“Leksyon 22 Materyal sa Pagpangandam sa Klase: Pagpanalipod sa Atong Kaugalingon batok sa Sayop nga mga Doktrina sa Kataposang mga Adlaw,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 22 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 22 Materyal sa Pagpangandam sa Klase
Pagpanalipod sa Atong Kaugalingon batok sa Sayop nga mga Doktrina sa Kataposang mga Adlaw
Si Elder Quentin L. Cook sa Korum sa Napulog Duha ka mga Apostoles nakaobersbar, “Nagpuyo kita sa lisud nga mga panahon. Nagkadako ang kalagmitan sa ‘[pagtawag] sa pagkadautan nga matarung, ug ang pagkamatarung dautan’ [2 Nephi 15:20; tan-awa usab sa Isaias 5:20]” (“Sama sa Barko ug Sama sa Bristol: Pagpakatakus sa Templo—sa Maayo ug sa Lisud nga mga Panahon,” Liahona, Nob. 2015, 40). Uban sa talagsaon nga nag-unang kahibalo [foreknowledge] ug gugma, ang Ginoo mihatag sa Basahon ni Mormon, nga motabang sa pagbutyag sa sayop nga mga pagtulun-an ug mga ideya nga naglabi sa atong panahon. Samtang magtuon ka niini nga materyal, hunahunaa kon unsa nga mga baroganan gikan sa Basahon ni Mormon ang makatabang kanimo nga makaila sa pagpanglingla ug makapanalipod sa kamatuoran.
Seksyon 1
Sa unsang paagi nga ang Basahon ni Mormon makapanalipod kanako batok sa sayop nga mga pagtulun-an sa kalibotan karon?
Si Presidente Ezra Taft Benson ug si Presidente Russell M. Nelson mitudlo sa mosunod mahitungod sa gahom sa Basahon ni Mormon sa pagpanalipod kanato gikan sa sayop nga mga pagtulun-an:
Ang Basahon ni Mormon nagbutyag sa mga kaaway ni Kristo. Kini nagbuntog sa bakak nga mga doktrina. … Kini naglig-on sa mapainubsanong mga sumusunod ni Kristo batok sa dautang mga disenyo, mga taktika, ug mga doktrina sa yawa sa atong panahon. (Mga Pagtulun-an sa mga Presidente sa Simbahan: Ezra Taft Benson [2014], 158)
Ang Basahon ni Mormon mihatag og katin-awan sa pagtulun-an sa Agalon ug mipakita sa mga taktika sa kaaway [tan-awa sa 2 Nephi 26–33]. Ang Basahon ni Mormon nagtudlo og tinuod nga doktrina sa pag-iway sa sayop nga relihiyusong mga tradisyon. (“Ang Basahon ni Mormon: Unsa kaha ang Imong Kinabuhi Kon wala Kini?” Liahona, Nob. 2017, 62)
Mirekord si Nephi og talagsaon nga panagna kabahin sa pagtungha sa Basahon ni Mormon, nga usa ka mahinungdanon nga bahin sa Pagpahiuli sa ebanghelyo ni Jesukristo (tan-awa sa 2 Nephi 27:6–23). Nanagna dayon si Nephi mahitungod sa mini nga mga magtutudlo, binuang nga mga doktrina, ug mga taktika sa yawa nga mopahisalaag sa mga tawo (tan-awa sa 2 Nephi 28).
Pagtuon agi og Pagpangandam alang sa Klase
Basaha ang 2 Nephi 28:7–9, 20–22, 29–30, ug ikonsiderar ang pagmarka sa sayop nga mga pagtulun-an nga giingon ni Nephi nga atong masinati sa kataposang mga adlaw.
Pamalandong agi og Pagpangandam alang sa Klase
Ang inadlaw nga pagtuon sa Basahon ni Mormon modapit sa Espiritu Santo nganhi sa atong mga kinabuhi. Ang Espiritu Santo mao ang labing dako nga tabang sa pag-ila sa kamatuoran gikan sa sayop. Kanus-a ka nakakita og mga ehemplo sa sayop nga mga pagtulun-an nga gipasidaan ni Nephi nga atong masinati sa kataposang mga adlaw? Giunsa nimo pag-ila niini? Unsay imong nahimo aron sa pagpanalipod sa imong kaugalingon batok niini nga sayop nga mga pagtulun-an?
Seksyon 2
Unsaon nako sa pag-andam sa akong kaugalingon batok niadtong kinsa tingali nagtinguha sa paglaglag sa akong hugot nga pagtuo diha ni Jesukristo?
