“Leksyon 21 Materyal sa Pagpangandam sa Klase: Pagbuntog sa Garbo,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 21 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 21 Materyal sa Pagpangandam sa Klase
Pagbuntog sa Garbo
Ang usa ka espirituhanong kakuyaw nga gihatagan og gibug-aton sa Basahon ni Mormon mao ang sala sa garbo. Gikan niana nga rekord atong makat-onan kon sa unsang paagi nga ang garbo mibalda sa panag-uyon sa pamilya ni Lehi, mimugna og mga panagbahin sa Simbahan sa Ginoo, miresulta sa dili maihap nga mga gubat, ug sa kataposan misangpot sa pagkalaglag sa Nephite nga sibilisasyon. Si Presidente Ezra Taft Benson mipasidaan nga “ang garbo sala sa tanan, ang labihan kangil-ad nga kinaiya.” (“Beware of Pride,” Ensign, Mayo 1989, 6). Samtang magtuon ka agi og pagpangandam alang sa klase, pangita og mga pagtulun-an nga makatabang kanimo sa pag-ila og mga timailhan sa garbo sa imong kaugalingon nga kinabuhi. Usab, hunahunaa kon sa unsang paagi nga ang mga pagtulun-an ug ehemplo ni Jesukristo makatabang kanimo sa pagbuntog sa garbo.
Seksyon 1
Unsaon nako nga mas makaila sa makadaot nga mga epekto sa garbo nga tingali anaa sa akong kinabuhi?
Human sa pagkamatay ni Nephi, nabalaka si Jacob sa nagkagrabe nga kadaotan taliwala sa mga Nephite. Ang Ginoo misugo ni Jacob nga sultihan ang mga tawo mahitungod sa ilang mga sala (tan-awa sa Jacob 1:15–2:4, 11). Sa masulundong paagi, namulong si Jacob ngadto sa mga tawo diha sa templo mahitungod sa ilang mga sala, lakip na kon sa unsang paagi nga ang ilang mga bahandi nagpalayo kanila sa Ginoo.
Pagtuon agi og Pagpangandam alang sa Klase
Basaha ang Jacob 2:12–16 o tan-awa ang video sa Basahon ni Mormon “Si Jacob Mitudlo bahin sa Garbo ug Kaputli (Jacob 2:3–21)” (5:56), nga makita sa ChurchofJesusChrist.org. Samtang imo kanang buhaton, pangitaa kon sa unsang paagi nga ang garbo nakaimpluwensya sa opinyon niini nga mga Nephite sa usag usa.
Mitudlo si Jacob mahitungod sa Garbo | Jacob 2:3–19
Jacob 2:3–19 | Ang propeta Jacob sa Basahon ni Mormon mitudlo sa katawhan nga magmatngon sa garbo ug pagtratar nga managsama ang tanan. Mitudlo usab siya nga unahon ang pagpangita sa gingharian sa Dios.
Sa kataposan sa Basahon ni Mormon, si Mormon ug si Moroni nakasaksi kon sa unsang paagi nga ang pagkapakyas sa paghinulsol sa garbo misangpot sa hingpit nga kalaglagan sa mga Nephite (tan-awa sa Moroni 8:27). Human sa pagsaksi sa ilang kalaglagan, nakita ni Moroni sa usa ka panan-awon kon sa unsang paagi nga ang garbo mahimo usab nga problema sa mga tawo sa atong panahon.
Pagtuon agi og Pagpangandam alang sa Klase
Basaha ang Mormon 8:35–37, ug hunahunaa kon sa unsang paagi nga ang garbo mosangpot ngadto sa dugang nga mga sala.
Niadtong 1989, mihatag si Presidente Benson og makapatandog nga pakigpulong bahin sa garbo. Samtang magbasa ka niini nga kinutlo gikan sa iyang pakigpulong, ikonsiderar ang pagmarka sa importanting mga pulong ug mga pulongan nga naghulagway sa kinahiladman nga kahulogan sa garbo.
Kadaghanan nato naghunahuna sa garbo isip paghunahuna lang sa kaugalingon, pagkamapahitas-on, pagkahambugero, pagkaarogante, o pagkamapalabi-labihon. Kining tanan mao ang mga elemento sa sala, apan ang kahulugan gayod, o ang kinauyukan niini, wala gihapon diha.
Ang klarong ebidensya nga anaa ang garbo mao ang pagdumot—pagdumot sa Dios ug sa atong isigkatawo. Ang pagdumot nagpasabut sa “kalagot, pagkamasupakon, o matang sa pagsukol.” Kini ang gahum diin si Satanas buot nga modumala kanato.
