mga kagawasan nga gihulga sa atong panahon?

Pahinumdomi ang mga estudyante nga miestablisar si Hari Mosiah og balaod sa pagpanalipod sa mga tawo sa iyang gingharian nga gidaogdaog tungod sa ilang mga gituohan. Mahimo nimong rebyohon ang Mosiah 27:1–4 sa mga estudyante ug mangutana:

• Unsa ang atong makat-onan mahitungod sa relihiyoso nga kagawasan gikan sa pamahayag ni Hari Mosiah?

Ikonsiderar ang pagpakita sa giandam nga hulagway, ug dapita ang mga estudyante sa pagminubo [summarize] sa pipila sa mga ideya nga gitudlo ni Korihor (tan-awa sa seksyon 1 sa materyal sa pagpangandam). Dapita ang mga estudyante sa pagrebyo sa Alma 30:7–9, 11 ug sutaa kon unsay gitudlo niini nga mga bersikulo mahitungod sa relihiyoso nga kagawasan. Ikonsiderar kon hain sa mosunod ang mahimo nimong ipangutana nga makatabang pag-ayo sa imong mga estudyante nga makakat-on gayod:

• Unsay atong makat-onan gikan niini nga mga bersikulo mahitungod sa bili nga gihatag sa Langitnong Amahan sa relihiyoso nga kagawasan? (Ang mga estudyante mahimong moila og baroganan nga susama sa mosunod: Nagtinguha ang Dios nga ang tanan sa Iyang mga anak adunay patas nga mga katungod ug mga pribilehiyo aron gawasnon sila nga mopili sa pagserbisyo Kaniya nga walay pagpamugos, ingon man nga gawasnon nga mopili sa dili pagserbisyo Kaniya.)

• Ngano man nga importante kini sa plano sa Dios nga dili kita pugson sa pagtuo o pagsunod Kaniya?

• Unsay ipasabot niini diha kaninyo nga ang Langitnong Amahan ug si Jesukristo dili gayod mopugos kaninyo sa pagtuo o pagsunod Kanila? Unsa ang gitudlo niini kaninyo mahitungod sa kinaiya Nila?

• Sa unsang paagi ang relihiyoso nga kagawasan makahatag og kaayohan sa tanang sakop sa katilingban? Sa unsang paagi kini makahatag og kaayohan kaninyo?

Giisa ni Kapitan Moroni ang bandila sa kalingkawasan ug midasig sa mga tawo nga magpundok aron sa pagpreserbar sa kagawasan.

Dapita ang pipila ka estudyante sa pagpaambit og mga ehemplo kon sa unsang paagi mahulga ang relihiyoso nga kagawasan. (Kon gikinahanglan, mahimo nimo silang hangyoon sa pagrebyo sa seksyon 2 sa materyal sa pagpangadam.)

Dapita ang mga estudyante sa pagbasa sa Alma 46:4, 10, ug dayon ipasabot kon giunsa paghulga ni Amalickiah ang mga kagawasan sa mga Nephite, lakip na ang ilang relihiyoso nga kagawasan. Pangutan-a ang mga estudyante kon giunsa pagtubag ni Kapitan Moroni kini nga hulga. (Kon gikinahanglan, hangyoa ang mga estudyante sa pagrebyo sa Alma 46:12–13, 19–20.) Ikonsiderar ang paghisgot sa mosunod nga mga pangutana:

• Unsa nga mga baroganan sa ebanghelyo mahitungod sa relihiyoso nga kagawasan ang mahimo natong makat-onan gikan sa mga paningkamot ni Kapitan Moroni ug sa iyang katawhan? (Tabangi ang mga estudyante nga moila og baroganan nga susama sa mosunod: Kon kita motawag sa Dios ug moandam sa atong kaugalingon sa paglihok, Siya molig-on kanato sa pagpanalipod sa atong mga pamilya, atong relihiyon, ug atong kagawasan.)

• Unsay epekto ni Kapitan Moroni ug sa bandila sa kalingkawasan diha sa katawhan? Nganong nagkinahanglan kita sa panabang sa Langitnong Amahan sa atong mga paningkamot sa pagpanalipod sa relihiyoso nga kagawasan?

• Sa unsang paagi nga ang pagpanalipod ni Kapitan Moroni sa relihiyoso nga kagawasan susama sa paagi nga si Jesukristo mipanalipod sa atong kagawasan sa pagpili?

