Leksyon 17 Materyal sa Pagpangandam sa Klase: Mahimong Sakop sa Simbahan sa Ginoo
“Leksyon 17 Materyal sa Pagpangandam sa Klase: Mahimong Sakop sa Simbahan sa Ginoo,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 17 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 17 Materyal sa Pagpangandam sa Klase
Mahimong Sakop sa Simbahan sa Ginoo
Imahe
duha ka lalaki nga naglamanohay
Usa ka mahinungdanong bahin sa pagpangalagad ni Kristo taliwala sa mga Nephite ug mga Lamanite mao ang pag-organisar sa Iyang Simbahan. Ang Manluluwas miingon nga ang Simbahan kinahanglan nga tawagon sa Iyang ngalan ug matukod diha sa Iyang ebanghelyo (tan-awa sa 3 Nephi 27:7–9). Samtang mangandam ka sa klase, pamalandongi ang mga panalangin nga gihatag sa Ginoo niadtong kinsa miapil sa Iyang Simbahan. Samtang maghunahuna kamo mahitungod niadtong mga panalangin, ikonsiderar unsa ang inyong buhaton aron makatabang sa paghimo sa Simbahan nga usa ka maabi-abihon nga dapit alang sa tanang mga anak sa Dios.
Seksyon 1
Unsa nga mga panalangin ang akong madawat pinaagi lamang sa Simbahan sa Ginoo?
Atol sa pagbisita sa Manluluwas ngadto sa mga Nephite didto sa templo sa Bountiful, Siya mihatag og awtoridad sa pagkapari ngadto sa Iyang napulog duha ka mga disipulo ug mitugot kanila sa pagbunyag, paghatag sa gasa sa Espiritu Santo, ug pagpangulo sa Iyang Simbahan (tan-awa sa 3 Nephi 11:18–22; 12:1; 18:5, 37). Ang Manluluwas mitudlo usab sa mga Nephite nga aron makasulod sa gingharian sa Dios, kita kinahanglan gayod nga maghinulsol, motuo Kaniya, ug modawat sa mga ordinansa sa kaluwasan ug kahimayaan nga gitanyag lamang diha sa Iyang Simbahan, sama sa bunyag ug kompirmasyon (tan-awa sa 3 Nephi 11:32–41).
Sa paghisgot sa katuyoan sa Simbahan ni Jesukristo sa karaan ug bag-ong mga panahon, si Elder D. Todd Christofferson sa Korum sa Napulog Duha ka mga Apostoles mitudlo:
Imahe
Elder D. Todd Christofferson
Ang karaang katuyoan nagpabilin: nga, isangyaw ang maayong balita sa ebanghelyo ni Jesukristo ug ipahigayon ang mga ordinansa sa kaluwasan—sa laing pagkasulti, pagdala sa mga katawhan ngadto kang Kristo. (“Nganong Anaa ang Simbahan,” Liahona, Nob. 2015, 108)
Imahe
icon, pamalandong
Pamalandong agi og Pagpangandam alang sa Klase
Sa unsa nga mga paagi nga ang pag-apil sa Simbahan nakatabang kaninyo sa pagduol ngadto ni Jesukristo?
Seksyon 2
Sa unsang paagi nga ang pag-ambit sa sakramento makatabang kanako sa akong mga paningkamot nga mas mahisama ni Jesukristo?
Samtang ang Manluluwas mitapos sa Iyang unang adlaw sa pagpangalagad didto sa yuta sa Bountiful, Siya mipahigayon og sakramento ngadto sa Iyang napulog duha ka mga disipulo ug sa mga katawhan. Siya misubli niining ordinansa pagkasunod adlaw human sa milagrusong paghatag sa pan ug bino. (Tan-awa sa 3 Nephi 18:1–9; 20:3–8.)
Imahe
icon, pagtuon
Pagtuon agi og Pagpangandam alang sa Klase
Tun-i ang 3 Nephi 18:3–12 ug 3 Nephi 20:8–9, ug ikonsiderar unsa ang gitudlo ni Jesus mahitungod sa sagradong katuyoan sa sakramento.
