Faamasinoga

Saunia e fetaiai ma le Atua

Pe ua e mafaufau ea pe faapefea e le malamalama i le faamoemoega o le olaga ma le talitonu i le olaga pe a mavae le oti ona tosina ai au filifiliga ma amioga? E faapefea ona aafia lou olaga ona o loo i ai sou malamalama i le fuafuaga a le Tama Faalelagi? I le muai olaga, sa faamalamalama mai ai e Ieova o le a tatou o mai i le lalolagi ina ia tofotofoina ma faamaonia “e vaai pe [tatou te] faia mea uma o soo se mea e poloaiina ai [i tatou] e le Alii [lo tatou] Atua” (Aperaamo 3:25). Ae e leai se tasi e usiusitai i taimi uma i poloaiga a le Atua. O le mafuaaga lena na auina mai ai e le Tama Faalelagi Lona Alo e puapuagatia ma maliu mo i tatou. E ala i le faatuatua ia Iesu Keriso ma le salamo i a tatou agasala, e mafai ai ona tatou maua le alofa mutimutivale, alofa tunoa, ma le faamagaloga a le Atua. O le savali o le talalelei a Iesu Keriso e faapea e mafai ona togiolaina ma faapaiaina i tatou ona o Lona alofa ma le taulaga togiola ma maua ai le agavaa e tutu atu ma le mautinoa i luma o le Atua i le aso o le faamasinoga.

O le a le Faamasinoga?

A mavae le Toetutu, pe a toefuatai o tatou agaga i o tatou tino ola pea, o le a tatou tutu i luma o le nofoa faamasino o le Atua. O le taimi lena o le a fofoga mai ai e le Alii lo tatou taui e faavavau e faavae i a tatou faatinoga, o tatou tulaga, ma manaoga o o tatou loto. E ui o le Atua o le Faamasino sili o tagata uma, e mafai e le Agaga Paia ona taiala i tatou e faia faamasinoga patino e uiga i manatu, tulaga, ma le matafaioi a isi i o tatou olaga (tagai Mataupu Faavae ma Feagaiga 11:12). E avea atili i tatou e pei o Iesu Keriso pe a tatou alolofa atu i isi ma aloese mai le tausalaina o i latou.

Vaaiga aoao i autu: Faamasinoga

O taiala fesootai mo le suesueina o le talalelei: Fuafuaga o le Faaolataga, Toetu, Ola e Faavavau, Faitalia, Usiusitai, Faamagaloga

Vaega 1

O Le A I Ai Se Aso e Te Tu Ai i luma o le Atua ina ia Faamasinoina

O Iesu Keriso o loo fetalai atu i se fafine i tafatafa o le alatele

Ua aoao mai tusitusiga paia e faapea, a mavae le Toetutu, o le a tutu fanau taitasi a le Atua i Ona luma i le aso o le faamasinoga (tagai i le 2 Nifae 9:12–13, 15, 20–22). O se faamaumauga o lou olaga o le a tuuina atu pe a “tatalaina tusi” i lena aso (tagai Faaaliga 20:12–13; Mataupu Faavae ma Feagaiga 128:6–7). O le a faamasinoina i tatou mo o tatou mafaufauga, upu, ma galuega (tagai Mosaea 4:30; Alema 12:14). Ona ua malamalama le Atua i le tele o tulaga faigata o feagai ma tagata taitoatasi i lenei olaga, o le a Ia faamautinoaina ua faamasinoina Ana fanau i a latou galuega ma “e tusa ma manaoga o o latou loto” (Mataupu Faavae ma Feagaiga 137:9). O lenei Faamasinoga Mulimuli o le a fuafua ai le malo o le mamalu ua saunia e a tatou filifiliga mo i tatou ia mautofi i le faavavau—o le malo selesitila, terasitila, po o le telesitila (tagai Mataupu Faavae ma Feagaiga 88:20–32).

O le a faatautaia e le Tama Faalelagi le faamasinoga paia e ala mai i Lona Alo o Iesu Keriso (tagai Ioane 5:21–30). Ua tautino mai foi e le Alii e faapea o nisi o Ana auauna o le a fesoasoani ia te Ia o ni faamasino o fanau a le Atua (tagai Mataio 19:28; 1 Nifae 12:9–10; Mamona 3:18–20).

