Leksyon 5 Materyal sa Pagpangandam sa Klase: Ang Pagkapukan ni Adan ug Eva ug ang Gasa sa Kabubut-on
“Leksyon 5 Materyal sa Magtutudlo: Ang Pagkapukan ni Adan ug ni Eva ug ang Gasa sa Kabubut-on,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 5 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 5 Materyal sa Pagpangandam sa Klase
Ang Pagkapukan ni Adan ug ni Eva ug ang Gasa sa Kabubut-on
Imahe
Pagbiya sa Tanaman sa Eden, ni Joseph Brickey
Dinhi niini nga yunit ikaw makabaton og oportunidad sa paghunahuna kon giunsa sa Langitnong Amahan ang plano sa katubsanan paghimo nga posible alang sa Iyang mga anak nga maluwas gikan sa sala ug sa kamatayon. Samtang ikaw nagtuon niini nga leksyon, hunahunaa kon sa unsa nga paagi ang Pagkapukan ni Adan ug ni Eva, ang gasa sa kabubut-on, ug ang Pag-ula ni Jesukristo importante ngadto sa plano sa Langitnong Amahan sa pagtubos kanimo ug sa pagtabang kanimo nga mahimong mas mahisama Kaniya. Gitudlo ni Presidente Ezra Taft Benson nga “walay laing basahon sa kalibutan nga nagpasabut niining mahinungdanong doktrina [sa Pagkapukan ug sa atong panginahanglan alang ni Kristo] ingon ka maayo sama sa Basahon ni Mormon” (“The Book of Mormon and the Doctrine and Covenants” Ensign, Mayo 1987, 85).
Seksyon 1
Ngano nga ang Pagkapukan ni Adan ug ni Eva mahinungdanon sa akong pag-uswag?
Ang hugpong sa mga pulong nga “ang Pagkapukan” nagpasabut sa mga kahimtang ug mga sangputanan sa mortalidad nga midangat ngadto ni Adan ug ni Eva ug sa ilang mga kaliwatan tungod kay si Adan ug si Eva mikaon sa gidili nga bunga didto sa Tanaman sa Eden. Sa hapit na siya mamatay, si Lehi mitudlo sa iyang anak nga lalaki nga si Jacob mahitungod sa Pagkapukan ug sa unsa nga paagi kini miapekto sa katawhan. (Tan-awa sa 2 Nephi 2.)
Imahe
icon, pagtuon
Pagtuon agi og Pagpangandam alang sa Klase
Basaha ang 2 Nephi 2:19–25, ug hunahunaa ang pagmarka sa mga kamatuoran nga nagtudlo kanato kon nganong ang Pagkapukan ni Adan ug ni Eva usa ka gikinahanglan nga bahin sa plano sa Langitnong Amahan. Mahimo ka usab nga motan-aw sa Basahon ni Mormon nga video nga “Gitudlo ni Lehi Unsaon nga Kita Malipay (2 Nephi 2:16–28)” (3:08).
