“Leksyon 13 Materyal sa Pagpangandam sa Klase: Ang Pagpundok sa Israel sa Katapusang mga Adlaw,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 13 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 13 Materyal sa Pagpangandam sa Klase
Ang Pagpundok sa Israel sa Katapusang mga Adlaw
Si Presidente Russell M. Nelson mipahayag, “Ang Ginoo mipadali sa Iyang buhat sa pagpundok sa Israel. Kana nga panagpundok mao ang labing importanting butang nga nahitabo sa yuta karon. Walay makatandi niini sa gidak-on, walay makatandi niini sa kaimportante, walay makatandi niini sa kahalangdon” (Russell M. Nelson ug Wendy W. Nelson, “Paglaum sa Israel” [tibuok kalibutan nga debosyonal sa mga kabatan-onan, Hunyo 3, 2018], dugang ngadto sa New Era ug Ensign, 8, HopeofIsrael.ChurchofJesusChrist.org). Niini nga yunit ikaw makabaton og oportunidad sa pagtuon sa talagsaong mga pagtulun-an sa Basahon ni Mormon kabahin sa pagpundok sa Israel ug hunahunaa kon giunsa niining importante nga buhat pagdala sa mga katawhan ngadto ni Jesukristo. Samtang ikaw magtuon, pangitaa ang mga responsibilidad ug mga oportunidad nga mahimong maimo samtang ikaw moapil diha sa pagpundok sa Israel.
Seksyon 1
Nganong importante nga mahimong kabahin sa balay ni Israel?
Aron masabtan ang importansya nga masakop ngadto sa balay ni Israel, kini makatabang ang pagkat-on kon giunsa pagsugod ang balay ni Israel. Sa mga panahon human sa 2000 BC, mipakita si Jesukristo ngadto ni Abraham ug mihimo og usa ka walay katapusang pakigsaad uban kaniya. Ang Ginoo misaad ni Abraham ug Sara nga ang ilang mga kaliwatan matanyagan sa tanang mga panalangin sa ebanghelyo. Kini nga mga saad ug mga panalangin gitawag og pakigsaad sama kang Abraham [Abrahamic covenant]. (Tan-awa sa Abraham 2:6–11; Giya ngadto sa mga Kasulatan, “Pakigsaad Sama Kang Abraham,” scriptures.ChurchofJesusChrist.org.)
Gibalik sa Ginoo kini nga pakigsaad ngadto sa anak nga lalaki ni Abraham nga si Isaac ug sa iyang apo nga lalaki nga si Jacob. Ang ngalan ni Jacob giilisan sa Ginoo og Israel. Si Israel may 12 ka anak nga mga lalaki kansang mga kaliwatan naila isip ang balay ni Israel o mga Israelinhon. (Tan-awa sa Genesis 26:24; 28:10–15; Giya ngadto sa mga Kasulatan, “Israel,” scriptures.ChurchofJesusChrist.org.)
Ang balay ni Israel mao ang mga katawhan sa pakigsaad sa Dios. Uban sa awtoridad sa balaang pagkapari, sila adunay responsibilidad sa pagdala sa ebanghelyo sa Ginoo ngadto sa tanang katawhan ibabaw sa yuta ug sa paghimong maanaa ang importanting mga ordinansa ug mga pakigsaad ngadto niadtong kinsa nangamatay nga walay ebanghelyo.
Kon ang tinuod nga mga kaliwatan ni Israel nagtuo ni Jesukristo ug nagdawat sa pakigsaad sama sa kang Abraham, sila pagapundukon ngadto sa balay ni Israel ug mahimong kabahin sa mga katawhan sa pakigsaad sa Ginoo. Kadtong dili tinuod nga mga kaliwatan ni Abraham, Isaac, ug Jacob mahimong sagupon ngadto sa balay ni Israel pinaagi sa pagbansay og hugot nga pagtuo diha ni Jesukristo ug pagdawat sa mga ordinansa ug mga pakigsaad sa Iyang ebanghelyo (tan-awa sa Giya ngadto sa mga Kasulatan, “Pagsagop,” scriptures.ChurchofJesusChrist.org).
