Faatomuaga

Na fetalai mai Iesu, “Faaaoao ia te au” (Mataio 11:29). O le aoao i le Faaola ma ana upu moni o se vaega taua lea o le ola ai i lana talalelei. O lou finafinau e sailiili i tusitusiga paia i aso taitasi, o le a fesoasoani e te latalata atu ai ia te ia, ua “tusia ia mea, ina ia talitonu ai outou, o Iesu o le Keriso lava ia, o le Alo o le Atua; ina ia maua ai foi le ola i lona suafa e outou o e talitonu” (Ioane 20:31).

O lenei taiala suesue ua vaevaeina i ni vaega ua faanumeraina e talafeagai ai ma lesona i le Tusi Lesona O le Feagaiga Fou: O Mataupu Faavae o le Talalelei. O vaega taitasi ua saunia ai ni vaega faitau faatulagaina mo le vaiaso ma ni fesili e faalautele ai au suesuega. Atonu e te faaaogaina fesili e faaleleia ai le faatatauga o mau i le tagata, e faatupulaia ai talanoaga faatatau i le talalelei a tagata o le aiga, ma saunia ai e tuuina atu ni fesoasoaniga aoga i talanoaga a le vasega.

O lenei taiala suesue o se risosi taua mo aiga. O vaega taitasi uma o lo o i ai ni fautuaga mo se gaoioiga po o se talanoaga e faaopoopo ai le fiafia i vaega e aoao ai le talalelei i le aiga.

O lo o aofia ai foi i vaega taitasi ni faasologa o mau—o se lisi o mau e faatatau i vaega faitauina. Atonu e te manao e tusia nei lisi i tua o a outou tusitusiga paia. Atonu foi e te manao e faia ni au lava faasologa o mau.

Mo le faailogaina o se faasologa o mau i au tusitusiga paia, ia makaina i au tusitusiga paia le vaega o le mau muamua o lo o i le lisi. I tafatafa o le vaega o le mau muamua lena, ia tusi ai le faasino mau mo le mau lona lua o lo o i le lisi. Sue le mau lona lua, maka, ma tusi ai le faasino mau mo le mau lona tolu. Ia faaauau pea se ia oo ina e makaina le mau mulimuli o lo o i le lisi, ona faamaea lea o lau lisi o mau i lou tusia lea i tafatafa o le mau lena o le faasino mau mo le mau muamua. O le a mafai ona e faaaogaina nei faagasologa o mau e saili vave ai mau o lo o taua i se aoaoga faavae o le talalelei.

O se vaega faaopoopo i le faaiuga o le taiala suesue o lo o aofia ai ni faamatalaga mai perofeta o aso e gata ai i faamanuiaga o le suesue i tusitusiga paia.

Lua te fetufaai ma lou faiaoga o Aoaoga Faavae o le Talalelei le tiutetauave e fesoasoani ai i tagata o le vasega mo le alualu i luma. Ua fetalai mai le Alii e moomia e faiaoga le “talai atu … e ala i le Agaga o le upu moni” ma o i latou e mauaina “le upu moni” e tatau ona “maua e ala i le Agaga moni o le upu moni” (MFF 50:17, 19). Pe a omai i le vasega, ia saunia e fetufaai lagona, tuuina atu fesili, fetufaai ni mea na tutupu, tuuina atu le molimau, ma faalogo ma gauai atu i le faiaoga ma isi tagata o le vasega. Pe a e aoao i mau faitau ma mafaufau loloto i fesili o lo o i lenei taiala suesue, o le a sili atu lou saunia mo le mauaina o le atoatoaga o le saunoaga a le Alii ina ua ia faapea mai: “O le talai atu atoa ma le talia mai, e malamalama le tasi i le tasi, e faamanuiaina ma olioli faatasi i laua uma” (MFF 50:22).