Tan-awa sa 2 Nephi 2:22 nga kon si Adan ug si Eva wala mopili sa paglapas, sila unta sa hangtud “magpabilin unta sa mao nga kahimtang human sila malalang.” Sila dili unta mouswag o mosinati og sakit o kamatayon. Kini unta makahatag og babag sa plano sa Langitnong Amahan alang sa Iyang mga anak. Samtang nag-alagad isip sakop sa Seventy, si Elder Bruce C. Hafen mitudlo:
Imahe
Elder Bruce C. Hafen
Ang Pagkapukan dili dautang panghitabo. Kini dili sayop o usa ka aksidente. Kadto usa ka tinuyo nga bahin sa kaluwasan. Kita espiritu nga mga “anak”sa Dios [tan-awa sa Mga Buhat 17:28], nga gipadala dinhi sa yuta nga “walay sala” [tan-awa sa Doktrina ug mga Pakigsaad 93:38] sa kalapasan ni Adan. Apan ang plano sa atong Amahan nagtugyan kanato ngadto sa tintasyon ug kaalaut dinhi niining napukan nga kalibutan isip ang bili sa pagsabut sa tinuod nga hingpit nga kalipay. Ang pagkadili makatilaw og kapait, kita sa tinuod dili makasabut sa katam-is [tan-awa sa Doktrina ug mga Pakigsaad 29:39]. Kita nagkinahanglan sa disiplina sa mortalidad ug kaputli isip ang “sunod nga lakang sa [atong] paglambo” paingon sa pagkamahimong sama sa atong Amahan. (“Ang Pag-ula: Ang Tanan alang sa Tanan,” Liahona, Mayo 2004, 97)
Si Elder Jeffrey R. Holland sa Korum sa Napulog Duha ka mga Apostoles mipasabut sa pipila ka mga epekto sa Pagkapukan:
Imahe
Elder Jeffrey R. Holland
Ang pisikal nga kamatayon midala sa panagbulag sa espiritu gikan sa lawas, ug ang espirituhanong kamatayon midala sa panagbulag sa espiritu ug sa lawas gikan sa Dios. Agi og resulta sa Pagkapukan, ang tanang mga tawo nga natawo nganhi sa mortalidad moantus niining duha ka matang sa kamatayon. Apan kinahanglan gayud natong hinumduman nga ang Pagkapukan usa ka importanting bahin sa balaang plano sa Langitnong Amahan. Kon wala kini walay mortal nga mga anak nga matawo unta ngadto ni Adan ug ni Eva, ug unta walay tawhanong pamilya nga makasinati og oposisyon ug pagtubo, moral nga kabubut-on, ug hingpit nga kalipay sa pagkabanhaw, katubsanan, ug kinabuhing dayon [tan-awa sa 2 Nephi 2:22–27; Moises 5:11] . (Jeffrey R. Holland, Christ and the New Covenant: The Messianic Message of the Book of Mormon (1997), 207)
Imahe
icon, pamalandong
Pamalandong agi og Pagpangandam alang sa Klase
Hunahunaa kon sa unsa nga paagi ang mga epekto sa Pagkapukan mga importanting bahin sa plano sa Dios alang sa Iyang mga anak. Giunsa sa Pagkapukan paghatag kanimo sa oportunidad sa pag-uswag sa espirituhanong paagi ug pagsinati og hingpit nga kalipay?
Seksyon 2
Unsaon sa hustong paggamit sa kabubut-on pagpanalangin sa akong kinabuhi?
Kalabut sa iyang mga pagtulun-an kabahin sa Pagkapukan, gihisgutan ni Lehi kon sa unsa nga paagi ang kagawasan sa pagpili importante sa atong pag-uswag diha sa plano sa katubsanan. Giila niya nga ang mosunod nga mga kahimtang gikinahanglan sa paghimo sa kabubut-on nga posible. (Tun-i ang nag-uban nga mga tudling sa kasulatan, ug hunahunaa ang pagmarka sa mga pulong ug mga hugpong sa mga pulong nga nagtudlo mahitungod niini nga mga kahimtang sa kabubut-on.)
Usa ka igo nga kahibalo sa maayo ug sa dautan (tan-awa sa 2 Nephi 2:5)
Mga balaod nga gihatag ngadto sa mga katawhan (tan-awa sa 2 Nephi 2:5, 10)
Pagsupak sa mga pagdani ug mga pagpili (tan-awa sa 2 Nephi 2:11–16)
Hunahunaa kon unsaon niini sa pag-apekto sa imong abilidad sa pagpili ug pag-uswag kon bisan hain niini nga mga kahimtang nawala gikan sa plano sa Langitnong Amahan.
