Leksyon 4 Materyal sa Magtutudlo

Pangitaa sa mga Kasulatan

Ang propeta nga si Mormon nag-ingon nga, “Siya nga adunay mga kasulatan, ipapangita sila kanila” (3 Nephi 10:14). Kini nga leksyon makahatag sa mga estudyante og oportunidad sa pag-ila sa daghang mga panalangin nga mahimong moabut niadtong kinsa magmakugihon sa pagpangita diha sa mga kasulatan. Ang mga estudyante motino usab kon unsa ang ilang mahimo aron himoon nga ang ilang pagtuon sa kasulatan mahimong mas makahuluganon nga bahin sa ilang kinabuhi.

Mga Sugyot alang sa Pagtudlo

Si Lehi ug ang iyang pamilya nakat-on nga ang balaan nga mga kasulatan adunay dakong bili.

Ikonsiderar ang pagpaambit sa mosunod nga mga kahimtang:

Si Tasha usa ka young adult nga daghan og gimbuhaton. Siya nag-eskwela, nagtrabaho og part-time nga trabaho, nagserbisyo sa Simbahan, aktibo sa social media, ug mogahin og panahon sa iyang mga higala sa katapusan sa semana. Siya gustong makaangkon og personal nga pagtuon sa kasulatan, apan lisud ang pagpangita og oras ug kadasig.

• Unsa nga tambag ang inyong ipaambit kang Tasha?

Dapita ang mga estudyante sa pagsaysay pag-usab sa istorya sa kaagi sa mga anak nga mga lalaki ni Lehi sa pagkuha sa mga palid nga tumbaga. Dayon basaha og dungan ang 1 Nephi 5:20–21.

Isulat ang mosunod nga pamahayag nga dili kompleto diha sa pisara, ug atol sa panaghisgutan nga mahitabo awhaga ang mga estudyante sa pagsulat sa lain-laing mga paagi nga kini mahimong makompleto: Ang mga kasulatan adunay dakong bili tungod kay …

• Sa unsang paagi kaha nga si Lehi ug Nephi nakakompleto sa pamahayag diha sa pisara?

• Gikan sa imong kaugalingong kasinatian sa mga kasulatan, unsaon nimo pagkompleto kini nga pamahayag?

Ipakita ang mosunod nga mga tudling, ug ipasabut nga ang mga propeta sa tibuok Basahon ni Mormon namahayag sa bili sa kasulatan: 1 Nephi 15:23–24; Jacob 2:8; Jacob 4:4; Alma 31:5; Alma 37:8–10; Helaman 3:29–30.

Bahina ang klase ngadto sa gagmay nga mga grupo. Sugoa ang matag grupo sa pagbahin-bahin sa mga tudling tali sa ilang mga kaugalingon aron ang matag sakop adunay usa o duha ka mga kasulatan nga basahon. Dapita ang mga estudyante sa pagbasa og hilum sa ilang gi-assign nga mga kasulatan ug motino og dugang nga mga paagi nga ang kasulatan adunay dakong bili.

Awhaga ang mga sakop sa grupo sa pagpaambit unsay ilang nakat-onan ug unsaon nga sila makadugang ngadto sa lista sa mga paagi aron makompleto ang pamahayag diha pisara. Isip kabahin sa ilang panaghisgutan, ang mga estudyante mahimong mopaambit kon sila nakabaton og kasinatian sa mga kaayohan sa mga kasulatan sama sa gihulagway diha sa mga tudling nga ilang nahisgutan.

Human sa kalihokan sa grupo, mahimong mangutana ka sa klase sa mosunod nga mga pangutana:

• Sa tanang mga rason nga mga kasulatan adunay dakong bili, hain ang imong masulti nga maoy labing importante?

• Unsa ang imong nahibaloan ug nabati mahitungod ni Jesukristo samtang ikaw nagbasa sa mga kasulatan—ilabi na sa Basahon ni Mormon? Unsa nga piho nga mga tudling ang nakadala nimo nga mas maduol ngadto Kaniya?

Pagpalambo sa Atong Pagtudlo ug Pagkat-on

Hatagi ang mga estudyante og mga oportunidad sa pagsulat sa ilang mga gibati. Samtang magbansay ang mga estudyante sa pagsulat sa ilang mga gibati nga ilang naangkon gikan sa Espiritu Santo, sila mahimong mas mahiuyon ngadto sa espirituhanong mga pag-aghat. Dapita ang mga estudyante sa pagsulat sa maong mga gibati diha sa dapit nga ilang maribyu ug diin makahimo usab sila sa paghimo og mga plano ug motakda og mga tumong. Tingali mahimo nimong awhagon sila sa paggamit sa Gospel Living nga app sa pagbuhat sa ingon. Awhaga ang mga estudyante sa pagbuhat sa mga butang nga ilang gibati.

Ipakita ang mosunod nga mga pangutana, ug hatagi ang mga estudyante og panahon sa pagpamalandong o sa pagsulat sa ilang mga gibati nga lagmit ilang nadawat atol sa klase.

• Base sa unsay inyong nakat-unan mahitungod sa mga panalangin sa pagtuon sa kasulatan, unsa ang piho nga mas abunda nga mga panalangin ang gusto ninyong madawat?

• Hunahunaa kon kapila ug unsa ka epektibo ang inyong pagtuon sa mga kasulatan. Unsa kaha, kon aduna man, ang makapugong ninyo gikan sa epektibong pagtuon sa kasulatan? Unsa ang inyong mahimo nga lahi aron molambo ang inyong kasinatian sa mga kasulatan?

