Leksyon 16 Materyal sa Magtutudlo

Jesukristo Nangalagad sa Tinagsa-tagsa

Ang pagpakita ni Jesukristo ngadto sa mga Nephite ug mga Lamanite naghatag og dugang gahom sa pagsaksi sa Iyang kabalaan. Samtang si Jesus nangalagad sa tinagsa-tagsa, Siya mipakita og ehemplo sa pagkamabination ug pagkamaloloy-on. Niining leksyon, ang mga estudyante mahimong dapiton sa pag-ila sa lain-laing mga paagi nga sila makaduol ngadto kang Kristo ug makabaton og mas lawom nga personal nga pagsaksi nga Siya mao ang ilang Manluluwas. Ang mga estudyante maghunahuna usab unsay ilang buhaton aron sundon ang pamaagi sa Manluluwas sa pagpangalagad.

Mga Sugyot alang sa Pagtudlo

Ang nabanhaw nga Kristo mipakita ngadto sa mga Nephite ug sa mga Lamanite ug midapit kanila nga mohikap sa timaan sa mga samad sa Iyang mga kamot ug mga tiil.

Mahimo nimong sugdan ang leksyon pinaagi sa pagpakita sa gilakip nga imahe ug paghangyo og usa ka estudyante sa pagsaysay sa mga panghitabo nga misangpot sa pagpakita ni Kristo ngadto sa mga Nephite ug mga Lamanite.

Dapita ang mga estudyante sa pagribyu sa kinutlo ni Elder Jeffrey R. Holland sa seksyon 1 sa materyal sa pagpangandam, ug pangutan-a sila kon nganong ang pagpakita ni Jesukristo taliwala sa mga katawhan mao man ang labing importanting panghitabo sa Basahon ni Mormon.

Hangyoa ang mga estudyante sa pagribyu sa 3 Nephi 11:13–17, nga mangita sa mga leksyon nga atong makat-onan gikan niining asoy sa pagpakighimamat ni Kristo sa mga katawhan. Hunahunaa kon hain sa mosunod nga mga pangutana ang lagmit gusto nimong ipangutana aron matabangan ang imong mga estudyante nga makasabot ug makagamit unsa ang ilang makat-onan:

• Unsa ang atong makat-onan gikan niining mga bersikulo mahitungod sa kinaiya ni Jesukristo?

• Unsa kaha ang inyong bation kon kamo gidapit sa paghikap sa timaan sa mga samad diha sa mga kamot ug tiil sa Manluluwas?

• Unsay atong makat-onan mahitungod sa Manluluwas gikan sa Iyang pagdapit sa mga katawhan sa tagsa-tagsa nga pagduol aron mohikap sa timaan sa mga samad sa Iyang mga kamot ug tiil? (Kon gikinahanglan, pahinumdumi ang mga estudyante nga 2,500 ang anaa didto.)

• Sa unsa kaha nga paagi nga kining kasinatian nagrepresentar sa unsay gidapit ni Jesukristo nga ipabuhat sa matag usa kanato? (Gamit ang mga tubag sa mga estudyante, pag-ila og usa ka kamatuoran nga susama sa mosunod: Si Jesukristo nagdapit kanato nga moduol ngadto Kaniya ug modawat og usa ka personal nga pagpamatuod nga Siya mao ang atong Manluluwas.)

• Unsa ang atong mabuhat aron makaduol ngadto ni Kristo ug makadawat sa atong personal nga pagpamatuod nga Siya mao ang atong Manluluwas? (Alang sa dugang nga mga panabot, mahimong mapuslanon alang sa mga estudyante ang pagribyu sa pamahayag ni Elder Walter F. González sa seksyon 1 sa materyal sa pagpangandam.)

Dapita ang mga estudyante sa pagribyu sa kalihokan nga “Irekord ang Imong mga Hunahuna” diha sa seksyon 1 sa materyal sa pagpangandam. Hatagi ang mga estudyante og pipila ka minuto sa pagribyu kon unsa ang ilang giandam, ug dayon pagdapit og pipila ka estudyante sa pagpaambit unsay ilang gisulat. Kon duna pay oras, tingali gusto nimong dapiton ang usa o duha ka estudyante sa pagtino og usa ka bersikulo gikan sa himno nga ilang gipili ug sa pagpaambit kon nganong makahuluganon kini ngadto kanila. Mahimo usab kamo nga magdungan sa pagkanta sa himno.

Hunahunaa ang pagpakita sa mosunod nga pangutana ug awhaga ang mga estudyante sa pagpamalandong ug pagsulat sa ilang mga hunahuna ug mga pagbati:

• Unsay akong mahimo aron mapalig-on ang akong pagpamatuod nga si Jesukristo mao ang akong Manluluwas?

Si Jesukristo nangalagad sa daghang tawo sa tinagsa-tagsa.

Pahinumdumi ang mga estudyante nga sa naghinapos na ang Iyang unang adlaw taliwala sa mga katawhan, ang Manluluwas midapit sa mga tawo sa pagpamauli sa ilang mga panimalay ug sa pagpangandam alang sa Iyang pagbalik sa sunod nga adlaw (tan-awa sa 3 Nephi 17:1–3).