Namulong ngadto sa mga miyembro sa Simbahan, si Presidente Nelson mitudlo:
Kita mga … anak sa pakigsaad. Atong nadawat, sama kanila sa karaan, ang balaang pagkapari ug ang mahangturong ebanghelyo. Si Abraham, Isaac, ug Jacob atong mga katigulangan. Kita sakop sa Israel. Kita adunay katungod sa pagdawat sa ebanghelyo, mga panalangin sa pagkapari, ug kinabuhing dayon. Mga kanasuran sa yuta mapanalanginan pinaagi sa atong mga paningkamot ug pinaagi sa mga kahago sa atong mga kaliwat. Ang tinuod nga binhi ni Abraham ug kadtong kinsa gipundok ngadto sa iyang pamilya pinaagi sa pagsagop nagdawat niining gisaad nga mga panalangin––nag-agad diha sa pagdawat sa Ginoo ug pagkamasulundon ngadto sa iyang mga sugo. (“Children of the Covenant [Mga Anak sa Pakigsaad],” Ensign, Mayo 1995, 33)
Pamalandong agi og Pagpangandam alang sa Klase
Unsaon nimo sa pagpasabut ngadto sa usa ka tawo kinsa dili miyembro sa Simbahan kon unsa ang balay ni Israel ug ngano nga kini importante?
Seksyon 2
Nganong kinahanglan akong moapil sa pagpundok sa Israel?
Sa dihang gitun-an ni Lehi ang mga palid nga tumbaga, nakakat-on siya og mas daghan pa mahitungod sa iyang kasaysayan sa kagikan ug sa iyang katungdanan diha sa balay ni Israel (tan-awa sa 1 Nephi 5:14). Aron sa pagtabang sa iyang pamilya nga makasabut sa importansya kabahin sa balay ni Israel, gitandi ni Lehi ang balay ni Israel ngadto sa kahoy nga oliba. Iyang gipasabut nga sama sa usa ka sanga nga mahimong putlon gikan sa kahoy nga oliba, mao usab ang mga katawhan sa Israel maputol ug magkatibulaag ngadto sa layo nga mga kayutaan. Ug sama sa sanga sa oliba gikan sa usa ka kahoy mahimong isumbak [grafted] ug mahimong kabahin sa usa ka lahi nga kahoy, busa ang nagkatibulaag nga Israel sa katapusan mapundok ug mahimong kabahin sa mga katawhan sa pakigsaad sa Ginoo. (Tan-awa sa 1 Nephi 10:12–14.)
Ang pagsumbak mao ang usa ka proseso diin ang usa ka sanga nga giputol gikan sa usa ka kahoy ibugkos ngadto sa lahi nga kahoy sa usa ka paagi nga ang sanga mahimong permanente nga kabahin sa kahoy.
Pagtuon agi og Pagpangandam alang sa Klase
Basaha ang 1 Nephi 10:12–14, ug hunahunaa ang pagmarka sa mga kamatuoran mahitungod sa pagpundok sa Israel. (Mubo nga Sulat: Diha sa Basahon ni Mormon, ang pulong mga Hentil sa kinatibuk-an nagpasabut sa “mga nasud nga walay ebanghelyo, bisan tuod adunay pipila ka mga Israelinhon nga dugo taliwala sa mga katawhan” [Giya ngadto sa mga Kasulatan, “Hentil, Mga,” scriptures.ChurchofJesusChrist.org].)
Wala madugay human sa mga pagtudlo ni Lehi kabahin sa pagkatibulaag ug pagpundok sa Israel, nakit-an ni Nephi ang iyang igsoong mga lalaki nga naglalis sa usag usa mahitungod sa unsay gitudlo sa ilang amahan. Ilang gisultihan si Nephi nga sila dili makasabut sa mga pagtulun-an ni Lehi mahitungod “sa kinaiyanhong mga sanga sa kahoy nga oliba, ug usab kabahin sa mga Hentil” (1 Nephi 15:7).