Ang Basahon ni Mormon nagpasidaan batok sa mga anti-kristo. Ang usa ka anti-kristo mao ang “bisan kinsa o bisan unsa nga mahasupak sa tinuod nga ebanghelyo sa laraw sa kaluwasan ug nga sa dayag o sa tinago misupak kang Kristo.” (Giya ngadto sa mga Kasulatan, “Anti-Kristo ,” scriptures.ChurchofJesusChrist.org). Sa mga anti-kristo, si Presidente Russell M. Nelson miingon:
Nahinumdom mo ni Korihor, ang anti-Kristo? Nagsulti og daghang mga bakak mahitungod sa Manluluwas, si Korihor miadto og lain-laing mga dapit hangtud nga gidala siya sa atubangan sa usa ka high priest kinsa nangutana kaniya: “Ngano nga ikaw naglibut-libut aron sa pagtuis sa mga paagi sa Ginoo? Ngano nga ikaw nagtudlo niini nga mga katawhan nga walay Kristo, aron sa pagsumpo sa ilang mga kalipay?” [Alma 30:22].
Bisan unsa nga mosupak ni Kristo o sa Iyang doktrina mobalda sa atong kalipay. Naglakip kana sa mga pilosopiya sa tawo, nga daghan kaayo diha sa internet ug sa mga blog, nga nagbuhat sa unsa gayud ang gibuhat ni Korihor. (“Hingpit nga Kalipay ug Pagsugakod sa Espirituhanong Paagi,” Liahona, Nob. 2016, 83–84)
Irekord ang Imong mga Hunahuna
Aron makaandam sa klase, pagtuon og usa sa mosunod nga mga asoy: (1) Sherem ug Jacob, (2) Nehor ug Gideon, o (3) Korihor ug Alma. (Pahinumdom: Ang katukma nga mga pakisayran sa kasulatan alang niini nga mga tudling gihatag sa mosunod nga mga seksyon.) Ang matag asoy naglangkob sa istorya sa usa ka anti-kristo kinsa mibatok sa Ginoo ug sa Iyang Simbahan ingon man sa usa ka tawo kinsa mitubag uban sa hugot nga pagtuo ni Jesukristo. Samtang ikaw magtuon, isulat ang imong mga tubag sa mosunod nga mga pangutana diha sa imong journal. Tambong sa klase nga andam nga mopaambit sa unsay imong nakat-onan.
Mga Pangutana sa Pagtuon
-
Unsa nga mga taktika ang gigamit niini nga anti-kristo sa paglaglag sa pagtuo sa mga tawo diha kang Jesukristo ug sa Iyang ebanghelyo?
-
Unsa ang pipila ka modernong mga ehemplo sa sayop nga mga ideya nga gitudlo o mga pamaagi nga gigamit sa anti-kristo niini nga asoy? Giunsa pagpakatap ni Satanas kini nga mga ideya sa atong panahon?
-
Unsa ang pipila ka baroganan o mga buhat nga imong nakat-onan gikan sa matinud-anon nga ehemplo sa tawo kinsa miharong sa sayop nga mga mensahe? (Paglista og labing minos tulo.) Sa unsang paagi ang usa ka tawo karon makagamit niini nga mga baroganan ug mga buhat sa pagtubag sa sayop nga mga doktrina ug mga pasangil?
Gamita ang mga kapanguhaan sa ubos samtang ikaw magtuon sa asoy nga imong napili.
Sherem ug Jacob
Basaha ang Jacob 7:1–14 o tan-awa ang video sa Basahon ni Mormon “Si Sherem Milimod kang Kristo (Jacob 7)” hangtod sa oras nga 4:20, ug tubaga ang nag-unang mga pangutana sa pagtuon.
Si Sherem Milimod kang Kristo | Jacob 7
Jacob 7 Si Sherem misangyaw batok sa doktrina ni Kristo ug nangita’g timailhan. Gisilutan siya sa Dios ug namatay human mitug-an sa katawhan sa iyang mga sala.
Ang espirituhanon nga pundasyon ni Jacob usa ka tinubdan sa kalig-on sa pagbuntog sa mga pangangkon ni Sherem (tan-awa sa Jacob 7:5). Basaha ang mosunod nga pamahayag ni Elder Ronald A. Rasband sa Korum sa Napulog Duha ka mga Apostoles, ug hunahunaa kon unsaon nimo nga makasunod sa ehemplo ni Jacob.