Si Presidente Thomas S. Monson misulti mahitungod sa nagkalain-laing mga matang sa pagpili nga atong gihimo niini nga kinabuhi:
Imahe
Presidente Thomas S. Monson
Panagsa ra kaayo nga molabay ang oras sa adlaw nga dili kita mohimo og mga pagpili sa bisan unsa nga matang. Ang uban dili kaayo importante, ang uban mahinungdanon kaayo. Ang uban dili makahimo og kalainan sa mahangturong kahimtang sa mga butang, ug ang uban makahimo sa tanang kalainan. (“Ang Tulo ka mga K sa Pagpili,” Liahona, Nob. 2010, 67)
Hinumdumi nga ang Langitnong Amahan naghatag og giya aron pagtabang kanato sa paghimo sa atong mga pagpili, ilabina sa labing importante nga mga butang. Paghunahuna mahitungod kon giunsa niana nga giya pag-abut nganha kanimo kaniadto.
Imahe
icon, pamalandong
Pamalandong agi og Pagpangandam alang sa Klase
Paghunahuna mahitungod sa mga pagpili nga imong gihimo bag-ohay lamang. Giunsa niini nga mga pagpili pag-impluwensya sa imong pag-uswag?
Seksyon 3
Sa unsa nga paagi ang Pag-ula ni Jesukristo makadala kanako og tinuod nga kagawasan?
Human magtudlo mahitungod sa panginahanglan sa Pagkapukan ug kabubut-on diha sa plano sa katubsanan, gitudloan ni Lehi ang iyang mga anak nga ang Pag-ula ni Jesukristo naghatag og kagawasan alang sa mga anak sa Dios sa paghimo og mahangturon nga importanting mga pagpili.
Basaha ang 2 Nephi 2:26–28, ug hunahunaa ang pagpili nga ikaw aduna alang kanimo tungod sa maulaong sakripisyo sa Manunubos.
Nagkomentaryo kabahin sa relasyon sa Pagkapukan, kabubut-on, ug sa Pag-ula ni Jesukristo, si Elder Hafen mitudlo:
Imahe
Elder Bruce C. Hafen
Si Adan ug si Eva kanunay nga nakakat-on gikan sa ilang kasagarang malisud nga kasinatian. … Gani tungod sa Pag-ula [ni Jesukristo], sila makahimo sa pagkat-on gikan sa ilang kasinatian nga dili masilutan pinaagi niini. Ang sakripisyo ni Kristo wala lamang magpapas sa ilang mga pagpili ug magbalik kanila sa kahimtang sa pagkawalay sala sama sa ilang kasinatian sa Eden. Mahimong kana nga usa ka sugilanon nga walay istorya ug walay dagan sa istorya. Ang Iyang plano hinay-hinay ang pagtubo––pagtulun-an human sa usa ka pagtulun-an, lakang human sa usa ka lakang, grasya human sa usa ka grasya.
Busa kon kamo adunay mga problema sa inyong kinabuhi, ayaw hunahunaa nga adunay sayop diha kaninyo. Ang pagpakigbisog uban niadto nga mga problema mao ang kinauyokan nga katuyoan sa kinabuhi. Samtang kita magpaduol ngadto sa Dios, Siya mopakita sa atong mga kahuyang, ug tungod niini makapahimo kanato nga mas maalamon, mas malig-on [tan-awa sa Ether 12:27]. (“Ang Pag-ula: Ang Tanan alang sa Tanan,” Liahona, Mayo 2004, 97)
Si Presidente Boyd K. Packer sa Korum sa Napulog Duha ka mga Apostoles mitudlo, “Kon ang kabubut-on gihatag ngadto sa tawo nga walay Pag-ula [ni Jesukristo], kini unta nahimong usa ka makalaglag nga gasa” (“Atonement, Agency, Accountability [Pag-ula, Kabubut-on, Pagkamay-tulubagon],” Ensign, Mayo 1988, 71). Sa unsa nga paagi ang Pag-ula ni Jesukristo mitugot kanimo sa pagkat-on gikan sa imong mga pagpili? Unsa ang usa ka butang nga imong makat-unan gikan sa usa ka sala nga imong nabuhat o usa ka sayop nga imong nahimo?