Pagpalambo sa Atong Pagtudlo ug Pagkat-on

Awhaga ang mga estudyante sa pagtuon ug pagsunod sa ehemplo sa Manluluwas. Si Presidente Dieter F. Uchtdorf, kanhi sa Unang Kapangulohan, miingon ngadto sa mga magtutudlo sa seminary ug institute, “Ang atong mga kabatan-onan gustong motuo; sila nagtinguha nga masayud pa og dugang mahitungod sa Manluluwas” (“A Teacher of God’s Children,” Religious Educator, vol. 12, nu. 3 [2011], 7). Usa sa paagi nga ang mga estudyante masayud pa og dugang mahitungod sa Manluluwas mao ang pagtutok sa Iyang hingpit nga mga ehemplo. Samtang ang mga estudyante motuon sa ehemplo ni Jesukristo, dapita sila sa pagkonsiderar unsay ilang mahimo aron mosunod Kaniya. Si Elder Neal A. Maxwell sa Korum sa Napulog Duha ka mga Apostoles miingon, “Kining pagsunod direktang makapalambo sa atong pagdayeg ni Jesus” (“Becoming a Disciple,” Ensign, Hunyo 1996, 12).

Bahina ang mga estudyante ngadto sa gagmay nga mga grupo. Dapita sila sa pagribyu sa 3 Nephi 17:5–9, 20–24 ug sa paghisgot kon sa unsang paagi nga ang Manluluwas nangalagad ngadto sa mga katawhan. Atol sa ilang panaghisgutan, awhaga ang mga estudyante sa pagkonsiderar og lain-laing mga paagi nga makompleto nila ang mosunod nga pamahayag: “Kita mangalagad sama sa Manluluwas kon …”

Human ang mga estudyante makabaton og dakong oras sa pagkat-on gikan sa usag usa, hangyoa sila sa pagpaambit og pipila ka mga paagi nga sila mikompleto sa nag-unang pamahayag. Samtang ang mga estudyante nagpaambit sa ilang mga pamahayag, ikonsiderar ang pagpangutana sa mosunod aron matabangan nga mapalawman ang ilang panaghisgutan:

• Unsay tahas sa gugma diha sa pagpangalagad? (Mahimo ka nga moribyu sa kinutlo ni Presidente Jean B. Bingham diha sa seksyon 2 sa materyal sa pagpangandam.)

• Sa inyong hunahuna ngano kaha nga ang pagpangalagad nakahatag og kalipay sa Manluluwas? Kanus-a nga mibati ka og kalipay samtang nagserbisyo sa usa ka tawo nga anaa sa panginahanglan?

• Nganong ang pagbati og kalooy usa ka importanting bahin sa pagpangalagad? Kanus-a ninyo nabati ang kalooy sa Manluluwas pinaagi sa mga paningkamot sa laing tawo sa pagpangalagad? Sa unsang paagi nga inyong napadangat ang kalooy ni Kristo alang sa uban pinaagi sa inyong kaugalingong mga paningkamot sa pagpangalagad?

• Unsaon nato sa pagtabang ang usa ka tawo nga masinati ang makaayo nga gahom sa Ginoo samtang kita mangalagad?

Aron matabangan ang mga estudyante sa paggamit sa unsay ilang nakat-onan mahitungod sa pagpangalagad, ikonsiderar ang pagpaambit sa mosunod nga kahimtang:

Si Alejandro usa ka batan-ong single adult. Nakadawat siya og usa ka imbitasyon sa pagpangalagad ngadto ni Pablo ug Jose. Nakig-istorya siya ni Pablo sa pipila ka higayon sa simbahan apan wala pa gayod mahimamat si Jose. Human makig-istorya sa presidente sa korum sa mga elder, nahibaloan ni Alejandro nga si Pablo nanglimbasog sa problema sa panglawas ug nga si José misulti sa bishop nga siya dili interesado sa pagtambong sa simbahan sa pagkakaron. Gusto ni Alejandro nga motuman sa iyang calling apan wala masayud kon asa magsugod.

Dapita ang mga estudyante sa pagtan-aw sa ehemplo sa Manluluwas ug sa pagpaambit kon unsa ang tambag nga tingali ilang ikahatag kang Alejandro. Awhaga usab ang mga estudyante sa pagpaambit sa ilang kaugalingong personal nga mga kasinatian sa pagpangalagad.

Pahinumdumi usab ang mga estudyante nga agig pagpangandam alang niining leksyon, sila gidapit sa paghunahuna og usa ka tawo nga ilang mapangalagaran (tan-awa sa seksyon 2 sa materyal sa pagpangandam). Dapita ang mga estudyante sa pagkonsiderar sa sitwasyon niini nga tawo. Dayon hatagi ang mga estudyante og pipila ka minuto sa pagpamalandong mahitungod sa mosunod nga pangutana:

• Unsay inyong buhaton aron masunod ang ehemplo sa Manluluwas ug mangalagad niining tawo uban sa pagkamabination ug kalooy?

Alang sa Sunod nga Higayon

Dapita ang mga estudyante sa pagkonsiderar og mga hagit nga giatubang sa mga miyembro o sa mga investigator sa Simbahan sa dihang wala nila mabati nga gidawat sa uban nga mga miyembro sa Simbahan. Awhaga ang inyong mga estudyante sa pagtuon sa materyal sa pagpangandam alang sa sunod nga klase, mangita kon sa unsang paagi kita makatabang sa uban nga mobati nga kitang tanan kabahin diha sa Simbahan ni Jesuskristo.