Ang garbo adunay kinaiya sa pagpangumpetensya. Ang atong kabubut-on batok sa kabubut-on sa Dios. …
Ang mga mapahitas-on dili makadawat nga ang awtoridad sa Dios ang modumala sa ilang kinabuhi. (Tan-awa sa Hel. 12:6.) …
Himoong kaaway sa mga mapahitas-on ang ubang tawo pinaagi sa pagkompara sa ilang mga kahibalo, opinyon, buhat, bahandi, talento, o uban pang kalibutanong mga butang nga makompara. Sa mga pulong ni C. S. Lewis: “Ang garbo dili malipay nga makaangkon og usa ka butang, apan mas makabintaha lang sa uban. … Ang pagkompara maoy nakapahimo ninyong mapahitas-on: ang kahimuot nga nakalabaw sa uban. Kon ang elemento sa pakigkompetinsya mawala, ang garbo mawala.” (Mere Christianity, New York: Macmillian, 1952, pp. 109–10.) …
Ang kahadlok nga mahukman sa tawo makita mismo sa pagbuhat unsay gikaangayan sa mga tawo. …
… Kadaghanan nato nagkonsiderar sa garbo nga sala niadtong anaa sa ibabaw, sama sa adunahan ug makinaadmanun, nga mipakaubos natong tanan. (Tan-awa sa 2 Ne. 9:42.) Hinoon, dunay mas grabing sakit nga nia kanato—ug kana mao ang garbo nga bisan ang tawo kabus pero mapahitas-on. Kini makita sa daghang paagi, sama sa pagpangita og sayop, pagpanglibak, pagreklamo, pagpakabuhi sobra sa atong kapanguhaan, kasina, kaibog, pugngan ang pagpasalamat ug pagdayeg nga makabayaw sa uban, ug dili mapasayloon ug kamasinahon. (“Maglikay sa Garbo,” Mga Pagtulun-an sa mga Presidente sa Simbahan: Ezra Taft Benson, 279-280, 282-283)
Irekord ang Imong mga Hunahuna
Si Presidente Benson nakaobserbar, “Ang garbo usa ka sala nga daling makita diha sa uban apan kita dili dali nga moangkon.” (“Maglikay sa Garbo,” Mga Pagtulun-an sa mga Presidente sa Simbahan: Ezra Taft Benson, 283). Pilia ang mga pangutana sa ubos nga maoy labing mahinungdanon sa imong kinabuhi, ug irekord ang imong mga tubag sa imong journal o notebook.
-
Aduna ba akoy mga pagbati sa pagdumot (kalagot, pagkamasupakon, o pagsukol) sa akong kasingkasing ngadto sa Dios o sa laing tawo? Kon aduna, sa unsang paagi nga kining mga pagbati nakaapekto sa akong kasingkasing ug sa akong mga relasyon?
-
Kanus-a ko kasagaran mokomparar sa akong kaugalingon sa uban? Kon ikomparar nako ang akong kaugalingon sa uban, unsa ang akong gibati?
Seksyon 2
Unsaon man nako sa pagbuntog ang sala sa garbo?
Human mipasidaan si Jacob sa iyang mga tawo mahitungod sa sala sa garbo, gitudloan niya sila sa importante nga mga kamatuoran mahitungod kon unsaon sa pagbuntog niini.
Pagtuon agi og Pagpangandam alang sa Klase
Samtang magbasa ka sa Jacob 2:17–21, pangita og tambag nga makatabang kanimo sa pagbuntog sa garbo.
Sa Basahon ni Mormon, ang mga Nephite nahimong mapagarbohon sa daghang higayon. Sama pananglit, human nakadaog sa usa ka dugay nga gubat batok sa mga tulisan ni Gadianton, ang mga Nephite milambo ug sa wala madugay nahimong mapagarbohon, nga nagbahin-bahin sa ilang kaugalingon sumala sa ilang mga bahandi ug kahibalo. Ang uban misugod sa pagdaogdaog niadtong ubos og kahimtang kaysa ilang kaugalingon. (Tan-awa sa 3 Nephi 6:4–12.)
Pagtuon agi og Pagpangandam alang sa Klase
Samtang magbasa ka sa 3 Nephi 6:12–14, tan-awa ang mga kalainan tali sa mga tawo kinsa mga mapagarbohon ug sa mga tawo kinsa mga dili mapagarbohon. Unsa nga mga kinaiya ang nagpaila sa kalainan sa duha ka grupo sa mga tawo gikan sa usag usa?
Si Presidente Benson mitudlo sa mosunod mahitungod kon unsaon sa pagbuntog sa garbo:
Ang panagang sa garbo mao ang pagkamapainubsanon—pagkamaaghop, pagkamanunuton. (Tan-awa sa Alma 7:23.) …
Atong pilion nga magmapainubsanon.
Kita makapili nga magmapainubsanon pinaagi sa pagbuntog sa pagdumot sa atong mga kaigsoonan, itratar sila sama sa pagtratar sa atong kaugalingon, ug ibayaw sila sa sama kataas o mas taas pa kay kanato. [Tan-awa sa Doktrina ug mga Pakigsaad 38:24.]
Kita makapili nga magmapainubsanon pinaagi sa pagdawat sa tambag ug pagpanton. [Tan-awa sa Jacob 4:10.]
Kita makapili nga magmapainubsanon pinaagi sa pagpasaylo niadtong nakasilo kanato. [Tan-awa sa 3 Nephi 13:11, 14; Doktrina ug mga Pakigsaad 64:10.]
Kita makapili nga magmapainubsanon pinaagi sa pagserbisyo nga dili maghunahuna og balos. (Tan-awa sa Mosiah 2:16–17.)
Kita makapili nga magmapainubsanon pinaagi sa pagserbisyo og mga misyon ug pagsangyaw sa pulong nga makapahimo sa uban nga magmapainubsanon. [Tan-awa sa Alma 4:19.]
Kita makapili nga magmapainubsanon pinaagi sa mas kanunay nga pag-adto sa templo.
Kita makapili nga magmapainubsanon pinaagi sa pagkumpisal ug pagbiya sa atong mga sala ug magbag-o diha sa Dios. [Tan-awa sa Doktrina ug mga Pakigsaad 58:43.]
Kita makapili nga magmapainubsanon pinaagi sa paghigugma sa Dios, pagtugyan sa atong kabubut-on ngadto sa Iyang kabubut-on, ug pagbutang og una Kaniya sa atong mga kinabuhi. [Tan-awa sa 3 Nephi 11:11.] (“Beware of Pride,” 6–7)
Pamalandong agi og Pagpangandam alang sa Klase
Pamalandong sa kinabuhi sa Manluluwas. Unsa man ang imong makat-onan mahitungod sa pagkamapainubsanon gikan Kaniya? Pag-andam sa pagpaambit og ehemplo diha sa klase.