Sa dihang mitambag ko og mga indibidwal [kansang pagtuo naglisod], misuhid ko sa mga desisyon nga ilang nahimo sa miaging mga tuig nga midala kanila nga makalimot sa sagrado nga mga kasinatian, nga mahuyang, ug nga magduha-duha. Miawhag ko kanila, sama sa akong pag-awhag kaninyo karon, nga hinumduman, ilabi na gayud sa panahon sa kalisud, ang panahon nga inyong nabati ang Espiritu ug ang inyong pagpamatuod lig-on; hinumdumi ang espirituhanon nga mga pundasyon nga inyong natukod. Mosaad ko kaninyo nga kon inyo kining buhaton, maglikay sa mga butang nga dili mopalig-on sa inyong pagpamatuod o nga nagbugal-bugal sa inyong mga tinuohan, kadtong bililhong mga panahon nga miuswag ang inyong pagpamatuod mobalik sa inyong hunahuna pinaagi sa mapainubsanong pag-ampo ug pagpuasa. Mopasalig ko kaninyo nga mobati kamo pag-usab sa luwas ug nindot nga mga pagbati nga konektado sa ebanghelyo ni Jesukristo. (“Kay Tingali Lamang Unya Mahakalimot Ka,” Liahona, Nob. 2016, 114)
Pagsulat sa imong journal og labing minos usa ka espirituhanon nga kasinatian nga imong mahinumdoman sa usa ka higayon dihang ang imong pagtuo ni Jesukristo o sa Iyang ebanghelyo gihagit.
Nehor ug Gideon
Tun-i ang Alma 1:2–16, ug tubaga ang nag-unang mga pangutana sa pagtuon. Mahimong makatabang ang pagtimaan nga si Nephi mitudlo nga “ang panapi sa mga pari mao nga ang mga tawo mowali ug mopahiluna sa ilang mga kaugalingon ingon og usa ka kahayag ngadto sa kalibutan, nga sila makaangkon og bahandi ug pagdayeg sa kalibutan; apan sila wala magtinguha sa kaayohan sa Zion” (2 Nephi 26:29).
Ngano kaha nga ang sayop nga mga pagtulun-an ni Nehor nahimong ilado taliwala sa ubang mga tawo? Basaha ang mosunod nga paghulagway sa mga taktika sa kaaway gikan ni Presidente Dallin H. Oaks sa Unang Kapangulohan, ug hunahunaa kon sa unsang paagi nga kini adunay kalabotan sa mga pagtulun-an ni Nehor nga girekord sa Alma 1:4.
Si Satanas mao ang bantogang tiglingla, ang amahan sa mga bakak (tan-awa sa Juan 8:44). Dili kini tungod kay mosulti si Satanas og mga bakak lamang. Ang iyang labing epektibong mga bakak mao ang katunga nga mga kamatuoran [half-truths] o mga bakak nga giubanan og kamatuoran. (“Reading Church History” [pakigpulong ngadto sa Church Educational System religious educators, Ago. 16, 1985], 9)
Pagsulat sa imong journal og tubag sa mosunod nga pangutana: Unsaon nako nga makapalambo og mas dako nga kaisog sa pagpili sa unsay husto kaysa unsay ilado apan sayop?
Korihor ug Alma
Basaha ang Alma 30:12–18, 23, 27–28, 32–33, 39–46, ug tubaga ang nag-unang mga pangutana sa pagtuon.
Si Presidente M. Russell Ballard sa Korum sa Napulog Duha ka mga Apostoles mihatag sa mosunod nga tambag ngadto sa mga miyembro sa Simbahan:
Magbantay kita sa mini nga mga propeta ug mini nga mga magtutudlo, mga lalaki ug mga babaye, kinsa mipili sa ilang kaugalingon isip mga tigpamahayag sa mga doktrina sa Simbahan ug kinsa nagtinguha sa pagpakatap sa ilang sayop nga ebanghelyo ug pagdani og mga sumusunod pinaagi sa pagpasiugda og mga komperensiya, mga libro, ug mga journal kansang mga sulod [content] naghagit sa sukaranang mga doktrina sa Simbahan. Pagbantay niadtong kinsa mamulong ug momantala batok sa tinuod nga mga propeta sa Dios ug kinsa aktibong mangabig sa uban nga wala gayoy pagpakabana sa mahangturong kaayohan niadtong ilang giagni. (“Beware of False Prophets and False Teachers,” Ensign, Nob. 1999, 63)
Sa paghatag og pagpamatuod sa kamatuoran, si Alma mihatag ni Korihor og pipila ka ebidensya sa pagkaadunay Dios. Isulat sa imong journal ang mga ebidensya nga imong nakita nga “nagpakita nga adunay Dios” (Alma 30:44). Sa unsa nga mga paagi nga kini nga mga ebidensya makapalig-on sa imong pagtuo ug pagpamatuod sa Dios?