Leksyon 10 Materyal sa Pagpangandam sa Klase: Paghinulsol ug Kapasayloan
“Leksyon 10 Materyal sa Pagpangandam sa Klase: Paghinulsol ug Kapasayloan,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (Relihiyon 275) (2021)
“Leksyon 10 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 10 Materyal sa Pagpangandam sa Klase
Paghinulsol ug Kapasayloan
Imahe
batan-ong babaye nga namalandong
Ang paghinulsol kabahin sa doktrina ni Jesukristo. Kini ang Iyang gasa ngadto niadtong kinsa nagtinguha nga mausab ug malimpyohan gikan sa sala. Nakahinumdom ka ba kon unsay imong gibati sa dihang ikaw kinasingkasing nga nangayo og pasaylo ug mihinulsol sa usa ka butang nga milabay na? Si Elder Richard G. Scott sa Korum sa Napulog Duha ka mga Apostoles mitudlo, “Hinumdumi, ang paghinulsol dili usa ka silot. Kini ang dalan nga puno sa paglaum ngadto sa mas mahimayaong umaabut” (“Personal nga Kalig-on pinaagi sa Pag-ula ni Jesukristo,,” Liahona, Nob. 2013, 84). Samtang ikaw magtuon agi og pagpangandam alang sa klase, pamalandonga kon giunsa sa gasa sa Manluluwas sa paghinulsol ug kapasayloan pagtugot kanimo sa pagkat-on, pagtubo, ug paghimong mas mahisama Kaniya.
Seksyon 1
Sa unsa nga paagi ako sa tinud-anay makahinulsol ug makadawat sa kapasayloan sa Ginoo alang sa akong mga sala?
Si Alma nga Batan-on wala motuo sa mga pagtulun-an sa iyang amahan, si Alma nga Tigulang. Kauban sa anak nga mga lalaki ni Hari Mosiah, si Alma nga Batan-on malimbasugong misulay og guba sa Simbahan sa Manluluwas. Samtang sila nagbuhat niining dautan nga buhat, usa ka anghel sa Ginoo mipakita ngadto kanila ug mipasidaan ni Alma sa paghunong unsay iyang gibuhat o siya “isalikway” (Mosiah 27:16). Nasanapan niini nga kasinatian, si Alma dili makasulti o makalihok. Ang anak nga mga lalaki ni Mosiah miagak ni Alma nga Batan-on ngadto sa iyang amahan ug mipasabut kon unsay nahitabo. (Tan-awa sa Mosiah 27:8–20.)
Basaha ang mahitungod sa kasinatian ni Alma nga Batan-on diha sa Mosiah 27:35 ug Alma 36:12–13, 17–21, 24. Samtang ikaw magbasa, hunahunaa ang pagmarka o paghimo og usa ka lista sa mga baruganan mahitungod sa paghinulsol ug kapasayloan nga gitudlo dinhi niini nga mga tudling. Pangandam sa pagpakigbahin niini nga mga baruganan diha sa klase. Hinumdumi nga ang kasinatian ni Alma mas mahinuklugon kay sa unsay naagian sa kadaghanan kanato kon kita maghinulsol. Hinoon, makakat-on pa kita og gamhanang mga baruganan gikan niini nga mga asoy.
Si Elder Jeffrey R. Holland sa Korum sa Napulog Duha ka mga Apostoles naka-obserbar sa mosunod mahitungod sa importante kaayong tahas sa Manluluwas sa atong paghinulsol:
Imahe
Elder Jeffrey R. Holland
Si Kristo mao ang gahum nga nagpaluyo sa tanang paghinulsol. … Natandog si Alma sa pagtulun-an sa iyang amahan, apan kini ilabi ka importante nga ang panagna nga iyang nahinumduman mao ang usa nga mahitungod “sa pag-anhi sa usa ka Jesukristo, usa ka Anak sa Dios, aron sa pag-ula sa iyang dugo alang sa mga sala sa kalibutan.” (Alma 36:17.) Mao kana ang ngalan ug kana ang mensahe nga kinahanglan gayud madungog sa matag tawo. … Bisan unsa pa nga pag-ampo ang atong ihalad, bisan unsa pa ang atong mga panginahanglan, ang tanan bisan sa unsa nga paagi nag-agad, niana nga pangamuyo: “O Jesus, ikaw nga Anak sa Dios, malooy ka kanako.” Siya andam sa paghatag niana nga kalooy. Iyang gibayaran sa iyang kaugalingon gayud nga kinabuhi aron mahatag kini. (However Long and Hard the Road [Bisan Unsa ka Taas ug Kalisud ang Dalan] [1985], 85)
Imahe
icon, pamalandong
Pamalandong agi og Pagpangandam alang sa Klase
Pagpili og usa sa mosunod nga mga pangutana nga imong gusto nga makat-unan kon unsaon sa pagtubag og mas maayo:
Unsa gayud ang gipasabut sa paghinulsol? Ako nang gihimo ang mga lakang, apan ako walay nabati nga kalainan.
Sa unsa nga paagi akong makaplagan ang kalig-on sa tinuoray nga pag-usab? Ako nawad-an og paglaum tungod kay akong gipaningkamutan pag-ayo ang pagbuhat og mas maayo, apan sige lamang gihapon ako og himo sa samang mga sayop.
Nganong kinahanglan pa gihapon akong mosulay sa paghinulsol? Ang akong mga sala ngil-ad kaayo nga ako dili mapasaylo.