Si Alma mitandi sa mga pulong ni Kristo ngadto sa Liahona.

Ipakita ang kauban nga imahe, ug hangyoa ang mga estudyante sa paghulagway kon unsa nga mga panlimbasug nga giatubang sa pamilya ni Lehi samtang nagbiyahe latas sa kamingawan. Sa unsang paagi ang atong kinabuhi nahisama sa usa ka biyahe latas sa kamingawan?

Lehi ug ang iyang pamilya mibiyahe sa kamingawan

Ipakita ang kauban nga imahe sa Liahona, ug dapita ang mga estudyante sa pagpasabut kon sa unsa nga paagi kini naglihok. (Kon gikinahanglan, hangyoa ang mga estudyante sa pagtan-aw sa seksyon 3 sa materyal sa pagpangandam.)

ang Liahona

• Unsa nga espirituhanong mga leksyon nga tingali nakat-unan sa pamilya ni Lehi pinaagi sa paggamit sa Liahona?

Ipakita ang mga gisukip nga mga imahe nga nagpakita og usa ka batan-ong lalaki nga nagbasa sa mga kasulatan gikan sa smartphone, ug dapita ang mga estudyante sa pagbasa o pagribyu sa Alma 37:43–46.

batan-on nga nagtuon sa mga kasulatan diha sa smartphone

• Asa man nato makit-an ang mga pulong ni Kristo? Sa unsang paagi ang mga pulong ni Kristo nagsilbi nga imo mismong personal nga Liahona?

Ipakita ang mosunod nga baruganan: Kon kita mopatalinghug sa mga pulong ni Kristo, kini mogiya kanato latas sa mga hagit niining kinabuhi ngadto sa mahangturon nga kalipay.

• Kanus-a ang mga pulong ni Kristo nakahatag kanimo sa giya ug direksyon? (Tingali mahimo nimong dapiton usab ang mga estudyante sa pagpaambit kon unsa ang ilang nahisgutan mahitungod sa usa ka higala o sakop sa pamilya diha sa panaghisgutan nga sila gidapit sa paghimo sa pagpangandam alang niini nga klase.)

Aron matabangan ang mga estudyante nga makasabut kon sa unsang paagi ang mga pulong ni Kristo kanunayng mogiya kanato, ipakita ang mosunod nga kahimtang ug dapita ang usa ka estudyante sa pagbasa og kusog:

Si Luis gisultihan nga ang mga kasulatan adunay mga tubag sa matag pangutana. Nawad-an siya og kadasig tungod kay siya wala makakita sa piho nga tubag sa importanting personal nga pangutana diha sa mga kasulatan. Magkadako ang iyang pagpangita, mas magkadaghan ang iyang kasagmuyo.

• Unsa nga tambag ang inyong ihatag ngadto kang Luis?

Ipakita ug basaha og kusog ang mosunod nga pamahayag ni Presdente Dallin H. Oaks sa Unang Kapangulohan.

Presidente Dallin H. Oaks

Kami moingon nga ang mga kasulatan naglangkob sa mga tubag sa matag pangutana tungod kay ang mga kasulatan magatultol kanato ngadto sa matag tubag. …

… Bisan og ang mga kasulatan [tingali] wala maglakip sa mga pulong sa pagtubag sa atong piho nga personal nga pangutana, ang usa ka mainampoon nga pagtuon sa mga kasulatan motabang kanato nga makabaton sa maong tubag. Kini tungod kay ang pagtuon sa kasulatan mohimo kanato nga daling madani sa pagdasig sa Espiritu Santo. …

… Ang mga kasulatan motabang kanato nga masulbad ang tanan natong personal nga mga pangutana tungod kay pinaagi niini atong gidapit ug gihimong sarang ang atong kaugalingon alang sa inspirasyon sa Espiritu Santo, nga mogiya kanato ngadto sa tanang kamatuoran. (“Studying the Scriptures” [Brigham Young University–Hawaii devotional, Mar. 14, 1986], 18–21, Church History Library, Salt Lake City)

• Unsa nga kamatuoran ang gitudlo kanato ni Presidente Oaks kabahin kon sa unsang paagi ang Ginoo mogiya kanato pinaagi sa Iyang pulong? (Ang mga estudyante mahimong motino og usa ka kamatuoran nga susama sa mosunod: Ang pagtuon sa mga kasulatan magdapit og personal nga pagpadayag.)

• Kanus-a nga ang mga kasulatan o ang mga pulong sa mga propeta sa bag-ong panahon miabli sa kahigayunan sa personal nga pagpadayag sa inyong kinabuhi?

Pagpamatuod sa bili sa kanunay nga personal nga pagtuon sa kasulatan ug awhaga ang mga estudyante sa pagbuhat sa mga pag-aghat gikan sa Espiritu Santoo nga ilang nadawat sa ilang pagtuon ug diha sa klase.

Alang sa Sunod nga Higayon

Ipasabut nga atol sa sunod nga klase kita magsugod og usa ka bag-o nga yunit nga gitawag og “Dako nga Laraw sa Katubsanan.” Samtang magtuon ang mga estudyante sa materyal sa pagpangandam alang sa leksyon 5, dapita sila sa paghunahuna unsa ang ilang nahibaloan mahitungod sa Pagkapukan ni Adan ug Eva ug ang mga pagpili nga mibukas alang sa matag usa kanato.