Mea e mafaufau i ai

E faaopoopo atu i le auauna atu o se Faamasino, o le a avea foi Iesu Keriso ma o tatou Fautua i luma o le Atua le Tama. Faitau le Mataupu Faavae ma Feagaiga 45:3–5, ma manatua o se fautua o “se tasi e aioi atu i le galuega a le isi” (Bible Dictionary, “Advocate”). O le a le mea e agavaa ai Iesu Keriso e aioi atu i le Tama mo oe e fai ma ou Fautua? O le a se mea ua fesoasoani lenei fuaitau ia te oe e malamalama ai e uiga i le Alii?
O le mafaufau e uiga i le Faamasinoga Mulimuli e ono taitai atu ai oe ia lagona le popole po o le lotovaivai. Faitau le Enosa 1:27 ma le Moronae 10:34, ma mafaufau pe aisea o le a maua ai e nisi le filemu ma le olioli i lena aso. Ua faamanatu mai e Elder Gerrit W. Gong ia i tatou: “O le alofa faalelagi ma le tulafono faalelagi, ua tatou nafa ai ma a tatou filifiliga ma o latou taunuuga. Ae o le alofa togiola a lo tatou Faaola e ‘lē i’u ma e faavavau.’ Pe a oo ina tatou saunia e foi mai i le aiga, tusa lava pe ‘o tatou mamao ese,’ ua sauni le Atua ma le mutimuti alofa tele e talileleia i tatou, ma ofoina mai ma le fiafia tele mea silisili ua ia te Ia.” E mafai faapefea e le manatuaina ma le taulai atu i le alofa ma le agaalofa o le Alii ona fesoasoani ia te oe e saunia ai mo le Faamasinoga Mulimuli? Aisea e taua ai foi le manatua o oe e nafa ma au lava filifiliga ma o latou taunuuga? (tagai Mataupu Faavae ma Feagaiga 101:78).

Gaoioiga mo le aoao faatasi ma isi

O Iesu Keriso o le Puluvaga Sili o fanau uma a le Atua (tagai i le 2 Nifae 2:26–28). Maimoa “O Le Puluvaga” (10:44) o se vaega. O lenei vitio e faavae i se savali na tuuina mai e Peresitene Boyd K. Packer. Talanoaina mea ua aoao mai e le talafaatusa a Peresitene Packer ia i tatou e uiga ia Iesu Keriso ma Lana misiona e faafetaiaia ai manaoga o le faamasinotonu ma le alofa mutimutivale. E faapefea ona fesoasoani lenei savali tatou te malamalama atili ai i le matafaioi a Iesu Keriso o lo tatou Faamasino (tagai Moronae 10:34) ma le Fautua (tagai i le Mataupu Faavae ma Feagaiga 29:5)?

Aoao atili

Alema 12:12–15; 3 Nifae 27:23–26; Mamona 3:20; 9:12–14; Mataupu Faavae o le Faatuatua 1:2
James R. Rasband, “Faamautinoaina o se Faamasinoga Amiotonu,” Liahona, Me 2020, 12–14

Vaega 2

O Le Talalelei a Iesu Keriso e Saunia ai Oe e Feiloai ma le Atua

I le aso o le faamasinoga, o le a tatou maua se tofi i se malo o le mamalu. Na aoao mai Peresitene Dallin H. Oaks: “O le malo o le mamalu tatou te maua i le Faamasinoga Mulimuli e fuafua i tulafono tatou te filifili e ola ai i le fuafuaga alofa a lo tatou Tama Faalelagi [tagai Mataupu Faavae ma Feagaiga 88:22–24]. I le fuafuaga o loo i ai malo e tele ina ia mafai ona atofaina i ai Ana fanau i se malo lea e mafai ona latou ‘nonofo ai.’”

O le atoaga o le talalelei a Iesu Keriso o loo i ai tulafono uma tatou te manaomia e mulimuli ai i lenei olaga e mautofi ai i le malo selesitila. A tatou filifili e mulimuli ia Iesu Keriso ma ola e tusa ai ma Lana talalelei, ua tatou saunia e tutu atu ma le le pona i luma o le Atua i le pa faamasino (tagai i le 2 Nifae 9:13–15; 3 Nifae 27:20–21).

Mea e mafaufau i ai

O le salamo o se vaega taua o le saunia mo le Faamasinoga Mulimuli. Faitau le Alema 34:31–35. Aisea e taua ai le aua le faatuai ona salamo? O le a se mea e te lagona o le a fesoasoani ia te oe e “saunia ai e fetaiai ma le Atua”?
Ua faatuina e le Alii ia tulaga faatonuina e fesoasoani e fua ai le saunia faaleagaga o se tagata mo le papatisoga, faauuina i le perisitua, auaunaga i se valaauga, po o le auai i sauniga o le malumalu. O anafea na fesoasoani ai le avanoa e feiloai ai ma se taitai perisitua ia te oe e faateleina ai au taumafaiga patino e ola i le talalelei a Iesu Keriso? Aisea e talafeagai ai ona mafaufau i aso uma o se aso o le faamasinoga?