Pamalandonga ang kasinatian ni Alma ug ang ubang mga asoy gikan sa Basahon ni Mormon nga makatabang sa pagtubag sa pangutana nga imong gipili. Tambong sa klase nga andam sa pagpakigbahin sa mga baruganan ug mga tudling nga imong gihunahuna nga labing maayo nga motubag niini nga pangutana.
Seksyon 2
Sa unsa nga paagi nga ang paghalad sa Ginoo og usa ka masulub-ong kasingkasing ug usa ka mahinulsulong espiritu kabahin sa sinsero nga paghinulsol?
Ang mga Nephite mipuyo sa balaod ni Moises hangtud sa hapit na si Jesukristo personal nga mipakita ngadto kanila. Isip kabahin sa balaod ni Moises, misugo ang Ginoo sa Iyang mga katawhan sa paghalad og sakripisyo nga mga hayop isip simbolo sa maulaong sakripisyo nga Iyang pagahimoon.
Sa dihang ang Manluluwas misullti ngadto sa mga Nephite kinsa nakalingkawas sa pagkahugno nga miuban sa Iyang kamatayon, Siya mipahibalo nga Siya dili na modawat og mga sakripisyo nga mga hayop. Basaha ang 3 Nephi 9:19–20, mangita alang sa bag-ong sakripisyo nga gikinahanglan sa Manluluwas sa Iyang mga katawhan.
Si Elder Bruce D. Porter sa Seventy mipasabut sa kahulugan sa hugpong sa mga pulong “usa ka masulub-on nga kasingkasing ug usa ka mahinulsulon nga espiritu” (3 Nephi 9:20):
Imahe
Elder Bruce D. Porter
Kon kita makasala ug magtinguha og kapasayloan, ang usa ka masulub-on nga kasingkasing ug usa ka mahinulsulon nga espiritu nangahulugan sa pagsinati og “diosnon nga kasubo [nga] mosangpot sa paghinulsol” (2 Mga Taga-Corinto 7:10). Kini moabut kon ang atong tinguha nga malimpyo gikan sa sala gamhanan kaayo nga ang atong mga kasingkasing magsakit sa kasubo ug mangandoy kita nga mobati og kalinaw uban sa Amahan sa Langit. Kadtong kinsa adunay usa ka masulub-on nga kasingkasing ug usa ka mahinulsulon nga espiritu andam nga mobuhat sa bisan unsa ug sa tanan nga pangayoon sa Dios kanila, nga walay pagsupak o kaligutgot. Mohunong kita sa pagbuhat sa mga butang sa kaugalingon natong paagi ug magkat-on sa pagbuhat hinoon niini sa paagi sa Dios. Niana nga kahimtang sa pagpaubos, ang Pag-ula mo-epekto ug ang tinuod nga paghinulsol mahimo. (“U sa ka Masulub-on nga Kasingkasing ug Mahinulsulon nga Espiritu,” Liahona, Nob. 2007, 32)
Unsa ang imong mabuhat sa pagpakita sa Ginoo sa imong sinserong tinguha sa paghalad Kaniya og usa ka masulub-ong kasingkasing ug usa ka mahinulsulong espiritu?
Seksyon 3
Ngano nga ang Manluluwas andam kaayo sa pagpasaylo kanako sa akong mga sala?
Atol sa paghari ni Hari Mosiah, “daghan sa mga bag-o nga kaliwatan” (Mosiah 26:1) midani sa mga miyembro sa Simbahan sa paghimo og bug-at nga mga sala. Wala masiguro kon unsaon sa pagtubag niini nga sitwasyon, si Alma nga Tigulang miduol sa Ginoo alang sa paggiya.
Imahe
icon, pagtuon
Pagtuon agi og Pagpangandam alang sa Klase
Basaha ang Mosiah 26:22, 30, mangita alang sa unsay nakat-unan ni Alma nga Tigulang mahitungod sa pagkaandam sa Ginoo nga mopasaylo.
Si Elder Dale G. Renlund sa Korum sa Napulog Duha ka mga Apostoles mitudlo:
Imahe
Elder Dale G. Renlund
Si Jesukristo makapasaylo tungod kay gibayaran Niya ang kantidad sa atong mga sala [tan-awa sa Isaias 53:5].
Ang atong Manunubos nagpili sa pagpasaylo tungod sa Iyang dili matandi nga kapuangod, kalooy, ug gugma.
Ang atong Manluluwas gusto nga mopasaylo tungod kay mao kini ang usa sa Iyang balaan nga mga hiyas.
Si Elder Neil L. Andersen sa Korum sa Napulog Duha ka mga Apostoles mipasalig usab:
Imahe
Elder Neil L. Andersen
“Natingala ko sa nagliyok nga mga bukton sa kalooy ug gugma sa Manluluwas alang sa mahinulsulon, bisan unsa ka maakuhon ang gisalikway nga sala. “Ako mopamatuod nga ang Manluluwas makahimo ug andam nga mopasaylo sa atong mga sala. (“PaghinulsoI … Aron Ako Moayo Kaninyo,” Liahona, Nob 2009, 40)
Imahe
icon, pamalandong
Pamalandong agi og Pagpangandam alang sa Klase
Sa unsa nga paagi nga ang pagtuo ug pagdawat nga si Jesukristo andam, makahimo, ug matinguhaong mopasaylo sa imong mga sala ug mokuha sa kangutngot sa imong tanlag makaapekto sa imong paghimo og paghinulsol?