Si Elder David A. Bednar sa Korum sa Napulog Duha ka mga Apostoles mipasabot kon sa unsang paagi nga ang ordinansa nagtugot kanato sa pagbaton sa Espiritu Santo isip makanunayong kauban:
Imahe
Elder David A. Bednar
Ang ordinansa sa sakramento usa ka balaan ug binalik-balik nga pagdapit nga sinserong maghinulsol ug mabag-o sa espirituhanong paagi. … Apan kon tinuoray kitang mangandam ug moapil niining balaan nga ordinansa uban sa mapainubsanong kasingkasing ug mahinulsulong espiritu, nan ang saad nga kita kanunayng makabaton sa Espiritu sa Ginoo nga manaa kanato. Ug pinaagi sa makabalaang gahum sa Espiritu Santo isip padayon natong kompanyon, kita kanunayng makabaton og kapasayloan sa atong mga sala. (“Kanunay nga Magbaton og Kapasayloan sa Inyong mga Sala,” Liahona, Mayo 2016, 59–62)
Si Elder Christofferson nagtudlo nga ang pag-ambit sa sakramento makatabang usab kanato sa pagtutok sa pagkahimong mas mahisama sa Manluluwas:
Imahe
Elder D. Todd Christofferson
Ang tinapay ug tubig nagrepresentar sa Iyang unod ug dugo kinsa mao ang Tinapay sa Kinabuhi ug ang Buhi nga Tubig [tan-awa sa Juan 4:10], nga sa malumong paagi nagpahinumdom kanato sa Iyang gibayad aron sa pagtubos kanato. …
… Ang pasumbingay nga mokaon sa Iyang unod ug moinom sa Iyang dugo dunay dugang nga kahulugan, ug mao kana ang pagsabot og maayo sa mga hiyas ug kinaiya ni Kristo, nga mosalikway sa kinaiyanhon nga tawo ug mahimong mga Santos “pinaagi sa pag-ula ni Kristo ang Ginoo” [Mosiah 3:19]. Sa pag-ambit nato sa tinapay ug tubig sa sakramento kada semana, mas maayo nga atong ikonsiderar kon unsa kahingpit natong ilakip ang Iyang kinaiya ug ang sumbanan sa Iyang walay sala nga kinabuhi sa atong kinabuhi ug pagkatawo. …
Ang pag-ambit sa unod sa Manluluwas ug pag-inom sa Iyang dugo nagpasabot nga isalikway sa atong kinabuhi ang bisan unsa nga wala mahiangay sa Kristohanong kinaiya ug sa paghimo sa Iyang mga hiyas nga atong kaugalingon. (“Ang Buhing Tinapay nga Nanaug Gikan sa Langit,” Liahona, Nob. 2017, 37, 39)
Imahe
icon, irekord
Irekord ang Imong mga Hunahuna
Si Presidente Dallin H. Oaks sa Unang Kapangulohan mitudlo, “Ang ordinansa sa sakramento makapahimo sa miting sa sakramento nga labing sagrado ug importanting miting sa Simbahan” (“Ang Miting sa Sakrament ug ang Sakrament,” Liahona, Nob. 2008, 17). Ikonsiderar ang pagsulat og pipila ka aksyon nga imong mahimo aron sa paghimo sa sakramento ug sa miting sa sakramento nga labing sagradong bahin sa imong pagsimba sa adlaw nga Igpapahulay.
Seksyon 3
Unsa ang akong mahimo aron makatabang sa tanan nga mobati nga kabahin sila sa Simbahan ni Jesukristo?
Human sa pagpasiugda sa sakramento taliwala sa mga Nephite ug mga Lamanite, si Jesus mitudlo sa kaimportante sa paghimo sa mga miting sa simbahan nga maabiabihon ug madawaton.
Imahe
icon, pagtuon
Pagtuon agi og Pagpangandam alang sa Klase
Tun-i ang 3 Nephi 18:22–25, ug ikonsiderar ang pagmarka sa mga pulong o mga hugpong sa mga pulong nga tukmang nagpakita sa mga pagtulun-an sa Ginoo mahitungod kon si kinsa ang kinahanglan natong ilakip sa Iyang Simbahan.
Si Sister Carol F. McConkie, usa ka kanhi magtatambag diha sa Kinatibuk-ang Kapangulohan sa Young Women, mipaambit kon unsa ang atong mahimo aron masiguro nga ang tanang tawo mobati nga gihangop diha sa Simbahan sa Ginoo:
Imahe
Sister Carol F. McConkie
Ako nakaila og mga tawo kinsa moadto sa simbahan sa matag Dominggo aron nga sila madasig ug mabayaw ug mga tawo kinsa mibiya nga gibati nga gihukman ug wala gimahal, wala kinahanglana. …
Kita kinahanglan gayud nga masayud kon unsay katuyoan sa atong pag-adto sa simbahan sa Dominggo ug mosiguro nga ang tanan nga moabot mobati nga gimahal, gikinahanglan, gidawat, ug gibayaw.
Ang tanan adunay mga panglimbasog nga wala gani kita makahibalo, ug importante kaayo nga kita makahibalo nga ang tanan nga naglibot kanato gimahal sa Dios ug nga kita kinahanglang motan-aw kanila sama sa pagtan-aw ni Kristo. Ug kita dili makatugot sa pagpanghukom nga mao ang modiktar sa paagi sa atong pagpakigdait sa mga tawo. …
Ang ebanghelyo ni Jesukristo wala mopabati sa mga tawo nga dili sila importante. Ang mga tawo mao ang mopabati sa mga tawo nga dili sila importante, ug kita kinahanglang motarung niana. Kinahanglan kita mahimong sensitibo ug mohigugma kanila ug mohatag kanila og oportunidad sa paglambo ug pag-uswag ug sa pagkab-ot sa ilang labing maayo. Sila adunay mga talento ug mga abilidad ug personalidad nga gikinahanglan sa gingharian sa Dios. Kon kita mopalig-on sa gingharian sa Dios dinhi sa yuta, kita nagkinahanglan sa tanan nga moduol
Imahe
icon, pamalandong
Pamalandong agi og Pagpangandam alang sa Klase
Unsay akong buhaton aron mas makadapit ug makapaapil sa pagtabang sa mga anak sa Dios nga mobati nga sila kabahin sa Simbahan sa Ginoo?