Leksyon 19 Materyal sa Pagpangandam sa Klase

Pagpakabuhi nga Matarong sa Panahon sa Kadautan

Si Presidente Ezra Taft Benson mitudlo nga ang Basahon ni Mormon “nakalig-on sa mapainubsanon nga mga sumusunod ni Kristo batok sa dautan nga mga plano, estratihiya, ug mga doktrina sa yawa sa atong panahon” (“The Book of Mormon Is the Word of God,” Ensign, Ene. 1988, 3). Niini nga yunit ikaw makabaton og oportunidad sa pagkat-on kon sa unsang paagi nga ang Basahon ni Mormon nagpakita niining mga peligro aron mas makapanalipod ka sa imong kaugalingon. Samtang magtuon kamo niining leksyon, pangitaa ang mga baruganan nga makatabang kaninyo nga magpakabuhi nga matarong sa panahon sa kadautan.

Seksyon 1

Sa unsang paagi nga ako magpabilin nga matinud-anon ngadto sa Ginoo kon ako mag-atubang og pagpanggukod tungod sa pagsunod sa ebanghelyo?

Sa dihang si Helaman, nga anak ni Helaman, mipuli sa hukmanan, ang mga Nephite nakasinati og usa ka panahon sa kalinaw, ug napulo ka liboan sa mga tawo ang mipasakop sa Simbahan. Samtang ang Simbahan milambo, ang pipila sa mga miyembro nahimong mga mapasigarbuhon ug misugod sa pagpanggukod sa mga mapainubsanon nga mga sumusunod ni Jesukristo. (Tan-awa sa Helaman 3:20–34.)

Pagtuon agi og Pagpangandam alang sa Klase

Basaha ang Helaman 3:33–35, ug pangitaa kon giunsa pagtubag sa mapainubsanong mga sumusunod ni Kristo ang pagpanggukod gikan sa uban nga mga miyembro sa Simbahan.

Pamalandong agi og Pagpangandam alang sa Klase

Paghunahuna og usa ka panahon sa dihang kamo nakasinati o nakasaksi og makapasakit nga pamatasan o dili mabination nga mga pulong gikan sa laing miyembro sa Simbahan. Giunsa nimo sa pagtubag? Unsa ang inyong makat-onan gikan niining mapainubsanon nga mga Santos mahitungod kon unsaon sa pag-atubang ang maong mga matang sa pagpanggukod?

Seksyon 2

Usaon nako nga mahimong matarong kon napalibotan ako sa kadautan?

Si propeta Mormon ug ang iyang anak si Moroni nag-atubang sa grabing kadautan. Tungod sa sala ug pagkawalay pagtuo, nahunong ang mga milagro ug ang Espiritu Santo wala na mag-uban sa mga katawhan. Ang gahum ni Satanas mipatigbabaw sa tibuok yuta. (Tan-awa sa Mormon 1:13–19.) Sa usa ka sulat ngadto sa iyang anak nga si Moroni, gihulagway ni Mormon ang kahimtang sa mga two ug mitapos nga sila hilabihan na ang kadautan nga sila “walay buhilaman [sibilisasyon]” (Moroni 9:11). Ang kabayolente, gubat, ug kamatay milukop sa yuta samtang ang mga Lamanite ug ang mga Nephite nagpadayon sa pagpakig-away sa usag usa. Sa katapusan ang mga Lamanite nagmadaugon, ug si Mormon ug si Moroni nakasaksi sa hingpit nga kalaglagan sa mga Nephite (tan-awa sa Mormon 2–6; 8:1–3, 7).

Pagtuon agi og Pagpangandam alang sa Klase

Basaha ang Mormon 1:1–2, 15 ug Moroni 9:25–26, ug pangitaa ang pipila ka rason nganong si Mormon ug si Moroni nakahimo nga magpabilin nga matinud-anon bisan sila napalibotan sa kadautan.

Namulong bahin sa gahum sa pagtutok ngadto sa Manluluwas diha sa makasasala nga kalibotan, si Presidente Joy D. Jones, Kinatibuk-ang Presidente sa Primary, mitudlo:

Kon ugaling ang impluwensya sa kalibotan mas kusog kay sa atong pagtuo ug pagsalig sa Manluluwas, nan ang impluwensya sa kalibotan magpabilin kanunay. …

… Samtang mas sayon nga wala kitay pagpakabana sa espirituhanon kay sa maningkamot sa paghinumdom ug pagdawat sa atong balaang pagkatawo, dili kita makatugot nga magpasagad niining katapusang mga adlaw. Hinaut nga kita … “magmatinud-anon diha kang Kristo … hinaut unta nga si Kristo mobayaw [kanato] ug unta ang Iyang mga pag-antus ug kamatayon, … ug sa iyang kalooy ug pagkamainantuson, ug ang paglaum sa iyang himaya ug kinabuhi nga dayon, moabot sa [atong salabotan] sa kahangturan” [Moroni 9:25]. Samtang bayawon kita sa Manluluwas ngadto sa mas taas nga lugar, mas klaro natong makita dili lang kon kinsa kita apan kita usab mas mahiduol ngadto Kaniya nga sukad atong mahunahuna. (“Bili nga Dili Masukod,” Liahona, Nob. 2017, 15)