Pagtuon agi og Pagpangandam alang sa Klase
Basaha ang pagpasabut ni Nephi diha sa 1 Nephi 15:12–15, ug hunahunaa ang pagmarka sa mga kamatuoran nga nagtabang kanimo nga mas masabtan ang pagpundok sa Israel.
Kabahin sa pagpundok sa Israel, si Presidente Nelson miingon usab:
Kon magsulti kita kalabut sa pagpundok, nagsulti lamang kita niining sukaranang kamatuoran: ang matag usa sa mga anak sa atong Langitnong Amahan, sa luyog luyo nga mga bahin sa tabil, angay makadungog sa mensahe sa gipahiuli nga ebanghelyo ni Jesukristo. (“Paglaum sa Israel,” 8)
Ang mga indibidwal sa luyog luyo nga mga bahin sa tabil naglakip niadtong kinsa mga buhi ug kadtong kinsa namatay na.
Irekord ang Imong mga Hunahuna
Paggahin og minuto sa pagrekord kon sa unsa nga paagi ang imong kinabuhi o ang mga kinabuhi sa mga sakop sa imong pamilya napanalanginan pinaagi sa pagpundok sa Israel. Paghunahuna og usa ka tawo––sa bisan hain nga bahin sa tabil––kinsa nanginahanglang makadawat sa mga panalangin sa gipahiuli nga ebanghelyo ni Jesukristo. I-rekord ang ngalan niini nga tawo ug nganong siya importante nganha kanimo. Hunahunaa kon unsa ang imong mahimo sa pagtabang niini nga tawo nga makadawat niini nga mga panalangin.
Seksyon 3
Unsaon nako pag-apil sa pagpundok sa Israel?
Si Jacob, ang manghud nga lalaki ni Nephi mitudlo mahitungod sa pagkatibulaag ug pagpundok sa Israel pinaagi sa pagkutlo sa sambingay ni Zenos sa dili ihalas ug sa ihalas nga mga kahoy sa oliba. Diha sa sambingay, ang Ginoo sa ubasan nagrepresentar ni Jesukristo, ug ang mga sulugoon nagrepresentar sa Iyang mga propeta ug ubang mga disipulo kinsa gitawag sa pagpundok sa Israel. Ang nagkalain-laing mga kahoy sa oliba nga gitanom diha sa ubasan nagrepresentar sa mga grupo sa mga anak sa Dios, lakip ang mga sakop sa balay ni Israel. (Tan-awa sa Jacob 5.)
Pagtuon agi og Pagpangandam alang sa Klase
Basaha ang Jacob 5:61–62, 70–72, ug pangitaa ang unsay gipaabut sa Ginoo niadtong kinsa gitawag sa pagpundok sa Israel.
Gipasabut ni Presidente Nelson kon unsa ka yano ang pagtabang sa pagpundok sa Israel:
Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, nagtabang kamo sa pagpundok sa Israel. Ingon lang niana ka yano. (“Paglaum sa Israel,” 15)
Paghimo og Plano
Paghunahuna mahitungod sa tawo––sa bisan hain nga bahin sa tabil––nga imong gisulat diha sa seksyon 2. Paghimo og yano nga plano bahin sa unsay imong buhaton sa pagtabang niini nga tawo nga mohimo og mga lakang padulong ngadto sa paghimo og mga pakigsaad uban sa Dios. Sama pananglit, mahimo ikaw nga modapit og usa ka tawo ngadto sa usa ka kalihokan sa Simbahan o makigbahin og kasulatan ngadto sa usa ka tawo, o ikaw maka download ug mosugod sa paggamit sa FamilySearch Family Tree mobile app. Tan-awa kon pila ka mga kagamitan dinhi niini nga app ang makatabang kanimo sa pagpundok sa Israel bisan asa ka.