Leksyon 18 Materyal sa Magtutudlo

Pagkahimong Sama sa Langitnong Amahan ug ni Jesukristo

Si Jesuskristo misulti sa mga Nephite ug sa mga Lamanite diha sa yuta sa Bountiful nga Siya nakatuman sa balaod ni Moises. Samtang Siya mitudlo sa usa ka mas taas nga balaod, Siya midapit sa mga katawhan nga magmahimong hingpit, gani sama Kaniya ug sa Langitnong Amahan nga hingpit. (Tan-awa sa 3 Nephi 12:17–48.) Niini nga leksyon, ang mga estudyante makabaton og oportunidad sa pagpasabot sa mga pagtulun-an sa Ginoo kabahin sa pagkahingpit. Ang mga estudyante motuon usab og laing mga aspeto sa mas taas nga balaod ug moila og butang nga ilang mahimo aron mas makasunod niining balaod ug mahimong sama ni Jesukristo.

Mga Sugyot alang sa Pagtudlo

Ang Manluluwas nagtudlo sa mga Nephite ug sa mga Lamanite kon unsaon nga mahimong hingpit.

Ipakita ang mosunod nga mga pangutana, ug dapita ang mga estudyante sa pagpamalandong niini:

• Sa paghunahuna mahitungod sa inyong balaan nga potensyal, unsa nga Kristohanong mga hiyas ang inyong gilauman nga palamboon sa sunod nga tuig? sa mosunod nga 10 ka tuig?

• Unsa nga mga hiyas ang inyong gilauman nga palamboon sa hinapos sa inyong kinabuhi?

Kon ikaw mobati nga kini tukma, hangyoa ang mga estudyante sa pagpaambit sa ilang mga tubag uban sa usa ka higala o magdapit og usa o duha ka estudyante sa pagpaambit sa ilang mga tubag diha sa klase.

Ipasabot nga atol sa Iyang pagpangalagad taliwala sa mga Nephite ug sa mga Lamanite, si Jesus mitudlo og importanting mga kamatuoran mahitungod sa atong balaan nga potensyal. Dapita ang mga estudyante sa pagribyu sa 3 Nephi 12:19–20, 46–48, nga mangita kon unsa ang mga gitinguha sa Ginoo nga kita mamahimo.

• Sumala niini nga mga bersikulo, unsa ang potensyal nga nakita sa Ginoo ngari kanato?

• Unsa ang gitudlo niini nga mga bersikulo kabahin kon sa unsa nga paagi nga kita mahimong hingpit sama ni Jesukristo ug sa Langitnong Amahan? (Mahimong moila ang mga estudyante og usa ka baruganan nga susama sa mosunod: Kon kita moduol ngadto ni Jesukristo ug mosunod sa Iyang balaod ug mga kasugoan, kita mahimong hingpit, sama nga Siya ug ang Amahan hingpit.)

Pagpalambo sa Atong Pagtudlo ug Pagkat-on

Tabangi ang mga estudyante sa paggamit sa mga tabang sa pagtuon sa kasulatan ug mga kapanguhaan. Ang Simbahan naghatag kanato og tabang sa pagtuon ug mga kapanguhaan aron mapalambo ang atong pagtuon sa mga kasulatan. Mga tabang sa pagtuon sama sa Giya ngadto sa mga Kasulatan, Topical Guide, Bible Dictionary, Hubad ni Joseph Smith, mga footnote, mga ulohan sa kapitulo, ug mga mapa nga makatabang sa mga estudyante nga mas makasabot unsa ang ilang gibasa. Atol sa klase, pangita og mga oportunidad sa pagtabang sa mga estudyante nga mogamit niining mga tabang ug mga kapanguhaan.

Ipasabot nga ang pipila sa mga tawo nanglimbasog sa pagsabot sa kasugoan aron mahimong hingpit. Dapita ang mga estudyante sa pagsuhid sa hilisgotan nga “hingpit” diha sa Giya ngadto sa mga Kasulatan. Tingali mahimo usab nimong hangyoon ang mga estudyante sa pagribyu sa Moroni 10:32–33 ug sa pamahayag ni Elder Jeffrey R. Holland sa seksyon 1 sa materyal sa pagpangandam. Ikonsiderar ang pagpangutana sa usa o mas daghan pa sa mosunod nga mga pangutana:

• Nganong makatabang ang pagsabot nga ang hingpit nangahulogan og “sangkap, tibuok, ug bug-os nga paglambo”? (Giya ngadto sa mga Kasulatan, “Hingpit,” scriptures.ChurchofJesusChrist.org). Kanus-a ug sa unsang paagi ang pagkahingpit mahimong makab-ot?

• Unsaon man nimo pagminubo sa unsay gitudlo ni Moroni mahitungod sa pagkahimong hingpit? Sa unsang paagi nga ang pagsabot niining pagtulun-an makahatag kaninyo og paglaum kon kamo magkulang ug makahimo og kasaypanan? Kanus-a kamo mibati nga ang Ginoo naghatag kaninyo og balaang tabang ug kalig-on?