Si Elder Neil L. Andersen sa Korum sa Napulog Duha ka mga Apostoles mitanyag sa mosunod nga pagpamatuod kabahin kon unsaon sa Ginoo sa pagtabang ang matinud-anon sa pag-atubang sa dautan nga kalibotan:

Ang atong panahon nakita nang daan, ug ang Ginoo naghatag og espirituhanong kahilwasan alang kanato. … Samtang ang kadautan modaghan dinhi sa kalibotan, adunay makatimbang nga gahum sa pagpadayag ug espirituhanong mga gasa nga ihatag ngadto sa mga matarong. Ang Ginoo mohatag kanato og dugang nga gahum kon kita andam nga magpabilin nga matarong diha sa usa ka dautan nga kalibotan. (“A Classroom of Faith, Hope, and Charity” [gabii uban sa Kinatibuk-ang Awtoridad, Peb. 28, 2014], ChurchofJesusChrist.org)

Irekord ang Imong mga Hunahuna

Moila og usa ka indibidwal o grupo sa mga tawo diha sa Basahon ni Mormon kinsa, sama ni Mormon o Moroni, nag-atubang sa kadautan ug mipabilin nga matinud-anon ngadto sa Ginoo. Samtang maghunahuna ka mahitungod niining ehemplo, pangita og usa ka tudling sa kasulatan nga makahatag og dugang nga panabot mahitungod niini nga tawo (o grupo sa mga tawo). Dayon irekord ang imong mga hunahuna mahitungod sa mosunod nga mga pangutana:

• Unsaon nimo sa paghulagway sa kadautan nga giatubang niini nga tawo (o grupo sa mga tawo)?

• Unsa ang usa ka butang nga gibuhat niini nga tawo (o grupo sa mga tawo) nga imong buhaton aron magpabilin nga matinud-anon ngadto sa Ginoo kon ikaw mag-atubang sa kadautan ug mga tintasyon sa kalibotan?

Tambong sa klase nga andam na sa pagpaambit sa imong ehemplo. Mahimo usab nga mangandam ka sa pagpaambit og ehemplo sa usa ka tawo nga personal nimo nga kaila kinsa nag-atubang og kadautan ug nagpabilin nga matinud-anon ngadto sa Ginoo.

Gusto pa og Dugang? (Opsyonal)

Sa unsa nga mga paagi nga ako mapanalanginan pinaagi sa pagtugyan sa akong kasingkasing ngadto sa Dios?

Basaha ang mga ulohan nga kapitulo sa Helaman 7–9. Dayon basaha ang Helaman 10:1–5, nga mangita kon sa unsang paagi nga si Nephi, anak ni Helaman, napanalanginan tungod sa pagkamanunuton ngadto sa kabubut-on sa Ginoo.

Sa iyang pakigpulong nga “Pagtugyan sa Atong Kasingkasing ngadto sa Dios” (Liahona, Nob. 2015, 30–32), si Sister Neill F. Marriott, usa ka kanhi magtatambag sa Kinatibuk-ang Kapangulohan sa Young Women, mitudlo kon sa unsang paagi nga kita makadugang sa atong gahum aron magpakabuhi nga matarong samtang kita motugyan sa atong mga kasingkasing ngadto sa Dios (tan-awa usab sa Helaman 3:35).

Nganong importante ang pagbaton og kaisug kon mag-atubang og mga sitwasyon nga wala mahisubay sa mga pagtulun-an ni Jesukristo?

Si Elder Gary E. Stevenson sa Korum sa Napulog Duha ka mga Apostoles mipaambit og usa ka istorya sa usa ka batan-ong lalaki kinsa mipakita og kaisug diha sa atubangan sa tintasyon.

Sa iyang pakigpulong “Nga Kita Unta sa Kanunay Makabaton sa Iyang Espiritu Uban Kanato” (Liahona, Mayo 2006, 28–31), Si Elder David A. Bednar sa Korum sa Napulog Duha ka mga Apostoles mipasidaan mahitungod sa mga butang nga makapahibulag kanato gikan sa Balaang Espiritu (time code 4:40–7:24).

Asa ako makakat-on pa og dugang mahitungod kon unsaon pag-angkon og usa ka malipayon nga kinabuhi diha sa usa ka dautan nga kalibotan?

Si Elder Richard G. Scott sa Korum sa Napulog Duha ka mga Apostoles mihisgot kon sa unsang paagi nga ang pagtutok kang Jesukristo makapahimong posible alang sa Manluluwas nga makahatag kanimo og “ usa ka buhong ug hingpit nga kinabuhi bisan unsa pa ang mahitabo sa kalibotan sa imong palibot” (101).