Gaoioiga mo le aoao faatasi ma isi

O le iloiloina o lou olaga o se auala taua lea e saunia ai mo le Faamasinoga Mulimuli. Valaaulia tagata o lau vaega e faitau le Alema 5:14–26 ma faailoa mai fesili e mafai ona fesoasoani ia i tatou e mafaufau ai i lo tatou tulaga faaleagaga i luma o le Alii. Talanoaina nisi o auala na valaaulia ai e Alema lona nuu e saunia mo le taimi o le a latou feiloai ai ma le Atua. O a auala o le a fesoasoani ai le Faaola ia i tatou ao tatou tauivi e saunia e fetaiai ma le Atua?

Aoao atili

2 Nifae 2:26–28; Mosaea 4:10–12
Dallin H. Oaks, “The Challenge to Become,” Ensign, Nov. 2000, 32-34

Vaega 3

Ua Faatonuina Oe e le Faaola e Faamasino Ma le Amiotonu

Tatou te faia faaiuga i aso uma e faavae i la tatou faamasinoga sili ona lelei. Pe a filifili i le va o le sa’o ma le sese po o le lelei ma le leaga, tatou te manaomia le Agaga Paia e taiala a tatou faaiuga (tagai Mataupu Faavae ma Feagaiga 11:12). O nisi taimi e tatau ona tatou faia ni faaiuga e uiga i isi tagata ma le matafaioi latou te faia i o tatou olaga, e pei o le filifilia o a tatou uo po o o tatou taitoalua. I na tulaga, e tatau ona tatou manatua le faatonuga a le Alii ia, “aua ne’i faamasino atu i le amioletonu, ina ia lē faamasinoina ai outou; ae ia faamasino atu i le faamasinoga amiotonu” (Faalilliuga a Iosefa Samita, Mataio 7:2 [i le Mataio 7:1, vaefaamatalaga a]).

O faitioga, upu leaga, ma mafaufauga le alofa e le talafeagai lava. “Vaai ia e alofa mutimutivale i o outou uso; fai mea tonu, faamasino ma le amiotonu, ma fai mea lelei e le aunoa” (Alema 41:14). I taimi e manaomia ai le faamasinoga i a tatou fegalegaleaiga ma isi, e tatau ona tatou saili e faaalia lo tatou alolofa mo le Atua ma le alofa mo isi (tagai Mataio 22:37–39).

Mea e mafaufau i ai

Na faamalamalama mai e Peresitene Dallin H. Oaks: “E lua ituaiga faamasinoga: faamasinoga mulimuli, lea o loo tapu ona tatou faia, ma faamasinoga e faia i le ogatotonu, lea ua faatonuina i tatou e fai, ae ia faia i luga o mataupu faavae amiotonu.” O a nisi o “mataupu faavae amiotonu” e mafai ona fesoasoani ia te oe e aloese ai mai le faamasinoina o isi po o le faamasino atu ma le amioletonu?

Gaoioiga mo le aoao faatasi ma isi

Faaali atu pe faitau le saunoaga lenei a le Perofeta o Iosefa Samita:

“Matou te [faamoemoe] o le a faaeteete o tatou uso i lagona o le tasi ma le isi, ma savavali i le alofa, ava le tasi i le isi e sili atu nai lo i latou lava, e pei ona manaomia ai e le Alii. …

“Afai o le a outou faateaeseina mai lo outou lotolotoi o upu leaga uma, taumuimui, mafaufauga ma lagona le mautonu: ia outou faamaualalo outou lava, ma atiina ae mataupu faavae uma o le amiomama ma le alofa, ona to’a ai lea i o outou luga faamanuiaga a Ieova, ma o le a outou vaai i aso lelei ma mamalu; o le a i ai le filemu i totonu o o outou faitotoa, ma le manuia i o outou tuaoi.”

Ia talanoaina pe mafai faapefea e a tatou taumafaiga e aloese mai le faamasinoga amioletonu ma le tausalaina o isi ona aumaia le filemu ma faamanuiaga. O anafea na e lagonaina ai le faamanuiaina mo le taumafai e faamasino ma le amiotonu?

Aoao atili

Levitiko 19:15–18; Mataio 7:1–8 (e aofia ai le Faaliliuga a Iosefa Samita i le fuaiupu 1, vaefaamatalagaa, ma i le faaopoopoga i le Tusi Paia); Ioane 7:24 (tagai foi i le Faaliliuga a Iosefa Samita i le vaefaamatalagae)
Russell M. Nelson, “Ua Manaomia i Latou e Faatupuina le Filemu,” Liahona, Me 2023, 98-101.
Dallin H. Oaks, “‘Judge Not and Judging,” Ensign, Aok. 1999, 6-13.
Gregory A. Schwitzer “Atiina Ae o le Faamasinoga Lelei ae Le o le Faamasinoina o Isi,” Liahona, Me 2010, 103–5