Aron matabangan ang mga estudyante sa pagkonsiderar kon unsaon nga mahimong matinahoron kon manalipod sa relihiyoso nga kagawasan, mahimo nimong ipakita ang mosunod nga pamahayag ni Presidente Dallin H. Oaks sa Unang Kapangulohan:

Kinahanglang higugmaon nato ang tanang katawhan, mahimong maayo nga mga tigpaminaw, ug mopakita og pakabana alang sa sinsero nga mga gituohan sa uban. Kinahanglang maalamon kita sa pagpasabot ug pagtinguha sa atong mga baroganan ug sa paggamit sa atong impluwensya. Kinahanglan nga atong tinguhaon ang pagsabot ug pagsuporta sa mga dili tumutuo. Ug kinahanglang iapil usab nato ang opisyal nga mga aksiyon sa mga gobyerno ug sa tukma nga mga organisasyon nga anaa sa nagkalain-laing mga nasod [multinational]. Ang tanan niini gikinahanglan aron sa pagpreserbar sa dakong kaayohan nga mahimong makab-ot sa relihiyoso nga mga organisasyon ug sa mga tumutuo alang sa kaayohan sa tanang katawhan. (“Challenges to Religious Freedom” [pakigpulong diha sa Argentina Council for Foreign Relations (CARI), Abr. 23, 2015], newsroom.ChurchofJesusChrist.org)

Aron matabangan ang mga estudyante sa pagbansay sa pagpanalipod sa relihiyoso nga kagawasan, dapita sila sa pakigtambayayong sa usa ka kauban ug sa paghisgot kon unsaon nila pagtubag ang mosunod nga sitwasyon:

Kamo adunay higala nga Muslim sa trabahoan kinsa mangita og pribado nga dapit aron mag-ampo atol sa iyang mga oras sa pagpahulay. Pipila ka mga kauban sa trabaho nagsugod sa pagbugalbugal niini nga buhat. Usa ka kauban sa trabaho sa kataposan miingon, “Kinahanglan iya lang nang itago ang iyang relihiyon ug dili kini buhaton sa trabahoan.” Siya dayon miatubang kaninyo ug miingon, “Unsay inyong hunahuna?”

Human nga ang mga estudyante adunay panahon sa paghisgot sa ilang tubag sa ilang mga kauban, dapita ang pipila ka estudyante sa pagpaambit kon sa unsang paagi sila mitubag sa sitwasyon.

Pagpalambo sa Atong Pagtudlo ug Pagkat-on

Dapita ang mga estudyante sa paghimo og mga tumong. Si Presidente M.Russell Ballard sa Korum sa Napulog Duha ka mga Apostoles nakaobserbar, “Ako sa tinud-anay gayod nakumbinsir nga kon dili kita maghimo og mga tumong sa atong kinabuhi ug magkat-on kon unsaon sa pagbansay ang pamaagi sa pagpakabuhi aron makab-ot ang atong mga tumong, makaabot kita sa igong katigulangon ug molingi sa atong kagahapon nga makakita nga ang atong nakab-ot mao lamang ang usa ka gamayng bahin sa atong kinatibuk-ang potensyal.”(“Do Things That Make a Difference,” Ensign, Hunyo 1983, 69–70). Hatagi ang mga estudyante og mga kahigayonan sa paghunahuna ug paghimo ug piho nga mga tumong nga makatabang kanila nga mobuhat og epektibo, matarong nga aksiyon. Gawas kon ang ilang mga tumong personal ra kaayo nga ipaambit, dapita ang mga estudyante sa pagpaambit sa ilang mga tumong uban kanimo, ug hunahunaa kon unsaon nimo nga maka-follow up sa mga estudyante mahitungod sa ilang mga tumong.

Dapita ang mga estudyante sa paghimo og piho nga tumong bahin sa unsay ilang mabuhat aron mahimong mas andam sa pagpanalipod sa sagrado nga katungod sa relihiyoso nga kagawasan. (Mahimong makatabang ang pagpakita ug pagrebyo sa pamahayag ni Elder Robert D. Hales sa seksyon 2 sa materyal sa pagpangandam.) Ikonsiderar ang pagdapit sa mga estudyante sa pagsulat og yano nga plano sa aksiyon aron sa pagkab-ot sa ilang tumong. Ikonsiderar ang paghatag sa imong pagpamatuod sa kaimportante sa relihiyoso nga kagawasan sa pagtapos sa leksyon.

Alang sa Sunod nga Higayon

Hangyoa ang mga estudyante sa pagkonsiderar kon ngano nga ang garbo usa gayod ka komon nga tema sa Basahon ni Mormon. Ipasabot nga si Presidente Ezra Taft Benson nakaobserbar, “Ang garbo usa ka sala nga daling makita diha sa uban apan kita dili dali nga moangkon.” (“Maglikay sa Garbo,” Mga Pagtulun-an sa mga Presidente sa Simbahan: Ezra Taft Benson, 283). Dapita ang mga estudyante sa pagpalawom sa ilang pagsabot sa mga pagtulun-an bahin sa garbo diha sa Basahon ni Mormon ug sa unsang paagi nga ang garbo mahimong nakaapekto sa ilang kinabuhi.