• Unsa ang kahulogan niini nganha kaninyo nga masayud nga si Jesukristo mipadangat sa Iyang grasya nganha kaninyo ug miandam og usa ka paagi alang kaninyo aron mamahimong sama Kaniya ug sa Iyang Amahan?

Aron matabangan ang mga estudyante sa paggamit sa unsay ilang nakat-onan, mahimo nimong ipakita ang mosunod nga kahimtang:

Si Joan usa ka matinud-anon nga miyembro sa Simbahan. Bisan og siya adunay pagpamatuod sa ebanghelyo, nabalaka siya nga siya dili gayod mahimong hingpit. Sa dihang nahisgutan na ang pagkahingpit, ang iya lang mahunahunaan mao ang iyang mga kahuyang ug mga kasaypanan. Nagtuo siya nga siya dili ingon niana ka maayo aron makaadto celestial nga gingharian.

• Sa paghunahuna mahitungod sa unsay inyong nakat-onan karon, unsa nga mga kamatuoran ang inyong mapaambit ni Joan aron matabangan siya nga makabaton og mas dakong paglaum diha sa imbitasyon sa Ginoo nga magmahimong hingpit?

Jesukristo nagtudlo sa mas taas nga balaod sa Iyang ebanghelyo.

Pahinumdumi ang mga estudyante nga human ang Manluluwas mipasabot nga Siya mituman sa balaod ni Moises, Siya mitudlo sa mga tawo sa mas taas nga balaod sa ebanghelyo.

• Unsaon ninyo sa pagpasabot ang mas taas nga balaod? Unsa ang katuyoan niining mas taas nga sumbanan? (Kon gikinahanglan, ang mga estudyante mahimong makatan-aw sa seksyon 2 sa materyal sa pagpangandam.)

Dapita ang mga estudyante sa pagribyu sa mga tudling sa kasulatan nga ilang gitun-an sa wala pa ang klase sa seksyon 2 sa materyal sa pagpangandam. (Kon ang pipila sa mga estudyante wala makaandam daan, dapita sila sa pagpili og usa ka tudling ug tun-an kini karon.) Human ang mga estudyante nakaangkon og igong panahon sa pagribyu, pilia ang usa sa mosunod nga mga kalihokan o paghimo og usa sa imong kaugalingon nga makahatag sa mga estudyante sa labing maayong oportunidad sa pagpaambit ug maghisgot unsa ang ilang nadiskubrihan:

• Opsyon 1: Bahina ang mga estudyante ngadto sa ginagmay nga mga grupo. Dapita ang mga estudyante sa pagpuli-puli sa pagpaambit uban sa ilang mga grupo sa unsay ilang nakat-onan gikan sa usa ka tudling nga ilang gitun-an. Human ang mga estudyante makahisgut, dapita sila sa pagpaambit uban sa klase unsa ang ilang nadiskubrihan.

• Opsyon 2: Ipakita ang mga pangutana nga nalakip diha sa “Irekord ang Imong mga Hunahuna” nga kalihokan diha sa seksyon 2 sa materyal sa pagpangandam. Dapita ang mga estudyante sa pagkonsiderar kon unsaon nila sa pagtubag ang mga pangutana base sa tudling nga ilang gitun-an. Dapita ang mga estudyante sa pagpaambit uban sa usa ka pares o gamay nga grupo kon unsaon nila sa pagtubag ang mga pangutana.

• Opsyon 3: Dapita ang mga estudyante sa paghunahuna bahin sa usa ka sitwasyon diin magamit nila ang usa ka pagtulun-an gikan sa usa ka tudling nga ilang gipili. Hatagi ang mga estudyante og usa ka oportunidad sa pagpresentar sa ilang mga kahimtang diha sa gagmay nga mga grupo o ngadto sa klase ug sa pagpasabot kon unsaon nila paggamit ang mga pagtulun-an nga ilang gipili.

Dapita ang mga estudyante sa pagpili og usa ka baruganan o Kristohanong hiyas nga mas gusto nilang masunod. Awhaga ang mga estudyante sa pagsulat kon unsaon nila sa pagpalambo ang pagsunod niining baruganan o sa pag-ugmad niining hiyas. Ikonsiderar ang pagdapit og usa o duha ka estudyante sa pagpaambit sa ilang mga pagpamatuod sa kamaayo ug grasya ni Jesukristo.

Alang sa Sunod nga Higayon

Ipasabot nga si Presidente Boyd K. Packer sa Korum sa Napulog Duha ka mga Apostoles misugyot nga ang batan-ong katawhan sa atong panahon “nagdako diha sa teritoryo sa kaaway” tungod kay ang impluwensya sa kaaway anaa bisan asa (“How to Survive in Enemy Territory,” New Era, Abr. 2012, 2). Samtang magsugod ang mga estudyante sa yunit kabahin sa espirituhanong kakuyaw sa atong panahon ug magtuon sa materyal sa pagpangandam alang sa sunod nga klase, dapita sila sa pagpangita kon sa unsang paagi nga ang Basahon ni Mormon makatabang nila sa pagpakabuhi nga matarong diha sa dautan nga kalibotan.